3.2.4 ทฺเวมาสาปริวสิตพฺพวิธิ
อิธ ปน, ภิกฺขเว, ภิกฺขุ ทฺเว สํฆาทิเสสา อาปตฺติโย อาปชฺชติ ทฺเวมาสปฺปฏิจฺฉนฺนาโย. ตสฺส เอวํ โหติ— ‘อหํ โข ทฺเว สํฆาทิเสสา อาปตฺติโย อาปชฺชิํ ทฺเวมาสปฺปฏิจฺฉนฺนาโย. ยนฺนูนาหํ สํฆํ เอกิสฺสา อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ ยาเจยฺยนฺ’ติ. โส สํฆํ เอกิสฺสา อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ ยาจติ. ตสฺส สํโฆ เอกิสฺสา อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ เทติ. ตสฺส ปริวสนฺตสฺส ลชฺชีธมฺโม โอกฺกมิ— ‘อหํ โข ทฺเว สํฆาทิเสสา อาปตฺติโย อาปชฺชิํ ทฺเวมาสปฺปฏิจฺฉนฺนาโย. ตสฺส เม เอตทโหสิ— “อหํ โข ทฺเว สํฆาทิเสสา อาปตฺติโย อาปชฺชิํ ทฺเวมาสปฺปฏิจฺฉนฺนาโย. ยนฺนูนาหํ สํฆํ เอกิสฺสา อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ ยาเจยฺยนฺ”ติ. โสหํ สํฆํ เอกิสฺสา อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ ยาจิํ. ตสฺส เม สํโฆ เอกิสฺสา อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ อทาสิ. ตสฺส เม ปริวสนฺตสฺส ลชฺชีธมฺโม โอกฺกมิ— “ยนฺนูนาหํ สํฆํ อิตริสฺสาปิ อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ ยาเจยฺยนฺ”’ติ. โส สํฆํ อิตริสฺสาปิ อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ ยาจติ. ตสฺส สํโฆ อิตริสฺสาปิ อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ เทติ. เตน, ภิกฺขเว, ภิกฺขุนา ตทุปาทาย ทฺเว มาสา ปริวสิตพฺพา.
อิธ ปน, ภิกฺขเว, ภิกฺขุ ทฺเว สํฆาทิเสสา อาปตฺติโย อาปชฺชติ ทฺเวมาสปฺปฏิจฺฉนฺนาโย; เอกํ อาปตฺติํ ชานาติ, เอกํ อาปตฺติํ น ชานาติ. โส สํฆํ ยํ อาปตฺติํ ชานาติ, ตสฺสา อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ ยาจติ. ตสฺส สํโฆ ตสฺสา อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ เทติ. โส ปริวสนฺโต อิตรมฺปิ อาปตฺติํ ชานาติ. ตสฺส เอวํ โหติ— ‘อหํ โข ทฺเว สํฆาทิเสสา อาปตฺติโย อาปชฺชิํ ทฺเวมาสปฺปฏิจฺฉนฺนาโย; เอกํ อาปตฺติํ ชานิํ, เอกํ อาปตฺติํ น ชานิํ. โสหํ สํฆํ ยํ อาปตฺติํ ชานิํ ตสฺสา อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ ยาจิํ. ตสฺส เม สํโฆ ตสฺสา อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ อทาสิ. โสหํ ปริวสนฺโต อิตรมฺปิ อาปตฺติํ ชานามิ. ยนฺนูนาหํ สํฆํ อิตริสฺสาปิ อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ ยาเจยฺยนฺ’ติ. โส สํฆํ อิตริสฺสาปิ อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ ยาจติ. ตสฺส สํโฆ อิตริสฺสาปิ อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ เทติ. เตน, ภิกฺขเว, ภิกฺขุนา ตทุปาทาย ทฺเว มาสา ปริวสิตพฺพา.
อิธ ปน, ภิกฺขเว, ภิกฺขุ ทฺเว สํฆาทิเสสา อาปตฺติโย อาปชฺชติ ทฺเวมาสปฺปฏิจฺฉนฺนาโย; เอกํ อาปตฺติํ สรติ, เอกํ อาปตฺติํ นสฺสรติ. โส สํฆํ ยํ อาปตฺติํ สรติ, ตสฺสา อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ ยาจติ. ตสฺส สํโฆ ตสฺสา อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ เทติ. โส ปริวสนฺโต อิตรมฺปิ อาปตฺติํ สรติ. ตสฺส เอวํ โหติ— ‘อหํ โข ทฺเว สํฆาทิเสสา อาปตฺติโย อาปชฺชิํ ทฺเวมาสปฺปฏิจฺฉนฺนาโย; เอกํ อาปตฺติํ สริํ, เอกํ อาปตฺติํ นสฺสริํ. โสหํ สํฆํ ยํ อาปตฺติํ สริํ, ตสฺสา อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ ยาจิํ. ตสฺส เม สํโฆ ตสฺสา อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ อทาสิ. โสหํ ปริวสนฺโต อิตรมฺปิ อาปตฺติํ สรามิ. ยนฺนูนาหํ สํฆํ อิตริสฺสาปิ อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ ยาเจยฺยนฺ’ติ. โส สํฆํ อิตริสฺสาปิ อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ ยาจติ. ตสฺส สํโฆ อิตริสฺสาปิ อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ เทติ. เตน, ภิกฺขเว, ภิกฺขุนา ตทุปาทาย ทฺเว มาสา ปริวสิตพฺพา.
