4.6 องฺคุลิมาลสุตฺต
เอวํ เม สุตํ— เอกํ สมยํ ภควา สาวตฺถิยํ วิหรติ เชตวเน อนาถปิณฺฑิกสฺส อาราเม. เตน โข ปน สมเยน รญฺโญ ปเสนทิสฺส โกสลสฺส วิชิเต โจโร องฺคุลิมาโล นาม โหติ ลุทฺโท โลหิตปาณิ หตปหเต นิวิฏฺโฐ อทยาปนฺโน ปาณภูเตสุ. เตน คามาปิ อคามา กตา, นิคมาปิ อนิคมา กตา, ชนปทาปิ อชนปทา กตา. โส มนุเสฺส วธิตฺวา วธิตฺวา องฺคุลีนํ มาลํ ธาเรติ. อถ โข ภควา ปุพฺพณฺหสมยํ นิวาเสตฺวา ปตฺตจีวรมาทาย สาวตฺถิํ ปิณฺฑาย ปาวิสิ. สาวตฺถิยํ ปิณฺฑาย จริตฺวา ปจฺฉาภตฺตํ ปิณฺฑปาตปฏิกฺกนฺโต เสนาสนํ สํสาเมตฺวา ปตฺตจีวรมาทาย เยน โจโร องฺคุลิมาโล เตนทฺธานมคฺคํ ปฏิปชฺชิ. อทฺทสาสุํ โข โคปาลกา ปสุปาลกา กสฺสกา ปถาวิโน ภควนฺตํ เยน โจโร องฺคุลิมาโล เตนทฺธานมคฺคปฏิปนฺนํ. ทิสฺวาน ภควนฺตํ เอตทโวจุํ— “มา, สมณ, เอตํ มคฺคํ ปฏิปชฺชิ. เอตสฺมิํ, สมณ, มคฺเค โจโร องฺคุลิมาโล นาม ลุทฺโท โลหิตปาณิ หตปหเต นิวิฏฺโฐ อทยาปนฺโน ปาณภูเตสุ. เตน คามาปิ อคามา กตา, นิคมาปิ อนิคมา กตา, ชนปทาปิ อชนปทา กตา. โส มนุเสฺส วธิตฺวา วธิตฺวา องฺคุลีนํ มาลํ ธาเรติ. เอตญฺหิ, สมณ, มคฺคํ ทสปิ ปุริสา วีสมฺปิ ปุริสา ติํสมฺปิ ปุริสา จตฺตารีสมฺปิ ปุริสา ปญฺญาสมฺปิ ปุริสา สงฺกริตฺวา สงฺกริตฺวา ปฏิปชฺชนฺติ. เตปิ โจรสฺส องฺคุลิมาลสฺส หตฺถตฺถํ คจฺฉนฺตี”ติ. เอวํ วุตฺเต, ภควา ตุณฺหีภูโต อคมาสิ.
ทุติยมฺปิ โข โคปาลกา …เป… ตติยมฺปิ โข โคปาลกา ปสุปาลกา กสฺสกา ปถาวิโน ภควนฺตํ เอตทโวจุํ— “มา, สมณ, เอตํ มคฺคํ ปฏิปชฺชิ, เอตสฺมิํ สมณ มคฺเค โจโร องฺคุลิมาโล นาม ลุทฺโท โลหิตปาณิ หตปหเต นิวิฏฺโฐ อทยาปนฺโน ปาณภูเตสุ, เตน คามาปิ อคามา กตา, นิคมาปิ อนิคมา กตา, ชนปทาปิ อชนปทา กตา. โส มนุเสฺส วธิตฺวา วธิตฺวา องฺคุลีนํ มาลํ ธาเรติ. เอตญฺหิ สมณ มคฺคํ ทสปิ ปุริสา วีสมฺปิ ปุริสา ติํสมฺปิ ปุริสา จตฺตารีสมฺปิ ปุริสา ปญฺญาสมฺปิ ปุริสา สงฺกริตฺวา สงฺกริตฺวา ปฏิปชฺชนฺติ. เตปิ โจรสฺส องฺคุลิมาลสฺส หตฺถตฺถํ คจฺฉนฺตี”ติ.
