1.4.5 อุชฺฌานสญฺญิสุตฺต
เอกํ สมยํ ภควา สาวตฺถิยํ วิหรติ เชตวเน อนาถปิณฺฑิกสฺส อาราเม. อถ โข สมฺพหุลา อุชฺฌานสญฺญิกา เทวตาโย อภิกฺกนฺตาย รตฺติยา อภิกฺกนฺตวณฺณา เกวลกปฺปํ เชตวนํ โอภาเสตฺวา เยน ภควา เตนุปสงฺกมิํสุ; อุปสงฺกมิตฺวา เวหาสํ อฏฺฐํสุ. เวหาสํ ฐิตา โข เอกา เทวตา ภควโต สนฺติเก อิมํ คาถํ อภาสิ—
“อญฺญถา สนฺตมตฺตานํ,
อญฺญถา โย ปเวทเย;
นิกจฺจ กิตวเสฺสว,
ภุตฺตํ เถเยฺยน ตสฺส ตํ.
ยญฺหิ กยิรา ตญฺหิ วเท,
ยํ น กยิรา น ตํ วเท;
อกโรนฺตํ ภาสมานํ,
ปริชานนฺติ ปณฺฑิตา”ติ.
“น ยิทํ ภาสิตมตฺเตน,
เอกนฺตสวเนน วา;
อนุกฺกมิตเว สกฺกา,
ยายํ ปฏิปทา ทฬฺหา;
ยาย ธีรา ปมุจฺจนฺติ,
ฌายิโน มารพนฺธนา.
น เว ธีรา ปกุพฺพนฺติ,
วิทิตฺวา โลกปริยายํ;
อญฺญาย นิพฺพุตา ธีรา,
ติณฺณา โลเก วิสตฺติกนฺ”ติ.
อถ โข ตา เทวตาโย ปถวิยํ ปติฏฺฐหิตฺวา ภควโต ปาเทสุ สิรสา นิปติตฺวา ภควนฺตํ เอตทโวจุํ— “อจฺจโย โน, ภนฺเต, อจฺจคมา ยถาพาลํ ยถามูฬฺหํ ยถาอกุสลํ, ยา มยํ ภควนฺตํ อาสาเทตพฺพํ อมญฺญิมฺหา. ตาสํ โน, ภนฺเต, ภควา อจฺจยํ อจฺจยโต ปฏิคฺคณฺหาตุ อายติํ สํวรายา”ติ. อถ โข ภควา สิตํ ปาตฺวากาสิ. อถ โข ตา เทวตาโย ภิโยฺยโส มตฺตาย อุชฺฌายนฺติโย เวหาสํ อพฺภุคฺคญฺฉุํ. เอกา เทวตา ภควโต สนฺติเก อิมํ คาถํ อภาสิ—
“อจฺจยํ เทสยนฺตีนํ,
โย เจ น ปฏิคณฺหติ;
โกปนฺตโร โทสครุ,
ส เวรํ ปฏิมุญฺจตี”ติ.
“อจฺจโย เจ น วิชฺเชถ,
โนจิธาปคตํ สิยา;
เวรานิ น จ สมฺเมยฺยุํ,
เกนีธ กุสโล สิยา”ติ.
“กสฺสจฺจยา น วิชฺชนฺติ,
กสฺส นตฺถิ อปาคตํ;
โก น สมฺโมหมาปาทิ,
โก จ ธีโร สทา สโต”ติ.
“ตถาคตสฺส พุทฺธสฺส,
สพฺพภูตานุกมฺปิโน;
ตสฺสจฺจยา น วิชฺชนฺติ,
ตสฺส นตฺถิ อปาคตํ;
โส น สมฺโมหมาปาทิ,
โสว ธีโร สทา สโตติ.
อจฺจยํ เทสยนฺตีนํ,
โย เจ น ปฏิคณฺหติ;
โกปนฺตโร โทสครุ,
ส เวรํ ปฏิมุญฺจติ;
ตํ เวรํ นาภินนฺทามิ,
ปฏิคฺคณฺหามิ โวจฺจยนฺ”ติ.