อิธ ปน, ภิกฺขเว, ภิกฺขุ ทฺเว สํฆาทิเสสา อาปตฺติโย อาปชฺชติ ทฺเวมาสปฺปฏิจฺฉนฺนาโย; เอกาย อาปตฺติยา นิพฺเพมติโก, เอกาย อาปตฺติยา เวมติโก. โส สํฆํ ยาย อาปตฺติยา นิพฺเพมติโก, ตสฺสา อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ ยาจติ. ตสฺส สํโฆ ตสฺสา อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ เทติ. โส ปริวสนฺโต อิตริสฺสาปิ อาปตฺติยา นิพฺเพมติโก โหติ. ตสฺส เอวํ โหติ— ‘อหํ โข ทฺเว สํฆาทิเสสา อาปตฺติโย อาปชฺชิํ ทฺเวมาสปฺปฏิจฺฉนฺนาโย; เอกาย อาปตฺติยา นิพฺเพมติโก, เอกาย อาปตฺติยา เวมติโก. โสหํ สํฆํ ยาย อาปตฺติยา นิพฺเพมติโก ตสฺสา อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ ยาจิํ. ตสฺส เม สํโฆ ตสฺสา อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ อทาสิ. โสหํ ปริวสนฺโต อิตริสฺสาปิ อาปตฺติยา นิพฺเพมติโก. ยนฺนูนาหํ สํฆํ อิตริสฺสาปิ อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ ยาเจยฺยนฺ’ติ. โส สํฆํ อิตริสฺสาปิ อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ ยาจติ. ตสฺส สํโฆ อิตริสฺสาปิ อาปตฺติยา ทฺเวมาสปฺปฏิจฺฉนฺนาย ทฺเวมาสปริวาสํ เทติ. เตน, ภิกฺขเว, ภิกฺขุนา ตทุปาทาย ทฺเว มาสา ปริวสิตพฺพา.
อิธ ปน, ภิกฺขเว, ภิกฺขุ ทฺเว สํฆาทิเสสา อาปตฺติโย อาปชฺชติ ทฺเวมาสปฺปฏิจฺฉนฺนาโย; เอกา อาปตฺติ ชานปฺปฏิจฺฉนฺนา, เอกา อาปตฺติ อชานปฺปฏิจฺฉนฺนา. โส สํฆํ ตาสํ อาปตฺตีนํ ทฺเวมาสปฺปฏิจฺฉนฺนานํ ทฺเวมาสปริวาสํ ยาจติ. ตสฺส สํโฆ ตาสํ อาปตฺตีนํ ทฺเวมาสปฺปฏิจฺฉนฺนานํ ทฺเวมาสปริวาสํ เทติ. ตสฺส ปริวสนฺตสฺส อญฺโญ ภิกฺขุ อาคจฺฉติ พหุสฺสุโต อาคตาคโม ธมฺมธโร วินยธโร มาติกาธโร ปณฺฑิโต วิยตฺโต เมธาวี ลชฺชี กุกฺกุจฺจโก สิกฺขากาโม. โส เอวํ วเทติ— ‘กิํ อยํ, อาวุโส, ภิกฺขุ อาปนฺโน? กิสฺสายํ ภิกฺขุ ปริวสตี’ติ? เต เอวํ วเทนฺติ— ‘อยํ, อาวุโส, ภิกฺขุ ทฺเว สํฆาทิเสสา อาปตฺติโย อาปชฺชิ ทฺเวมาสปฺปฏิจฺฉนฺนาโย; เอกา อาปตฺติ ชานปฺปฏิจฺฉนฺนา, เอกา อาปตฺติ อชานปฺปฏิจฺฉนฺนา. โส สํฆํ ตาสํ อาปตฺตีนํ ทฺเวมาสปฺปฏิจฺฉนฺนานํ ทฺเวมาสปริวาสํ ยาจติ. ตสฺส สํโฆ ตาสํ อาปตฺตีนํ ทฺเวมาสปฺปฏิจฺฉนฺนานํ ทฺเวมาสปริวาสํ อทาสิ. ตาโย อยํ, อาวุโส, ภิกฺขุ อาปนฺโน, ตาสายํ ภิกฺขุ ปริวสตี’ติ. โส เอวํ วเทติ— ‘ยายํ, อาวุโส, อาปตฺติ ชานปฺปฏิจฺฉนฺนา, ธมฺมิกํ ตสฺสา อาปตฺติยา ปริวาสทานํ; ธมฺมตฺตา รุหติ. ยา จ ขฺวายํ, อาวุโส, อาปตฺติ อชานปฺปฏิจฺฉนฺนา, อธมฺมิกํ ตสฺสา อาปตฺติยา ปริวาสทานํ; อธมฺมตฺตา น รุหติ. เอกิสฺสา, อาวุโส, อาปตฺติยา ภิกฺขุ มานตฺตารโห’ติ.
