3.8 สลฺลสุตฺต
อนิมิตฺตมนญฺญาตํ,
มจฺจานํ อิธ ชีวิตํ;
กสิรญฺจ ปริตฺตญฺจ,
ตญฺจ ทุกฺเขน สํยุตํ. (1)
น หิ โส อุปกฺกโม อตฺถิ,
เยน ชาตา น มิยฺยเร;
ชรมฺปิ ปตฺวา มรณํ,
เอวํธมฺมา หิ ปาณิโน. (2)
ผลานมิว ปกฺกานํ,
ปาโต ปตนโต ภยํ;
เอวํ ชาตาน มจฺจานํ,
นิจฺจํ มรณโต ภยํ. (3)
ยถาปิ กุมฺภการสฺส,
กตา มตฺติกภาชนา;
สพฺเพ เภทนปริยนฺตา,
เอวํ มจฺจาน ชีวิตํ. (4)
ทหรา จ มหนฺตา จ,
เย พาลา เย จ ปณฺฑิตา;
สพฺเพ มจฺจุวสํ ยนฺติ,
สพฺเพ มจฺจุปรายณา. (5)
เตสํ มจฺจุปเรตานํ,
คจฺฉตํ ปรโลกโต;
น ปิตา ตายเต ปุตฺตํ,
ญาตี วา ปน ญาตเก. (6)
เปกฺขตํเยว ญาตีนํ,
ปสฺส ลาลปตํ ปุถุ;
เอกเมโกว มจฺจานํ,
โควชฺโฌ วิย นียติ. (7)
เอวมพฺภาหโต โลโก,
มจฺจุนา จ ชราย จ;
ตสฺมา ธีรา น โสจนฺติ,
วิทิตฺวา โลกปริยายํ. (8)
ยสฺส มคฺคํ น ชานาสิ,
อาคตสฺส คตสฺส วา;
อุโภ อนฺเต อสมฺปสฺสํ,_
นิรตฺถํ ปริเทวสิ. (9)
ปริเทวยมาโน เจ,
กิญฺจิทตฺถํ อุทพฺพเห;
สมฺมูโฬฺห หิํสมตฺตานํ,
กยิรา เจ นํ วิจกฺขโณ. (10)
น หิ รุณฺเณน โสเกน,
สนฺติํ ปปฺโปติ เจตโส;
ภิยฺยสฺสุปฺปชฺชเต ทุกฺขํ,
สรีรํ จุปหญฺญติ. (11)
กิโส วิวณฺโณ ภวติ,
หิํสมตฺตานมตฺตนา;
น เตน เปตา ปาเลนฺติ,
นิรตฺถา ปริเทวนา. (12)
โสกมปฺปชหํ ชนฺตุ,
ภิโยฺย ทุกฺขํ นิคจฺฉติ;
อนุตฺถุนนฺโต กาลงฺกตํ,
โสกสฺส วสมนฺวคู. (13)
อญฺเญปิ ปสฺส คมิเน,
ยถากมฺมุปเค นเร;
มจฺจุโน วสมาคมฺม,
ผนฺทนฺเตวิธ ปาณิโน. (14)
เยน เยน หิ มญฺญนฺติ,
ตโต ตํ โหติ อญฺญถา;
เอตาทิโส วินาภาโว,
ปสฺส โลกสฺส ปริยายํ. (15)
อปิ วสฺสสตํ ชีเว,
ภิโยฺย วา ปน มาณโว;
ญาติสงฺฆา วินา โหติ,
ชหาติ อิธ ชีวิตํ. (16)
ตสฺมา อรหโต สุตฺวา,
วิเนยฺย ปริเทวิตํ;
เปตํ กาลงฺกตํ ทิสฺวา,
เนโส ลพฺภา มยา อิติ. (17)
ยถา สรณมาทิตฺตํ,
วารินา ปรินิพฺพเย;
เอวมฺปิ ธีโร สปญฺโญ,
ปณฺฑิโต กุสโล นโร;
ขิปฺปมุปฺปติตํ โสกํ,
วาโต ตูลํว ธํสเย. (18)
ปริเทวํ ปชปฺปญฺจ,
โทมนสฺสญฺจ อตฺตโน;
อตฺตโน สุขเมสาโน,
อพฺพเห สลฺลมตฺตโน. (19)
อพฺพูฬฺหสโลฺล อสิโต,
สนฺติํ ปปฺปุยฺย เจตโส;
สพฺพโสกํ อติกฺกนฺโต,
อโสโก โหติ นิพฺพุโตติ.
สลฺลสุตฺตํ อฏฺฐมํ.