4.15 อตฺตทณฺฑสุตฺต
“อตฺตทณฺฑา ภยํ ชาตํ,
ชนํ ปสฺสถ เมธคํ;
สํเวคํ กิตฺตยิสฺสามิ,
ยถา สํวิชิตํ มยา. (1)
ผนฺทมานํ ปชํ ทิสฺวา,
มจฺเฉ อปฺโปทเก ยถา;
อญฺญมญฺเญหิ พฺยารุทฺเธ,
ทิสฺวา มํ ภยมาวิสิ. (2)
สมนฺตมสาโร โลโก,
ทิสา สพฺพา สเมริตา;
อิจฺฉํ ภวนมตฺตโน,_
นาทฺทสาสิํ อโนสิตํ. (3)
โอสาเน เตฺวว พฺยารุทฺเธ,
ทิสฺวา เม อรตี อหุ;
อเถตฺถ สลฺลมทฺทกฺขิํ,
ทุทฺทสํ หทยนิสฺสิตํ. (4)
เยน สเลฺลน โอติณฺโณ,
ทิสา สพฺพา วิธาวติ;
ตเมว สลฺลมพฺพุยฺห,
น ธาวติ น สีทติ. (5)
ตตฺถ สิกฺขานุคียนฺติ,
ยานิ โลเก คธิตานิ;
น เตสุ ปสุโต สิยา,
นิพฺพิชฺฌ สพฺพโส กาเม;
สิกฺเข นิพฺพานมตฺตโน. (6)
สจฺโจ สิยา อปฺปคพฺโภ,
อมาโย ริตฺตเปสุโณ;
อกฺโกธโน โลภปาปํ,
เววิจฺฉํ วิตเร มุนิ. (7)
นิทฺทํ ตนฺทิํ สเห ถีนํ,
ปมาเทน น สํวเส;
อติมาเน น ติฏฺเฐยฺย,
นิพฺพานมนโส นโร. (8)
โมสวชฺเช น นีเยถ,
รูเป เสฺนหํ น กุพฺพเย;
มานญฺจ ปริชาเนยฺย,
สาหสา วิรโต จเร. (9)
ปุราณํ นาภินนฺเทยฺย,
นเว ขนฺติํ น กุพฺพเย;
หิยฺยมาเน น โสเจยฺย,
อากาสํ น สิโต สิยา. (10)
เคธํ พฺรูมิ มโหโฆติ,
อาชวํ พฺรูมิ ชปฺปนํ;
อารมฺมณํ ปกปฺปนํ,
กามปงฺโก ทุรจฺจโย. (11)
สจฺจา อโวกฺกมฺม มุนิ,
ถเล ติฏฺฐติ พฺราหฺมโณ;
สพฺพํ โส ปฏินิสฺสชฺช,
ส เว สนฺโตติ วุจฺจติ. (12)
ส เว วิทฺวา ส เวทคู,
ญตฺวา ธมฺมํ อนิสฺสิโต;
สมฺมา โส โลเก อิริยาโน,
น ปิเหตีธ กสฺสจิ. (13)
โยธ กาเม อจฺจตริ,
สงฺคํ โลเก ทุรจฺจยํ;
น โส โสจติ นาชฺเฌติ,
ฉินฺนโสโต อพนฺธโน. (14)
ยํ ปุพฺเพ ตํ วิโสเสหิ,
ปจฺฉา เต มาหุ กิญฺจนํ;
มชฺเฌ เจ โน คเหสฺสสิ,
อุปสนฺโต จริสฺสสิ. (15)_
สพฺพโส นามรูปสฺมิํ,
ยสฺส นตฺถิ มมายิตํ;
อสตา จ น โสจติ,
ส เว โลเก น ชียติ. (16)
ยสฺส นตฺถิ อิทํ เมติ,
ปเรสํ วาปิ กิญฺจนํ;
มมตฺตํ โส อสํวินฺทํ,
นตฺถิ เมติ น โสจติ. (17)
อนิฏฺฐุรี อนนุคิทฺโธ,
อเนโช สพฺพธี สโม;
ตมานิสํสํ ปพฺรูมิ,
ปุจฺฉิโต อวิกมฺปินํ. (18)
อเนชสฺส วิชานโต,
นตฺถิ กาจิ นิสงฺขติ;
วิรโต โส วิยารพฺภา,
เขมํ ปสฺสติ สพฺพธิ. (19)
น สเมสุ น โอเมสุ,
น อุเสฺสสุ วทเต มุนิ;
สนฺโต โส วีตมจฺฉโร,
นาเทติ น นิรสฺสตี”ติ. (20)
อตฺตทณฺฑสุตฺตํ ปนฺนรสมํ.