4.9 มาคณฺฑิยสุตฺต
“ทิสฺวาน ตณฺหํ อรติํ รคญฺจ,
นาโหสิ ฉนฺโท อปิ เมถุนสฺมิํ;
กิเมวิทํ มุตฺตกรีสปุณฺณํ,
ปาทาปิ นํ สมฺผุสิตุํ น อิจฺเฉ”. (1)
“เอตาทิสญฺเจ รตนํ น อิจฺฉสิ,
นาริํ นรินฺเทหิ พหูหิ ปตฺถิตํ;
ทิฏฺฐิคตํ สีลวตํ นุ ชีวิตํ,
ภวูปปตฺติญฺจ วเทสิ กีทิสํ”. (2)
“อิทํ วทามีติ น ตสฺส โหติ, (มาคณฺฑิยาติ ภควา)
ธมฺเมสุ นิจฺเฉยฺย สมุคฺคหีตํ;
ปสฺสญฺจ ทิฏฺฐีสุ อนุคฺคหาย,
อชฺฌตฺตสนฺติํ ปจินํ อทสฺสํ”. (3)
“วินิจฺฉยา ยานิ ปกปฺปิตานิ, (อิติ มาคณฺฑิโย)
เต เว มุนี พฺรูสิ อนุคฺคหาย;
อชฺฌตฺตสนฺตีติ ยเมตมตฺถํ,
กถํ นุ ธีเรหิ ปเวทิตํ ตํ”. (4)
“น ทิฏฺฐิยา น สุติยา น ญาเณน, (มาคณฺฑิยาติ ภควา)
สีลพฺพเตนาปิ น สุทฺธิมาห;
อทิฏฺฐิยา อสฺสุติยา อญาณา,
อสีลตา อพฺพตา โนปิ เตน;
เอเต จ นิสฺสชฺช อนุคฺคหาย,
สนฺโต อนิสฺสาย ภวํ น ชปฺเป”. (5)
“โน เจ กิร ทิฏฺฐิยา น สุติยา น ญาเณน, (อิติ มาคณฺฑิโย)
สีลพฺพเตนาปิ น สุทฺธิมาห;
อทิฏฺฐิยา อสฺสุติยา อญาณา,
อสีลตา อพฺพตา โนปิ เตน;
มญฺญามหํ โมมุหเมว ธมฺมํ,
ทิฏฺฐิยา เอเก ปจฺเจนฺติ สุทฺธิํ”. (6)
“ทิฏฺฐญฺจ นิสฺสาย อนุปุจฺฉมาโน, (มาคณฺฑิยาติ ภควา)
สมุคฺคหีเตสุ ปโมหมาคา;
อิโต จ นาทฺทกฺขิ อณุมฺปิ สญฺญํ,_
ตสฺมา ตุวํ โมมุหโต ทหาสิ. (7)
สโม วิเสสี อุท วา นิหีโน,
โย มญฺญติ โส วิวเทถ เตน;
ตีสุ วิธาสุ อวิกมฺปมาโน,
สโม วิเสสีติ น ตสฺส โหติ. (8)
สจฺจนฺติ โส พฺราหฺมโณ กิํ วเทยฺย,
มุสาติ วา โส วิวเทถ เกน;
ยสฺมิํ สมํ วิสมํ วาปิ นตฺถิ,
ส เกน วาทํ ปฏิสํยุเชยฺย. (9)
โอกํ ปหาย อนิเกตสารี,
คาเม อกุพฺพํ มุนิ สนฺถวานิ;
กาเมหิ ริตฺโต อปุรกฺขราโน,
กถํ น วิคฺคยฺห ชเนน กยิรา. (10)
เยหิ วิวิตฺโต วิจเรยฺย โลเก,
น ตานิ อุคฺคยฺห วเทยฺย นาโค;
ชลมฺพุชํ กณฺฑกวาริชํ ยถา,
ชเลน ปงฺเกน จนูปลิตฺตํ;
เอวํ มุนี สนฺติวาโท อคิทฺโธ,
กาเม จ โลเก จ อนูปลิตฺโต. (11)
น เวทคู ทิฏฺฐิยายโก น มุติยา,
ส มานเมติ น หิ ตมฺมโย โส;
น กมฺมุนา โนปิ สุเตน เนโยฺย,
อนูปนีโต ส นิเวสเนสุ. (12)
สญฺญาวิรตฺตสฺส น สนฺติ คนฺถา,
ปญฺญาวิมุตฺตสฺส น สนฺติ โมหา;
สญฺญญฺจ ทิฏฺฐิญฺจ เย อคฺคเหสุํ,
เต ฆฏฺฏยนฺตา วิจรนฺติ โลเก”ติ. (13)
มาคณฺฑิยสุตฺตํ นวมํ.