6.7 คุตฺตาเถรีคาถา
163.
224
“คุตฺเต ยทตฺถํ ปพฺพชฺชา,
หิตฺวา ปุตฺตํ วสุํ ปิยํ;
ตเมว อนุพฺรูเหหิ,
มา จิตฺตสฺส วสํ คมิ.
164.
225
จิตฺเตน วญฺจิตา สตฺตา,
มารสฺส วิสเย รตา;
อเนกชาติสํสารํ,
สนฺธาวนฺติ อวิทฺทสู.
165.
226
กามจฺฉนฺทญฺจ พฺยาปาทํ,
สกฺกายทิฏฺฐิเมว จ;
สีลพฺพตปรามาสํ,
วิจิกิจฺฉญฺจ ปญฺจมํ.
166.
227
สํโยชนานิ เอตานิ,
ปชหิตฺวาน ภิกฺขุนี;
โอรมฺภาคมนียานิ,
นยิทํ ปุนเรหิสิ.
167.
228
ราคํ มานํ อวิชฺชญฺจ,
อุทฺธจฺจญฺจ วิวชฺชิย;_
สํโยชนานิ เฉตฺวาน,
ทุกฺขสฺสนฺตํ กริสฺสสิ.
168.
229
เขเปตฺวา ชาติสํสารํ,
ปริญฺญาย ปุนพฺภวํ;
ทิฏฺเฐว ธมฺเม นิจฺฉาตา,
อุปสนฺตา จริสฺสตี”ติ._
230
… คุตฺตา เถรี… .