อถ โข ภควา ตุณฺหีภูโต อคมาสิ. อทฺทสา โข โจโร องฺคุลิมาโล ภควนฺตํ ทูรโตว อาคจฺฉนฺตํ. ทิสฺวานสฺส เอตทโหสิ— “อจฺฉริยํ วต โภ, อพฺภุตํ วต โภ. อิมญฺหิ มคฺคํ ทสปิ ปุริสา วีสมฺปิ ปุริสา ติํสมฺปิ ปุริสา จตฺตารีสมฺปิ ปุริสา ปญฺญาสมฺปิ ปุริสา สงฺกริตฺวา สงฺกริตฺวา ปฏิปชฺชนฺติ. เตปิ มม หตฺถตฺถํ คจฺฉนฺติ. อถ จ ปนายํ สมโณ เอโก อทุติโย ปสยฺห มญฺเญ อาคจฺฉติ. ยนฺนูนาหํ อิมํ สมณํ ชีวิตา โวโรเปยฺยนฺ”ติ.
อถ โข โจโร องฺคุลิมาโล อสิจมฺมํ คเหตฺวา ธนุกลาปํ สนฺนยฺหิตฺวา ภควนฺตํ ปิฏฺฐิโต ปิฏฺฐิโต อนุพนฺธิ. อถ โข ภควา ตถารูปํ อิทฺธาภิสงฺขารํ อภิสงฺขาสิ ยถา โจโร องฺคุลิมาโล ภควนฺตํ ปกติยา คจฺฉนฺตํ สพฺพถาเมน คจฺฉนฺโต น สกฺโกติ สมฺปาปุณิตุํ. อถ โข โจรสฺส องฺคุลิมาลสฺส เอตทโหสิ— “อจฺฉริยํ วต โภ, อพฺภุตํ วต โภ. อหญฺหิ ปุพฺเพ หตฺถิมฺปิ ธาวนฺตํ อนุปติตฺวา คณฺหามิ, อสฺสมฺปิ ธาวนฺตํ อนุปติตฺวา คณฺหามิ, รถมฺปิ ธาวนฺตํ อนุปติตฺวา คณฺหามิ, มิคมฺปิ ธาวนฺตํ อนุปติตฺวา คณฺหามิ; อถ จ ปนาหํ อิมํ สมณํ ปกติยา คจฺฉนฺตํ สพฺพถาเมน คจฺฉนฺโต น สกฺโกมิ สมฺปาปุณิตุนฺ”ติ. ฐิโตว ภควนฺตํ เอตทโวจ— “ติฏฺฐ, ติฏฺฐ, สมณา”ติ. “ฐิโต อหํ, องฺคุลิมาล, ตฺวญฺจ ติฏฺฐา”ติ. อถ โข โจรสฺส องฺคุลิมาลสฺส เอตทโหสิ— “อิเม โข สมณา สกฺยปุตฺติยา สจฺจวาทิโน สจฺจปฏิญฺญา. อถ ปนายํ สมโณ คจฺฉํ เยวาห— ‘ฐิโต อหํ, องฺคุลิมาล, ตฺวญฺจ ติฏฺฐา’ติ. ยนฺนูนาหํ อิมํ สมณํ ปุจฺเฉยฺยนฺ”ติ.
อถ โข โจโร องฺคุลิมาโล ภควนฺตํ คาถาย อชฺฌภาสิ—
“คจฺฉํ วเทสิ สมณ ฐิโตมฺหิ,
มมญฺจ พฺรูสิ ฐิตมฏฺฐิโตติ;
ปุจฺฉามิ ตํ สมณ เอตมตฺถํ,
กถํ ฐิโต ตฺวํ อหมฏฺฐิโตมฺหี”ติ.
“ฐิโต อหํ องฺคุลิมาล สพฺพทา,
สพฺเพสุ ภูเตสุ นิธาย ทณฺฑํ;
ตุวญฺจ ปาเณสุ อสญฺญโตสิ,
ตสฺมา ฐิโตหํ ตุวมฏฺฐิโตสี”ติ.
