4.13 มหาพฺยูหสุตฺต
“เย เกจิเม ทิฏฺฐิปริพฺพสานา,
อิทเมว สจฺจนฺติ วิวาทยนฺติ;_
สพฺเพว เต นินฺทมนฺวานยนฺติ,
อโถ ปสํสมฺปิ ลภนฺติ ตตฺถ”. (1)
“อปฺปญฺหิ เอตํ น อลํ สมาย,
ทุเว วิวาทสฺส ผลานิ พฺรูมิ;
เอตมฺปิ ทิสฺวา น วิวาทเยถ,
เขมาภิปสฺสํ อวิวาทภูมิํ”. (2)
“ยา กาจิมา สมฺมุติโย ปุถุชฺชา,
สพฺพาว เอตา น อุเปติ วิทฺวา;
อนูปโย โส อุปยํ กิเมยฺย,
ทิฏฺเฐ สุเต ขนฺติมกุพฺพมาโน”. (3)
“สีลุตฺตมา สญฺญเมนาหุ สุทฺธิํ,
วตํ สมาทาย อุปฏฺฐิตาเส;
อิเธว สิกฺเขม อถสฺส สุทฺธิํ,_
ภวูปนีตา กุสลาวทานา. (4)
สเจ จุโต สีลวตโต โหติ,
ปเวธตี กมฺม วิราธยิตฺวา;
ปชปฺปตี ปตฺถยตี จ สุทฺธิํ,
สตฺถาว หีโน ปวสํ ฆรมฺหา. (5)
สีลพฺพตํ วาปิ ปหาย สพฺพํ,
กมฺมญฺจ สาวชฺชนวชฺชเมตํ;
สุทฺธิํ อสุทฺธินฺติ อปตฺถยาโน,
วิรโต จเร สนฺติมนุคฺคหาย. (6)
ตมูปนิสฺสาย ชิคุจฺฉิตํ วา,
อถ วาปิ ทิฏฺฐํ ว สุตํ มุตํ วา;
อุทฺธํสรา สุทฺธิมนุตฺถุนนฺติ,_
อวีตตณฺหาเส ภวาภเวสุ. (7)
ปตฺถยมานสฺส หิ ชปฺปิตานิ,
ปเวธิตํ วาปิ ปกปฺปิเตสุ;
จุตูปปาโต อิธ ยสฺส นตฺถิ,
ส เกน เวเธยฺย กุหิํ ว ชปฺเป”. (8)
“ยมาหุ ธมฺมํ ปรมนฺติ เอเก,
ตเมว หีนนฺติ ปนาหุ อญฺเญ;
สจฺโจ นุ วาโท กตโม อิเมสํ,
สพฺเพว หีเม กุสลาวทานา”. (9)
“สกญฺหิ ธมฺมํ ปริปุณฺณมาหุ,
อญฺญสฺส ธมฺมํ ปน หีนมาหุ;
เอวมฺปิ วิคฺคยฺห วิวาทยนฺติ,
สกํ สกํ สมฺมุติมาหุ สจฺจํ. (10)
ปรสฺส เจ วมฺภยิเตน หีโน,
น โกจิ ธมฺเมสุ วิเสสิ อสฺส;
ปุถู หิ อญฺญสฺส วทนฺติ ธมฺมํ,
นิหีนโต สมฺหิ ทฬฺหํ วทานา. (11)
สทฺธมฺมปูชาปิ เนสํ ตเถว,
ยถา ปสํสนฺติ สกายนานิ;
สพฺเพว วาทา ตถิยา ภเวยฺยุํ,
สุทฺธี หิ เนสํ ปจฺจตฺตเมว. (12)
น พฺราหฺมณสฺส ปรเนยฺยมตฺถิ,
ธมฺเมสุ นิจฺเฉยฺย สมุคฺคหีตํ;
ตสฺมา วิวาทานิ อุปาติวตฺโต,
น หิ เสฏฺฐโต ปสฺสติ ธมฺมมญฺญํ. (13)
ชานามิ ปสฺสามิ ตเถว เอตํ,
ทิฏฺฐิยา เอเก ปจฺเจนฺติ สุทฺธิํ;
อทฺทกฺขิ เจ กิญฺหิ ตุมสฺส เตน,
อติสิตฺวา อญฺเญน วทนฺติ สุทฺธิํ. (14)
ปสฺสํ นโร ทกฺขติ นามรูปํ,
ทิสฺวาน วา ญสฺสติ ตานิเมว;
กามํ พหุํ ปสฺสตุ อปฺปกํ วา,
น หิ เตน สุทฺธิํ กุสลา วทนฺติ. (15)
นิวิสฺสวาที น หิ สุพฺพินาโย,
ปกปฺปิตํ ทิฏฺฐิ ปุรกฺขราโน;
ยํ นิสฺสิโต ตตฺถ สุภํ วทาโน,
สุทฺธิํ วโท ตตฺถ ตถทฺทสา โส. (16)
น พฺราหฺมโณ กปฺปมุเปติ สงฺขา,
น ทิฏฺฐิสารี นปิ ญาณพนฺธุ;
ญตฺวา จ โส สมฺมุติโย ปุถุชฺชา,
อุเปกฺขตี อุคฺคหณนฺติ มญฺเญ. (17)_
วิสฺสชฺช คนฺถานิ มุนีธ โลเก,
วิวาทชาเตสุ น วคฺคสารี;
สนฺโต อสนฺเตสุ อุเปกฺขโก โส,
อนุคฺคโห อุคฺคหณนฺติ มญฺเญ. (18)
ปุพฺพาสเว หิตฺวา นเว อกุพฺพํ,
น ฉนฺทคู โนปิ นิวิสฺสวาที;
ส วิปฺปมุตฺโต ทิฏฺฐิคเตหิ ธีโร,
น ลิปฺปติ โลเก อนตฺตครหี. (19)
ส สพฺพธมฺเมสุ วิเสนิภูโต,
ยํ กิญฺจิ ทิฏฺฐํ ว สุตํ มุตํ วา;
ส ปนฺนภาโร มุนิ วิปฺปมุตฺโต,
น กปฺปิโย นูปรโต น ปตฺถิโย”ติ. (20)
มหาพฺยูหสุตฺตํ เตรสมํ.