3.2 ปธานสุตฺต
“ตํ มํ ปธานปหิตตฺตํ,
นทิํ เนรญฺชรํ ปติ;
วิปรกฺกมฺม ฌายนฺตํ,
โยคกฺเขมสฺส ปตฺติยา. (1)
นมุจี กรุณํ วาจํ,
ภาสมาโน อุปาคมิ;
‘กิโส ตฺวมสิ ทุพฺพณฺโณ,
สนฺติเก มรณํ ตว. (2)
สหสฺสภาโค มรณสฺส,
เอกํโส ตว ชีวิตํ;
ชีว โภ ชีวิตํ เสโยฺย,
ชีวํ ปุญฺญานิ กาหสิ. (3)
จรโต จ เต พฺรหฺมจริยํ,
อคฺคิหุตฺตญฺจ ชูหโต;
ปหูตํ จียเต ปุญฺญํ,
กิํ ปธาเนน กาหสิ. (4)
ทุคฺโค มคฺโค ปธานาย,
ทุกฺกโร ทุรภิสมฺภโว’”;
อิมา คาถา ภณํ มาโร,_
อฏฺฐา พุทฺธสฺส สนฺติเก. (5)
ตํ ตถาวาทินํ มารํ,
ภควา เอตทพฺรวิ;
“ปมตฺตพนฺธุ ปาปิม,
เยนตฺเถน อิธาคโต. (6)
อณุมตฺโตปิ ปุญฺเญน,
อตฺโถ มยฺหํ น วิชฺชติ;
เยสญฺจ อตฺโถ ปุญฺเญน,
เต มาโร วตฺตุมรหติ. (7)
อตฺถิ สทฺธา ตถา วิริยํ,
ปญฺญา จ มม วิชฺชติ;
เอวํ มํ ปหิตตฺตมฺปิ,
กิํ ชีวมนุปุจฺฉสิ. (8)
นทีนมปิ โสตานิ,
อยํ วาโต วิโสสเย;
กิญฺจ เม ปหิตตฺตสฺส,
โลหิตํ นุปสุสฺสเย. (9)
โลหิเต สุสฺสมานมฺหิ,
ปิตฺตํ เสมฺหญฺจ สุสฺสติ;
มํเสสุ ขียมาเนสุ,
ภิโยฺย จิตฺตํ ปสีทติ;
ภิโยฺย สติ จ ปญฺญา จ,
สมาธิ มม ติฏฺฐติ. (10)
ตสฺส เมวํ วิหรโต,
ปตฺตสฺสุตฺตมเวทนํ;
กาเมสุ นาเปกฺขเต จิตฺตํ,
ปสฺส สตฺตสฺส สุทฺธตํ. (11)
กามา เต ปฐมา เสนา,
ทุติยา อรติ วุจฺจติ;
ตติยา ขุปฺปิปาสา เต,
จตุตฺถี ตณฺหา ปวุจฺจติ. (12)
ปญฺจมํ ถินมิทฺธํ เต,
ฉฏฺฐา ภีรู ปวุจฺจติ;
สตฺตมี วิจิกิจฺฉา เต,
มกฺโข ถมฺโภ เต อฏฺฐโม. (13)
ลาโภ สิโลโก สกฺกาโร,
มิจฺฉาลทฺโธ จ โย ยโส;
โย จตฺตานํ สมุกฺกํเส,
ปเร จ อวชานติ. (14)
เอสา นมุจิ เต เสนา,
กณฺหสฺสาภิปฺปหารินี;
น นํ อสูโร ชินาติ,
เชตฺวา จ ลภเต สุขํ. (15)
เอส มุญฺชํ ปริหเร,
ธิรตฺถุ มม ชีวิตํ;
สงฺคาเม เม มตํ เสโยฺย,
ยญฺเจ ชีเว ปราชิโต. (16)
ปคาเฬฺหตฺถ น ทิสฺสนฺติ,
เอเก สมณพฺราหฺมณา;
ตญฺจ มคฺคํ น ชานนฺติ,
เยน คจฺฉนฺติ สุพฺพตา. (17)
สมนฺตา ธชินิํ ทิสฺวา,
ยุตฺตํ มารํ สวาหนํ;
ยุทฺธาย ปจฺจุคฺคจฺฉามิ,
มา มํ ฐานา อจาวยิ. (18)
ยํ เต ตํ นปฺปสหติ,
เสนํ โลโก สเทวโก;
ตํ เต ปญฺญาย เภจฺฉามิ,
อามํ ปตฺตํว อสฺมนา. (19)
วสีกริตฺวา สงฺกปฺปํ,
สติญฺจ สูปติฏฺฐิตํ;
รฏฺฐา รฏฺฐํ วิจริสฺสํ,
สาวเก วินยํ ปุถู. (20)
เต อปฺปมตฺตา ปหิตตฺตา,
มม สาสนการกา;
อกามสฺส เต คมิสฺสนฺติ,
ยตฺถ คนฺตฺวา น โสจเร”. (21)
“สตฺต วสฺสานิ ภควนฺตํ,
อนุพนฺธิํ ปทาปทํ;
โอตารํ นาธิคจฺฉิสฺสํ,
สมฺพุทฺธสฺส สตีมโต. (22)
เมทวณฺณํว ปาสาณํ,
วายโส อนุปริยคา;
อเปตฺถ มุทุํ วินฺเทม,
อปิ อสฺสาทนา สิยา. (23)
อลทฺธา ตตฺถ อสฺสาทํ,
วายเสตฺโต อปกฺกมิ;
กาโกว เสลมาสชฺช,
นิพฺพิชฺชาเปม โคตมํ”. (24)
ตสฺส โสกปเรตสฺส,
วีณา กจฺฉา อภสฺสถ;
ตโต โส ทุมฺมโน ยกฺโข,
ตตฺเถวนฺตรธายถาติ. (25)
ปธานสุตฺตํ ทุติยํ.