10.1.12 อาฬวกสุตฺต
เอวํ เม สุตํ— เอกํ สมยํ ภควา อาฬวิยํ วิหรติ อาฬวกสฺส ยกฺขสฺส ภวเน. อถ โข อาฬวโก ยกฺโข เยน ภควา เตนุปสงฺกมิ; อุปสงฺกมิตฺวา ภควนฺตํ เอตทโวจ— “นิกฺขม, สมณา”ติ. “สาธาวุโส”ติ ภควา นิกฺขมิ. “ปวิส, สมณา”ติ. “สาธาวุโส”ติ ภควา ปาวิสิ. ทุติยมฺปิ โข อาฬวโก ยกฺโข ภควนฺตํ เอตทโวจ— “นิกฺขม, สมณา”ติ. “สาธาวุโส”ติ ภควา นิกฺขมิ. “ปวิส, สมณา”ติ. “สาธาวุโส”ติ ภควา ปาวิสิ. ตติยมฺปิ โข อาฬวโก ยกฺโข ภควนฺตํ เอตทโวจ— “นิกฺขม, สมณา”ติ. “สาธาวุโส”ติ ภควา นิกฺขมิ. “ปวิส, สมณา”ติ. “สาธาวุโส”ติ ภควา ปาวิสิ. จตุตฺถมฺปิ โข อาฬวโก ยกฺโข ภควนฺตํ เอตทโวจ— “นิกฺขม, สมณา”ติ. “น ขฺวาหํ ตํ, อาวุโส, นิกฺขมิสฺสามิ. ยํ เต กรณียํ ตํ กโรหี”ติ. “ปญฺหํ ตํ, สมณ, ปุจฺฉิสฺสามิ. สเจ เม น พฺยากริสฺสสิ, จิตฺตํ วา เต ขิปิสฺสามิ, หทยํ วา เต ผาเลสฺสามิ, ปาเทสุ วา คเหตฺวา ปารคงฺคาย ขิปิสฺสามี”ติ. “น ขฺวาหํ ตํ, อาวุโส, ปสฺสามิ สเทวเก โลเก สมารเก สพฺรหฺมเก สสฺสมณพฺราหฺมณิยา ปชาย สเทวมนุสฺสาย, โย เม จิตฺตํ วา ขิเปยฺย หทยํ วา ผาเลยฺย, ปาเทสุ วา คเหตฺวา ปารคงฺคาย ขิเปยฺย. อปิ จ ตฺวํ, อาวุโส, ปุจฺฉ ยทา กงฺขสี”ติ ( ).
“กิํสูธ วิตฺตํ ปุริสสฺส เสฏฺฐํ,
กิํสุ สุจิณฺณํ สุขมาวหาติ;
กิํสุ หเว สาทุตรํ รสานํ,
กถํชีวิํ ชีวิตมาหุ เสฏฺฐนฺ”ติ.
“สทฺธีธ วิตฺตํ ปุริสสฺส เสฏฺฐํ,
ธมฺโม สุจิณฺโณ สุขมาวหาติ;
สจฺจํ หเว สาทุตรํ รสานํ,
ปญฺญาชีวิํ ชีวิตมาหุ เสฏฺฐนฺ”ติ.
“กถํสุ ตรติ โอฆํ,
กถํสุ ตรติ อณฺณวํ;
กถํสุ ทุกฺขมจฺเจติ,
กถํสุ ปริสุชฺฌตี”ติ.
“สทฺธาย ตรติ โอฆํ,
อปฺปมาเทน อณฺณวํ;
วีริเยน ทุกฺขมจฺเจติ,
ปญฺญาย ปริสุชฺฌตี”ติ.
“กถํสุ ลภเต ปญฺญํ,
กถํสุ วินฺทเต ธนํ;
กถํสุ กิตฺติํ ปปฺโปติ,
กถํ มิตฺตานิ คนฺถติ;
อสฺมา โลกา ปรํ โลกํ,
กถํ เปจฺจ น โสจตี”ติ.
“สทฺทหาโน อรหตํ,
ธมฺมํ นิพฺพานปตฺติยา;
สุสฺสูสํ ลภเต ปญฺญํ,
อปฺปมตฺโต วิจกฺขโณ.
ปติรูปการี ธุรวา,
อุฏฺฐาตา วินฺทเต ธนํ;_
สจฺเจน กิตฺติํ ปปฺโปติ,
ททํ มิตฺตานิ คนฺถติ;
อสฺมา โลกา ปรํ โลกํ,
เอวํ เปจฺจ น โสจติ.
ยเสฺสเต จตุโร ธมฺมา,
สทฺธสฺส ฆรเมสิโน;
สจฺจํ ธมฺโม ธิติ จาโค,
ส เว เปจฺจ น โสจติ.
อิงฺฆ อญฺเญปิ ปุจฺฉสฺสุ,_
ปุถู สมณพฺราหฺมเณ;
ยทิ สจฺจา ธมฺมา จาคา,
ขนฺตฺยา ภิโยฺยธ วิชฺชตี”ติ.
“กถํ นุ ทานิ ปุจฺเฉยฺยํ,
ปุถู สมณพฺราหฺมเณ;
โยหํ อชฺช ปชานามิ,
โย อตฺโถ สมฺปรายิโก.
อตฺถาย วต เม พุทฺโธ,
วาสายาฬวิมาคมา;
โยหํ อชฺช ปชานามิ,
ยตฺถ ทินฺนํ มหปฺผลํ.
โส อหํ วิจริสฺสามิ,
คามา คามํ ปุรา ปุรํ;
นมสฺสมาโน สมฺพุทฺธํ,
ธมฺมสฺส จ สุธมฺมตนฺ”ติ.
อินฺทกวคฺโค ปฐโม.
ตสฺสุทฺทานํ
อินฺทโก สกฺก สูจิ จ,_
มณิภทฺโท จ สานุ จ;
ปิยงฺกร ปุนพฺพสุ สุทตฺโต จ,
ทฺเว สุกฺกา จีรอาฬวีติ ทฺวาทส.
ยกฺขสํยุตฺตํ สมตฺตํ.