10.1.5 สานุสุตฺต
เอกํ สมยํ ภควา สาวตฺถิยํ วิหรติ เชตวเน อนาถปิณฺฑิกสฺส อาราเม. เตน โข ปน สมเยน อญฺญตริสฺสา อุปาสิกาย สานุ นาม ปุตฺโต ยกฺเขน คหิโต โหติ. อถ โข สา อุปาสิกา ปริเทวมานา ตายํ เวลายํ อิมา คาถาโย อภาสิ—
“จาตุทฺทสิํ ปญฺจทสิํ,
ยา จ ปกฺขสฺส อฏฺฐมี;
ปาฏิหาริยปกฺขญฺจ,
อฏฺฐงฺคสุสมาคตํ.
อุโปสถํ อุปวสนฺติ,_
พฺรหฺมจริยํ จรนฺติ เย;
น เตหิ ยกฺขา กีฬนฺติ,
อิติ เม อรหตํ สุตํ;_
สา ทานิ อชฺช ปสฺสามิ,
ยกฺขา กีฬนฺติ สานุนา”ติ.
“จาตุทฺทสิํ ปญฺจทสิํ,
ยา จ ปกฺขสฺส อฏฺฐมี;
ปาฏิหาริยปกฺขญฺจ,
อฏฺฐงฺคสุสมาคตํ;
อุโปสถํ อุปวสนฺติ,_
พฺรหฺมจริยํ จรนฺติ เย.
น เตหิ ยกฺขา กีฬนฺติ,
สาหุ เต อรหตํ สุตํ;
สานุํ ปพุทฺธํ วชฺชาสิ,
ยกฺขานํ วจนํ อิทํ;
มากาสิ ปาปกํ กมฺมํ,
อาวิ วา ยทิ วา รโห.
สเจ จ ปาปกํ กมฺมํ,
กริสฺสสิ กโรสิ วา;
น เต ทุกฺขา ปมุตฺยตฺถิ,
อุปฺปจฺจาปิ ปลายโต”ติ._
“มตํ วา อมฺม โรทนฺติ,
โย วา ชีวํ น ทิสฺสติ;
ชีวนฺตํ อมฺม ปสฺสนฺตี,
กสฺมา มํ อมฺม โรทสี”ติ.
“มตํ วา ปุตฺต โรทนฺติ,
โย วา ชีวํ น ทิสฺสติ;
โย จ กาเม จชิตฺวาน,
ปุนราคจฺฉเต อิธ;
ตํ วาปิ ปุตฺต โรทนฺติ,
ปุน ชีวํ มโต หิ โส.
กุกฺกุฬา อุพฺภโต ตาต,
กุกฺกุฬํ ปติตุมิจฺฉสิ;
นรกา อุพฺภโต ตาต,
นรกํ ปติตุมิจฺฉสิ.
อภิธาวถ ภทฺทนฺเต,
กสฺส อุชฺฌาปยามเส;
อาทิตฺตา นีหตํ ภณฺฑํ,
ปุน ฑยฺหิตุมิจฺฉสี”ติ.