3.2.3 ทฺเวมาสปริวาส
เตน โข ปน สมเยน อญฺญตโร ภิกฺขุ ทฺเว สํฆาทิเสสา อาปตฺติโย อาปนฺโน โหติ ทฺเวมาสปฺปฏิจฺฉนฺนาโย. ตสฺส เอตทโหสิ— “อหํ โข ทฺเว สํฆาทิเสสา อาปตฺติโย อาปชฺชิํ ทฺเวมาสปฺปฏิจฺฉนฺนาโย. ยนฺนูนาหํ สํฆํ เอกิสฺสา อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ ยาเจยฺยนฺ”ติ. โส สํฆํ เอกิสฺสา อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ ยาจิ. ตสฺส สํโฆ เอกิสฺสา อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ อทาสิ. ตสฺส ปริวสนฺตสฺส ลชฺชีธมฺโม โอกฺกมิ— “อหํ โข ทฺเว สํฆาทิเสสา อาปตฺติโย อาปชฺชิํ ทฺเวมาสปฺปฏิจฺฉนฺนาโย. ตสฺส เม เอตทโหสิ— ‘อหํ โข ทฺเว สํฆาทิเสสา อาปตฺติโย อาปชฺชิํ ทฺเวมาสปฺปฏิจฺฉนฺนาโย. ยนฺนูนาหํ สํฆํ เอกิสฺสา อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ ยาเจยฺยนฺ’ติ. โสหํ สํฆํ เอกิสฺสา อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ ยาจิํ. ตสฺส เม สํโฆ เอกิสฺสา อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ อทาสิ. ตสฺส เม ปริวสนฺตสฺส ลชฺชีธมฺโม โอกฺกมิ— ‘ยนฺนูนาหํ สํฆํ อิตริสฺสาปิ อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ ยาเจยฺยนฺ’”ติ.
โส ภิกฺขูนํ อาโรเจสิ— “อหํ, อาวุโส, ทฺเว สํฆาทิเสสา อาปตฺติโย อาปชฺชิํ ทฺเวมาสปฺปฏิจฺฉนฺนาโย. ตสฺส เม เอตทโหสิ— ‘อหํ โข ทฺเว สํฆาทิเสสา อาปตฺติโย อาปชฺชิํ ทฺเวมาสปฺปฏิจฺฉนฺนาโย. ยนฺนูนาหํ สํฆํ เอกิสฺสา อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ ยาเจยฺยนฺ’ติ. โสหํ สํฆํ เอกิสฺสา อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ ยาจิํ. ตสฺส เม สํโฆ เอกิสฺสา อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ อทาสิ. ตสฺส เม ปริวสนฺตสฺส ลชฺชีธมฺโม โอกฺกมิ— ‘อหํ โข ทฺเว สํฆาทิเสสา อาปตฺติโย อาปชฺชิํ ทฺเวมาสปฺปฏิจฺฉนฺนาโย. ตสฺส เม เอตทโหสิ— “อหํ โข ทฺเว สํฆาทิเสสา อาปตฺติโย อาปชฺชิํ ทฺเวมาสปฺปฏิจฺฉนฺนาโย. ยนฺนูนาหํ สํฆํ เอกิสฺสา อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ ยาเจยฺยนฺ”’ติ. โสหํ สํฆํ เอกิสฺสา อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ ยาจิํ. ตสฺส เม สํโฆ เอกิสฺสา อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ อทาสิ. ตสฺส เม ปริวสนฺตสฺส ลชฺชีธมฺโม โอกฺกมิ— ‘ยนฺนูนาหํ สํฆํ อิตริสฺสาปิ อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ ยาเจยฺยนฺ’ติ. กถํ นุ โข มยา ปฏิปชฺชิตพฺพนฺ”ติ? ภควโต เอตมตฺถํ อาโรเจสุํ. “เตน หิ, ภิกฺขเว, สํโฆ ตสฺส ภิกฺขุโน อิตริสฺสาปิ อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ เทตุ. เอวญฺจ ปน, ภิกฺขเว, ทาตพฺโพ—