อิธ ปน, ภิกฺขเว, ภิกฺขุ ทฺเว สํฆาทิเสสา อาปตฺติโย อาปชฺชติ ทฺเวมาสปฺปฏิจฺฉนฺนาโย; เอกา อาปตฺติ สรมานปฺปฏิจฺฉนฺนา, เอกา อาปตฺติ อสฺสรมานปฺปฏิจฺฉนฺนา. โส สํฆํ ตาสํ อาปตฺตีนํ ทฺเวมาสปฺปฏิจฺฉนฺนานํ ทฺเวมาสปริวาสํ ยาจติ. ตสฺส สํโฆ ตาสํ อาปตฺตีนํ ทฺเวมาสปฺปฏิจฺฉนฺนานํ ทฺเวมาสปริวาสํ เทติ. ตสฺส ปริวสนฺตสฺส อญฺโญ ภิกฺขุ อาคจฺฉติ พหุสฺสุโต อาคตาคโม ธมฺมธโร วินยธโร มาติกาธโร ปณฺฑิโต วิยตฺโต เมธาวี ลชฺชี กุกฺกุจฺจโก สิกฺขากาโม. โส เอวํ วเทติ— ‘กิํ อยํ, อาวุโส, ภิกฺขุ อาปนฺโน? กิสฺสายํ ภิกฺขุ ปริวสตี’ติ? เต เอวํ วเทนฺติ— ‘อยํ, อาวุโส, ภิกฺขุ ทฺเว สํฆาทิเสสา อาปตฺติโย อาปชฺชิ ทฺเวมาสปฺปฏิจฺฉนฺนาโย; เอกา อาปตฺติ สรมานปฺปฏิจฺฉนฺนา, เอกา อาปตฺติ อสฺสรมานปฺปฏิจฺฉนฺนา. โส สํฆํ ตาสํ อาปตฺตีนํ ทฺเวมาสปฺปฏิจฺฉนฺนานํ ทฺเวมาสปริวาสํ ยาจิ. ตสฺส สํโฆ ตาสํ อาปตฺตีนํ ทฺเวมาสปฺปฏิจฺฉนฺนานํ ทฺเวมาสปริวาสํ อทาสิ. ตาโย อยํ, อาวุโส, ภิกฺขุ อาปนฺโน; ตาสายํ ภิกฺขุ ปริวสตี’ติ. โส เอวํ วเทติ— ‘ยายํ, อาวุโส, อาปตฺติ สรมานปฺปฏิจฺฉนฺนา ธมฺมิกํ ตสฺสา อาปตฺติยา ปริวาสทานํ; ธมฺมตฺตา รุหติ. ยา จ ขฺวายํ, อาวุโส, อาปตฺติ อสฺสรมานปฺปฏิจฺฉนฺนา, อธมฺมิกํ ตสฺสา อาปตฺติยา ปริวาสทานํ; อธมฺมตฺตา น รุหติ. เอกิสฺสา, อาวุโส, อาปตฺติยา ภิกฺขุ มานตฺตารโห’ติ.
อิธ ปน, ภิกฺขเว, ภิกฺขุ ทฺเว สํฆาทิเสสา อาปตฺติโย อาปชฺชติ ทฺเวมาสปฺปฏิจฺฉนฺนาโย; เอกา อาปตฺติ นิพฺเพมติกปฺปฏิจฺฉนฺนา, เอกา อาปตฺติ เวมติกปฺปฏิจฺฉนฺนา. โส สํฆํ ตาสํ อาปตฺตีนํ ทฺเวมาสปฺปฏิจฺฉนฺนานํ ทฺเวมาสปริวาสํ ยาจติ. ตสฺส สํโฆ ตาสํ อาปตฺตีนํ ทฺเวมาสปฺปฏิจฺฉนฺนานํ ทฺเวมาสปริวาสํ เทติ. ตสฺส ปริวสนฺตสฺส อญฺโญ ภิกฺขุ อาคจฺฉติ พหุสฺสุโต อาคตาคโม ธมฺมธโร วินยธโร มาติกาธโร ปณฺฑิโต วิยตฺโต เมธาวี ลชฺชี กุกฺกุจฺจโก สิกฺขากาโม. โส เอวํ วเทติ— ‘กิํ อยํ, อาวุโส, ภิกฺขุ อาปนฺโน? กิสฺสายํ ภิกฺขุ ปริวสตี’ติ? เต เอวํ วเทนฺติ— ‘อยํ, อาวุโส, ภิกฺขุ ทฺเว สํฆาทิเสสา อาปตฺติโย อาปชฺชิ ทฺเวมาสปฺปฏิจฺฉนฺนาโย; เอกา อาปตฺติ นิพฺเพมติกปฺปฏิจฺฉนฺนา, เอกา อาปตฺติ เวมติกปฺปฏิจฺฉนฺนา. โส สํฆํ ตาสํ อาปตฺตีนํ ทฺเวมาสปฺปฏิจฺฉนฺนานํ ทฺเวมาสปริวาสํ ยาจิ. ตสฺส สํโฆ ตาสํ อาปตฺตีนํ ทฺเวมาสปฺปฏิจฺฉนฺนานํ ทฺเวมาสปริวาสํ อทาสิ. ตาโย อยํ, อาวุโส, ภิกฺขุ อาปนฺโน; ตาสายํ ภิกฺขุ ปริวสตี’ติ. โส เอวํ วเทติ— ‘ยายํ, อาวุโส, อาปตฺติ นิพฺเพมติกปฺปฏิจฺฉนฺนา, ธมฺมิกํ ตสฺสา อาปตฺติยา ปริวาสทานํ; ธมฺมตฺตา รุหติ. ยา จ ขฺวายํ, อาวุโส, อาปตฺติ เวมติกปฺปฏิจฺฉนฺนา อธมฺมิกํ ตสฺสา อาปตฺติยา ปริวาสทานํ; อธมฺมตฺตา น รุหติ. เอกิสฺสา, อาวุโส, อาปตฺติยา ภิกฺขุ มานตฺตารโห’”ติ.
