4.7 ติสฺสเมตฺเตยฺยสุตฺต
“เมถุนมนุยุตฺตสฺส, (อิจฺจายสฺมา ติโสฺส เมตฺเตโยฺย)
วิฆาตํ พฺรูหิ มาริส;
สุตฺวาน ตว สาสนํ,
วิเวเก สิกฺขิสฺสามเส”. (1)
“เมถุนมนุยุตฺตสฺส, (เมตฺเตยฺยาติ ภควา)
มุสฺสเต วาปิ สาสนํ;
มิจฺฉา จ ปฏิปชฺชติ,
เอตํ ตสฺมิํ อนาริยํ. (2)
เอโก ปุพฺเพ จริตฺวาน,
เมถุนํ โย นิเสวติ;
ยานํ ภนฺตํว ตํ โลเก,
หีนมาหุ ปุถุชฺชนํ. (3)
ยโส กิตฺติ จ ยา ปุพฺเพ,
หายเต วาปิ ตสฺส สา;
เอตมฺปิ ทิสฺวา สิกฺเขถ,
เมถุนํ วิปฺปหาตเว. (4)
สงฺกปฺเปหิ ปเรโต โส,
กปโณ วิย ฌายติ;
สุตฺวา ปเรสํ นิคฺโฆสํ,
มงฺกุ โหติ ตถาวิโธ. (5)
อถ สตฺถานิ กุรุเต,
ปรวาเทหิ โจทิโต;
เอส ขฺวสฺส มหาเคโธ,
โมสวชฺชํ ปคาหติ. (6)
ปณฺฑิโตติ สมญฺญาโต,
เอกจริยํ อธิฏฺฐิโต;
อถาปิ เมถุเน ยุตฺโต,
มนฺโทว ปริกิสฺสติ. (7)
เอตมาทีนวํ ญตฺวา,
มุนิ ปุพฺพาปเร อิธ;
เอกจริยํ ทฬฺหํ กยิรา,
น นิเสเวถ เมถุนํ. (8)
วิเวกญฺเญว สิกฺเขถ,
เอตํ อริยานมุตฺตมํ;
น เตน เสฏฺโฐ มญฺเญถ,
ส เว นิพฺพานสนฺติเก. (9)
ริตฺตสฺส มุนิโน จรโต,
กาเมสุ อนเปกฺขิโน;
โอฆติณฺณสฺส ปิหยนฺติ,
กาเมสุ คธิตา ปชา”ติ. (10)
ติสฺสเมตฺเตยฺยสุตฺตํ สตฺตมํ.