7.1.3 ภทฺทตฺเถรคาถา
473.
760
“เอกปุตฺโต อหํ อาสิํ,
ปิโย มาตุ ปิโย ปิตุ;
พหูหิ วตจริยาหิ,
ลทฺโธ อายาจนาหิ จ.
474.
761
เต จ มํ อนุกมฺปาย,
อตฺถกามา หิเตสิโน;
อุโภ ปิตา จ มาตา จ,_
พุทฺธสฺส อุปนามยุํ.
475.
762
‘กิจฺฉา ลทฺโธ อยํ ปุตฺโต,
สุขุมาโล สุเขธิโต;
อิมํ ททาม เต นาถ,_
ชินสฺส ปริจารกํ’.
476.
763
สตฺถา จ มํ ปฏิคฺคยฺห,
อานนฺทํ เอตทพฺรวิ;
‘ปพฺพาเชหิ อิมํ ขิปฺปํ,
เหสฺสตฺยาชานิโย อยํ’.
477.
764
ปพฺพาเชตฺวาน มํ สตฺถา,
วิหารํ ปาวิสี ชิโน;
อโนคฺคตสฺมิํ สูริยสฺมิํ,
ตโต จิตฺตํ วิมุจฺจิ เม.
478.
765
ตโต สตฺถา นิรากตฺวา,
ปฏิสลฺลานวุฏฺฐิโต;
‘เอหิ ภทฺทา’ติ มํ อาห,
สา เม อาสูปสมฺปทา.
479.
766
ชาติยา สตฺตวเสฺสน,
ลทฺธา เม อุปสมฺปทา;
ติโสฺส วิชฺชา อนุปฺปตฺตา,
อโห ธมฺมสุธมฺมตา”ติ.
767
… ภทฺโท เถโร… .