เตน โข ปน สมเยน อญฺญตโร ภิกฺขุ ทฺเว สํฆาทิเสสา อาปตฺติโย อาปนฺโน โหติ ทฺเวมาสปฺปฏิจฺฉนฺนาโย. ตสฺส เอตทโหสิ— “อหํ โข ทฺเว สํฆาทิเสสา อาปตฺติโย อาปชฺชิํ ทฺเวมาสปฺปฏิจฺฉนฺนาโย. ยนฺนูนาหํ สํฆํ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ เอกมาสปริวาสํ ยาเจยฺยนฺ”ติ. โส สํฆํ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ เอกมาสปริวาสํ ยาจิ. ตสฺส สํโฆ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ เอกมาสปริวาสํ อทาสิ. ตสฺส ปริวสนฺตสฺส ลชฺชีธมฺโม โอกฺกมิ— “อหํ โข ทฺเว สํฆาทิเสสา อาปตฺติโย อาปชฺชิํ ทฺเวมาสปฺปฏิจฺฉนฺนาโย. ตสฺส เม เอตทโหสิ— ‘อหํ โข ทฺเว สํฆาทิเสสา อาปตฺติโย อาปชฺชิํ ทฺเวมาสปฺปฏิจฺฉนฺนาโย. ยนฺนูนาหํ สํฆํ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ เอกมาสปริวาสํ ยาเจยฺยนฺ’ติ. โสหํ สํฆํ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ เอกมาสปริวาสํ ยาจิํ. ตสฺส เม สํโฆ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ เอกมาสปริวาสํ อทาสิ. ตสฺส เม ปริวสนฺตสฺส ลชฺชีธมฺโม โอกฺกมิ. ยนฺนูนาหํ สํฆํ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ อิตรมฺปิ มาสํ ปริวาสํ ยาเจยฺยนฺ”ติ.
โส ภิกฺขูนํ อาโรเจสิ— “อหํ โข, อาวุโส, ทฺเว สํฆาทิเสสา อาปตฺติโย อาปชฺชิํ ทฺเวมาสปฺปฏิจฺฉนฺนาโย. ตสฺส เม เอตทโหสิ— ‘อหํ โข ทฺเว สํฆาทิเสสา อาปตฺติโย อาปชฺชิํ ทฺเวมาสปฺปฏิจฺฉนฺนาโย. ยนฺนูนาหํ สํฆํ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ เอกมาสปริวาสํ ยาเจยฺยนฺ’ติ. โสหํ สํฆํ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ เอกมาสปริวาสํ ยาจิํ. ตสฺส เม สํโฆ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ เอกมาสปริวาสํ อทาสิ. ตสฺส เม ปริวสนฺตสฺส ลชฺชีธมฺโม โอกฺกมิ— ‘อหํ โข ทฺเว สํฆาทิเสสา อาปตฺติโย อาปชฺชิํ ทฺเวมาสปฺปฏิจฺฉนฺนาโย. ตสฺส เม เอตทโหสิ— “อหํ โข ทฺเว สํฆาทิเสสา อาปตฺติโย อาปชฺชิํ ทฺเวมาสปฺปฏิจฺฉนฺนาโย. ยนฺนูนาหํ สํฆํ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ เอกมาสปริวาสํ ยาเจยฺยนฺ”’ติ. โสหํ สํฆํ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ เอกมาสปริวาสํ ยาจิํ. ตสฺส เม สํโฆ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ เอกมาสปริวาสํ อทาสิ. ตสฺส เม ปริวสนฺตสฺส ลชฺชีธมฺโม โอกฺกมิ— ‘ยนฺนูนาหํ สํฆํ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ อิตรมฺปิ มาสํ ปริวาสํ ยาเจยฺยนฺ’ติ. กถํ นุ โข มยา ปฏิปชฺชิตพฺพนฺ”ติ? ภควโต เอตมตฺถํ อาโรเจสุํ. “เตน หิ, ภิกฺขเว, สํโฆ ตสฺส ภิกฺขุโน ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ อิตรมฺปิ มาสํ ปริวาสํ เทตุ. เอวญฺจ ปน, ภิกฺขเว, ทาตพฺโพ—
เตน, ภิกฺขเว, ภิกฺขุนา สํฆํ อุปสงฺกมิตฺวา …เป… เอวมสฺส วจนีโย— ‘อหํ, ภนฺเต, ทฺเว สํฆาทิเสสา อาปตฺติโย อาปชฺชิํ ทฺเวมาสปฺปฏิจฺฉนฺนาโย. ตสฺส เม เอตทโหสิ— “อหํ โข ทฺเว สํฆาทิเสสา อาปตฺติโย อาปชฺชิํ ทฺเวมาสปฺปฏิจฺฉนฺนาโย. ยนฺนูนาหํ สํฆํ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ เอกมาสปริวาสํ ยาเจยฺยนฺ”ติ. โสหํ สํฆํ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ เอกมาสปริวาสํ ยาจิํ. ตสฺส เม สํโฆ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ เอกมาสปริวาสํ อทาสิ. ตสฺส เม ปริวสนฺตสฺส ลชฺชีธมฺโม โอกฺกมิ— “อหํ โข ทฺเว สํฆาทิเสสา อาปตฺติโย อาปชฺชิํ ทฺเวมาสปฺปฏิจฺฉนฺนาโย. ตสฺส เม เอตทโหสิ— อหํ โข ทฺเว สํฆาทิเสสา อาปตฺติโย อาปชฺชิํ ทฺเวมาสปฺปฏิจฺฉนฺนาโย. ยนฺนูนาหํ สํฆํ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ เอกมาสปริวาสํ ยาเจยฺยนฺ”ติ. โสหํ สํฆํ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ เอกมาสปริวาสํ ยาจิํ. ตสฺส เม สํโฆ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ เอกมาสปริวาสํ อทาสิ. ตสฺส เม ปริวสนฺตสฺส ลชฺชีธมฺโม โอกฺกมิ— “ยนฺนูนาหํ สํฆํ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ อิตรมฺปิ มาสํ ปริวาสํ ยาเจยฺยนฺ”ติ. โสหํ, ภนฺเต, สํฆํ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ อิตรมฺปิ มาสํ ปริวาสํ ยาจามี’ติ. ทุติยมฺปิ ยาจิตพฺโพ. ตติยมฺปิ ยาจิตพฺโพ. พฺยตฺเตน ภิกฺขุนา ปฏิพเลน สํโฆ ญาเปตพฺโพ—