เตน, ภิกฺขเว, ภิกฺขุนา สํฆํ อุปสงฺกมิตฺวา, เอกํสํ อุตฺตราสงฺคํ กริตฺวา, วุฑฺฒานํ ภิกฺขูนํ ปาเท วนฺทิตฺวา, อุกฺกุฏิกํ นิสีทิตฺวา, อญฺชลิํ ปคฺคเหตฺวา, เอวมสฺส วจนีโย— ‘อหํ, ภนฺเต, ทฺเว สํฆาทิเสสา อาปตฺติโย อาปชฺชิํ ทฺเวมาสปฺปฏิจฺฉนฺนาโย. ตสฺส เม เอตทโหสิ— “อหํ โข ทฺเว สํฆาทิเสสา อาปตฺติโย อาปชฺชิํ ทฺเวมาสปฺปฏิจฺฉนฺนาโย. ยนฺนูนาหํ สํฆํ เอกิสฺสา อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ ยาเจยฺยนฺ”ติ. โสหํ สํฆํ เอกิสฺสา อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ ยาจิํ. ตสฺส เม สํโฆ เอกิสฺสา อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ อทาสิ. ตสฺส เม ปริวสนฺตสฺส ลชฺชีธมฺโม โอกฺกมิ— “อหํ โข ทฺเว สํฆาทิเสสา อาปตฺติโย อาปชฺชิํ ทฺเวมาสปฺปฏิจฺฉนฺนาโย. ตสฺส เม เอตทโหสิ— อหํ โข ทฺเว สํฆาทิเสสา อาปตฺติโย อาปชฺชิํ ทฺเวมาสปฺปฏิจฺฉนฺนาโย. ยนฺนูนาหํ สํฆํ เอกิสฺสา อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ ยาเจยฺยนฺ”ติ. โสหํ สํฆํ เอกิสฺสา อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ ยาจิํ. ตสฺส เม สํโฆ เอกิสฺสา อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ อทาสิ. ตสฺส เม ปริวสนฺตสฺส ลชฺชีธมฺโม โอกฺกมิ— “ยนฺนูนาหํ สํฆํ อิตริสฺสาปิ อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ ยาเจยฺยนฺ”ติ. โสหํ, ภนฺเต, สํฆํ อิตริสฺสาปิ อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ ยาจามี’ติ.
ทุติยมฺปิ ยาจิตพฺโพ. ตติยมฺปิ ยาจิตพฺโพ. พฺยตฺเตน ภิกฺขุนา ปฏิพเลน สํโฆ ญาเปตพฺโพ—
‘สุณาตุ เม, ภนฺเต, สํโฆ. อยํ อิตฺถนฺนาโม ภิกฺขุ ทฺเว สํฆาทิเสสา อาปตฺติโย อาปชฺชิ ทฺเวมาสปฺปฏิจฺฉนฺนาโย. ตสฺส เอตทโหสิ— “อหํ โข ทฺเว สํฆาทิเสสา อาปตฺติโย อาปชฺชิํ ทฺเวมาสปฺปฏิจฺฉนฺนาโย. ยนฺนูนาหํ สํฆํ เอกิสฺสา อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ ยาเจยฺยนฺ”ติ. โส สํฆํ เอกิสฺสา อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ ยาจิ. ตสฺส สํโฆ เอกิสฺสา อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ อทาสิ. ตสฺส ปริวสนฺตสฺส ลชฺชีธมฺโม โอกฺกมิ— “อหํ โข ทฺเว สํฆาทิเสสา อาปตฺติโย อาปชฺชิํ ทฺเวมาสปฺปฏิจฺฉนฺนาโย. ตสฺส เม เอตทโหสิ— อหํ โข ทฺเว สํฆาทิเสสา อาปตฺติโย อาปชฺชิํ ทฺเวมาสปฺปฏิจฺฉนฺนาโย. ยนฺนูนาหํ สํฆํ เอกิสฺสา อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ ยาเจยฺยนฺ”ติ. โสหํ สํฆํ เอกิสฺสา อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ ยาจิํ. ตสฺส เม สํโฆ เอกิสฺสา อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ อทาสิ. ตสฺส เม ปริวสนฺตสฺส ลชฺชีธมฺโม โอกฺกมิ— “ยนฺนูนาหํ สํฆํ อิตริสฺสาปิ อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ ยาเจยฺยนฺ”ติ. โส สํฆํ อิตริสฺสาปิ อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ ยาจติ. ยทิ สํฆสฺส ปตฺตกลฺลํ, สํโฆ อิตฺถนฺนามสฺส ภิกฺขุโน อิตริสฺสาปิ อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ ทเทยฺย. เอสา ญตฺติ.
