4.11 กลหวิวาทสุตฺต
“กุโตปหูตา กลหา วิวาทา,
ปริเทวโสกา สหมจฺฉรา จ;
มานาติมานา สหเปสุณา จ,
กุโตปหูตา เต ตทิงฺฆ พฺรูหิ”. (1)
“ปิยปฺปหูตา กลหา วิวาทา,
ปริเทวโสกา สหมจฺฉรา จ;
มานาติมานา สหเปสุณา จ,
มจฺเฉรยุตฺตา กลหา วิวาทา;
วิวาทชาเตสุ จ เปสุณานิ”. (2)
“ปิยา สุ โลกสฺมิํ กุโตนิทานา,
เย จาปิ โลภา วิจรนฺติ โลเก;
อาสา จ นิฏฺฐา จ กุโตนิทานา,
เย สมฺปรายาย นรสฺส โหนฺติ”. (3)
“ฉนฺทานิทานานิ ปิยานิ โลเก,
เย จาปิ โลภา วิจรนฺติ โลเก;
อาสา จ นิฏฺฐา จ อิโตนิทานา,
เย สมฺปรายาย นรสฺส โหนฺติ”. (4)
“ฉนฺโท นุ โลกสฺมิํ กุโตนิทาโน,
วินิจฺฉยา จาปิ กุโตปหูตา;
โกโธ โมสวชฺชญฺจ กถํกถา จ,
เย วาปิ ธมฺมา สมเณน วุตฺตา”. (5)
“สาตํ อสาตนฺติ ยมาหุ โลเก,
ตมูปนิสฺสาย ปโหติ ฉนฺโท;
รูเปสุ ทิสฺวา วิภวํ ภวญฺจ,
วินิจฺฉยํ กุพฺพติ ชนฺตุ โลเก. (6)
โกโธ โมสวชฺชญฺจ กถํกถา จ,
เอเตปิ ธมฺมา ทฺวยเมว สนฺเต;
กถํกถี ญาณปถาย สิกฺเข,
ญตฺวา ปวุตฺตา สมเณน ธมฺมา”. (7)
“สาตํ อสาตญฺจ กุโตนิทานา,
กิสฺมิํ อสนฺเต น ภวนฺติ เหเต;
วิภวํ ภวญฺจาปิ ยเมตมตฺถํ,
เอตํ เม ปพฺรูหิ ยโตนิทานํ”. (8)
“ผสฺสนิทานํ สาตํ อสาตํ,
ผเสฺส อสนฺเต น ภวนฺติ เหเต;
วิภวํ ภวญฺจาปิ ยเมตมตฺถํ,
เอตํ เต ปพฺรูมิ อิโตนิทานํ”. (9)
“ผโสฺส นุ โลกสฺมิ กุโตนิทาโน,
ปริคฺคหา จาปิ กุโตปหูตา;
กิสฺมิํ อสนฺเต น มมตฺตมตฺถิ,
กิสฺมิํ วิภูเต น ผุสนฺติ ผสฺสา”. (10)
“นามญฺจ รูปญฺจ ปฏิจฺจ ผโสฺส,
อิจฺฉานิทานานิ ปริคฺคหานิ;_
อิจฺฉายสนฺตฺยา น มมตฺตมตฺถิ,_
รูเป วิภูเต น ผุสนฺติ ผสฺสา”. (11)
“กถํ สเมตสฺส วิโภติ รูปํ,
สุขํ ทุขญฺจาปิ กถํ วิโภติ;
เอตํ เม ปพฺรูหิ ยถา วิโภติ,
ตํ ชานิยามาติ เม มโน อหุ”. (12)
“น สญฺญสญฺญี น วิสญฺญสญฺญี,
โนปิ อสญฺญี น วิภูตสญฺญี;
เอวํ สเมตสฺส วิโภติ รูปํ,
สญฺญานิทานา หิ ปปญฺจสงฺขา”. (13)
“ยํ ตํ อปุจฺฉิมฺห อกิตฺตยี โน,
อญฺญํ ตํ ปุจฺฉาม ตทิงฺฆ พฺรูหิ;
เอตฺตาวตคฺคํ นุ วทนฺติ เหเก,
ยกฺขสฺส สุทฺธิํ อิธ ปณฺฑิตาเส;
อุทาหุ อญฺญมฺปิ วทนฺติ เอตฺโต”. (14)_
“เอตฺตาวตคฺคมฺปิ วทนฺติ เหเก,
ยกฺขสฺส สุทฺธิํ อิธ ปณฺฑิตาเส;
เตสํ ปเนเก สมยํ วทนฺติ,
อนุปาทิเสเส กุสลา วทานา. (15)
เอเต จ ญตฺวา อุปนิสฺสิตาติ,
ญตฺวา มุนี นิสฺสเย โส วิมํสี;
ญตฺวา วิมุตฺโต น วิวาทเมติ,
ภวาภวาย น สเมติ ธีโร”ติ. (16)
กลหวิวาทสุตฺตํ เอกาทสมํ.