1.2.5 สญฺจริตฺตสิกฺขาปท
เตน สมเยน พุทฺโธ ภควา สาวตฺถิยํ วิหรติ เชตวเน อนาถปิณฺฑิกสฺส อาราเม. เตน โข ปน สมเยน อายสฺมา อุทายี สาวตฺถิยํ กุลูปโก โหติ. พหุกานิ กุลานิ อุปสงฺกมติ. ยตฺถ ปสฺสติ กุมารกํ วา อปชาปติกํ, กุมาริกํ วา อปติกํ, กุมารกสฺส มาตาปิตูนํ สนฺติเก กุมาริกาย วณฺณํ ภณติ— “อมุกสฺส กุลสฺส กุมาริกา อภิรูปา ทสฺสนียา ปาสาทิกา ปณฺฑิตา พฺยตฺตา เมธาวินี ทกฺขา อนลสา. ฉนฺนา สา กุมาริกา อิมสฺส กุมารกสฺสา”ติ. เต เอวํ วทนฺติ— “เอเต โข, ภนฺเต, อเมฺห น ชานนฺติ— ‘เก วา อิเม กสฺส วา’ติ. สเจ, ภนฺเต, อโยฺย ทาเปยฺย อาเนยฺยาม มยํ ตํ กุมาริกํ อิมสฺส กุมารกสฺสา”ติ. กุมาริกาย มาตาปิตูนํ สนฺติเก กุมารกสฺส วณฺณํ ภณติ— “อมุกสฺส กุลสฺส กุมารโก อภิรูโป ทสฺสนีโย ปาสาทิโก ปณฺฑิโต พฺยตฺโต เมธาวี ทกฺโข อนลโส. ฉนฺนายํ กุมาริกา ตสฺส กุมารกสฺสา”ติ. เต เอวํ วทนฺติ— “เอเต โข, ภนฺเต, อเมฺห น ชานนฺติ— ‘เก วา อิเม กสฺส วา’ติ, กิสฺมิํ วิย กุมาริกาย วตฺตุํ. สเจ, ภนฺเต, อโยฺย ยาจาเปยฺย ทชฺเชยฺยาม มยํ อิมํ กุมาริกํ ตสฺส กุมารกสฺสา”ติ. เอเตเนว อุปาเยน อาวาหานิปิ การาเปติ, วิวาหานิปิ การาเปติ, วาเรยฺยานิปิ การาเปติ.
เตน โข ปน สมเยน อญฺญตริสฺสา ปุราณคณกิยา ธีตา อภิรูปา โหติ ทสฺสนียา ปาสาทิกา. ติโรคามกา อาชีวกสาวกา อาคนฺตฺวา ตํ คณกิํ เอตทโวจุํ— “เทหาเยฺย, อิมํ กุมาริกํ อมฺหากํ กุมารกสฺสา”ติ. สา เอวมาห— “อหํ ขฺวโยฺย, ตุมฺเห น ชานามิ— ‘เก วา อิเม กสฺส วา’ติ. อยญฺจ เม เอกธีติกา, ติโรคาโม จ คนฺตพฺโพ, นาหํ ทสฺสามี”ติ. มนุสฺสา เต อาชีวกสาวเก เอตทโวจุํ— “กิสฺส ตุมฺเห, อโยฺย, อาคตตฺถา”ติ? “อิธ มยํ, อโยฺย, อมุกํ นาม คณกิํ ธีตรํ ยาจิมฺหา อมฺหากํ กุมารกสฺส. สา เอวมาห— ‘อหํ ขฺวโยฺย, ตุมฺเห น ชานามิ— เก วา อิเม กสฺส วา’ติ. อยญฺจ เม เอกธีติกา, ติโรคาโม จ คนฺตพฺโพ, นาหํ ทสฺสามี”ติ. “กิสฺส ตุมฺเห, อโยฺย, ตํ คณกิํ ธีตรํ ยาจิตฺถ? นนุ อโยฺย อุทายี วตฺตพฺโพ. อโยฺย อุทายี ทาเปสฺสตี”ติ.
