4.10 ปุราเภทสุตฺต
“กถํทสฺสี กถํสีโล,
อุปสนฺโตติ วุจฺจติ;_
ตํ เม โคตม ปพฺรูหิ,
ปุจฺฉิโต อุตฺตมํ นรํ”. (1)
“วีตตโณฺห ปุรา เภทา, (อิติ ภควา)
ปุพฺพมนฺตมนิสฺสิโต;
เวมชฺเฌ นุปสงฺเขโยฺย,
ตสฺส นตฺถิ ปุรกฺขตํ. (2)
อกฺโกธโน อสนฺตาสี,
อวิกตฺถี อกุกฺกุโจ;
มนฺตภาณี อนุทฺธโต,
ส เว วาจายโต มุนิ. (3)
นิราสตฺติ อนาคเต,
อตีตํ นานุโสจติ;
วิเวกทสฺสี ผเสฺสสุ,
ทิฏฺฐีสุ จ น นียติ. (4)
ปติลีโน อกุหโก,
อปิหาลุ อมจฺฉรี;
อปฺปคพฺโภ อเชคุจฺโฉ,
เปสุเณเยฺย จ โน ยุโต. (5)
สาติเยสุ อนสฺสาวี,
อติมาเน จ โน ยุโต;
สโณฺห จ ปฏิภานวา,
น สทฺโธ น วิรชฺชติ. (6)
ลาภกมฺยา น สิกฺขติ,
อลาเภ จ น กุปฺปติ;
อวิรุทฺโธ จ ตณฺหาย,
รเสสุ นานุคิชฺฌติ. (7)
อุเปกฺขโก สทา สโต,_
น โลเก มญฺญเต สมํ;
น วิเสสี น นีเจโยฺย,
ตสฺส โน สนฺติ อุสฺสทา. (8)
ยสฺส นิสฺสยนา นตฺถิ,
ญตฺวา ธมฺมํ อนิสฺสิโต;
ภวาย วิภวาย วา,
ตณฺหา ยสฺส น วิชฺชติ. (9)
ตํ พฺรูมิ อุปสนฺโตติ,
กาเมสุ อนเปกฺขินํ;
คนฺถา ตสฺส น วิชฺชนฺติ,
อตรี โส วิสตฺติกํ. (10)
น ตสฺส ปุตฺตา ปสโว,
เขตฺตํ วตฺถุญฺจ วิชฺชติ;
อตฺตา วาปิ นิรตฺตา วา,
น ตสฺมิํ อุปลพฺภติ. (11)
เยน นํ วชฺชุํ ปุถุชฺชนา,
อโถ สมณพฺราหฺมณา;
ตํ ตสฺส อปุรกฺขตํ,
ตสฺมา วาเทสุ เนชติ. (12)
วีตเคโธ อมจฺฉรี,
น อุเสฺสสุ วทเต มุนิ;
น สเมสุ น โอเมสุ,
กปฺปํ เนติ อกปฺปิโย. (13)
ยสฺส โลเก สกํ นตฺถิ,
อสตา จ น โสจติ;
ธมฺเมสุ จ น คจฺฉติ,
ส เว สนฺโตติ วุจฺจตี”ติ. (14)
ปุราเภทสุตฺตํ ทสมํ.