7.6 ตณฺหาสงฺขยสุตฺต
66.
630
เอวํ เม สุตํ— เอกํ สมยํ ภควา สาวตฺถิยํ วิหรติ เชตวเน อนาถปิณฺฑิกสฺส อาราเม. เตน โข ปน สมเยน อายสฺมา อญฺญาสิโกณฺฑญฺโญ ภควโต อวิทูเร นิสินฺโน โหติ ปลฺลงฺกํ อาภุชิตฺวา อุชุํ กายํ ปณิธาย ตณฺหาสงฺขยวิมุตฺติํ ปจฺจเวกฺขมาโน.
631
อทฺทสา โข ภควา อายสฺมนฺตํ อญฺญาสิโกณฺฑญฺญํ อวิทูเร นิสินฺนํ ปลฺลงฺกํ อาภุชิตฺวา อุชุํ กายํ ปณิธาย ตณฺหาสงฺขยวิมุตฺติํ ปจฺจเวกฺขมานํ.
632
อถ โข ภควา เอตมตฺถํ วิทิตฺวา ตายํ เวลายํ อิมํ อุทานํ อุทาเนสิ—
633
“ยสฺส มูลํ ฉมา นตฺถิ,
ปณฺณา นตฺถิ กุโต ลตา;
ตํ ธีรํ พนฺธนา มุตฺตํ,
โก ตํ นินฺทิตุมรหติ;
เทวาปิ นํ ปสํสนฺติ,
พฺรหฺมุนาปิ ปสํสิโต”ติ. (79)
634
ฉฏฺฐํ.