6.1.8 มิคชาลตฺเถรคาถา
417.
692
“สุเทสิโต จกฺขุมตา,
พุทฺเธนาทิจฺจพนฺธุนา;
สพฺพสํโยชนาตีโต,
สพฺพวฏฺฏวินาสโน.
418.
693
นิยฺยานิโก อุตฺตรโณ,
ตณฺหามูลวิโสสโน;
วิสมูลํ อาฆาตนํ,
เฉตฺวา ปาเปติ นิพฺพุติํ.
419.
694
อญฺญาณมูลเภทาย,
กมฺมยนฺตวิฆาฏโน;
วิญฺญาณานํ ปริคฺคเห,
ญาณวชิรนิปาตโน.
420.
695
เวทนานํ วิญฺญาปโน,
อุปาทานปฺปโมจโน;_
ภวํ องฺคารกาสุํว,
ญาเณน อนุปสฺสโน.
421.
696
มหารโส สุคมฺภีโร,
ชรามจฺจุนิวารโณ;
อริโย อฏฺฐงฺคิโก มคฺโค,
ทุกฺขูปสมโน สิโว.
422.
697
กมฺมํ กมฺมนฺติ ญตฺวาน,
วิปากญฺจ วิปากโต;
ปฏิจฺจุปฺปนฺนธมฺมานํ,
ยถาวาโลกทสฺสโน;
มหาเขมงฺคโม สนฺโต,
ปริโยสานภทฺทโก”ติ.
698
… มิคชาโล เถโร… .