“จิรสฺสํ วต เม มหิโต มเหสี,
มหาวนํ ปาปุณิ สจฺจวาที;
โสหํ จริสฺสามิ ปหาย ปาปํ,
สุตฺวาน คาถํ ตว ธมฺมยุตฺตํ”.
อิเตฺวว โจโร อสิมาวุธญฺจ,_
โสพฺเภ ปปาเต นรเก อกิริ;
อวนฺทิ โจโร สุคตสฺส ปาเท,
ตตฺเถว นํ ปพฺพชฺชํ อยาจิ.
พุทฺโธ จ โข การุณิโก มเหสิ,
โย สตฺถา โลกสฺส สเทวกสฺส;
“ตเมหิ ภิกฺขู”ติ ตทา อโวจ,
เอเสว ตสฺส อหุ ภิกฺขุภาโวติ.
อถ โข ภควา อายสฺมตา องฺคุลิมาเลน ปจฺฉาสมเณน เยน สาวตฺถิ เตน จาริกํ ปกฺกามิ. อนุปุพฺเพน จาริกํ จรมาโน เยน สาวตฺถิ ตทวสริ. ตตฺร สุทํ ภควา สาวตฺถิยํ วิหรติ เชตวเน อนาถปิณฺฑิกสฺส อาราเม. เตน โข ปน สมเยน รญฺโญ ปเสนทิสฺส โกสลสฺส อนฺเตปุรทฺวาเร มหาชนกาโย สนฺนิปติตฺวา อุจฺจาสทฺโท มหาสทฺโท โหติ— “โจโร เต, เทว, วิชิเต องฺคุลิมาโล นาม ลุทฺโท โลหิตปาณิ หตปหเต นิวิฏฺโฐ อทยาปนฺโน ปาณภูเตสุ. เตน คามาปิ อคามา กตา, นิคมาปิ อนิคมา กตา, ชนปทาปิ อชนปทา กตา. โส มนุเสฺส วธิตฺวา วธิตฺวา องฺคุลีนํ มาลํ ธาเรติ. ตํ เทโว ปฏิเสเธตู”ติ.
อถ โข ราชา ปเสนทิ โกสโล ปญฺจมตฺเตหิ อสฺสสเตหิ สาวตฺถิยา นิกฺขมิ ทิวา ทิวสฺส. เยน อาราโม เตน ปาวิสิ. ยาวติกา ยานสฺส ภูมิ ยาเนน คนฺตฺวา ยานา ปจฺโจโรหิตฺวา ปตฺติโกว เยน ภควา เตนุปสงฺกมิ; อุปสงฺกมิตฺวา ภควนฺตํ อภิวาเทตฺวา เอกมนฺตํ นิสีทิ. เอกมนฺตํ นิสินฺนํ โข ราชานํ ปเสนทิํ โกสลํ ภควา เอตทโวจ— “กิํ นุ เต, มหาราช, ราชา วา มาคโธ เสนิโย พิมฺพิสาโร กุปิโต เวสาลิกา วา ลิจฺฉวี อญฺเญ วา ปฏิราชาโน”ติ?
“น โข เม, ภนฺเต, ราชา มาคโธ เสนิโย พิมฺพิสาโร กุปิโต, นาปิ เวสาลิกา ลิจฺฉวี, นาปิ อญฺเญ ปฏิราชาโน. โจโร เม, ภนฺเต, วิชิเต องฺคุลิมาโล นาม ลุทฺโท โลหิตปาณิ หตปหเต นิวิฏฺโฐ อทยาปนฺโน ปาณภูเตสุ. เตน คามาปิ อคามา กตา, นิคมาปิ อนิคมา กตา, ชนปทาปิ อชนปทา กตา. โส มนุเสฺส วธิตฺวา วธิตฺวา องฺคุลีนํ มาลํ ธาเรติ. ตาหํ, ภนฺเต, ปฏิเสธิสฺสามี”ติ.
