9.1 วฑฺฒมาตุเถรีคาถา
“มา สุ เต วฑฺฒ โลกมฺหิ,
วนโถ อาหุ กุทาจนํ;
มา ปุตฺตก ปุนปฺปุนํ,
อหุ ทุกฺขสฺส ภาคิมา.
สุขญฺหิ วฑฺฒ มุนโย,
อเนชา ฉินฺนสํสยา;
สีติภูตา ทมปฺปตฺตา,
วิหรนฺติ อนาสวา.
เตหานุจิณฺณํ อิสีภิ,
มคฺคํ ทสฺสนปตฺติยา;
ทุกฺขสฺสนฺตกิริยาย,
ตฺวํ วฑฺฒ อนุพฺรูหย”.
“วิสารทาว ภณสิ,
เอตมตฺถํ ชเนตฺติ เม;
มญฺญามิ นูน มามิเก,
วนโถ เต น วิชฺชติ”.
“เย เกจิ วฑฺฒ สงฺขารา,
หีนา อุกฺกฏฺฐมชฺฌิมา;
อณูปิ อณุมตฺโตปิ,
วนโถ เม น วิชฺชติ.
สพฺเพ เม อาสวา ขีณา,
อปฺปมตฺตสฺส ฌายโต;
ติโสฺส วิชฺชา อนุปฺปตฺตา,
กตํ พุทฺธสฺส สาสนํ”.
“อุฬารํ วต เม มาตา,
ปโตทํ สมวสฺสริ;
ปรมตฺถสญฺหิตา คาถา,
ยถาปิ อนุกมฺปิกา.
ตสฺสาหํ วจนํ สุตฺวา,
อนุสิฏฺฐิํ ชเนตฺติยา;
ธมฺมสํเวคมาปาทิํ,
โยคกฺเขมสฺส ปตฺติยา.
โสหํ ปธานปหิตตฺโต,
รตฺตินฺทิวมตนฺทิโต;
มาตรา โจทิโต สนฺโต,
อผุสิํ สนฺติมุตฺตมํ”.
… วฑฺฒมาตา เถรี… .
นวกนิปาโต นิฏฺฐิโต.