6.1.4 กุลฺลตฺเถรคาถา
393.
664
“กุโลฺล สิวถิกํ คนฺตฺวา,
อทฺทส อิตฺถิมุชฺฌิตํ;
อปวิทฺธํ สุสานสฺมิํ,
ขชฺชนฺติํ กิมิหี ผุฏํ.
394.
665
อาตุรํ อสุจิํ ปูติํ,
ปสฺส กุลฺล สมุสฺสยํ;
อุคฺฆรนฺตํ ปคฺฆรนฺตํ,_
พาลานํ อภินนฺทิตํ.
395.
666
ธมฺมาทาสํ คเหตฺวาน,
ญาณทสฺสนปตฺติยา;
ปจฺจเวกฺขิํ อิมํ กายํ,
ตุจฺฉํ สนฺตรพาหิรํ.
396.
667
ยถา อิทํ ตถา เอตํ,
ยถา เอตํ ตถา อิทํ;
ยถา อโธ ตถา อุทฺธํ,
ยถา อุทฺธํ ตถา อโธ.
397.
668
ยถา ทิวา ตถา รตฺติํ,
ยถา รตฺติํ ตถา ทิวา;
ยถา ปุเร ตถา ปจฺฉา,
ยถา ปจฺฉา ตถา ปุเร.
398.
669
ปญฺจงฺคิเกน ตุริเยน,
น รตี โหติ ตาทิสี;
ยถา เอกคฺคจิตฺตสฺส,
สมฺมา ธมฺมํ วิปสฺสโต”ติ.
670
… กุโลฺล เถโร… .