“สเจ ปน ตฺวํ, มหาราช, องฺคุลิมาลํ ปเสฺสยฺยาสิ เกสมสฺสุํ โอหาเรตฺวา กาสายานิ วตฺถานิ อจฺฉาเทตฺวา อคารสฺมา อนคาริยํ ปพฺพชิตํ, วิรตํ ปาณาติปาตา, วิรตํ อทินฺนาทานา, วิรตํ มุสาวาทา, เอกภตฺติกํ, พฺรหฺมจาริํ, สีลวนฺตํ, กลฺยาณธมฺมํ, กินฺติ นํ กเรยฺยาสี”ติ? “อภิวาเทยฺยาม วา, ภนฺเต, ปจฺจุฏฺเฐยฺยาม วา อาสเนน วา นิมนฺเตยฺยาม, อภินิมนฺเตยฺยาม วา นํ จีวรปิณฺฑปาตเสนาสนคิลานปฺปจฺจยเภสชฺชปริกฺขาเรหิ, ธมฺมิกํ วา อสฺส รกฺขาวรณคุตฺติํ สํวิทเหยฺยาม. กุโต ปนสฺส, ภนฺเต, ทุสฺสีลสฺส ปาปธมฺมสฺส เอวรูโป สีลสํยโม ภวิสฺสตี”ติ?
เตน โข ปน สมเยน อายสฺมา องฺคุลิมาโล ภควโต อวิทูเร นิสินฺโน โหติ. อถ โข ภควา ทกฺขิณํ พาหุํ ปคฺคเหตฺวา ราชานํ ปเสนทิํ โกสลํ เอตทโวจ— “เอโส, มหาราช, องฺคุลิมาโล”ติ.
อถ โข รญฺโญ ปเสนทิสฺส โกสลสฺส อหุเทว ภยํ, อหุ ฉมฺภิตตฺตํ, อหุ โลมหํโส. อถ โข ภควา ราชานํ ปเสนทิํ โกสลํ ภีตํ สํวิคฺคํ โลมหฏฺฐชาตํ วิทิตฺวา ราชานํ ปเสนทิํ โกสลํ เอตทโวจ— “มา ภายิ, มหาราช, นตฺถิ เต อิโต ภยนฺ”ติ. อถ โข รญฺโญ ปเสนทิสฺส โกสลสฺส ยํ อโหสิ ภยํ วา ฉมฺภิตตฺตํ วา โลมหํโส วา โส ปฏิปฺปสฺสมฺภิ. อถ โข ราชา ปเสนทิ โกสโล เยนายสฺมา องฺคุลิมาโล เตนุปสงฺกมิ; อุปสงฺกมิตฺวา อายสฺมนฺตํ องฺคุลิมาลํ เอตทโวจ— “อโยฺย โน, ภนฺเต, องฺคุลิมาโล”ติ? “เอวํ, มหาราชา”ติ. “กถํโคตฺโต อยฺยสฺส ปิตา, กถํโคตฺตา มาตา”ติ? “คคฺโค โข, มหาราช, ปิตา, มนฺตาณี มาตา”ติ.
“อภิรมตุ, ภนฺเต, อโยฺย คคฺโค มนฺตาณิปุตฺโต. อหมยฺยสฺส คคฺคสฺส มนฺตาณิปุตฺตสฺส อุสฺสุกฺกํ กริสฺสามิ จีวรปิณฺฑปาตเสนาสนคิลานปฺปจฺจยเภสชฺชปริกฺขารานนฺ”ติ.
