2.6 กปิลสุตฺต (ธมฺมจริยสุตฺต)
- กปิลสุตฺต (ธมฺมจริยสุตฺต)
ธมฺมจริยํ พฺรหฺมจริยํ,
เอตทาหุ วสุตฺตมํ;
ปพฺพชิโตปิ เจ โหติ,
อคารา อนคาริยํ. (1)
โส เจ มุขรชาติโก,
วิเหสาภิรโต มโค;
ชีวิตํ ตสฺส ปาปิโย,
รชํ วฑฺเฒติ อตฺตโน. (2)
กลหาภิรโต ภิกฺขุ,
โมหธมฺเมน อาวุโต;
อกฺขาตมฺปิ น ชานาติ,
ธมฺมํ พุทฺเธน เทสิตํ. (3)
วิเหสํ ภาวิตตฺตานํ,
อวิชฺชาย ปุรกฺขโต;
สํกิเลสํ น ชานาติ,
มคฺคํ นิรยคามินํ. (4)
วินิปาตํ สมาปนฺโน,
คพฺภา คพฺภํ ตมา ตมํ;
ส เว ตาทิสโก ภิกฺขุ,
เปจฺจ ทุกฺขํ นิคจฺฉติ. (5)
คูถกูโป ยถา อสฺส,
สมฺปุณฺโณ คณวสฺสิโก;
โย จ เอวรูโป อสฺส,
ทุพฺพิโสโธ หิ สางฺคโณ. (6)
ยํ เอวรูปํ ชานาถ,
ภิกฺขโว เคหนิสฺสิตํ;
ปาปิจฺฉํ ปาปสงฺกปฺปํ,
ปาปอาจารโคจรํ. (7)
สพฺเพ สมคฺคา หุตฺวาน,
อภินิพฺพชฺชิยาถ นํ;
การณฺฑวํ นิทฺธมถ,
กสมฺพุํ อปกสฺสถ. (8)
ตโต ปลาเป วาเหถ,
อสฺสมเณ สมณมานิเน;
นิทฺธมิตฺวาน ปาปิจฺเฉ,
ปาปอาจารโคจเร. (9)
สุทฺธา สุทฺเธหิ สํวาสํ,
กปฺปยโวฺห ปติสฺสตา;
ตโต สมคฺคา นิปกา,
ทุกฺขสฺสนฺตํ กริสฺสถาติ. (10)
ธมฺมจริยสุตฺตํ ฉฏฺฐํ.