4.4 สุทฺธฏฺฐกสุตฺต
ปสฺสามิ สุทฺธํ ปรมํ อโรคํ,
ทิฏฺเฐน สํสุทฺธิ นรสฺส โหติ;
เอวาภิชานํ ปรมนฺติ ญตฺวา,
สุทฺธานุปสฺสีติ ปจฺเจติ ญาณํ. (1)
ทิฏฺเฐน เจ สุทฺธิ นรสฺส โหติ,
ญาเณน วา โส ปชหาติ ทุกฺขํ;
อญฺเญน โส สุชฺฌติ โสปธีโก,
ทิฏฺฐี หิ นํ ปาว ตถา วทานํ. (2)
น พฺราหฺมโณ อญฺญโต สุทฺธิมาห,
ทิฏฺเฐ สุเต สีลวเต มุเต วา;
ปุญฺเญ จ ปาเป จ อนูปลิตฺโต,
อตฺตญฺชโห นยิธ ปกุพฺพมาโน. (3)
ปุริมํ ปหาย อปรํ สิตาเส,
เอชานุคา เต น ตรนฺติ สงฺคํ;
เต อุคฺคหายนฺติ นิรสฺสชนฺติ,
กปีว สาขํ ปมุญฺจํ คหายํ. (4)
สยํ สมาทาย วตานิ ชนฺตุ,
อุจฺจาวจํ คจฺฉติ สญฺญสตฺโต;_
วิทฺวา จ เวเทหิ สเมจฺจ ธมฺมํ,
น อุจฺจาวจํ คจฺฉติ ภูริปญฺโญ. (5)
ส สพฺพธมฺเมสุ วิเสนิภูโต,
ยํ กิญฺจิ ทิฏฺฐํ ว สุตํ มุตํ วา;
ตเมว ทสฺสิํ วิวฏํ จรนฺตํ,
เกนีธ โลกสฺมิ วิกปฺปเยยฺย. (6)
น กปฺปยนฺติ น ปุเรกฺขโรนฺติ,
อจฺจนฺตสุทฺธีติ น เต วทนฺติ;
อาทานคนฺถํ คถิตํ วิสชฺช,
อาสํ น กุพฺพนฺติ กุหิญฺจิ โลเก. (7)
สีมาติโค พฺราหฺมโณ ตสฺส นตฺถิ,
ญตฺวา ว ทิสฺวา ว สมุคฺคหีตํ;
น ราคราคี น วิราครตฺโต,
ตสฺสีธ นตฺถิ ปรมุคฺคหีตนฺติ. (8)
สุทฺธฏฺฐกสุตฺตํ จตุตฺถํ.