3.1 ปพฺพชฺชาสุตฺต
“ปพฺพชฺชํ กิตฺตยิสฺสามิ,
ยถา ปพฺพชิ จกฺขุมา;
ยถา วีมํสมาโน โส,
ปพฺพชฺชํ สมโรจยิ. (1)
สมฺพาโธยํ ฆราวาโส,
รชสฺสายตนํ อิติ;
อพฺโภกาโสว ปพฺพชฺชา,
อิติ ทิสฺวาน ปพฺพชิ. (2)_
ปพฺพชิตฺวาน กาเยน,
ปาปกมฺมํ วิวชฺชยิ;
วจีทุจฺจริตํ หิตฺวา,
อาชีวํ ปริโสธยิ. (3)
อคมา ราชคหํ พุทฺโธ,
มคธานํ คิริพฺพชํ;
ปิณฺฑาย อภิหาเรสิ,
อากิณฺณวรลกฺขโณ”. (4)
ตมทฺทสา พิมฺพิสาโร,
ปาสาทสฺมิํ ปติฏฺฐิโต;
ทิสฺวา ลกฺขณสมฺปนฺนํ,
อิมมตฺถํ อภาสถ. (5)_
“อิมํ โภนฺโต นิสาเมถ,
อภิรูโป พฺรหา สุจิ;
จรเณน จ สมฺปนฺโน,
ยุคมตฺตญฺจ เปกฺขติ. (6)
โอกฺขิตฺตจกฺขุ สติมา,
นายํ นีจกุลามิว;
ราชทูตาภิธาวนฺตุ,
กุหิํ ภิกฺขุ คมิสฺสติ”. (7)
เต เปสิตา ราชทูตา,
ปิฏฺฐิโต อนุพนฺธิสุํ;
กุหิํ คมิสฺสติ ภิกฺขุ,
กตฺถ วาโส ภวิสฺสติ. (8)
สปทานํ จรมาโน,
คุตฺตทฺวาโร สุสํวุโต;
ขิปฺปํ ปตฺตํ อปูเรสิ,
สมฺปชาโน ปฏิสฺสโต. (9)
ปิณฺฑจารํ จริตฺวาน,
นิกฺขมฺม นครา มุนิ;
ปณฺฑวํ อภิหาเรสิ,
เอตฺถ วาโส ภวิสฺสติ. (10)
ทิสฺวาน วาสูปคตํ,
ตโย ทูตา อุปาวิสุํ;
เตสุ เอโกว อาคนฺตฺวา,
ราชิโน ปฏิเวทยิ. (11)
“เอส ภิกฺขุ มหาราช,
ปณฺฑวสฺส ปุรตฺถโต;
นิสินฺโน พฺยคฺฆุสโภว,
สีโหว คิริคพฺภเร”. (12)
สุตฺวาน ทูตวจนํ,
ภทฺทยาเนน ขตฺติโย;
ตรมานรูโป นิยฺยาสิ,
เยน ปณฺฑวปพฺพโต. (13)
ส ยานภูมิํ ยายิตฺวา,
ยานา โอรุยฺห ขตฺติโย;
ปตฺติโก อุปสงฺกมฺม,
อาสชฺช นํ อุปาวิสิ. (14)
นิสชฺช ราชา สมฺโมทิ,
กถํ สารณียํ ตโต;
กถํ โส วีติสาเรตฺวา,
อิมมตฺถํ อภาสถ. (15)_
“ยุวา จ ทหโร จาสิ,
ปฐมุปฺปตฺติโก สุสุ;
วณฺณาโรเหน สมฺปนฺโน,
ชาติมา วิย ขตฺติโย. (16)
โสภยนฺโต อนีกคฺคํ,
นาคสงฺฆปุรกฺขโต;
ททามิ โภเค ภุญฺชสฺสุ,
ชาติํ อกฺขาหิ ปุจฺฉิโต”. (17)
“อุชุํ ชนปโท ราช,
หิมวนฺตสฺส ปสฺสโต;
ธนวิริเยน สมฺปนฺโน,
โกสเลสุ นิเกติโน. (18)
อาทิจฺจา นาม โคตฺเตน,
สากิยา นาม ชาติยา;
ตมฺหา กุลา ปพฺพชิโตมฺหิ,
น กาเม อภิปตฺถยํ. (19)
กาเมสฺวาทีนวํ ทิสฺวา,
เนกฺขมฺมํ ทฏฺฐุ เขมโต;
ปธานาย คมิสฺสามิ,
เอตฺถ เม รญฺชตี มโน”ติ. (20)
ปพฺพชฺชาสุตฺตํ ปฐมํ.