เตน โข ปน สมเยน อายสฺมา องฺคุลิมาโล อารญฺญิโก โหติ ปิณฺฑปาติโก ปํสุกูลิโก เตจีวริโก. อถ โข อายสฺมา องฺคุลิมาโล ราชานํ ปเสนทิํ โกสลํ เอตทโวจ— “อลํ, มหาราช, ปริปุณฺณํ เม จีวรนฺ”ติ. อถ โข ราชา ปเสนทิ โกสโล เยน ภควา เตนุปสงฺกมิ; อุปสงฺกมิตฺวา ภควนฺตํ อภิวาเทตฺวา เอกมนฺตํ นิสีทิ. เอกมนฺตํ นิสินฺโน โข ราชา ปเสนทิ โกสโล ภควนฺตํ เอตทโวจ— “อจฺฉริยํ, ภนฺเต, อพฺภุตํ, ภนฺเต. ยาวญฺจิทํ, ภนฺเต, ภควา อทนฺตานํ ทเมตา, อสนฺตานํ สเมตา, อปรินิพฺพุตานํ ปรินิพฺพาเปตา. ยญฺหิ มยํ, ภนฺเต, นาสกฺขิมฺหา ทณฺเฑนปิ สตฺเถนปิ ทเมตุํ โส ภควตา อทณฺเฑน อสตฺเถเนว ทนฺโต. หนฺท จ ทานิ มยํ, ภนฺเต, คจฺฉาม; พหุกิจฺจา มยํ พหุกรณียา”ติ. “ยสฺสทานิ, มหาราช, กาลํ มญฺญสี”ติ. อถ โข ราชา ปเสนทิ โกสโล อุฏฺฐายาสนา ภควนฺตํ อภิวาเทตฺวา ปทกฺขิณํ กตฺวา ปกฺกามิ.
อถ โข อายสฺมา องฺคุลิมาโล ปุพฺพณฺหสมยํ นิวาเสตฺวา ปตฺตจีวรมาทาย สาวตฺถิยํ ปิณฺฑาย ปาวิสิ. อทฺทสา โข อายสฺมา องฺคุลิมาโล สาวตฺถิยํ สปทานํ ปิณฺฑาย จรมาโน อญฺญตรํ อิตฺถิํ มูฬฺหคพฺภํ วิฆาตคพฺภํ. ทิสฺวานสฺส เอตทโหสิ— “กิลิสฺสนฺติ วต, โภ, สตฺตา; กิลิสฺสนฺติ วต, โภ, สตฺตา”ติ. อถ โข อายสฺมา องฺคุลิมาโล สาวตฺถิยํ ปิณฺฑาย จริตฺวา ปจฺฉาภตฺตํ ปิณฺฑปาตปฏิกฺกนฺโต เยน ภควา เตนุปสงฺกมิ; อุปสงฺกมิตฺวา ภควนฺตํ อภิวาเทตฺวา เอกมนฺตํ นิสีทิ. เอกมนฺตํ นิสินฺโน โข อายสฺมา องฺคุลิมาโล ภควนฺตํ เอตทโวจ— “อิธาหํ, ภนฺเต, ปุพฺพณฺหสมยํ นิวาเสตฺวา ปตฺตจีวรมาทาย สาวตฺถิํ ปิณฺฑาย ปาวิสิํ. อทฺทสํ โข อหํ, ภนฺเต, สาวตฺถิยํ สปทานํ ปิณฺฑาย จรมาโน อญฺญตรํ อิตฺถิํ มูฬฺหคพฺภํ วิฆาตคพฺภํ. ทิสฺวาน มยฺหํ เอตทโหสิ— ‘กิลิสฺสนฺติ วต โภ สตฺตา, กิลิสฺสนฺติ วต โภ สตฺตา’”ติ.
“เตน หิ ตฺวํ, องฺคุลิมาล, เยน สา อิตฺถี เตนุปสงฺกม; อุปสงฺกมิตฺวา ตํ อิตฺถิํ เอวํ วเทหิ— ‘ยโตหํ, ภคินิ, ชาโต นาภิชานามิ สญฺจิจฺจ ปาณํ ชีวิตา โวโรเปตา, เตน สจฺเจน โสตฺถิ เต โหตุ, โสตฺถิ คพฺภสฺสา’”ติ.
