4.6 ชราสุตฺต
อปฺปํ วต ชีวิตํ อิทํ,
โอรํ วสฺสสตาปิ มิยฺยติ;
โย เจปิ อติจฺจ ชีวติ,
อถ โข โส ชรสาปิ มิยฺยติ. (1)
โสจนฺติ ชนา มมายิเต,
น หิ สนฺติ นิจฺจา ปริคฺคหา;
วินาภาวสนฺตเมวิทํ,
อิติ ทิสฺวา นาคารมาวเส. (2)_
มรเณนปิ ตํ ปหียติ,
ยํ ปุริโส มมิทนฺติ มญฺญติ;
เอตมฺปิ วิทิตฺวา ปณฺฑิโต,
น มมตฺตาย นเมถ มามโก. (3)
สุปิเนน ยถาปิ สงฺคตํ,
ปฏิพุทฺโธ ปุริโส น ปสฺสติ;
เอวมฺปิ ปิยายิตํ ชนํ,
เปตํ กาลงฺกตํ น ปสฺสติ. (4)
ทิฏฺฐาปิ สุตาปิ เต ชนา,
เยสํ นามมิทํ ปวุจฺจติ;
นามํเยวาวสิสฺสติ,
อกฺเขยฺยํ เปตสฺส ชนฺตุโน. (5)
โสกปฺปริเทวมจฺฉรํ,
น ชหนฺติ คิทฺธา มมายิเต;
ตสฺมา มุนโย ปริคฺคหํ,
หิตฺวา อจริํสุ เขมทสฺสิโน. (6)
ปติลีนจรสฺส ภิกฺขุโน,
ภชมานสฺส วิวิตฺตมาสนํ;
สามคฺคิยมาหุ ตสฺส ตํ,
โย อตฺตานํ ภวเน น ทสฺสเย. (7)
สพฺพตฺถ มุนี อนิสฺสิโต,
น ปิยํ กุพฺพติ โนปิ อปฺปิยํ;
ตสฺมิํ ปริเทวมจฺฉรํ,
ปณฺเณ วาริ ยถา น ลิมฺปติ. (8)
อุทพินฺทุ ยถาปิ โปกฺขเร,_
ปทุเม วาริ ยถา น ลิมฺปติ;
เอวํ มุนิ โนปลิมฺปติ,
ยทิทํ ทิฏฺฐสุตํ มุเตสุ วา. (9)
โธโน น หิ เตน มญฺญติ,
ยทิทํ ทิฏฺฐสุตํ มุเตสุ วา;
นาญฺเญน วิสุทฺธิมิจฺฉติ,
น หิ โส รชฺชติ โน วิรชฺชตีติ. (10)
ชราสุตฺตํ ฉฏฺฐํ.