10.1.8 สุทตฺตสุตฺต
เอกํ สมยํ ภควา ราชคเห วิหรติ สีตวเน. เตน โข ปน สมเยน อนาถปิณฺฑิโก คหปติ ราชคหํ อนุปฺปตฺโต โหติ เกนจิเทว กรณีเยน. อสฺโสสิ โข อนาถปิณฺฑิโก คหปติ— “พุทฺโธ กิร โลเก อุปฺปนฺโน”ติ. ตาวเทว จ ปน ภควนฺตํ ทสฺสนาย อุปสงฺกมิตุกาโม โหติ. อถสฺส อนาถปิณฺฑิกสฺส คหปติสฺส เอตทโหสิ— “อกาโล โข อชฺช ภควนฺตํ ทสฺสนาย อุปสงฺกมิตุํ. เสฺว ทานาหํ กาเลน ภควนฺตํ ทสฺสนาย คมิสฺสามี”ติ พุทฺธคตาย สติยา นิปชฺชิ. รตฺติยา สุทํ ติกฺขตฺตุํ วุฏฺฐาสิ ปภาตนฺติ มญฺญมาโน. อถ โข อนาถปิณฺฑิโก คหปติ เยน สิวถิกทฺวารํ เตนุปสงฺกมิ. อมนุสฺสา ทฺวารํ วิวริํสุ. อถ โข อนาถปิณฺฑิกสฺส คหปติสฺส นครมฺหา นิกฺขมนฺตสฺส อาโลโก อนฺตรธายิ, อนฺธกาโร ปาตุรโหสิ, ภยํ ฉมฺภิตตฺตํ โลมหํโส อุทปาทิ, ตโตว ปุน นิวตฺติตุกาโม อโหสิ. อถ โข สิวโก ยกฺโข อนฺตรหิโต สทฺทมนุสฺสาเวสิ—
“สตํ หตฺถี สตํ อสฺสา,
สตํ อสฺสตรีรถา;
สตํ กญฺญาสหสฺสานิ,
อามุกฺกมณิกุณฺฑลา;
เอกสฺส ปทวีติหารสฺส,
กลํ นาคฺฆนฺติ โสฬสิํ.
อภิกฺกม คหปติ,
อภิกฺกม คหปติ;
อภิกฺกมนํ เต เสโยฺย,
โน ปฏิกฺกมนนฺ”ติ.
อถ โข อนาถปิณฺฑิกสฺส คหปติสฺส อนฺธกาโร อนฺตรธายิ, อาโลโก ปาตุรโหสิ, ยํ อโหสิ ภยํ ฉมฺภิตตฺตํ โลมหํโส, โส ปฏิปฺปสฺสมฺภิ. ทุติยมฺปิ โข อนาถปิณฺฑิกสฺส คหปติสฺส อาโลโก อนฺตรธายิ, อนฺธกาโร ปาตุรโหสิ, ภยํ ฉมฺภิตตฺตํ โลมหํโส อุทปาทิ, ตโตว ปุน นิวตฺติตุกาโม อโหสิ. ทุติยมฺปิ โข สิวโก ยกฺโข อนฺตรหิโต สทฺทมนุสฺสาเวสิ—
“สตํ หตฺถี สตํ อสฺสา,
_ …เป… _
กลํ นาคฺฆนฺติ โสฬสิํ.
อภิกฺกม คหปติ,
อภิกฺกม คหปติ;
อภิกฺกมนํ เต เสโยฺย,
โน ปฏิกฺกมนนฺ”ติ.
อถ โข อนาถปิณฺฑิกสฺส คหปติสฺส อนฺธกาโร อนฺตรธายิ, อาโลโก ปาตุรโหสิ, ยํ อโหสิ ภยํ ฉมฺภิตตฺตํ โลมหํโส, โส ปฏิปฺปสฺสมฺภิ. ตติยมฺปิ โข อนาถปิณฺฑิกสฺส คหปติสฺส อาโลโก อนฺตรธายิ, อนฺธกาโร ปาตุรโหสิ, ภยํ ฉมฺภิตตฺตํ โลมหํโส อุทปาทิ, ตโตว ปุน นิวตฺติตุกาโม อโหสิ. ตติยมฺปิ โข สิวโก ยกฺโข อนฺตรหิโต สทฺทมนุสฺสาเวสิ—
“สตํ หตฺถี สตํ อสฺสา,
_ …เป… _
กลํ นาคฺฆนฺติ โสฬสิํ.
อภิกฺกม คหปติ,
อภิกฺกม คหปติ;
อภิกฺกมนํ เต เสโยฺย,
โน ปฏิกฺกมนนฺ”ติ.
อถ โข อนาถปิณฺฑิกสฺส คหปติสฺส อนฺธกาโร อนฺตรธายิ, อาโลโก ปาตุรโหสิ, ยํ อโหสิ ภยํ ฉมฺภิตตฺตํ โลมหํโส, โส ปฏิปฺปสฺสมฺภิ. อถ โข อนาถปิณฺฑิโก คหปติ เยน สีตวนํ เยน ภควา เตนุปสงฺกมิ.
เตน โข ปน สมเยน ภควา รตฺติยา ปจฺจูสสมยํ ปจฺจุฏฺฐาย อพฺโภกาเส จงฺกมติ. อทฺทสา โข ภควา อนาถปิณฺฑิกํ คหปติํ ทูรโตว อาคจฺฉนฺตํ. ทิสฺวาน จงฺกมา โอโรหิตฺวา ปญฺญตฺเต อาสเน นิสีทิ. นิสชฺช โข ภควา อนาถปิณฺฑิกํ คหปติํ เอตทโวจ— “เอหิ, สุทตฺตา”ติ. อถ โข อนาถปิณฺฑิโก คหปติ, นาเมน มํ ภควา อาลปตีติ, หฏฺโฐ อุทคฺโค ตตฺเถว ภควโต ปาเทสุ สิรสา นิปติตฺวา ภควนฺตํ เอตทโวจ— “กจฺจิ, ภนฺเต, ภควา สุขมสยิตฺถา”ติ?
“สพฺพทา เว สุขํ เสติ,
พฺราหฺมโณ ปรินิพฺพุโต;
โย น ลิมฺปติ กาเมสุ,
สีติภูโต นิรูปธิ.
สพฺพา อาสตฺติโย เฉตฺวา,
วิเนยฺย หทเย ทรํ;
อุปสนฺโต สุขํ เสติ,_
สนฺติํ ปปฺปุยฺย เจตสา”ติ.