5.8 โสณาเถรีคาถา
102.
151
“ทส ปุตฺเต วิชายิตฺวา,
อสฺมิํ รูปสมุสฺสเย;
ตโตหํ ทุพฺพลา ชิณฺณา,
ภิกฺขุนิํ อุปสงฺกมิํ.
103.
152
สา เม ธมฺมมเทเสสิ,
ขนฺธายตนธาตุโย;
ตสฺสา ธมฺมํ สุณิตฺวาน,
เกเส เฉตฺวาน ปพฺพชิํ.
104.
153
ตสฺสา เม สิกฺขมานาย,
ทิพฺพจกฺขุ วิโสธิตํ;
ปุพฺเพนิวาสํ ชานามิ,
ยตฺถ เม วุสิตํ ปุเร.
105.
154
อนิมิตฺตญฺจ ภาเวมิ,
เอกคฺคา สุสมาหิตา;
อนนฺตราวิโมกฺขาสิํ,
อนุปาทาย นิพฺพุตา.
106.
155
ปญฺจกฺขนฺธา ปริญฺญาตา,
ติฏฺฐนฺติ ฉินฺนมูลกา;
ธิ ตวตฺถุ ชเร ชมฺเม,
นตฺถิ ทานิ ปุนพฺภโว”ติ.
156
… โสณา เถรี… .