3.11 ตติยนวก
อิธ ปน, ภิกฺขเว, ภิกฺขุ สมฺพหุลา สํฆาทิเสสา อาปตฺติโย อาปชฺชติ ปริมาณมฺปิ อปริมาณมฺปิ …เป… ววตฺถิตมฺปิ สมฺภินฺนมฺปิ. โส สํฆํ ตาสํ อาปตฺตีนํ สโมธานปริวาสํ ยาจติ. ตสฺส สํโฆ ตาสํ อาปตฺตีนํ สโมธานปริวาสํ เทติ. โส ปริวสนฺโต อนฺตรา สมฺพหุลา สํฆาทิเสสา อาปตฺติโย อาปชฺชติ ปริมาณาโย อปฺปฏิจฺฉนฺนาโย. โส สํฆํ อนฺตราอาปตฺตีนํ มูลายปฏิกสฺสนํ ยาจติ. ตํ สํโฆ อนฺตราอาปตฺตีนํ มูลาย ปฏิกสฺสติ อธมฺมิเกน กมฺเมน กุปฺเปน อฏฺฐานารเหน, อธมฺเมน สโมธานปริวาสํ เทติ. โส ปริวสามีติ มญฺญมาโน อนฺตรา สมฺพหุลา สํฆาทิเสสา อาปตฺติโย อาปชฺชติ ปริมาณาโย อปฺปฏิจฺฉนฺนาโย. โส ตสฺมิํ ภูมิยํ ฐิโต ปุริมาอาปตฺตีนํ อนฺตราอาปตฺติโย สรติ, อปราอาปตฺตีนํ อนฺตราอาปตฺติโย สรติ. ตสฺส เอวํ โหติ— ‘อหํ โข สมฺพหุลา สํฆาทิเสสา อาปตฺติโย อาปชฺชิํ ปริมาณมฺปิ อปริมาณมฺปิ …เป… ววตฺถิตมฺปิ สมฺภินฺนมฺปิ. โสหํ สํฆํ ตาสํ อาปตฺตีนํ สโมธานปริวาสํ ยาจิํ. ตสฺส เม สํโฆ ตาสํ อาปตฺตีนํ สโมธานปริวาสํ อทาสิ. โสหํ ปริวสนฺโต อนฺตรา สมฺพหุลา สํฆาทิเสสา อาปตฺติโย อาปชฺชิํ ปริมาณาโย อปฺปฏิจฺฉนฺนาโย. โสหํ สํฆํ อนฺตราอาปตฺตีนํ มูลายปฏิกสฺสนํ ยาจิํ. ตํ มํ สํโฆ อนฺตราอาปตฺตีนํ มูลาย ปฏิกสฺสิ อธมฺมิเกน กมฺเมน กุปฺเปน อฏฺฐานารเหน, อธมฺเมน สโมธานปริวาสํ อทาสิ. โสหํ ปริวสามีติ มญฺญมาโน อนฺตรา สมฺพหุลา สํฆาทิเสสา อาปตฺติโย อาปชฺชิํ ปริมาณาโย อปฺปฏิจฺฉนฺนาโย. โสหํ ตสฺมิํ ภูมิยํ ฐิโต ปุริมาอาปตฺตีนํ อนฺตราอาปตฺติโย สรามิ, อปราอาปตฺตีนํ อนฺตราอาปตฺติโย สรามิ. ยนฺนูนาหํ สํฆํ ปุริมาอาปตฺตีนํ อนฺตราอาปตฺตีนญฺจ อปราอาปตฺตีนํ อนฺตราอาปตฺตีนญฺจ มูลายปฏิกสฺสนํ ยาเจยฺยํ ธมฺมิเกน กมฺเมน อกุปฺเปน ฐานารเหน, ธมฺเมน สโมธานปริวาสํ; ธมฺเมน มานตฺตํ, ธมฺเมน อพฺภานนฺ’ติ. โส สํฆํ ปุริมาอาปตฺตีนํ อนฺตราอาปตฺตีนญฺจ, อปราอาปตฺตีนํ อนฺตราอาปตฺตีนญฺจ, มูลายปฏิกสฺสนํ ยาจติ ธมฺมิเกน กมฺเมน อกุปฺเปน ฐานารเหน, ธมฺเมน สโมธานปริวาสํ; ธมฺเมน มานตฺตํ, ธมฺเมน อพฺภานํ. ตํ สํโฆ ปุริมาอาปตฺตีนํ อนฺตราอาปตฺตีนญฺจ, อปราอาปตฺตีนํ อนฺตราอาปตฺตีนญฺจ, มูลาย ปฏิกสฺสติ ธมฺมิเกน กมฺเมน อกุปฺเปน ฐานารเหน, ธมฺเมน สโมธานปริวาสํ เทติ; ธมฺเมน มานตฺตํ เทติ, ธมฺเมน อพฺเภติ. โส, ภิกฺขเว, ภิกฺขุ วิสุทฺโธ ตาหิ อาปตฺตีหิ. (1)
อิธ ปน, ภิกฺขเว, ภิกฺขุ สมฺพหุลา สํฆาทิเสสา อาปตฺติโย อาปชฺชติ ปริมาณมฺปิ อปริมาณมฺปิ …เป… ววตฺถิตมฺปิ สมฺภินฺนมฺปิ. โส สํฆํ ตาสํ อาปตฺตีนํ สโมธานปริวาสํ ยาจติ. ตสฺส สํโฆ ตาสํ อาปตฺตีนํ สโมธานปริวาสํ เทติ. โส ปริวสนฺโต อนฺตรา สมฺพหุลา สํฆาทิเสสา อาปตฺติโย อาปชฺชติ ปริมาณา ปฏิจฺฉนฺนาโย. โส สํฆํ อนฺตราอาปตฺตีนํ มูลายปฏิกสฺสนํ ยาจติ. ตํ สํโฆ อนฺตราอาปตฺตีนํ มูลาย ปฏิกสฺสติ, อธมฺมิเกน กมฺเมน กุปฺเปน อฏฺฐานารเหน, อธมฺเมน สโมธานปริวาสํ เทติ. โส ปริวสามีติ มญฺญมาโน อนฺตรา สมฺพหุลา สํฆาทิเสสา อาปตฺติโย อาปชฺชติ ปริมาณา ปฏิจฺฉนฺนาโย. โส ตสฺมิํ ภูมิยํ ฐิโต ปุริมาอาปตฺตีนํ อนฺตราอาปตฺติโย สรติ, อปราอาปตฺตีนํ อนฺตราอาปตฺติโย สรติ. ตสฺส เอวํ โหติ— ‘อหํ โข สมฺพหุลา สํฆาทิเสสา อาปตฺติโย อาปชฺชิํ ปริมาณมฺปิ อปริมาณมฺปิ …เป… ววตฺถิตมฺปิ สมฺภินฺนมฺปิ. โสหํ สํฆํ ตาสํ อาปตฺตีนํ สโมธานปริวาสํ ยาจิํ. ตสฺส เม สํโฆ ตาสํ อาปตฺตีนํ สโมธานปริวาสํ อทาสิ. โสหํ ปริวสนฺโต อนฺตรา สมฺพหุลา สํฆาทิเสสา อาปตฺติโย อาปชฺชิํ ปริมาณา ปฏิจฺฉนฺนาโย. โสหํ สํฆํ อนฺตราอาปตฺตีนํ มูลายปฏิกสฺสนํ ยาจิํ. ตํ มํ สํโฆ อนฺตราอาปตฺตีนํ มูลาย ปฏิกสฺสิ, อธมฺมิเกน กมฺเมน กุปฺเปน อฏฺฐานารเหน, อธมฺเมน สโมธานปริวาสํ อทาสิ. โสหํ ปริวสามีติ มญฺญมาโน อนฺตรา สมฺพหุลา สํฆาทิเสสา อาปตฺติโย อาปชฺชิํ ปริมาณา ปฏิจฺฉนฺนาโย. โสหํ ตสฺมิํ ภูมิยํ ฐิโต ปุริมาอาปตฺตีนํ อนฺตราอาปตฺติโย สรามิ, อปราอาปตฺตีนํ อนฺตราอาปตฺติโย สรามิ. ยนฺนูนาหํ สํฆํ ปุริมาอาปตฺตีนํ อนฺตราอาปตฺตีนญฺจ, อปราอาปตฺตีนํ อนฺตราอาปตฺตีนญฺจ, มูลายปฏิกสฺสนํ ยาเจยฺยํ ธมฺมิเกน กมฺเมน อกุปฺเปน ฐานารเหน, ธมฺเมน สโมธานปริวาสํ, ธมฺเมน มานตฺตํ, ธมฺเมน อพฺภานนฺ’ติ. โส สํฆํ ปุริมาอาปตฺตีนํ อนฺตราอาปตฺตีนญฺจ, อปราอาปตฺตีนํ อนฺตราอาปตฺตีนญฺจ มูลายปฏิกสฺสนํ ยาจติ ธมฺมิเกน กมฺเมน อกุปฺเปน ฐานารเหน, ธมฺเมน สโมธานปริวาสํ, ธมฺเมน มานตฺตํ, ธมฺเมน อพฺภานํ. ตํ สํโฆ ปุริมาอาปตฺตีนํ อนฺตราอาปตฺตีนญฺจ, อปราอาปตฺตีนํ อนฺตราอาปตฺตีนญฺจ, มูลาย ปฏิกสฺสติ ธมฺมิเกน กมฺเมน อกุปฺเปน ฐานารเหน, ธมฺเมน สโมธานปริวาสํ เทติ, ธมฺเมน มานตฺตํ เทติ, ธมฺเมน อพฺเภติ. โส, ภิกฺขเว, ภิกฺขุ วิสุทฺโธ ตาหิ อาปตฺตีหิ. (2)
อิธ ปน, ภิกฺขเว, ภิกฺขุ สมฺพหุลา สํฆาทิเสสา อาปตฺติโย อาปชฺชติ ปริมาณมฺปิ อปริมาณมฺปิ …เป… ววตฺถิตมฺปิ สมฺภินฺนมฺปิ. โส สํฆํ ตาสํ อาปตฺตีนํ สโมธานปริวาสํ ยาจติ. ตสฺส สํโฆ ตาสํ อาปตฺตีนํ สโมธานปริวาสํ เทติ. โส ปริวสนฺโต อนฺตรา สมฺพหุลา สํฆาทิเสสา อาปตฺติโย อาปชฺชติ ปริมาณา ปฏิจฺฉนฺนาโยปิ อปฺปฏิจฺฉนฺนาโยปิ. โส สํฆํ อนฺตราอาปตฺตีนํ มูลายปฏิกสฺสนํ ยาจติ. ตํ สํโฆ อนฺตราอาปตฺตีนํ มูลาย ปฏิกสฺสติ อธมฺมิเกน กมฺเมน กุปฺเปน อฏฺฐานารเหน, อธมฺเมน สโมธานปริวาสํ เทติ. โส ปริวสามีติ มญฺญมาโน อนฺตรา สมฺพหุลา สํฆาทิเสสา อาปตฺติโย อาปชฺชติ ปริมาณา ปฏิจฺฉนฺนาโยปิ อปฺปฏิจฺฉนฺนาโยปิ. โส ตสฺมิํ ภูมิยํ ฐิโต ปุริมาอาปตฺตีนํ อนฺตราอาปตฺติโย สรติ, อปราอาปตฺตีนํ อนฺตราอาปตฺติโย สรติ. ตสฺส เอวํ โหติ— ‘อหํ โข สมฺพหุลา สํฆาทิเสสา อาปตฺติโย อาปชฺชิํ ปริมาณมฺปิ อปริมาณมฺปิ …เป… ววตฺถิตมฺปิ สมฺภินฺนมฺปิ. โสหํ สํฆํ ตาสํ อาปตฺตีนํ สโมธานปริวาสํ ยาจิํ. ตสฺส เม สํโฆ ตาสํ อาปตฺตีนํ สโมธานปริวาสํ อทาสิ. โสหํ ปริวสนฺโต อนฺตรา สมฺพหุลา สํฆาทิเสสา อาปตฺติโย อาปชฺชิํ ปริมาณา ปฏิจฺฉนฺนาโยปิ อปฺปฏิจฺฉนฺนาโยปิ. โสหํ สํฆํ อนฺตราอาปตฺตีนํ มูลายปฏิกสฺสนํ ยาจิํ. ตํ มํ สํโฆ อนฺตราอาปตฺตีนํ มูลาย ปฏิกสฺสิ อธมฺมิเกน กมฺเมน กุปฺเปน อฏฺฐานารเหน, อธมฺเมน สโมธานปริวาสํ อทาสิ. โสหํ ปริวสามีติ มญฺญมาโน อนฺตรา สมฺพหุลา สํฆาทิเสสา อาปตฺติโย อาปชฺชิํ ปริมาณา ปฏิจฺฉนฺนาโยปิ อปฺปฏิจฺฉนฺนาโยปิ. โสหํ ตสฺมิํ ภูมิยํ ฐิโต ปุริมาอาปตฺตีนํ อนฺตราอาปตฺติโย สรามิ, อปราอาปตฺตีนํ อนฺตราอาปตฺติโย สรามิ. ยนฺนูนาหํ สํฆํ ปุริมาอาปตฺตีนํ อนฺตราอาปตฺตีนญฺจ, อปราอาปตฺตีนํ อนฺตราอาปตฺตีนญฺจ, มูลายปฏิกสฺสนํ ยาเจยฺยํ ธมฺมิเกน กมฺเมน อกุปฺเปน ฐานารเหน, ธมฺเมน สโมธานปริวาสํ, ธมฺเมน มานตฺตํ, ธมฺเมน อพฺภานนฺ’ติ. โส สํฆํ ปุริมาอาปตฺตีนํ อนฺตราอาปตฺตีนญฺจ, อปราอาปตฺตีนํ อนฺตราอาปตฺตีนญฺจ, มูลายปฏิกสฺสนํ ยาจติ ธมฺมิเกน กมฺเมน อกุปฺเปน ฐานารเหน, ธมฺเมน สโมธานปริวาสํ, ธมฺเมน มานตฺตํ, ธมฺเมน อพฺภานํ. ตํ สํโฆ ปุริมาอาปตฺตีนํ อนฺตราอาปตฺตีนญฺจ, อปราอาปตฺตีนํ อนฺตราอาปตฺตีนญฺจ, มูลาย ปฏิกสฺสติ ธมฺมิเกน กมฺเมน อกุปฺเปน ฐานารเหน, ธมฺเมน สโมธานปริวาสํ เทติ, ธมฺเมน มานตฺตํ เทติ, ธมฺเมน อพฺเภติ. โส, ภิกฺขเว, ภิกฺขุ วิสุทฺโธ ตาหิ อาปตฺตีหิ. (3)
อิธ ปน, ภิกฺขเว, ภิกฺขุ สมฺพหุลา สํฆาทิเสสา อาปตฺติโย อาปชฺชติ ปริมาณมฺปิ อปริมาณมฺปิ …เป… ววตฺถิตมฺปิ สมฺภินฺนมฺปิ. โส สํฆํ ตาสํ อาปตฺตีนํ สโมธานปริวาสํ ยาจติ. ตสฺส สํโฆ ตาสํ อาปตฺตีนํ สโมธานปริวาสํ เทติ. โส ปริวสนฺโต อนฺตรา สมฺพหุลา สํฆาทิเสสา อาปตฺติโย อาปชฺชติ อปริมาณาโย อปฺปฏิจฺฉนฺนาโย …เป… อปริมาณาโย ปฏิจฺฉนฺนาโย …เป… อปริมาณาโย ปฏิจฺฉนฺนาโยปิ อปฺปฏิจฺฉนฺนาโยปิ …เป… ปริมาณาโยปิ อปริมาณาโยปิ อปฺปฏิจฺฉนฺนาโย. โส สํฆํ อนฺตราอาปตฺตีนํ มูลายปฏิกสฺสนํ ยาจติ. ตํ สํโฆ อนฺตราอาปตฺตีนํ มูลาย ปฏิกสฺสิ อธมฺมิเกน กมฺเมน กุปฺเปน อฏฺฐานารเหน, อธมฺเมน