‘สุณาตุ เม, ภนฺเต, สํโฆ. อยํ อิตฺถนฺนาโม ภิกฺขุ ทฺเว สํฆาทิเสสา อาปตฺติโย อาปชฺชิ ทฺเวมาสปฺปฏิจฺฉนฺนาโย. ตสฺส เอตทโหสิ— “อหํ โข ทฺเว สํฆาทิเสสา อาปตฺติโย อาปชฺชิํ ทฺเวมาสปฺปฏิจฺฉนฺนาโย. ยนฺนูนาหํ สํฆํ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ เอกมาสปริวาสํ ยาเจยฺยนฺ”ติ. โส สํฆํ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ เอกมาสปริวาสํ ยาจิ. ตสฺส สํโฆ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ เอกมาสปริวาสํ อทาสิ. ตสฺส ปริวสนฺตสฺส ลชฺชีธมฺโม โอกฺกมิ— “อหํ โข ทฺเว สํฆาทิเสสา อาปตฺติโย อาปชฺชิํ ทฺเวมาสปฺปฏิจฺฉนฺนาโย. ตสฺส เม เอตทโหสิ— อหํ โข ทฺเว สํฆาทิเสสา อาปตฺติโย อาปชฺชิํ ทฺเวมาสปฺปฏิจฺฉนฺนาโย— “ยนฺนูนาหํ สํฆํ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ เอกมาสปริวาสํ ยาเจยฺยนฺ”ติ. โสหํ สํฆํ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ เอกมาสปริวาสํ ยาจิํ. ตสฺส เม สํโฆ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ เอกมาสปริวาสํ อทาสิ. ตสฺส เม ปริวสนฺตสฺส ลชฺชีธมฺโม โอกฺกมิ. “ยนฺนูนาหํ สํฆํ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ อิตรมฺปิ มาสํ ปริวาสํ ยาเจยฺยนฺ”ติ. โส สํฆํ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ อิตรมฺปิ มาสํ ปริวาสํ ยาจติ. ยทิ สํฆสฺส ปตฺตกลฺลํ, สํโฆ อิตฺถนฺนามสฺส ภิกฺขุโน ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ อิตรมฺปิ มาสํ ปริวาสํ ทเทยฺย. เอสา ญตฺติ.
สุณาตุ เม, ภนฺเต, สํโฆ. อยํ อิตฺถนฺนาโม ภิกฺขุ ทฺเว สํฆาทิเสสา อาปตฺติโย อาปชฺชิ ทฺเวมาสปฺปฏิจฺฉนฺนาโย. ตสฺส เอตทโหสิ— “อหํ โข ทฺเว สํฆาทิเสสา อาปตฺติโย อาปชฺชิํ ทฺเวมาสปฺปฏิจฺฉนฺนาโย. ยนฺนูนาหํ สํฆํ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ เอกมาสปริวาสํ ยาเจยฺยนฺ”ติ. โส สํฆํ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ เอกมาสปริวาสํ ยาจิ. ตสฺส สํโฆ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ เอกมาสปริวาสํ อทาสิ. ตสฺส ปริวสนฺตสฺส ลชฺชีธมฺโม โอกฺกมิ— “อหํ โข ทฺเว สํฆาทิเสสา อาปตฺติโย อาปชฺชิํ ทฺเวมาสปฺปฏิจฺฉนฺนาโย. ตสฺส เม เอตทโหสิ— อหํ โข ทฺเว สํฆาทิเสสา อาปตฺติโย อาปชฺชิํ ทฺเวมาสปฺปฏิจฺฉนฺนาโย. ยนฺนูนาหํ สํฆํ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ เอกมาสปริวาสํ ยาเจยฺยนฺ”ติ. โสหํ สํฆํ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ เอกมาสปริวาสํ ยาจิํ. ตสฺส เม สํโฆ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ เอกมาสปริวาสํ อทาสิ. ตสฺส เม ปริวสนฺตสฺส ลชฺชีธมฺโม โอกฺกมิ— “ยนฺนูนาหํ สํฆํ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ อิตรมฺปิ มาสํ ปริวาสํ ยาเจยฺยนฺ”ติ. โส สํฆํ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ อิตรมฺปิ มาสํ ปริวาสํ ยาจติ. สํโฆ อิตฺถนฺนามสฺส ภิกฺขุโน ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ อิตรมฺปิ มาสํ ปริวาสํ เทติ. ยสฺสายสฺมโต ขมติ อิตฺถนฺนามสฺส ภิกฺขุโน ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ อิตรมฺปิ มาสํ ปริวาสสฺส ทานํ, โส ตุณฺหสฺส; ยสฺส นกฺขมติ, โส ภาเสยฺย.
