7.8 กจฺจานสุตฺต
68.
639
เอวํ เม สุตํ— เอกํ สมยํ ภควา สาวตฺถิยํ วิหรติ เชตวเน อนาถปิณฺฑิกสฺส อาราเม. เตน โข ปน สมเยน อายสฺมา มหากจฺจาโน ภควโต อวิทูเร นิสินฺโน โหติ ปลฺลงฺกํ อาภุชิตฺวา อุชุํ กายํ ปณิธาย กายคตาย สติยา อชฺฌตฺตํ ปริมุขํ สูปฏฺฐิตาย.
640
อทฺทสา โข ภควา อายสฺมนฺตํ มหากจฺจานํ อวิทูเร นิสินฺนํ ปลฺลงฺกํ อาภุชิตฺวา อุชุํ กายํ ปณิธาย กายคตาย สติยา อชฺฌตฺตํ ปริมุขํ สูปฏฺฐิตาย.
641
อถ โข ภควา เอตมตฺถํ วิทิตฺวา ตายํ เวลายํ อิมํ อุทานํ อุทาเนสิ—
642
“ยสฺส สิยา สพฺพทา สติ,
สตตํ กายคตา อุปฏฺฐิตา;
โน จสฺส โน จ เม สิยา,
น ภวิสฺสติ น จ เม ภวิสฺสติ;
อนุปุพฺพวิหาริ ตตฺถ โส,
กาเลเนว ตเร วิสตฺติกนฺ”ติ. (81)
643
อฏฺฐมํ.