4.12 จูฬพฺยูหสุตฺต
“สกํสกํทิฏฺฐิปริพฺพสานา,
วิคฺคยฺห นานา กุสลา วทนฺติ;
โย เอวํ ชานาติ ส เวทิ ธมฺมํ,
อิทํ ปฏิกฺโกสมเกวลี โส. (1)_
เอวมฺปิ วิคฺคยฺห วิวาทยนฺติ,
พาโล ปโร อกฺกุสโลติ จาหุ;
สจฺโจ นุ วาโท กตโม อิเมสํ,
สพฺเพว หีเม กุสลาวทานา”. (2)
“ปรสฺส เจ ธมฺมมนานุชานํ,
พาโลมโก โหติ นิหีนปญฺโญ;
สพฺเพว พาลา สุนิหีนปญฺญา,
สพฺเพวิเม ทิฏฺฐิปริพฺพสานา. (3)
สนฺทิฏฺฐิยา เจว น วีวทาตา,
สํสุทฺธปญฺญา กุสลา มุตีมา;
น เตสํ โกจิ ปริหีนปญฺโญ,
ทิฏฺฐี หิ เตสมฺปิ ตถา สมตฺตา. (4)
น วาหเมตํ ตถิยนฺติ พฺรูมิ,
ยมาหุ พาลา มิถุ อญฺญมญฺญํ;
สกํ สกํ ทิฏฺฐิมกํสุ สจฺจํ,
ตสฺมา หิ พาโลติ ปรํ ทหนฺติ”. (5)
“ยมาหุ สจฺจํ ตถิยนฺติ เอเก,
ตมาหุ อญฺเญ ตุจฺฉํ มุสาติ;
เอวมฺปิ วิคยฺห วิวาทยนฺติ,
กสฺมา น เอกํ สมณา วทนฺติ”. (6)
“เอกญฺหิ สจฺจํ น ทุตียมตฺถิ,
ยสฺมิํ ปชา โน วิวเท ปชานํ;
นานา เต สจฺจานิ สยํ ถุนนฺติ,
ตสฺมา น เอกํ สมณา วทนฺติ”. (7)
“กสฺมา นุ สจฺจานิ วทนฺติ นานา,
ปวาทิยาเส กุสลาวทานา;
สจฺจานิ สุตานิ พหูนิ นานา,
อุทาหุ เต ตกฺกมนุสฺสรนฺติ”. (8)_
“น เหว สจฺจานิ พหูนิ นานา,
อญฺญตฺร สญฺญาย นิจฺจานิ โลเก;
ตกฺกญฺจ ทิฏฺฐีสุ ปกปฺปยิตฺวา,
สจฺจํ มุสาติ ทฺวยธมฺมมาหุ. (9)
ทิฏฺเฐ สุเต สีลวเต มุเต วา,
เอเต จ นิสฺสาย วิมานทสฺสี;
วินิจฺฉเย ฐตฺวา ปหสฺสมาโน,
พาโล ปโร อกฺกุสโลติ จาห. (10)
เยเนว พาโลติ ปรํ ทหาติ,
เตนาตุมานํ กุสโลติ จาห;
สยมตฺตนา โส กุสลาวทาโน,
อญฺญํ วิมาเนติ ตเทว ปาว. (11)
อติสารทิฏฺฐิยา โส สมตฺโต,
มาเนน มตฺโต ปริปุณฺณมานี;
สยเมว สามํ มนสาภิสิตฺโต,
ทิฏฺฐี หิ สา ตสฺส ตถา สมตฺตา. (12)
ปรสฺส เจ หิ วจสา นิหีโน,
ตุโม สหา โหติ นิหีนปญฺโญ;
อถ เจ สยํ เวทคู โหติ ธีโร,
น โกจิ พาโล สมเณสุ อตฺถิ. (13)
อญฺญํ อิโต ยาภิวทนฺติ ธมฺมํ,
อปรทฺธา สุทฺธิมเกวลี เต;
เอวมฺปิ ติตฺถฺยา ปุถุโส วทนฺติ,
สนฺทิฏฺฐิราเคน หิ เตภิรตฺตา. (14)
อิเธว สุทฺธิํ อิติ วาทยนฺติ,_
นาญฺเญสุ ธมฺเมสุ วิสุทฺธิมาหุ;
เอวมฺปิ ติตฺถฺยา ปุถุโส นิวิฏฺฐา,
สกายเน ตตฺถ ทฬฺหํ วทานา. (15)
สกายเน วาปิ ทฬฺหํ วทาโน,
กเมตฺถ พาโลติ ปรํ ทเหยฺย;
สยํว โส เมธคมาวเหยฺย,
ปรํ วทํ พาลมสุทฺธิธมฺมํ. (16)
วินิจฺฉเย ฐตฺวา สยํ ปมาย,
อุทฺธํส โลกสฺมิํ วิวาทเมติ;_
หิตฺวาน สพฺพานิ วินิจฺฉยานิ,
น เมธคํ กุพฺพติ ชนฺตุ โลเก”ติ. (17)
จูฬพฺยูหสุตฺตํ ทฺวาทสมํ.