12.1 ปุณฺณาเถรีคาถา
“อุทหารี อหํ สีเต,
สทา อุทกโมตริํ;
อยฺยานํ ทณฺฑภยภีตา,
วาจาโทสภยฏฺฏิตา.
กสฺส พฺราหฺมณ ตฺวํ ภีโต,
สทา อุทกโมตริ;
เวธมาเนหิ คตฺเตหิ,
สีตํ เวทยเส ภุสํ”.
“ชานนฺตี วต มํ โภติ,
ปุณฺณิเก ปริปุจฺฉสิ;
กโรนฺตํ กุสลํ กมฺมํ,
รุนฺธนฺตํ กตปาปกํ.
โย จ วุฑฺโฒ ทหโร วา,
ปาปกมฺมํ ปกุพฺพติ;
ทกาภิเสจนา โสปิ,
ปาปกมฺมา ปมุจฺจติ”.
“โก นุ เต อิทมกฺขาสิ,
อชานนฺตสฺส อชานโก;
ทกาภิเสจนา นาม,
ปาปกมฺมา ปมุจฺจติ.
สคฺคํ นูน คมิสฺสนฺติ,
สพฺเพ มณฺฑูกกจฺฉปา;
นาคา จ สุสุมารา จ,
เย จญฺเญ อุทเก จรา.
โอรพฺภิกา สูกริกา,
มจฺฉิกา มิคพนฺธกา;
โจรา จ วชฺฌฆาตา จ,
เย จญฺเญ ปาปกมฺมิโน;
ทกาภิเสจนา เตปิ,
ปาปกมฺมา ปมุจฺจเร.
สเจ อิมา นทิโย เต,
ปาปํ ปุพฺเพ กตํ วหุํ;
ปุญฺญมฺปิมา วเหยฺยุํ เต,
เตน ตฺวํ ปริพาหิโร.
ยสฺส พฺราหฺมณ ตฺวํ ภีโต,
สทา อุทกโมตริ;
ตเมว พฺรเหฺม มา กาสิ,
มา เต สีตํ ฉวิํ หเน”.
“กุมฺมคฺคปฏิปนฺนํ มํ,
อริยมคฺคํ สมานยิ;
ทกาภิเสจนา โภติ,
อิมํ สาฏํ ททามิ เต”._
“ตุเยฺหว สาฏโก โหตุ,
นาหมิจฺฉามิ สาฏกํ;
สเจ ภายสิ ทุกฺขสฺส,
สเจ เต ทุกฺขมปฺปิยํ.
มากาสิ ปาปกํ กมฺมํ,
อาวิ วา ยทิ วา รโห;
สเจ จ ปาปกํ กมฺมํ,
กริสฺสสิ กโรสิ วา.
น เต ทุกฺขา ปมุตฺยตฺถิ,
อุเปจฺจาปิ ปลายโต;_
สเจ ภายสิ ทุกฺขสฺส,
สเจ เต ทุกฺขมปฺปิยํ.
อุเปหิ สรณํ พุทฺธํ,_
ธมฺมํ สํฆญฺจ ตาทินํ;
สมาทิยาหิ สีลานิ,
ตํ เต อตฺถาย เหหิติ”.
“อุเปมิ สรณํ พุทฺธํ,
ธมฺมํ สํฆญฺจ ตาทินํ;
สมาทิยามิ สีลานิ,
ตํ เม อตฺถาย เหหิติ.
พฺรหฺมพนฺธุ ปุเร อาสิํ,
อชฺชมฺหิ สจฺจพฺราหฺมโณ;
เตวิชฺโช เวทสมฺปนฺโน,
โสตฺติโย จมฺหิ นฺหาตโก”ติ.
… ปุณฺณา เถรี… .
โสฬสกนิปาโต นิฏฺฐิโต.