1.8.7 ติณวตฺถารก
อิเม โข ปนายสฺมนฺโต สตฺต อธิกรณสมถา
ธมฺมา อุทฺเทสํ อาคจฺฉนฺติ.
อุปฺปนฺนุปฺปนฺนานํ อธิกรณานํ สมถาย วูปสมาย สมฺมุขาวินโย ทาตพฺโพ, สติวินโย ทาตพฺโพ, อมูฬฺหวินโย ทาตพฺโพ, ปฏิญฺญาย กาเรตพฺพํ, เยภุยฺยสิกา, ตสฺสปาปิยสิกา, ติณวตฺถารโกติ. (1—7: 221–227 )
อุทฺทิฏฺฐา โข, อายสฺมนฺโต, สตฺต อธิกรณสมถา ธมฺมา. ตตฺถายสฺมนฺเต ปุจฺฉามิ— “กจฺจิตฺถ ปริสุทฺธา”? ทุติยมฺปิ ปุจฺฉามิ— “กจฺจิตฺถ ปริสุทฺธา”? ตติยมฺปิ ปุจฺฉามิ— “กจฺจิตฺถ ปริสุทฺธา”? ปริสุทฺเธตฺถายสฺมนฺโต, ตสฺมา ตุณฺหี, เอวเมตํ ธารยามีติ.
อธิกรณสมถา นิฏฺฐิตา.
อุทฺทิฏฺฐํ โข, อายสฺมนฺโต, นิทานํ; อุทฺทิฏฺฐา จตฺตาโร ปาราชิกา ธมฺมา; อุทฺทิฏฺฐา เตรส สํฆาทิเสสา ธมฺมา; อุทฺทิฏฺฐา ทฺเว อนิยตา ธมฺมา; อุทฺทิฏฺฐา ติํส นิสฺสคฺคิยา ปาจิตฺติยา ธมฺมา; อุทฺทิฏฺฐา ทฺเวนวุติ ปาจิตฺติยา ธมฺมา; อุทฺทิฏฺฐา จตฺตาโร ปาฏิเทสนียา ธมฺมา; อุทฺทิฏฺฐา เสขิยา ธมฺมา; อุทฺทิฏฺฐา สตฺต อธิกรณสมถา ธมฺมา. เอตฺตกํ ตสฺส ภควโต สุตฺตาคตํ สุตฺตปริยาปนฺนํ อนฺวทฺธมาสํ อุทฺเทสํ อาคจฺฉติ. ตตฺถ สพฺเพเหว สมคฺเคหิ สมฺโมทมาเนหิ อวิวทมาเนหิ สิกฺขิตพฺพนฺติ.
มหาวิภงฺโค นิฏฺฐิโต.