7.1.5 สรภงฺคตฺเถรคาถา
“สเร หตฺเถหิ ภญฺชิตฺวา,
กตฺวาน กุฏิมจฺฉิสํ;
เตน เม สรภงฺโคติ,
นามํ สมฺมุติยา อหุ.
น มยฺหํ กปฺปเต อชฺช,
สเร หตฺเถหิ ภญฺชิตุํ;
สิกฺขาปทา โน ปญฺญตฺตา,
โคตเมน ยสสฺสินา.
สกลํ สมตฺตํ โรคํ,
สรภงฺโค นาทฺทสํ ปุพฺเพ;
โสยํ โรโค ทิฏฺโฐ,
วจนกเรนาติเทวสฺส.
เยเนว มคฺเคน คโต วิปสฺสี,
เยเนว มคฺเคน สิขี จ เวสฺสภู;
กกุสนฺธโกณาคมโน จ กสฺสโป,
เตนญฺชเสน อคมาสิ โคตโม.
วีตตณฺหา อนาทานา,
สตฺต พุทฺธา ขโยคธา;
เยหายํ เทสิโต ธมฺโม,
ธมฺมภูเตหิ ตาทิภิ.
จตฺตาริ อริยสจฺจานิ,
อนุกมฺปาย ปาณินํ;
ทุกฺขํ สมุทโย มคฺโค,
นิโรโธ ทุกฺขสงฺขโย.
ยสฺมิํ นิวตฺตเต ทุกฺขํ,
สํสารสฺมิํ อนนฺตกํ;
เภทา อิมสฺส กายสฺส,
ชีวิตสฺส จ สงฺขยา;
อญฺโญ ปุนพฺภโว นตฺถิ,
สุวิมุตฺโตมฺหิ สพฺพธี”ติ.
… สรภงฺโค เถโร… .
สตฺตกนิปาโต นิฏฺฐิโต.
ตตฺรุทฺทานํ
สุนฺทรสมุทฺโท เถโร,
เถโร ลกุณฺฑภทฺทิโย;
ภทฺโท เถโร จ โสปาโก,
สรภงฺโค มหาอิสิ;
สตฺตเก ปญฺจกา เถรา,
คาถาโย ปญฺจติํสตีติ.