ปารายนานุคีติคาถา
“ปารายนมนุคายิสฺสํ, (อิจฺจายสฺมา ปิงฺคิโย)
ยถาทฺทกฺขิ ตถากฺขาสิ;
วิมโล ภูริเมธโส,
นิกฺกาโม นิพฺพโน นาโค;
กิสฺส เหตุ มุสา ภเณ. (1)
ปหีนมลโมหสฺส,
มานมกฺขปฺปหายิโน;
หนฺทาหํ กิตฺตยิสฺสามิ,
คิรํ วณฺณูปสญฺหิตํ. (2)
ตโมนุโท พุทฺโธ สมนฺตจกฺขุ,
โลกนฺตคู สพฺพภวาติวตฺโต;
อนาสโว สพฺพทุกฺขปฺปหีโน,
สจฺจวฺหโย พฺรเหฺม อุปาสิโต เม. (3)
ทิโช ยถา กุพฺพนกํ ปหาย,
พหุปฺผลํ กานนมาวเสยฺย;
เอวมฺปหํ อปฺปทเสฺส ปหาย,
มโหทธิํ หํโสริว อชฺฌปตฺโต. (4)
เย เม ปุพฺเพ วิยากํสุ,
หุรํ โคตมสาสนา;
อิจฺจาสิ อิติ ภวิสฺสติ,_
สพฺพํ ตํ อิติหีติหํ;
สพฺพํ ตํ ตกฺกวฑฺฒนํ. (5)
เอโก ตมนุทาสิโน,
ชุติมา โส ปภงฺกโร;
โคตโม ภูริปญฺญาโณ,
โคตโม ภูริเมธโส. (6)
โย เม ธมฺมมเทเสสิ,
สนฺทิฏฺฐิกมกาลิกํ;
ตณฺหกฺขยมนีติกํ,
ยสฺส นตฺถิ อุปมา กฺวจิ”. (7)
“กิํ นุ ตมฺหา วิปฺปวสสิ,
มุหุตฺตมปิ ปิงฺคิย;
โคตมา ภูริปญฺญาณา,
โคตมา ภูริเมธสา. (8)
โย เต ธมฺมมเทเสสิ,
สนฺทิฏฺฐิกมกาลิกํ;
ตณฺหกฺขยมนีติกํ,
ยสฺส นตฺถิ อุปมา กฺวจิ”. (9)
“นาหํ ตมฺหา วิปฺปวสามิ,
มุหุตฺตมปิ พฺราหฺมณ;
โคตมา ภูริปญฺญาณา,
โคตมา ภูริเมธสา. (10)
โย เม ธมฺมมเทเสสิ,
สนฺทิฏฺฐิกมกาลิกํ;
ตณฺหกฺขยมนีติกํ,
ยสฺส นตฺถิ อุปมา กฺวจิ. (11)
ปสฺสามิ นํ มนสา จกฺขุนาว,
รตฺตินฺทิวํ พฺราหฺมณ อปฺปมตฺโต;
นมสฺสมาโน วิวเสมิ รตฺติํ,
เตเนว มญฺญามิ อวิปฺปวาสํ. (12)
สทฺธา จ ปีติ จ มโน สติ จ,
นาเปนฺติเม โคตมสาสนมฺหา;
ยํ ยํ ทิสํ วชติ ภูริปญฺโญ,
ส เตน เตเนว นโตหมสฺมิ. (13)
ชิณฺณสฺส เม ทุพฺพลถามกสฺส,
เตเนว กาโย น ปเลติ ตตฺถ;
สํกปฺปยนฺตาย วชามิ นิจฺจํ,
มโน หิ เม พฺราหฺมณ เตน ยุตฺโต. (14)
ปงฺเก สยาโน ปริผนฺทมาโน,
ทีปา ทีปํ อุปปฺลวิํ;
อถทฺทสาสิํ สมฺพุทฺธํ,
โอฆติณฺณมนาสวํ”. (15)
“ยถา อหู วกฺกลิ มุตฺตสทฺโธ,
ภทฺราวุโธ อาฬวิโคตโม จ;
เอวเมวํ ตฺวมฺปิ ปมุญฺจสฺสุ สทฺธํ,
คมิสฺสสิ ตฺวํ ปิงฺคิย มจฺจุเธยฺยสฺส ปารํ”. ((16))
“เอส ภิโยฺย ปสีทามิ,
สุตฺวาน มุนิโน วโจ;
วิวฏฺฏจฺฉโท สมฺพุทฺโธ,
อขิโล ปฏิภานวา. (17)
อธิเทเว อภิญฺญาย,
สพฺพํ เวทิ วโรวรํ;
ปญฺหานนฺตกโร สตฺถา,
กงฺขีนํ ปฏิชานตํ. (18)
อสํหีรํ อสํกุปฺปํ,
ยสฺส นตฺถิ อุปมา กฺวจิ;
อทฺธา คมิสฺสามิ น เมตฺถ กงฺขา,
เอวํ มํ ธาเรหิ อธิมุตฺตจิตฺตนฺ”ติ. (19)
ปารายนวคฺโค ปญฺจโม.
สุตฺตุทฺทานํ
อุรโค ธนิโยปิ จ,_
ขคฺควิสาโณ กสิ จ;
จุนฺโท ภโว ปุนเทว,
วสโล จ กรณียญฺจ;
เหมวโต อถ ยกฺโข,
วิชยสุตฺตํ มุนิสุตฺตวรนฺติ.