ทุติยมฺปิ เอตมตฺถํ วทามิ …เป… ตติยมฺปิ เอตมตฺถํ วทามิ …เป… .
ทินฺโน สํเฆน อิตฺถนฺนามสฺส ภิกฺขุโน ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ อิตรมฺปิ มาสํ ปริวาโส. ขมติ สํฆสฺส, ตสฺมา ตุณฺหี, เอวเมตํ ธารยามี’ติ.
เตน, ภิกฺขเว, ภิกฺขุนา ปุริมํ อุปาทาย ทฺเว มาสา ปริวสิตพฺพา.
อิธ ปน, ภิกฺขเว, ภิกฺขุ ทฺเว สํฆาทิเสสา อาปตฺติโย อาปชฺชติ ทฺเวมาสปฺปฏิจฺฉนฺนาโย. ตสฺส เอวํ โหติ— ‘อหํ โข ทฺเว สํฆาทิเสสา อาปตฺติโย อาปชฺชิํ ทฺเวมาสปฺปฏิจฺฉนฺนาโย. ยนฺนูนาหํ สํฆํ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ เอกมาสปริวาสํ ยาเจยฺยนฺ’ติ. โส สํฆํ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ เอกมาสปริวาสํ ยาจติ. ตสฺส สํโฆ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ เอกมาสปริวาสํ เทติ. ตสฺส ปริวสนฺตสฺส ลชฺชีธมฺโม โอกฺกมิ— ‘อหํ โข ทฺเว สํฆาทิเสสา อาปตฺติโย อาปชฺชิํ ทฺเวมาสปฺปฏิจฺฉนฺนาโย. ตสฺส เม เอตทโหสิ— “อหํ โข ทฺเว สํฆาทิเสสา อาปตฺติโย อาปชฺชิํ ทฺเวมาสปฺปฏิจฺฉนฺนาโย. ยนฺนูนาหํ สํฆํ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ เอกมาสปริวาสํ ยาเจยฺยนฺ”ติ. โสหํ สํฆํ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ เอกมาสปริวาสํ ยาจิํ. ตสฺส เม สํโฆ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ เอกมาสปริวาสํ อทาสิ. ตสฺส เม ปริวสนฺตสฺส ลชฺชีธมฺโม โอกฺกมิ— “ยนฺนูนาหํ สํฆํ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ อิตรมฺปิ มาสํ ปริวาสํ ยาเจยฺยนฺ”ติ. โส สํฆํ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ อิตรมฺปิ มาสํ ปริวาสํ ยาจติ. ตสฺส สํโฆ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ อิตรมฺปิ มาสํ ปริวาสํ เทติ. เตน, ภิกฺขเว, ภิกฺขุนา ปุริมํ อุปาทาย ทฺเว มาสา ปริวสิตพฺพา.
อิธ ปน, ภิกฺขเว, ภิกฺขุ ทฺเว สํฆาทิเสสา อาปตฺติโย อาปชฺชติ ทฺเวมาสปฺปฏิจฺฉนฺนาโย; เอกํ มาสํ ชานาติ, เอกํ มาสํ น ชานาติ. โส สํฆํ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ ยํ มาสํ ชานาติ ตํ มาสํ ปริวาสํ ยาจติ. ตสฺส สํโฆ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ ยํ มาสํ ชานาติ ตํ มาสํ ปริวาสํ เทติ. โส ปริวสนฺโต อิตรมฺปิ มาสํ ชานาติ. ตสฺส เอวํ โหติ— ‘อหํ โข ทฺเว สํฆาทิเสสา อาปตฺติโย อาปชฺชิํ ทฺเวมาสปฺปฏิจฺฉนฺนาโย; เอกํ มาสํ ชานิํ, เอกํ มาสํ น ชานิํ. โสหํ สํฆํ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ ยํ มาสํ ชานิํ ตํ มาสํ ปริวาสํ ยาจิํ. ตสฺส เม สํโฆ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ ยํ มาสํ ชานิํ ตํ มาสํ ปริวาสํ อทาสิ. โสหํ ปริวสนฺโต อิตรมฺปิ มาสํ ชานามิ. ยนฺนูนาหํ สํฆํ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ อิตรมฺปิ มาสํ ปริวาสํ ยาเจยฺยนฺ’ติ. โส สํฆํ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ อิตรมฺปิ มาสํ ปริวาสํ ยาจติ. ตสฺส สํโฆ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ อิตรมฺปิ มาสํ ปริวาสํ เทติ. เตน, ภิกฺขเว, ภิกฺขุนา ปุริมํ อุปาทาย ทฺเว มาสา ปริวสิตพฺพา.
