5.1.6 นทีกสฺสปตฺเถรคาถา
340.
597
“อตฺถาย วต เม พุทฺโธ,
นทิํ เนรญฺชรํ อคา;
ยสฺสาหํ ธมฺมํ สุตฺวาน,
มิจฺฉาทิฏฺฐิํ วิวชฺชยิํ.
341.
598
ยชิํ อุจฺจาวเจ ยญฺเญ,
อคฺคิหุตฺตํ ชุหิํ อหํ;
‘เอสา สุทฺธี’ติ มญฺญนฺโต,
อนฺธภูโต ปุถุชฺชโน.
342.
599
ทิฏฺฐิคหนปกฺขนฺโท,
ปรามาเสน โมหิโต;
อสุทฺธิํ มญฺญิสํ สุทฺธิํ,
อนฺธภูโต อวิทฺทสุ.
343.
600
มิจฺฉาทิฏฺฐิ ปหีนา เม,
ภวา สพฺเพ ปทาลิตา;
ชุหามิ ทกฺขิเณยฺยคฺคิํ,
นมสฺสามิ ตถาคตํ.
344.
601
โมหา สพฺเพ ปหีนา เม,
ภวตณฺหา ปทาลิตา;
วิกฺขีโณ ชาติสํสาโร,
นตฺถิ ทานิ ปุนพฺภโว”ติ.
602
… นทีกสฺสโป เถโร… .