อถ โข เต อาชีวกสาวกา เยนายสฺมา อุทายี เตนุปสงฺกมิํสุ; อุปสงฺกมิตฺวา อายสฺมนฺตํ อุทายิํ เอตทโวจุํ— “อิธ มยํ, ภนฺเต, อมุกํ นาม คณกิํ ธีตรํ ยาจิมฺหา อมฺหากํ กุมารกสฺส. สา เอวมาห— ‘อหํ ขฺวโยฺย, ตุมฺเห น ชานามิ— เก วา อิเม กสฺส วาติ. อยญฺจ เม เอกธีติกา, ติโรคาโม จ คนฺตพฺโพ, นาหํ ทสฺสามี’ติ. สาธุ, ภนฺเต, อโยฺย ตํ คณกิํ ธีตรํ ทาเปตุ อมฺหากํ กุมารกสฺสา”ติ.
อถ โข อายสฺมา อุทายี เยน สา คณกี เตนุปสงฺกมิ; อุปสงฺกมิตฺวา ตํ คณกิํ เอตทโวจ— “กิสฺสิเมสํ ธีตรํ น เทสี”ติ? “อหํ ขฺวยฺย, อิเม น ชานามิ— ‘เก วา อิเม กสฺส วา’ติ. อยญฺจ เม เอกธีติกา, ติโรคาโม จ คนฺตพฺโพ, นาหํ ทสฺสามี”ติ. “เทหิเมสํ. อหํ อิเม ชานามี”ติ. “สเจ, ภนฺเต, อโยฺย ชานาติ, ทสฺสามี”ติ. อถ โข สา คณกี เตสํ อาชีวกสาวกานํ ธีตรํ อทาสิ. อถ โข เต อาชีวกสาวกา ตํ กุมาริกํ เนตฺวา มาสํเยว สุณิสโภเคน ภุญฺชิํสุ. ตโต อปเรน ทาสิโภเคน ภุญฺชนฺติ.
อถ โข สา กุมาริกา มาตุยา สนฺติเก ทูตํ ปาเหสิ— “อหญฺหิ ทุคฺคตา ทุกฺขิตา, น สุขํ ลภามิ. มาสํเยว มํ สุณิสโภเคน ภุญฺชิํสุ. ตโต อปเรน ทาสิโภเคน ภุญฺชนฺติ. อาคจฺฉตุ เม, มาตา, มํ เนสฺสตู”ติ. อถ โข สา คณกี เยน เต อาชีวกสาวกา เตนุปสงฺกมิ; อุปสงฺกมิตฺวา เต อาชีวกสาวเก เอตทโวจ— “มาโยฺย, อิมํ กุมาริกํ ทาสิโภเคน ภุญฺชิตฺถ. สุณิสโภเคน อิมํ กุมาริกํ ภุญฺชถา”ติ. เต เอวมาหํสุ— “นตฺถมฺหากํ ตยา สทฺธิํ อาหารูปหาโร, สมเณน สทฺธิํ อมฺหากํ อาหารูปหาโร, คจฺฉ ตฺวํ, น มยํ ตํ ชานามา”ติ. อถ โข สา คณกี เตหิ อาชีวกสาวเกหิ อปสาทิตา ปุนเทว สาวตฺถิํ ปจฺจาคญฺฉิ.
ทุติยมฺปิ โข สา กุมาริกา มาตุยา สนฺติเก ทูตํ ปาเหสิ— “อหญฺหิ ทุคฺคตา ทุกฺขิตา, น สุขํ ลภามิ. มาสํเยว มํ สุณิสโภเคน ภุญฺชิํสุ. ตโต อปเรน ทาสิโภเคน ภุญฺชนฺติ. อาคจฺฉตุ เม, มาตา, มํ เนสฺสตู”ติ. อถ โข สา คณกี เยนายสฺมา อุทายี เตนุปสงฺกมิ; อุปสงฺกมิตฺวา อายสฺมนฺตํ อุทายิํ เอตทโวจ— “สา กิร, ภนฺเต, กุมาริกา ทุคฺคตา ทุกฺขิตา, น สุขํ ลภติ. มาสํเยว นํ สุณิสโภเคน ภุญฺชิํสุ. ตโต อปเรน ทาสิโภเคน ภุญฺชนฺติ. วเทยฺยาถ, ภนฺเต— ‘มาโยฺย, อิมํ กุมาริกํ ทาสิโภเคน ภุญฺชิตฺถ. สุณิสโภเคน อิมํ กุมาริกํ ภุญฺชถา’”ติ.