อิธ ปน, ภิกฺขเว, ภิกฺขุ ทฺเว สํฆาทิเสสา อาปตฺติโย อาปชฺชติ ทฺเวมาสปฺปฏิจฺฉนฺนาโย; เอกํ มาสํ สรติ, เอกํ มาสํ นสฺสรติ. โส สํฆํ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ ยํ มาสํ สรติ ตํ มาสํ ปริวาสํ ยาจติ. ตสฺส สํโฆ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ ยํ มาสํ สรติ ตํ มาสํ ปริวาสํ เทติ. โส ปริวสนฺโต อิตรมฺปิ มาสํ สรติ. ตสฺส เอวํ โหติ— ‘อหํ โข ทฺเว สํฆาทิเสสา อาปตฺติโย อาปชฺชิํ ทฺเวมาสปฺปฏิจฺฉนฺนาโย; เอกํ มาสํ สริํ, เอกํ มาสํ นสฺสริํ. โสหํ สํฆํ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ ยํ มาสํ สริํ ตํ มาสํ ปริวาสํ ยาจิํ. ตสฺส เม สํโฆ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ ยํ มาสํ สริํ ตํ มาสํ ปริวาสํ อทาสิ. โสหํ ปริวสนฺโต อิตรมฺปิ มาสํ สรามิ. ยนฺนูนาหํ สํฆํ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ อิตรมฺปิ มาสํ ปริวาสํ ยาเจยฺยนฺ’ติ. โส สํฆํ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ อิตรมฺปิ มาสํ ปริวาสํ ยาจติ. ตสฺส สํโฆ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ อิตรมฺปิ มาสํ ปริวาสํ เทติ. เตน, ภิกฺขเว, ภิกฺขุนา ปุริมํ อุปาทาย ทฺเว มาสา ปริวสิตพฺพา.
อิธ ปน, ภิกฺขเว, ภิกฺขุ ทฺเว สํฆาทิเสสา อาปตฺติโย อาปชฺชติ ทฺเวมาสปฺปฏิจฺฉนฺนาโย; เอกํ มาสํ นิพฺเพมติโก, เอกํ มาสํ เวมติโก. โส สํฆํ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ ยํ มาสํ นิพฺเพมติโก ตํ มาสํ ปริวาสํ ยาจติ. ตสฺส สํโฆ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ ยํ มาสํ นิพฺเพมติโก ตํ มาสํ ปริวาสํ เทติ. โส ปริวสนฺโต อิตรมฺปิ มาสํ นิพฺเพมติโก โหติ. ตสฺส เอวํ โหติ— ‘อหํ โข ทฺเว สํฆาทิเสสา อาปตฺติโย อาปชฺชิํ ทฺเวมาสปฺปฏิจฺฉนฺนาโย; เอกํ มาสํ นิพฺเพมติโก, เอกํ มาสํ เวมติโก. โสหํ สํฆํ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ ยํ มาสํ นิพฺเพมติโก ตํ มาสํ ปริวาสํ ยาจิํ. ตสฺส เม สํโฆ ทฺวินฺนํ อาปตฺตีนํ ทฺเวมาสปฺปฏิจฺฉานฺนานํ ยํ มาสํ นิพฺเพมติโก ตํ มาสํ ปริวาสํ อทาสิ. โสหํ ปริวสนฺโต อิตรมฺปิ มาสํ นิพฺเพมติโก. ยนฺนูนาหํ สํฆํ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ อิตรมฺปิ มาสํ ปริวาสํ ยาเจยฺยนฺ’ติ. โส สํฆํ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ อิตรมฺปิ มาสํ ปริวาสํ ยาจติ. ตสฺส สํโฆ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ อิตรมฺปิ มาสํ ปริวาสํ เทติ. เตน, ภิกฺขเว, ภิกฺขุนา ปุริมํ อุปาทาย ทฺเว มาสา ปริวสิตพฺพา.
อิธ ปน, ภิกฺขเว, ภิกฺขุ ทฺเว สํฆาทิเสสา อาปตฺติโย อาปชฺชติ ทฺเวมาสปฺปฏิจฺฉนฺนาโย; เอโก มาโส ชานปฺปฏิจฺฉนฺโน, เอโก มาโส อชานปฺปฏิจฺฉนฺโน. โส สํฆํ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ ทฺเวมาสปริวาสํ ยาจติ. ตสฺส สํโฆ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ ทฺเวมาสปริวาสํ เทติ. ตสฺส ปริวสนฺตสฺส อญฺโญ ภิกฺขุ อาคจฺฉติ พหุสฺสุโต อาคตาคโม ธมฺมธโร วินยธโร มาติกาธโร ปณฺฑิโต วิยตฺโต เมธาวี ลชฺชี กุกฺกุจฺจโก สิกฺขากาโม. โส เอวํ วเทติ— ‘กิํ อยํ, อาวุโส, ภิกฺขุ อาปนฺโน? กิสฺสายํ ภิกฺขุ ปริวสตี’ติ? เต เอวํ วเทนฺติ— ‘อยํ, อาวุโส, ภิกฺขุ ทฺเว สํฆาทิเสสา อาปตฺติโย อาปชฺชิ ทฺเวมาสปฺปฏิจฺฉนฺนาโย. เอโก มาโส ชานปฺปฏิจฺฉนฺโน, เอโก มาโส อชานปฺปฏิจฺฉนฺโน. โส สํฆํ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ ทฺเวมาสปริวาสํ ยาจิ. ตสฺส สํโฆ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ ทฺเวมาสปริวาสํ อทาสิ. ตาโย อยํ, อาวุโส, ภิกฺขุ อาปนฺโน ตาสายํ ภิกฺขุ ปริวสตี’ติ. โส เอวํ วเทติ— ‘ยฺวายํ, อาวุโส, มาโส ชานปฺปฏิจฺฉนฺโน ธมฺมิกํ ตสฺส มาสสฺส ปริวาสทานํ; ธมฺมตฺตา รุหติ. โย จ ขฺวายํ, อาวุโส, มาโส อชานปฺปฏิจฺฉนฺโน อธมฺมิกํ ตสฺส มาสสฺส ปริวาสทานํ; อธมฺมตฺตา น รุหติ. เอกสฺส, อาวุโส, มาสสฺส ภิกฺขุ มานตฺตารโห’ติ.
