4.14 ตุวฏกสุตฺต
“ปุจฺฉามิ ตํ อาทิจฺจพนฺธุ,
วิเวกํ สนฺติปทญฺจ มเหสิ;
กถํ ทิสฺวา นิพฺพาติ ภิกฺขุ,
อนุปาทิยาโน โลกสฺมิํ กิญฺจิ”. (1)
“มูลํ ปปญฺจสงฺขาย, (อิติ ภควา)
มนฺตา อสฺมีติ สพฺพมุปรุนฺเธ;
ยา กาจิ ตณฺหา อชฺฌตฺตํ,
ตาสํ วินยา สทา สโต สิกฺเข. (2)
ยํ กิญฺจิ ธมฺมมภิชญฺญา,
อชฺฌตฺตํ อถ วาปิ พหิทฺธา;
น เตน ถามํ กุพฺเพถ,
น หิ สา นิพฺพุติ สตํ วุตฺตา. (3)
เสโยฺย น เตน มญฺเญยฺย,
นีเจโยฺย อถ วาปิ สริกฺโข;
ผุฏฺโฐ อเนกรูเปหิ,
นาตุมานํ วิกปฺปยํ ติฏฺเฐ. (4)
อชฺฌตฺตเมวุปสเม,
น อญฺญโต ภิกฺขุ สนฺติเมเสยฺย;
อชฺฌตฺตํ อุปสนฺตสฺส,
นตฺถิ อตฺตา กุโต นิรตฺตา วา. (5)
มชฺเฌ ยถา สมุทฺทสฺส,
อูมิ โน ชายตี ฐิโต โหติ;
เอวํ ฐิโต อเนชสฺส,
อุสฺสทํ ภิกฺขุ น กเรยฺย กุหิญฺจิ”. (6)_
“อกิตฺตยี วิวฏจกฺขุ,
สกฺขิธมฺมํ ปริสฺสยวินยํ;
ปฏิปทํ วเทหิ ภทฺทนฺเต,
ปาติโมกฺขํ อถ วาปิ สมาธิํ”. (7)
“จกฺขูหิ เนว โลลสฺส,
คามกถาย อาวรเย โสตํ;
รเส จ นานุคิชฺเฌยฺย,
น จ มมาเยถ กิญฺจิ โลกสฺมิํ. (8)
ผเสฺสน ยทา ผุฏฺฐสฺส,
ปริเทวํ ภิกฺขุ น กเรยฺย กุหิญฺจิ;
ภวญฺจ นาภิชปฺเปยฺย,
เภรเวสุ จ น สมฺปเวเธยฺย. (9)
อนฺนานมโถ ปานานํ,
ขาทนียานํ อโถปิ วตฺถานํ;
ลทฺธา น สนฺนิธิํ กยิรา,
น จ ปริตฺตเส ตานิ อลภมาโน. (10)
ฌายี น ปาทโลลสฺส,
วิรเม กุกฺกุจฺจา นปฺปมชฺเชยฺย;
อถาสเนสุ สยเนสุ,
อปฺปสทฺเทสุ ภิกฺขุ วิหเรยฺย. (11)
นิทฺทํ น พหุลีกเรยฺย,
ชาคริยํ ภเชยฺย อาตาปี;
ตนฺทิํ มายํ หสฺสํ ขิฑฺฑํ,
เมถุนํ วิปฺปชเห สวิภูสํ. (12)
อาถพฺพณํ สุปินํ ลกฺขณํ,
โน วิทเห อโถปิ นกฺขตฺตํ;
วิรุตญฺจ คพฺภกรณํ,
ติกิจฺฉํ มามโก น เสเวยฺย. (13)
นินฺทาย นปฺปเวเธยฺย,
น อุณฺณเมยฺย ปสํสิโต ภิกฺขุ;
โลภํ สห มจฺฉริเยน,
โกธํ เปสุณิยญฺจ ปนุเทยฺย. (14)
กยวิกฺกเย น ติฏฺเฐยฺย,
อุปวาทํ ภิกฺขุ น กเรยฺย กุหิญฺจิ;_
คาเม จ นาภิสชฺเชยฺย,
ลาภกมฺยา ชนํ น ลปเยยฺย. (15)
น จ กตฺถิตา สิยา ภิกฺขุ,
น จ วาจํ ปยุตฺตํ ภาเสยฺย;
ปาคพฺภิยํ น สิกฺเขยฺย,
กถํ วิคฺคาหิกํ น กถเยยฺย. (16)
โมสวชฺเช น นีเยถ,
สมฺปชาโน สฐานิ น กยิรา;
อถ ชีวิเตน ปญฺญาย,
สีลพฺพเตน นาญฺญมติมญฺเญ. (17)
สุตฺวา รุสิโต พหุํ วาจํ,
สมณานํ วา ปุถุชนานํ;
ผรุเสน เน น ปฏิวชฺชา,
น หิ สนฺโต ปฏิเสนิกโรนฺติ. (18)
เอตญฺจ ธมฺมมญฺญาย,
วิจินํ ภิกฺขุ สทา สโต สิกฺเข;
สนฺตีติ นิพฺพุติํ ญตฺวา,
สาสเน โคตมสฺส น ปมชฺเชยฺย. (19)
อภิภู หิ โส อนภิภูโต,
สกฺขิธมฺมมนีติหมทสฺสี;
ตสฺมา หิ ตสฺส ภควโต สาสเน,
อปฺปมตฺโต สทา นมสฺสมนุสิกฺเข”ติ. (20)
ตุวฏกสุตฺตํ จุทฺทสมํ.