สุณาตุ เม, ภนฺเต, สํโฆ. อยํ อิตฺถนฺนาโม ภิกฺขุ ทฺเว สํฆาทิเสสา อาปตฺติโย อาปชฺชิ ทฺเวมาสปฺปฏิจฺฉนฺนาโย. ตสฺส เอตทโหสิ— “อหํ โข ทฺเว สํฆาทิเสสา อาปตฺติโย อาปชฺชิํ ทฺเวมาสปฺปฏิจฺฉนฺนาโย. ยนฺนูนาหํ สํฆํ เอกิสฺสา อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ ยาเจยฺยนฺ”ติ. โส สํฆํ เอกิสฺสา อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ ยาจิ. ตสฺส สํโฆ เอกิสฺสา อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ อทาสิ. ตสฺส ปริวสนฺตสฺส ลชฺชีธมฺโม โอกฺกมิ— “อหํ โข ทฺเว สํฆาทิเสสา อาปตฺติโย อาปชฺชิํ ทฺเวมาสปฺปฏิจฺฉนฺนาโย. ตสฺส เม เอตทโหสิ— อหํ โข ทฺเว สํฆาทิเสสา อาปตฺติโย อาปชฺชิํ ทฺเวมาสปฺปฏิจฺฉนฺนาโย. ยนฺนูนาหํ สํฆํ เอกิสฺสา อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ ยาเจยฺยนฺ”ติ. โสหํ สํฆํ เอกิสฺสา อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ ยาจิํ. ตสฺส เม สํโฆ เอกิสฺสา อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ อทาสิ. ตสฺส เม ปริวสนฺตสฺส ลชฺชีธมฺโม โอกฺกมิ— “ยนฺนูนาหํ สํฆํ อิตริสฺสาปิ อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ ยาเจยฺยนฺ”ติ. โส สํฆํ อิตริสฺสาปิ อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ ยาจติ. สํโฆ อิตฺถนฺนามสฺส ภิกฺขุโน อิตริสฺสาปิ อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ เทติ. ยสฺสายสฺมโต ขมติ อิตฺถนฺนามสฺส ภิกฺขุโน อิตริสฺสาปิ อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสสฺส ทานํ, โส ตุณฺหสฺส; ยสฺส นกฺขมติ, โส ภาเสยฺย.
ทุติยมฺปิ เอตมตฺถํ วทามิ …เป… ตติยมฺปิ เอตมตฺถํ วทามิ …เป… .
ทินฺโน สํเฆน อิตฺถนฺนามสฺส ภิกฺขุโน อิตริสฺสาปิ อาปตฺติยา ทฺเวมาสปฺปฏิจฺฉนฺนาย ทฺเวมาสปริวาโส. ขมติ สํฆสฺส, ตสฺมา ตุณฺหี, เอวเมตํ ธารยามี’ติ. เตน, ภิกฺขเว, ภิกฺขุนา ตทุปาทาย ทฺเว มาสา ปริวสิตพฺพา.