11.3.1 เฉตฺวาสุตฺต
267.
1683
สาวตฺถิยํ เชตวเน. อถ โข สกฺโก เทวานมินฺโท เยน ภควา เตนุปสงฺกมิ; อุปสงฺกมิตฺวา ภควนฺตํ อภิวาเทตฺวา เอกมนฺตํ อฏฺฐาสิ. เอกมนฺตํ ฐิโต โข สกฺโก เทวานมินฺโท ภควนฺตํ คาถาย อชฺฌภาสิ—
1684
“กิํสุ เฉตฺวา สุขํ เสติ,
กิํสุ เฉตฺวา น โสจติ;
กิสฺสสฺสุ เอกธมฺมสฺส,
วธํ โรเจสิ โคตมา”ติ.
1685
“โกธํ เฉตฺวา สุขํ เสติ,
โกธํ เฉตฺวา น โสจติ;
โกธสฺส วิสมูลสฺส,
มธุรคฺคสฺส วาสว;
วธํ อริยา ปสํสนฺติ,
ตญฺหิ เฉตฺวา น โสจตี”ติ.