4.2 อุทฺธตสุตฺต
32.
273
เอวํ เม สุตํ— เอกํ สมยํ ภควา กุสินารายํ วิหรติ อุปวตฺตเน มลฺลานํ สาลวเน. เตน โข ปน สมเยน สมฺพหุลา ภิกฺขู ภควโต อวิทูเร อรญฺญกุฏิกายํ วิหรนฺติ อุทฺธตา อุนฺนฬา จปลา มุขรา วิกิณฺณวาจา มุฏฺฐสฺสติโน อสมฺปชานา อสมาหิตา วิพฺภนฺตจิตฺตา ปากตินฺทฺริยา.
274
อทฺทสา โข ภควา เต สมฺพหุเล ภิกฺขู อวิทูเร อรญฺญกุฏิกายํ วิหรนฺเต อุทฺธเต อุนฺนเฬ จปเล มุขเร วิกิณฺณวาเจ มุฏฺฐสฺสติโน อสมฺปชาเน อสมาหิเต วิพฺภนฺตจิตฺเต ปากตินฺทฺริเย.
275
อถ โข ภควา เอตมตฺถํ วิทิตฺวา ตายํ เวลายํ อิมํ อุทานํ อุทาเนสิ—
276
“อรกฺขิเตน กาเยน,
มิจฺฉาทิฏฺฐิหเตน จ;
ถินมิทฺธาภิภูเตน,
วสํ มารสฺส คจฺฉติ. (40)
277
ตสฺมา รกฺขิตจิตฺตสฺส,
สมฺมาสงฺกปฺปโคจโร;
สมฺมาทิฏฺฐิปุเรกฺขาโร,
ญตฺวาน อุทยพฺพยํ;
ถินมิทฺธาภิภู ภิกฺขุ,
สพฺพา ทุคฺคติโย ชเห”ติ. (41)
278
ทุติยํ.