3.2.2 สพฺพจิรปฺปฏิจฺฉนฺนอคฺฆสโมธาน
เตน โข ปน สมเยน อญฺญตโร ภิกฺขุ สมฺพหุลา สํฆาทิเสสา อาปตฺติโย อาปนฺโน โหติ— เอกา อาปตฺติ เอกาหปฺปฏิจฺฉนฺนา, ทฺเว อาปตฺติโย ทฺวีหปฺปฏิจฺฉนฺนาโย, ติโสฺส อาปตฺติโย ตีหปฺปฏิจฺฉนฺนาโย, จตโสฺส อาปตฺติโย จตูหปฺปฏิจฺฉนฺนาโย, ปญฺจ อาปตฺติโย ปญฺจาหปฺปฏิจฺฉนฺนาโย, ฉ อาปตฺติโย ฉาหปฺปฏิจฺฉนฺนาโย, สตฺต อาปตฺติโย สตฺตาหปฺปฏิจฺฉนฺนาโย, อฏฺฐ อาปตฺติโย อฏฺฐาหปฺปฏิจฺฉนฺนาโย, นว อาปตฺติโย นวาหปฺปฏิจฺฉนฺนาโย, ทส อาปตฺติโย ทสาหปฺปฏิจฺฉนฺนาโย. โส ภิกฺขูนํ อาโรเจสิ— “อหํ, อาวุโส, สมฺพหุลา สํฆาทิเสสา อาปตฺติโย อาปชฺชิํ, เอกา อาปตฺติ เอกาหปฺปฏิจฺฉนฺนา …เป… ทส อาปตฺติโย ทสาหปฺปฏิจฺฉนฺนาโย. กถํ นุ โข มยา ปฏิปชฺชิตพฺพนฺ”ติ? ภควโต เอตมตฺถํ อาโรเจสุํ. “เตน หิ, ภิกฺขเว, สํโฆ ตสฺส ภิกฺขุโน ตาสํ อาปตฺตีนํ ยา อาปตฺติโย สพฺพจิรปฺปฏิจฺฉนฺนาโย ตาสํ อคฺเฆน สโมธานปริวาสํ เทตุ. เอวญฺจ ปน, ภิกฺขเว, ทาตพฺโพ—
เตน, ภิกฺขเว, ภิกฺขุนา สํฆํ อุปสงฺกมิตฺวา …เป… เอวมสฺส วจนีโย— ‘อหํ, ภนฺเต, สมฺพหุลา สํฆาทิเสสา อาปตฺติโย อาปชฺชิํ, เอกา อาปตฺติ เอกาหปฺปฏิจฺฉนฺนา …เป… ทส อาปตฺติโย ทสาหปฺปฏิจฺฉนฺนาโย. โสหํ, ภนฺเต, สํฆํ ตาสํ อาปตฺตีนํ ยา อาปตฺติโย สพฺพจิรปฺปฏิจฺฉนฺนาโย ตาสํ อคฺเฆน สโมธานปริวาสํ ยาจามี’ติ. ทุติยมฺปิ ยาจิตพฺโพ. ตติยมฺปิ ยาจิตพฺโพ. พฺยตฺเตน ภิกฺขุนา ปฏิพเลน สํโฆ ญาเปตพฺโพ—
‘สุณาตุ เม, ภนฺเต, สํโฆ. อยํ อิตฺถนฺนาโม ภิกฺขุ สมฺพหุลา สํฆาทิเสสา อาปตฺติโย อาปชฺชิ, เอกา อาปตฺติ เอกาหปฺปฏิจฺฉนฺนา …เป… ทส อาปตฺติโย ทสาหปฺปฏิจฺฉนฺนาโย. โส สํฆํ ตาสํ อาปตฺตีนํ ยา อาปตฺติโย สพฺพจิรปฺปฏิจฺฉนฺนาโย ตาสํ อคฺเฆน สโมธานปริวาสํ ยาจติ. ยทิ สํฆสฺส ปตฺตกลฺลํ สํโฆ อิตฺถนฺนามสฺส ภิกฺขุโน ตาสํ อาปตฺตีนํ ยา อาปตฺติโย สพฺพจิรปฺปฏิจฺฉนฺนาโย ตาสํ อคฺเฆน สโมธานปริวาสํ ทเทยฺย. เอสา ญตฺติ.
สุณาตุ เม, ภนฺเต, สํโฆ. อยํ อิตฺถนฺนาโม ภิกฺขุ สมฺพหุลา สํฆาทิเสสา อาปตฺติโย อาปชฺชิ— เอกา อาปตฺติ เอกาหปฺปฏิจฺฉนฺนา …เป… ทส อาปตฺติโย ทสาหปฺปฏิจฺฉนฺนาโย. โส สํฆํ ตาสํ อาปตฺตีนํ ยา อาปตฺติโย สพฺพจิรปฺปฏิจฺฉนฺนาโย ตาสํ อคฺเฆน สโมธานปริวาสํ ยาจติ. สํโฆ อิตฺถนฺนามสฺส ภิกฺขุโน ตาสํ อาปตฺตีนํ ยา อาปตฺติโย สพฺพจิรปฺปฏิจฺฉนฺนาโย ตาสํ อคฺเฆน สโมธานปริวาสํ เทติ. ยสฺสายสฺมโต ขมติ อิตฺถนฺนามสฺส ภิกฺขุโน ตาสํ อาปตฺตีนํ ยา อาปตฺติโย สพฺพจิรปฺปฏิจฺฉนฺนาโย ตาสํ อคฺเฆน สโมธานปริวาสสฺส ทานํ, โส ตุณฺหสฺส; ยสฺส นกฺขมติ, โส ภาเสยฺย.
ทุติยมฺปิ เอตมตฺถํ วทามิ …เป… ตติยมฺปิ เอตมตฺถํ วทามิ …เป… .
ทินฺโน สํเฆน อิตฺถนฺนามสฺส ภิกฺขุโน ตาสํ อาปตฺตีนํ ยา อาปตฺติโย สพฺพจิรปฺปฏิจฺฉนฺนาโย ตาสํ อคฺเฆน สโมธานปริวาโส. ขมติ สํฆสฺส, ตสฺมา ตุณฺหี, เอวเมตํ ธารยามี’”ติ.