ปฐมกฏฺฐวโร วรวคฺโค,
ทฺวาทสสุตฺตธโร สุวิภตฺโต;
เทสิโต จกฺขุมตา วิมเลน,
สุยฺยติ วคฺควโร อุรโคติ.
รตนามคนฺโธ หิริมงฺคลนาโม,
สุจิโลมกปิโล จ พฺราหฺมณธมฺโม;
นาวา กิํสีเลาฏฺฐหโน จ,
ราหุโล จ ปุนปิ วงฺคีโส.
สมฺมาปริพฺพาชนีโยปิ เจตฺถ,
ธมฺมิกสุตฺตวโร สุวิภตฺโต;
จุทฺทสสุตฺตธโร ทุติยมฺหิ,
จูฬกวคฺควโรติ ตมาหุ.
ปพฺพชฺชปธานสุภาสิตนาโม,
ปูรฬาโส ปุนเทว มาโฆ จ;
สภิยํ เกณิยเมว สลฺลนาโม,
วาเสฏฺฐวโร กาลิโกปิ จ.
นาลกสุตฺตวโร สุวิภตฺโต,
ตํ อนุปสฺสี ตถา ปุนเทว;
ทฺวาทสสุตฺตธโร ตติยมฺหิ,
สุยฺยติ วคฺควโร มหานาโม.
กามคุหฏฺฐกทุฏฺฐกนามา,
สุทฺธวโร ปรมฏฺฐกนาโม;
ชรา เมตฺติยวโร สุวิภตฺโต,
ปสูรมาคณฺฑิยา ปุราเภโท.
กลหวิวาโท อุโภ วิยุหา จ,
ตุวฏกอตฺตทณฺฑสาริปุตฺตา;
โสฬสสุตฺตธโร จตุตฺถมฺหิ,
อฏฺฐกวคฺควโรติ ตมาหุ.
มคเธ ชนปเท รมณีเย,
เทสวเร กตปุญฺญนิเวเส;
ปาสาณกเจติยวเร สุวิภตฺเต,
วสิ ภควา คณเสฏฺโฐ.
อุภยวาสมาคติยมฺหิ,_
ทฺวาทสโยชนิยา ปริสาย;
โสฬสพฺราหฺมณานํ กิร ปุฏฺโฐ,
ปุจฺฉาย โสฬสปญฺหกมฺมิยา;
นิปฺปกาสยิ ธมฺมมทาสิ.
อตฺถปกาสกพฺยญฺชนปุณฺณํ,
ธมฺมมเทเสสิ ปรเขมชนิยํ;
โลกหิตาย ชิโน ทฺวิปทคฺโค,
สุตฺตวรํ พหุธมฺมวิจิตฺรํ;
สพฺพกิเลสปโมจนเหตุํ,
เทสยิ สุตฺตวรํ ทฺวิปทคฺโค.
พฺยญฺชนมตฺถปทํ สมยุตฺตํ,
อกฺขรสญฺญิตโอปมคาฬฺหํ;
โลกวิจารณญาณปภคฺคํ,
เทสยิ สุตฺตวรํ ทฺวิปทคฺโค.
ราคมเล อมลํ วิมลคฺคํ,
โทสมเล อมลํ วิมลคฺคํ;
โมหมเล อมลํ วิมลคฺคํ,
โลกวิจารณญาณปภคฺคํ;
เทสยิ สุตฺตวรํ ทฺวิปทคฺโค.
เกฺลสมเล อมลํ วิมลคฺคํ,
ทุจฺจริตมเล อมลํ วิมลคฺคํ;
โลกวิจารณญาณปภคฺคํ,
เทสยิ สุตฺตวรํ ทฺวิปทคฺโค.
อาสวพนฺธนโยคากิเลสํ,
นีวรณานิ จ ตีณิ มลานิ;
ตสฺส กิเลสปโมจนเหตุํ,
เทสยิ สุตฺตวรํ ทฺวิปทคฺโค.
นิมฺมลสพฺพกิเลสปนูทํ,
ราควิราคมเนชมโสกํ;
สนฺตปณีตสุทุทฺทสธมฺมํ,
เทสยิ สุตฺตวรํ ทฺวิปทคฺโค.
ราคญฺจ โทสกมภญฺชิตสนฺตํ,
โยนิจตุคฺคติปญฺจวิญฺญาณํ;
ตณฺหารตจฺฉทนตาณลตาปโมกฺขํ,
เทสยิ สุตฺตวรํ ทฺวิปทคฺโค.
คมฺภีรทุทฺทสสณฺหนิปุณํ,
ปณฺฑิตเวทนิยํ นิปุณตฺถํ;
โลกวิจารณญาณปภคฺคํ,
เทสยิ สุตฺตวรํ ทฺวิปทคฺโค.
นวงฺคกุสุมมาลคีเวยฺยํ,
อินฺทฺริยฌานวิโมกฺขวิภตฺตํ;_
อฏฺฐงฺคมคฺคธรํ วรยานํ,
เทสยิ สุตฺตวรํ ทฺวิปทคฺโค.
โสมุปมํ วิมลํ ปริสุทฺธํ,
อณฺณวมูปมรตนสุจิตฺตํ;
ปุปฺผสมํ รวิมูปมเตชํ,
เทสยิ สุตฺตวรํ ทฺวิปทคฺโค.
เขมสิวํ สุขสีตลสนฺตํ,
มจฺจุตตาณปรํ ปรมตฺถํ;
ตสฺส สุนิพฺพุตทสฺสนเหตุํ,
เทสยิ สุตฺตวรํ ทฺวิปทคฺโคติ.
สุตฺตนิปาตปาฬิ สมตฺตา.