สโมธานปริวาสํ เทติ. โส ปริวสามีติ มญฺญมาโน …เป… ตํ สํโฆ ปุริมาอาปตฺตีนํ อนฺตราอาปตฺตีนญฺจ, อปราอาปตฺตีนํ อนฺตราอาปตฺตีนญฺจ, มูลาย ปฏิกสฺสติ ธมฺมิเกน กมฺเมน อกุปฺเปน ฐานารเหน, ธมฺเมน สโมธานปริวาสํ เทติ, ธมฺเมน มานตฺตํ เทติ, ธมฺเมน อพฺเภติ. โส, ภิกฺขเว, ภิกฺขุ วิสุทฺโธ ตาหิ อาปตฺตีหิ. (4–7)
อิธ ปน, ภิกฺขเว, ภิกฺขุ สมฺพหุลา สํฆาทิเสสา อาปตฺติโย อาปชฺชติ ปริมาณมฺปิ อปริมาณมฺปิ …เป… ววตฺถิตมฺปิ สมฺภินฺนมฺปิ. โส สํฆํ ตาสํ อาปตฺตีนํ สโมธานปริวาสํ ยาจติ. ตสฺส สํโฆ ตาสํ อาปตฺตีนํ สโมธานปริวาสํ เทติ. โส ปริวสนฺโต อนฺตรา สมฺพหุลา สํฆาทิเสสา อาปตฺติโย อาปชฺชติ ปริมาณาโยปิ อปริมาณาโยปิ ปฏิจฺฉนฺนาโย. โส สํฆํ อนฺตราอาปตฺตีนํ มูลายปฏิกสฺสนํ ยาจติ. ตํ สํโฆ อนฺตราอาปตฺตีนํ มูลาย ปฏิกสฺสติ อธมฺมิเกน กมฺเมน กุปฺเปน อฏฺฐานารเหน, อธมฺเมน สโมธานปริวาสํ เทติ. โส ปริวสามีติ มญฺญมาโน อนฺตรา สมฺพหุลา สํฆาทิเสสา อาปตฺติโย อาปชฺชติ ปริมาณาโยปิ อปริมาณาโยปิ ปฏิจฺฉนฺนาโย. โส ตสฺมิํ ภูมิยํ ฐิโต ปุริมาอาปตฺตีนํ อนฺตราอาปตฺติโย สรติ, อปราอาปตฺตีนํ อนฺตราอาปตฺติโย สรติ. ตสฺส เอวํ โหติ— ‘อหํ โข สมฺพหุลา สํฆาทิเสสา อาปตฺติโย อาปชฺชิํ ปริมาณมฺปิ อปริมาณมฺปิ …เป… ววตฺถิตมฺปิ สมฺภินฺนมฺปิ. โสหํ สํฆํ ตาสํ อาปตฺตีนํ สโมธานปริวาสํ ยาจิํ. ตสฺส เม สํโฆ ตาสํ อาปตฺตีนํ สโมธานปริวาสํ อทาสิ. โสหํ ปริวสนฺโต อนฺตรา สมฺพหุลา สํฆาทิเสสา อาปตฺติโย อาปชฺชิํ ปริมาณาโยปิ อปริมาณาโยปิ ปฏิจฺฉนฺนาโย. โสหํ สํฆํ อนฺตราอาปตฺตีนํ มูลายปฏิกสฺสนํ ยาจิํ. ตํ มํ สํโฆ อนฺตราอาปตฺตีนํ มูลาย ปฏิกสฺสิ อธมฺมิเกน กมฺเมน กุปฺเปน อฏฺฐานารเหน, อธมฺเมน สโมธานปริวาสํ อทาสิ. โสหํ ปริวสามีติ มญฺญมาโน อนฺตรา สมฺพหุลา สํฆาทิเสสา อาปตฺติโย อาปชฺชิํ ปริมาณาโยปิ อปริมาณาโยปิ ปฏิจฺฉนฺนาโย. โสหํ ตสฺมิํ ภูมิยํ ฐิโต ปุริมาอาปตฺตีนํ อนฺตราอาปตฺติโย สรามิ, อปราอาปตฺตีนํ อนฺตราอาปตฺติโย สรามิ. ยนฺนูนาหํ สํฆํ ปุริมาอาปตฺตีนํ อนฺตราอาปตฺตีนญฺจ, อปราอาปตฺตีนํ อนฺตราอาปตฺตีนญฺจ, มูลายปฏิกสฺสนํ ยาเจยฺยํ ธมฺมิเกน กมฺเมน อกุปฺเปน ฐานารเหน, ธมฺเมน สโมธานปริวาสํ, ธมฺเมน มานตฺตํ, ธมฺเมน อพฺภานนฺ’ติ. โส สํฆํ ปุริมาอาปตฺตีนํ อนฺตราอาปตฺตีนญฺจ, อปราอาปตฺตีนํ อนฺตราอาปตฺตีนญฺจ, มูลายปฏิกสฺสนํ ยาจติ ธมฺมิเกน กมฺเมน อกุปฺเปน ฐานารเหน, ธมฺเมน สโมธานปริวาสํ, ธมฺเมน มานตฺตํ, ธมฺเมน อพฺภานํ. ตํ สํโฆ ปุริมาอาปตฺตีนํ อนฺตราอาปตฺตีนญฺจ, อปราอาปตฺตีนํ อนฺตราอาปตฺตีนญฺจ, มูลาย ปฏิกสฺสติ ธมฺมิเกน กมฺเมน อกุปฺเปน ฐานารเหน, ธมฺเมน สโมธานปริวาสํ เทติ, ธมฺเมน มานตฺตํ เทติ, ธมฺเมน อพฺเภติ. โส, ภิกฺขเว, ภิกฺขุ วิสุทฺโธ ตาหิ อาปตฺตีหิ. (8)
อิธ ปน, ภิกฺขเว, ภิกฺขุ สมฺพหุลา สํฆาทิเสสา อาปตฺติโย อาปชฺชติ ปริมาณมฺปิ อปริมาณมฺปิ …เป… ววตฺถิตมฺปิ สมฺภินฺนมฺปิ. โส สํฆํ ตาสํ อาปตฺตีนํ สโมธานปริวาสํ ยาจติ. ตสฺส สํโฆ ตาสํ อาปตฺตีนํ สโมธานปริวาสํ เทติ. โส ปริวสนฺโต อนฺตรา สมฺพหุลา สํฆาทิเสสา อาปตฺติโย อาปชฺชติ ปริมาณาโยปิ อปริมาณาโยปิ ปฏิจฺฉนฺนาโยปิ อปฺปฏิจฺฉนฺนาโยปิ. โส สํฆํ อนฺตราอาปตฺตีนํ มูลายปฏิกสฺสนํ ยาจติ. ตํ สํโฆ อนฺตราอาปตฺตีนํ มูลาย ปฏิกสฺสติ อธมฺมิเกน กมฺเมน กุปฺเปน อฏฺฐานารเหน, อธมฺเมน สโมธานปริวาสํ เทติ. โส ปริวสามีติ มญฺญมาโน อนฺตรา สมฺพหุลา สํฆาทิเสสา อาปตฺติโย อาปชฺชติ ปริมาณาโยปิ อปริมาณาโยปิ ปฏิจฺฉนฺนาโยปิ อปฺปฏิจฺฉนฺนาโยปิ. โส ตสฺมิํ ภูมิยํ ฐิโต ปุริมาอาปตฺตีนํ อนฺตราอาปตฺติโย สรติ, อปราอาปตฺตีนํ อนฺตราอาปตฺติโย สรติ. ตสฺส เอวํ โหติ— ‘อหํ โข สมฺพหุลา สํฆาทิเสสา อาปตฺติโย อาปชฺชิํ ปริมาณมฺปิ อปริมาณมฺปิ …เป… ววตฺถิตมฺปิ สมฺภินฺนมฺปิ. โสหํ สํฆํ ตาสํ อาปตฺตีนํ สโมธานปริวาสํ ยาจิํ. ตสฺส เม สํโฆ ตาสํ อาปตฺตีนํ สโมธานปริวาสํ อทาสิ. โสหํ ปริวสนฺโต อนฺตรา