5.5 โธตกมาณวปุจฺฉา
“ปุจฺฉามิ ตํ ภควา พฺรูหิ เมตํ, (อิจฺจายสฺมา โธตโก)
วาจาภิกงฺขามิ มเหสิ ตุยฺหํ;
ตว สุตฺวาน นิคฺโฆสํ,
สิกฺเข นิพฺพานมตฺตโน”. (1)
“เตนหาตปฺปํ กโรหิ, (โธตกาติ ภควา)
อิเธว นิปโก สโต;_
อิโต สุตฺวาน นิคฺโฆสํ,_
สิกฺเข นิพฺพานมตฺตโน”. (2)
“ปสฺสามหํ เทวมนุสฺสโลเก,
อกิญฺจนํ พฺราหฺมณมิริยมานํ;
ตํ ตํ นมสฺสามิ สมนฺตจกฺขุ,
ปมุญฺจ มํ สกฺก กถํกถาหิ”. (3)
“นาหํ สหิสฺสามิ ปโมจนาย,
กถํกถิํ โธตก กญฺจิ โลเก;
ธมฺมญฺจ เสฏฺฐํ อภิชานมาโน,
เอวํ ตุวํ โอฆมิมํ ตเรสิ”. (4)
“อนุสาส พฺรเหฺม กรุณายมาโน,
วิเวกธมฺมํ ยมหํ วิชญฺญํ;
ยถาหํ อากาโสว อพฺยาปชฺชมาโน,
อิเธว สนฺโต อสิโต จเรยฺยํ”. (5)_
“กิตฺตยิสฺสามิ เต สนฺติํ, (โธตกาติ ภควา)
ทิฏฺเฐ ธมฺเม อนีติหํ;
ยํ วิทิตฺวา สโต จรํ,
ตเร โลเก วิสตฺติกํ”. (6)
“ตญฺจาหํ อภินนฺทามิ,
มเหสิ สนฺติมุตฺตมํ;
ยํ วิทิตฺวา สโต จรํ,
ตเร โลเก วิสตฺติกํ”. (7)
“ยํ กิญฺจิ สมฺปชานาสิ, (โธตกาติ ภควา)
อุทฺธํ อโธ ติริยญฺจาปิ มชฺเฌ;_
เอตํ วิทิตฺวา สงฺโคติ โลเก,
ภวาภวาย มากาสิ ตณฺหนฺ”ติ. (8)
โธตกมาณวปุจฺฉา ปญฺจมี.