7.2.4 มหาสาลสุตฺต
สาวตฺถินิทานํ. อถ โข อญฺญตโร พฺราหฺมณมหาสาโล ลูโข ลูขปาวุรโณ เยน ภควา เตนุปสงฺกมิ; อุปสงฺกมิตฺวา ภควตา สทฺธิํ สมฺโมทิ. สมฺโมทนียํ กถํ สารณียํ วีติสาเรตฺวา เอกมนฺตํ นิสีทิ. เอกมนฺตํ นิสินฺนํ โข ตํ พฺราหฺมณมหาสาลํ ภควา เอตทโวจ— “กิํ นุ ตฺวํ, พฺราหฺมณ, ลูโข ลูขปาวุรโณ”ติ? “อิธ เม, โภ โคตม, จตฺตาโร ปุตฺตา. เต มํ ทาเรหิ สมฺปุจฺฉ ฆรา นิกฺขาเมนฺตี”ติ. “เตน หิ ตฺวํ, พฺราหฺมณ, อิมา คาถาโย ปริยาปุณิตฺวา สภายํ มหาชนกาเย สนฺนิปติเต ปุตฺเตสุ จ สนฺนิสินฺเนสุ ภาสสฺสุ—
‘เยหิ ชาเตหิ นนฺทิสฺสํ,
เยสญฺจ ภวมิจฺฉิสํ;
เต มํ ทาเรหิ สมฺปุจฺฉ,
สาว วาเรนฺติ สูกรํ.
อสนฺตา กิร มํ ชมฺมา,
ตาต ตาตาติ ภาสเร;
รกฺขสา ปุตฺตรูเปน,
เต ชหนฺติ วโยคตํ.
อโสฺสว ชิณฺโณ นิพฺโภโค,
ขาทนา อปนียติ;
พาลกานํ ปิตา เถโร,
ปราคาเรสุ ภิกฺขติ.
ทณฺโฑว กิร เม เสโยฺย,
ยญฺเจ ปุตฺตา อนสฺสวา;
จณฺฑมฺปิ โคณํ วาเรติ,
อโถ จณฺฑมฺปิ กุกฺกุรํ.
อนฺธกาเร ปุเร โหติ,
คมฺภีเร คาธเมธติ;
ทณฺฑสฺส อานุภาเวน,
ขลิตฺวา ปติติฏฺฐตี’”ติ.
อถ โข โส พฺราหฺมณมหาสาโล ภควโต สนฺติเก อิมา คาถาโย ปริยาปุณิตฺวา สภายํ มหาชนกาเย สนฺนิปติเต ปุตฺเตสุ จ สนฺนิสินฺเนสุ อภาสิ—
“เยหิ ชาเตหิ นนฺทิสฺสํ,
เยสญฺจ ภวมิจฺฉิสํ;
เต มํ ทาเรหิ สมฺปุจฺฉ,
สาว วาเรนฺติ สูกรํ.
อสนฺตา กิร มํ ชมฺมา,
ตาต ตาตาติ ภาสเร;
รกฺขสา ปุตฺตรูเปน,
เต ชหนฺติ วโยคตํ.
อโสฺสว ชิณฺโณ นิพฺโภโค,
ขาทนา อปนียติ;
พาลกานํ ปิตา เถโร,
ปราคาเรสุ ภิกฺขติ.
ทณฺโฑว กิร เม เสโยฺย,
ยญฺเจ ปุตฺตา อนสฺสวา;
จณฺฑมฺปิ โคณํ วาเรติ,
อโถ จณฺฑมฺปิ กุกฺกุรํ.
อนฺธกาเร ปุเร โหติ,
คมฺภีเร คาธเมธติ;
ทณฺฑสฺส อานุภาเวน,
ขลิตฺวา ปติติฏฺฐตี”ติ.
อถ โข นํ พฺราหฺมณมหาสาลํ ปุตฺตา ฆรํ เนตฺวา นฺหาเปตฺวา ปจฺเจกํ ทุสฺสยุเคน อจฺฉาเทสุํ. อถ โข โส พฺราหฺมณมหาสาโล เอกํ ทุสฺสยุคํ อาทาย เยน ภควา เตนุปสงฺกมิ; อุปสงฺกมิตฺวา ภควตา สทฺธิํ สมฺโมทิ. สมฺโมทนียํ กถํ สารณียํ วีติสาเรตฺวา เอกมนฺตํ นิสีทิ. เอกมนฺตํ นิสินฺโน โข พฺราหฺมณมหาสาโล ภควนฺตํ เอตทโวจ— “มยํ, โภ โคตม, พฺราหฺมณา นาม อาจริยสฺส อาจริยธนํ ปริเยสาม. ปฏิคฺคณฺหตุ เม ภวํ โคตโม อาจริยธนนฺ”ติ. ปฏิคฺคเหสิ ภควา อนุกมฺปํ อุปาทาย. อถ โข โส พฺราหฺมณมหาสาโล ภควนฺตํ เอตทโวจ— “อภิกฺกนฺตํ, โภ โคตม …เป… อุปาสกํ มํ ภวํ โคตโม ธาเรตุ อชฺชตคฺเค ปาณุเปตํ สรณํ คตนฺ”ติ.