1.8.6 นชีรติสุตฺต
76.
346
“กิํ ชีรติ กิํ น ชีรติ,
กิํสุ อุปฺปโถติ วุจฺจติ;
กิํสุ ธมฺมานํ ปริปนฺโถ,
กิํสุ รตฺตินฺทิวกฺขโย;
กิํ มลํ พฺรหฺมจริยสฺส,
กิํ สินานมโนทกํ.
347
กติ โลกสฺมิํ ฉิทฺทานิ,
ยตฺถ วิตฺตํ น ติฏฺฐติ;
ภควนฺตํ ปุฏฺฐุมาคมฺม,
กถํ ชาเนมุ ตํ มยนฺ”ติ.
348
“รูปํ ชีรติ มจฺจานํ,
นามโคตฺตํ น ชีรติ;
ราโค อุปฺปโถติ วุจฺจติ.
349
โลโภ ธมฺมานํ ปริปนฺโถ,
วโย รตฺตินฺทิวกฺขโย;
อิตฺถี มลํ พฺรหฺมจริยสฺส,_
เอตฺถายํ สชฺชเต ปชา;
ตโป จ พฺรหฺมจริยญฺจ,
ตํ สินานมโนทกํ.
350
ฉ โลกสฺมิํ ฉิทฺทานิ,
ยตฺถ วิตฺตํ น ติฏฺฐติ;
อาลสฺยญฺจ ปมาโท จ,
อนุฏฺฐานํ อสํยโม;
นิทฺทา ตนฺที จ เต ฉิทฺเท,
สพฺพโส ตํ วิวชฺชเย”ติ.