1.5.9 มจฺฉริสุตฺต
“เยธ มจฺฉริโน โลเก,
กทริยา ปริภาสกา;
อญฺเญสํ ททมานานํ,
อนฺตรายกรา นรา.
กีทิโส เตสํ วิปาโก,
สมฺปราโย จ กีทิโส;
ภควนฺตํ ปุฏฺฐุมาคมฺม,
กถํ ชาเนมุ ตํ มยนฺ”ติ.
“เยธ มจฺฉริโน โลเก,
กทริยา ปริภาสกา;
อญฺเญสํ ททมานานํ,
อนฺตรายกรา นรา.
นิรยํ ติรจฺฉานโยนิํ,
ยมโลกํ อุปปชฺชเร;
สเจ เอนฺติ มนุสฺสตฺตํ,
ทลิทฺเท ชายเร กุเล.
โจฬํ ปิณฺโฑ รตี ขิฑฺฑา,
ยตฺถ กิจฺเฉน ลพฺภติ;
ปรโต อาสีสเร พาลา,
ตมฺปิ เตสํ น ลพฺภติ;
ทิฏฺเฐ ธมฺเมส วิปาโก,
สมฺปราเย จ ทุคฺคตี”ติ.
“อิติเหตํ วิชานาม,
อญฺญํ ปุจฺฉาม โคตม;
เยธ ลทฺธา มนุสฺสตฺตํ,
วทญฺญู วีตมจฺฉรา.
พุทฺเธ ปสนฺนา ธมฺเม จ,
สํเฆ จ ติพฺพคารวา;
กีทิโส เตสํ วิปาโก,
สมฺปราโย จ กีทิโส;
ภควนฺตํ ปุฏฺฐุมาคมฺม,
กถํ ชาเนมุ ตํ มยนฺ”ติ.
“เยธ ลทฺธา มนุสฺสตฺตํ,
วทญฺญู วีตมจฺฉรา;
พุทฺเธ ปสนฺนา ธมฺเม จ,
สํเฆ จ ติพฺพคารวา;
เอเต สคฺคา ปกาสนฺติ,
ยตฺถ เต อุปปชฺชเร.
สเจ เอนฺติ มนุสฺสตฺตํ,
อฑฺเฒ อาชายเร กุเล;
โจฬํ ปิณฺโฑ รตี ขิฑฺฑา,
ยตฺถากิจฺเฉน ลพฺภติ.
ปรสมฺภเตสุ โภเคสุ,
วสวตฺตีว โมทเร;
ทิฏฺเฐ ธมฺเมส วิปาโก,
สมฺปราเย จ สุคฺคตี”ติ.