สมฺพหุลา สํฆาทิเสสา อาปตฺติโย อาปชฺชิํ ปริมาณาโยปิ อปริมาณาโยปิ ปฏิจฺฉนฺนาโยปิ อปฺปฏิจฺฉนฺนาโยปิ. โสหํ สํฆํ อนฺตราอาปตฺตีนํ มูลายปฏิกสฺสนํ ยาจิํ. ตํ มํ สํโฆ อนฺตราอาปตฺตีนํ มูลาย ปฏิกสฺสิ อธมฺมิเกน กมฺเมน กุปฺเปน อฏฺฐานารเหน, อธมฺเมน สโมธานปริวาสํ อทาสิ. โสหํ ปริวสามีติ มญฺญมาโน อนฺตรา สมฺพหุลา สํฆาทิเสสา อาปตฺติโย อาปชฺชิํ ปริมาณาโยปิ อปริมาณาโยปิ ปฏิจฺฉนฺนาโยปิ อปฺปฏิจฺฉนฺนาโยปิ. โสหํ ตสฺมิํ ภูมิยํ ฐิโต ปุริมาอาปตฺตีนํ อนฺตราอาปตฺติโย สรามิ, อปราอาปตฺตีนํ อนฺตราอาปตฺติโย สรามิ. ยนฺนูนาหํ สํฆํ ปุริมาอาปตฺตีนํ อนฺตราอาปตฺตีนญฺจ, อปราอาปตฺตีนํ อนฺตราอาปตฺตีนญฺจ, มูลายปฏิกสฺสนํ ยาเจยฺยํ ธมฺมิเกน กมฺเมน อกุปฺเปน ฐานารเหน, ธมฺเมน สโมธานปริวาสํ, ธมฺเมน มานตฺตํ, ธมฺเมน อพฺภานนฺ’ติ. โส สํฆํ ปุริมาอาปตฺตีนํ อนฺตราอาปตฺตีนญฺจ, อปราอาปตฺตีนํ อนฺตราอาปตฺตีนญฺจ, มูลาย ปฏิกสฺสนํ ยาจติ ธมฺมิเกน กมฺเมน อกุปฺเปน ฐานารเหน, ธมฺเมน สโมธานปริวาสํ, ธมฺเมน มานตฺตํ, ธมฺเมน อพฺภานํ. ตํ สํโฆ ปุริมาอาปตฺตีนํ อนฺตราอาปตฺตีนญฺจ, อปราอาปตฺตีนํ อนฺตราอาปตฺตีนญฺจ, มูลาย ปฏิกสฺสติ ธมฺมิเกน กมฺเมน อกุปฺเปน ฐานารเหน, ธมฺเมน สโมธานปริวาสํ เทติ, ธมฺเมน มานตฺตํ เทติ, ธมฺเมน อพฺเภติ. โส, ภิกฺขเว, ภิกฺขุ วิสุทฺโธ ตาหิ อาปตฺตีหิ”. (9)
ตติยนวกํ นิฏฺฐิตํ.
สมุจฺจยกฺขนฺธโก ตติโย.
ตสฺสุทฺทานํ
อปฺปฏิจฺฉนฺนา เอกาห,
ทฺวีห ตีห จตูห จ;
ปญฺจาหปกฺขทสนฺนํ,
อาปตฺติมาห มหามุนิ.
สุทฺธนฺโต จ วิพฺภมนฺโต,
ปริมาณมุขํ ทฺเว ภิกฺขู;
ตตฺถ สญฺญิโน ทฺเว ยถา,
เวมติกา ตเถว จ.
มิสฺสกทิฏฺฐิโน ทฺเว จ,
อสุทฺธเกกทิฏฺฐิโน;
ทฺเว เจว สุทฺธทิฏฺฐิโน.
ตเถว จ เอโก ฉาเทติ,
อถ มกฺขมเตน จ;
อุมฺมตฺตกเทสนญฺจ,_
มูลา อฏฺฐารส วิสุทฺธโต.
อาจริยานํ วิภชฺชปทานํ,
ตมฺพปณฺณิทีปปสาทกานํ;
มหาวิหารวาสีนํ,
วาจนา สทฺธมฺมฏฺฐิติยาติ.
สมุจฺจยกฺขนฺธโก นิฏฺฐิโต.