“โส หิ นูน เม, ภนฺเต, สมฺปชานมุสาวาโท ภวิสฺสติ. มยา หิ, ภนฺเต, พหู สญฺจิจฺจ ปาณา ชีวิตา โวโรปิตา”ติ. “เตน หิ ตฺวํ, องฺคุลิมาล, เยน สา อิตฺถี เตนุปสงฺกม; อุปสงฺกมิตฺวา ตํ อิตฺถิํ เอวํ วเทหิ— ‘ยโตหํ, ภคินิ, อริยาย ชาติยา ชาโต, นาภิชานามิ สญฺจิจฺจ ปาณํ ชีวิตา โวโรเปตา, เตน สจฺเจน โสตฺถิ เต โหตุ, โสตฺถิ คพฺภสฺสา’”ติ.
“เอวํ, ภนฺเต”ติ โข อายสฺมา องฺคุลิมาโล ภควโต ปฏิสฺสุตฺวา เยน สา อิตฺถี เตนุปสงฺกมิ; อุปสงฺกมิตฺวา ตํ อิตฺถิํ เอตทโวจ— “ยโตหํ, ภคินิ, อริยาย ชาติยา ชาโต, นาภิชานามิ สญฺจิจฺจ ปาณํ ชีวิตา โวโรเปตา, เตน สจฺเจน โสตฺถิ เต โหตุ, โสตฺถิ คพฺภสฺสา”ติ. อถ ขฺวาสฺสา อิตฺถิยา โสตฺถิ อโหสิ, โสตฺถิ คพฺภสฺส.
อถ โข อายสฺมา องฺคุลิมาโล เอโก วูปกฏฺโฐ อปฺปมตฺโต อาตาปี ปหิตตฺโต วิหรนฺโต นจิรเสฺสว— ยสฺสตฺถาย กุลปุตฺตา สมฺมเทว อคารสฺมา อนคาริยํ ปพฺพชนฺติ, ตทนุตฺตรํ— พฺรหฺมจริยปริโยสานํ ทิฏฺเฐว ธมฺเม สยํ อภิญฺญา สจฺฉิกตฺวา อุปสมฺปชฺช วิหาสิ. “ขีณา ชาติ, วุสิตํ พฺรหฺมจริยํ, กตํ กรณียํ, นาปรํ อิตฺถตฺตายา”ติ อพฺภญฺญาสิ. อญฺญตโร โข ปนายสฺมา องฺคุลิมาโล อรหตํ อโหสิ.
อถ โข อายสฺมา องฺคุลิมาโล ปุพฺพณฺหสมยํ นิวาเสตฺวา ปตฺตจีวรมาทาย สาวตฺถิํ ปิณฺฑาย ปาวิสิ. เตน โข ปน สมเยน อญฺเญนปิ เลฑฺฑุ ขิตฺโต อายสฺมโต องฺคุลิมาลสฺส กาเย นิปตติ, อญฺเญนปิ ทณฺโฑ ขิตฺโต อายสฺมโต องฺคุลิมาลสฺส กาเย นิปตติ, อญฺเญนปิ สกฺขรา ขิตฺตา อายสฺมโต องฺคุลิมาลสฺส กาเย นิปตติ. อถ โข อายสฺมา องฺคุลิมาโล ภินฺเนน สีเสน, โลหิเตน คฬนฺเตน, ภินฺเนน ปตฺเตน, วิปฺผาลิตาย สงฺฆาฏิยา เยน ภควา เตนุปสงฺกมิ. อทฺทสา โข ภควา อายสฺมนฺตํ องฺคุลิมาลํ ทูรโตว อาคจฺฉนฺตํ. ทิสฺวาน อายสฺมนฺตํ องฺคุลิมาลํ เอตทโวจ— “อธิวาเสหิ ตฺวํ, พฺราหฺมณ, อธิวาเสหิ ตฺวํ, พฺราหฺมณ. ยสฺส โข ตฺวํ, พฺราหฺมณ, กมฺมสฺส วิปาเกน พหูนิ วสฺสานิ พหูนิ วสฺสสตานิ พหูนิ วสฺสสหสฺสานิ นิรเย ปจฺเจยฺยาสิ ตสฺส ตฺวํ, พฺราหฺมณ, กมฺมสฺส วิปากํ ทิฏฺเฐว ธมฺเม ปฏิสํเวเทสี”ติ. อถ โข อายสฺมา องฺคุลิมาโล รโหคโต ปฏิสลฺลีโน วิมุตฺติสุขํ ปฏิสํเวทิ; ตายํ เวลายํ อิมํ อุทานํ อุทาเนสิ—
“โย ปุพฺเพว ปมชฺชิตฺวา,
ปจฺฉา โส นปฺปมชฺชติ;
โสมํ โลกํ ปภาเสติ,
อพฺภา มุตฺโตว จนฺทิมา.
