3.8 ทฺเวภิกฺขุวารเอกาทสก
ทฺเว ภิกฺขู สํฆาทิเสสํ อาปนฺนา โหนฺติ. เต สํฆาทิเสเส สํฆาทิเสสทิฏฺฐิโน โหนฺติ. เอโก ฉาเทติ, เอโก นจฺฉาเทติ. โย ฉาเทติ โส ทุกฺกฏํ เทสาเปตพฺโพ. ยถาปฏิจฺฉนฺเน จสฺส ปริวาสํ ทตฺวา อุภินฺนมฺปิ มานตฺตํ ทาตพฺพํ. (1)
ทฺเว ภิกฺขู สํฆาทิเสสํ อาปนฺนา โหนฺติ. เต สํฆาทิเสเส เวมติกา โหนฺติ. เอโก ฉาเทติ, เอโก นจฺฉาเทติ. โย ฉาเทติ โส ทุกฺกฏํ เทสาเปตพฺโพ. ยถาปฏิจฺฉนฺเน จสฺส ปริวาสํ ทตฺวา อุภินฺนมฺปิ มานตฺตํ ทาตพฺพํ. (2)
ทฺเว ภิกฺขู สํฆาทิเสสํ อาปนฺนา โหนฺติ. เต สํฆาทิเสเส มิสฺสกทิฏฺฐิโน โหนฺติ. เอโก ฉาเทติ, เอโก นจฺฉาเทติ. โย ฉาเทติ โส ทุกฺกฏํ เทสาเปตพฺโพ. ยถาปฏิจฺฉนฺเน จสฺส ปริวาสํ ทตฺวา อุภินฺนมฺปิ มานตฺตํ ทาตพฺพํ. (3)
ทฺเว ภิกฺขู มิสฺสกํ อาปนฺนา โหนฺติ. เต มิสฺสเก สํฆาทิเสสทิฏฺฐิโน โหนฺติ. เอโก ฉาเทติ, เอโก นจฺฉาเทติ. โย ฉาเทติ โส ทุกฺกฏํ เทสาเปตพฺโพ. ยถาปฏิจฺฉนฺเน จสฺส ปริวาสํ ทตฺวา อุภินฺนมฺปิ มานตฺตํ ทาตพฺพํ. (4)
ทฺเว ภิกฺขู มิสฺสกํ อาปนฺนา โหนฺติ. เต มิสฺสเก มิสฺสกทิฏฺฐิโน โหนฺติ. เอโก ฉาเทติ, เอโก นจฺฉาเทติ. โย ฉาเทติ โส ทุกฺกฏํ เทสาเปตพฺโพ. ยถาปฏิจฺฉนฺเน จสฺส ปริวาสํ ทตฺวา อุภินฺนมฺปิ มานตฺตํ ทาตพฺพํ. (5)
ทฺเว ภิกฺขู สุทฺธกํ อาปนฺนา โหนฺติ. เต สุทฺธเก สํฆาทิเสสทิฏฺฐิโน โหนฺติ. เอโก ฉาเทติ, เอโก นจฺฉาเทติ. โย ฉาเทติ โส ทุกฺกฏํ เทสาเปตพฺโพ. อุโภปิ ยถาธมฺมํ การาเปตพฺพา. (6)
ทฺเว ภิกฺขู สุทฺธกํ อาปนฺนา โหนฺติ. เต สุทฺธเก สุทฺธกทิฏฺฐิโน โหนฺติ. เอโก ฉาเทติ, เอโก นจฺฉาเทติ. โย ฉาเทติ โส ทุกฺกฏํ เทสาเปตพฺโพ. อุโภปิ ยถาธมฺมํ การาเปตพฺพา. (7)
ทฺเว ภิกฺขู สํฆาทิเสสํ อาปนฺนา โหนฺติ. เต สํฆาทิเสเส สํฆาทิเสสทิฏฺฐิโน โหนฺติ. เอกสฺส โหติ อาโรเจสฺสามีติ, เอกสฺส โหติ น อาโรเจสฺสามีติ. โส ปฐมมฺปิ ยามํ ฉาเทติ, ทุติยมฺปิ ยามํ ฉาเทติ, ตติยมฺปิ ยามํ ฉาเทติ— อุฏฺฐิเต อรุเณ ฉนฺนา โหติ อาปตฺติ. โย ฉาเทติ โส ทุกฺกฏํ เทสาเปตพฺโพ. ยถาปฏิจฺฉนฺเน จสฺส ปริวาสํ ทตฺวา อุภินฺนมฺปิ มานตฺตํ ทาตพฺพํ. (8)
ทฺเว ภิกฺขู สํฆาทิเสสํ อาปนฺนา โหนฺติ. เต สํฆาทิเสเส สํฆาทิเสสทิฏฺฐิโน โหนฺติ. เต คจฺฉนฺติ อาโรเจสฺสามาติ. เอกสฺส อนฺตรามคฺเค มกฺขธมฺโม อุปฺปชฺชติ น อาโรเจสฺสามีติ. โส ปฐมมฺปิ ยามํ ฉาเทติ, ทุติยมฺปิ ยามํ ฉาเทติ, ตติยมฺปิ ยามํ ฉาเทติ— อุฏฺฐิเต อรุเณ ฉนฺนา โหติ อาปตฺติ. โย ฉาเทติ โส ทุกฺกฏํ เทสาเปตพฺโพ. ยถาปฏิจฺฉนฺเน จสฺส ปริวาสํ ทตฺวา อุภินฺนมฺปิ มานตฺตํ ทาตพฺพํ. (9)
ทฺเว ภิกฺขู สํฆาทิเสสํ อาปนฺนา โหนฺติ. เต สํฆาทิเสเส สํฆาทิเสสทิฏฺฐิโน โหนฺติ. เต อุมฺมตฺตกา โหนฺติ. เต ปจฺฉา อนุมฺมตฺตกา หุตฺวา เอโก ฉาเทติ, เอโก นจฺฉาเทติ. โย ฉาเทติ โส ทุกฺกฏํ เทสาเปตพฺโพ. ยถาปฏิจฺฉนฺเน จสฺส ปริวาสํ ทตฺวา อุภินฺนมฺปิ มานตฺตํ ทาตพฺพํ. (10)
ทฺเว ภิกฺขู สํฆาทิเสสํ อาปนฺนา โหนฺติ. เต ปาติโมกฺเข อุทฺทิสฺสมาเน เอวํ วทนฺติ— ‘อิทาเนว โข มยํ ชานาม— อยมฺปิ กิร ธมฺโม สุตฺตาคโต สุตฺตปริยาปนฺโน อนฺวทฺธมาสํ อุทฺเทสํ อาคจฺฉตี’ติ. เต สํฆาทิเสเส สํฆาทิเสสทิฏฺฐิโน โหนฺติ. เอโก ฉาเทติ, เอโก นจฺฉาเทติ. โย ฉาเทติ โส ทุกฺกฏํ เทสาเปตพฺโพ. ยถาปฏิจฺฉนฺเน จสฺส ปริวาสํ ทตฺวา อุภินฺนมฺปิ มานตฺตํ ทาตพฺพํ. (11)
ทฺเวภิกฺขุวารเอกาทสกํ นิฏฺฐิตํ.