อิธ ปน, ภิกฺขเว, ภิกฺขุ ทฺเว สํฆาทิเสสา อาปตฺติโย อาปชฺชติ ทฺเวมาสปฺปฏิจฺฉนฺนาโย; เอโก มาโส สรมานปฺปฏิจฺฉนฺโน, เอโก มาโส อสฺสรมานปฺปฏิจฺฉนฺโน. โส สํฆํ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ ทฺเวมาสปริวาสํ ยาจติ. ตสฺส สํโฆ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ ทฺเวมาสปริวาสํ เทติ. ตสฺส ปริวสนฺตสฺส อญฺโญ ภิกฺขุ อาคจฺฉติ พหุสฺสุโต อาคตาคโม ธมฺมธโร วินยธโร มาติกาธโร ปณฺฑิโต วิยตฺโต เมธาวี ลชฺชี กุกฺกุจฺจโก สิกฺขากาโม. โส เอวํ วเทติ— ‘กิํ อยํ, อาวุโส, ภิกฺขุ อาปนฺโน? กิสฺสายํ ภิกฺขุ ปริวสตี’ติ? เต เอวํ วเทนฺติ— ‘อยํ, อาวุโส, ภิกฺขุ ทฺเว สํฆาทิเสสา อาปตฺติโย อาปชฺชิ ทฺเวมาสปฺปฏิจฺฉนฺนาโย; เอโก มาโส สรมานปฺปฏิจฺฉนฺโน, เอโก มาโส อสฺสรมานปฺปฏิจฺฉนฺโน. โส สํฆํ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ ทฺเวมาสปริวาสํ ยาจิ. ตสฺส สํโฆ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ ทฺเวมาสปริวาสํ อทาสิ. ตาโย อยํ, อาวุโส, ภิกฺขุ อาปนฺโน ตาสายํ ภิกฺขุ ปริวสตี’ติ. โส เอวํ วเทติ— ‘ยฺวายํ, อาวุโส, มาโส สรมานปฺปฏิจฺฉนฺโน ธมฺมิกํ ตสฺส มาสสฺส ปริวาสทานํ; ธมฺมตฺตา รุหติ. โย จ ขฺวายํ, อาวุโส, มาโส อสฺสรมานปฺปฏิจฺฉนฺโน อธมฺมิกํ ตสฺส มาสสฺส ปริวาสทานํ; อธมฺมตฺตา น รุหติ. เอกสฺส, อาวุโส, มาสสฺส ภิกฺขุ มานตฺตารโห’ติ.
อิธ ปน, ภิกฺขเว, ภิกฺขุ ทฺเว สํฆาทิเสสา อาปตฺติโย อาปชฺชติ ทฺเวมาสปฺปฏิจฺฉนฺนาโย; เอโก มาโส นิพฺเพมติกปฺปฏิจฺฉนฺโน, เอโก มาโส เวมติกปฺปฏิจฺฉนฺโน. โส สํฆํ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ ทฺเวมาสปริวาสํ ยาจติ. ตสฺส สํโฆ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ ทฺเวมาสปริวาสํ เทติ. ตสฺส ปริวสนฺตสฺส อญฺโญ ภิกฺขุ อาคจฺฉติ พหุสฺสุโต อาคตาคโม ธมฺมธโร วินยธโร มาติกาธโร ปณฺฑิโต วิยตฺโต เมธาวี ลชฺชี กุกฺกุจฺจโก สิกฺขากาโม. โส เอวํ วเทติ— ‘กิํ อยํ, อาวุโส, ภิกฺขุ อาปนฺโน? กิสฺสายํ ภิกฺขุ ปริวสตี’ติ? เต เอวํ วเทนฺติ— ‘อยํ, อาวุโส, ภิกฺขุ ทฺเว สํฆาทิเสสา อาปตฺติโย อาปชฺชิ ทฺเวมาสปฺปฏิจฺฉนฺนาโย; เอโก มาโส นิพฺเพมติกปฺปฏิจฺฉนฺโน, เอโก มาโส เวมติกปฺปฏิจฺฉนฺโน. โส สํฆํ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ ทฺเวมาสปริวาสํ ยาจิ. ตสฺส สํโฆ ทฺวินฺนํ อาปตฺตีนํ ทฺเวมาสปฺปฏิจฺฉนฺนานํ ทฺเวมาสปริวาสํ อทาสิ. ตาโย อยํ, อาวุโส, ภิกฺขุ อาปนฺโน ตาสายํ ภิกฺขุ ปริวสตี’ติ. โส เอวํ วเทติ— ‘ยฺวายํ, อาวุโส, มาโส นิพฺเพมติกปฺปฏิจฺฉนฺโน ธมฺมิกํ ตสฺส มาสสฺส ปริวาสทานํ; ธมฺมตฺตา รุหติ. โย จ ขฺวายํ, อาวุโส, มาโส เวมติกปฺปฏิจฺฉนฺโน อธมฺมิกํ ตสฺส มาสสฺส ปริวาสทานํ; อธมฺมตฺตา น รุหติ. เอกสฺส, อาวุโส, มาสสฺส ภิกฺขุ มานตฺตารโห’”ติ.