ยสฺส ปาปํ กตํ กมฺมํ,
กุสเลน ปิธียติ;
โสมํ โลกํ ปภาเสติ,
อพฺภา มุตฺโตว จนฺทิมา.
โย หเว ทหโร ภิกฺขุ,
ยุญฺชติ พุทฺธสาสเน;
โสมํ โลกํ ปภาเสติ,
อพฺภา มุตฺโตว จนฺทิมา.
ทิสา หิ เม ธมฺมกถํ สุณนฺตุ,
ทิสา หิ เม ยุญฺชนฺตุ พุทฺธสาสเน;
ทิสา หิ เม เต มนุชา ภชนฺตุ,
เย ธมฺมเมวาทปยนฺติ สนฺโต.
ทิสา หิ เม ขนฺติวาทานํ,
อวิโรธปฺปสํสีนํ;
สุณนฺตุ ธมฺมํ กาเลน,
ตญฺจ อนุวิธียนฺตุ.
น หิ ชาตุ โส มมํ หิํเส,
อญฺญํ วา ปน กิญฺจิ นํ;
ปปฺปุยฺย ปรมํ สนฺติํ,
รกฺเขยฺย ตสถาวเร.
อุทกญฺหิ นยนฺติ เนตฺติกา,_
อุสุการา นมยนฺติ เตชนํ;_
ทารุํ นมยนฺติ ตจฺฉกา,
อตฺตานํ ทมยนฺติ ปณฺฑิตา.
ทณฺเฑเนเก ทมยนฺติ,
องฺกุเสหิ กสาหิ จ;
อทณฺเฑน อสตฺเถน,
อหํ ทนฺโตมฺหิ ตาทินา.
อหิํสโกติ เม นามํ,
หิํสกสฺส ปุเร สโต;
อชฺชาหํ สจฺจนาโมมฺหิ,
น นํ หิํสามิ กิญฺจิ นํ.
โจโร อหํ ปุเร อาสิํ,
องฺคุลิมาโลติ วิสฺสุโต;
วุยฺหมาโน มโหเฆน,
พุทฺธํ สรณมาคมํ.
โลหิตปาณิ ปุเร อาสิํ,
องฺคุลิมาโลติ วิสฺสุโต;
สรณคมนํ ปสฺส,
ภวเนตฺติ สมูหตา.
ตาทิสํ กมฺมํ กตฺวาน,
พหุํ ทุคฺคติคามินํ;
ผุฏฺโฐ กมฺมวิปาเกน,
อณโณ ภุญฺชามิ โภชนํ.
ปมาทมนุยุญฺชนฺติ,
พาลา ทุมฺเมธิโน ชนา;
อปฺปมาทญฺจ เมธาวี,
ธนํ เสฏฺฐํว รกฺขติ.
มา ปมาทมนุยุญฺเชถ,
มา กามรติ สนฺถวํ;
อปฺปมตฺโต หิ ฌายนฺโต,
ปปฺโปติ วิปุลํ สุขํ.
สฺวาคตํ นาปคตํ,
นยิทํ ทุมฺมนฺติตํ มม;
สํวิภตฺเตสุ ธมฺเมสุ,
ยํ เสฏฺฐํ ตทุปาคมํ.
สฺวาคตํ นาปคตํ,
นยิทํ ทุมฺมนฺติตํ มม;
ติโสฺส วิชฺชา อนุปฺปตฺตา,
กตํ พุทฺธสฺส สาสนนฺ”ติ.
องฺคุลิมาลสุตฺตํ นิฏฺฐิตํ ฉฏฺฐํ.