อถ โข อายสฺมา อุทายี เยน เต อาชีวกสาวกา เตนุปสงฺกมิ; อุปสงฺกมิตฺวา เต อาชีวกสาวเก เอตทโวจ— “มาโยฺย, อิมํ กุมาริกํ ทาสิโภเคน ภุชฺชิตฺถ. สุณิสโภเคน อิมํ กุมาริกํ ภุญฺชถา”ติ. เต เอวมาหํสุ— “นตฺถมฺหากํ ตยา สทฺธิํ อาหารูปหาโร, คณกิยา สทฺธิํ อมฺหากํ อาหารูปหาโร. สมเณน ภวิตพฺพํ อพฺยาวเฏน. สมโณ อสฺส สุสมโณ, คจฺฉ ตฺวํ, น มยํ ตํ ชานามา”ติ. อถ โข อายสฺมา อุทายี เตหิ อาชีวกสาวเกหิ อปสาทิโต ปุนเทว สาวตฺถิํ ปจฺจาคญฺฉิ.
ตติยมฺปิ โข สา กุมาริกา มาตุยา สนฺติเก ทูตํ ปาเหสิ— “อหญฺหิ ทุคฺคตา ทุกฺขิตา, น สุขํ ลภามิ. มาสํเยว มํ สุณิสโภเคน ภุญฺชิํสุ. ตโต อปเรน ทาสิโภเคน ภุญฺชนฺติ. อาคจฺฉตุ เม, มาตา, มํ เนสฺสตู”ติ. ทุติยมฺปิ โข สา คณกี เยนายสฺมา อุทายี เตนุปสงฺกมิ; อุปสงฺกมิตฺวา อายสฺมนฺตํ อุทายิํ เอตทโวจ— “สา กิร, ภนฺเต, กุมาริกา ทุคฺคตา ทุกฺขิตา, น สุขํ ลภติ. มาสํเยว นํ สุณิสโภเคน ภุญฺชิํสุ. ตโต อปเรน ทาสิโภเคน ภุญฺชนฺติ. วเทยฺยาถ, ภนฺเต— ‘มาโยฺย, อิมํ กุมาริกํ ทาสิโภเคน ภุญฺชิตฺถ, สุณิสโภเคน อิมํ กุมาริกํ ภุญฺชถา’”ติ. “ปฐมมฺปาหํ เตหิ อาชีวกสาวเกหิ อปสาทิโต, คจฺฉ ตฺวํ, นาหํ คมิสฺสามี”ติ.
อถ โข สา คณกี อุชฺฌายติ ขิยฺยติ วิปาเจติ— “เอวํ ทุคฺคโต โหตุ อโยฺย อุทายี, เอวํ ทุกฺขิโต โหตุ อโยฺย อุทายี, เอวํ มา สุขํ ลภตุ อโยฺย อุทายี, ยถา เม กุมาริกา ทุคฺคตา ทุกฺขิตา น สุขํ ลภติ ปาปิกาย สสฺสุยา ปาปเกน สสุเรน ปาปเกน สามิเกนา”ติ.
สาปิ โข กุมาริกา อุชฺฌายติ ขิยฺยติ วิปาเจติ— “เอวํ ทุคฺคโต โหตุ อโยฺย อุทายี, เอวํ ทุกฺขิโต โหตุ อโยฺย อุทายี, เอวํ มา สุขํ ลภตุ อโยฺย อุทายี, ยถาหํ ทุคฺคตา ทุกฺขิตา น สุขํ ลภามิ ปาปิกาย สสฺสุยา ปาปเกน สสุเรน ปาปเกน สามิเกนา”ติ.
อญฺญาปิ อิตฺถิโย อสนฺตุฏฺฐา สสฺสูหิ วา สสุเรหิ วา สามิเกหิ วา, ตา เอวํ โอยาจนฺติ— “เอวํ ทุคฺคโต โหตุ อโยฺย อุทายี, เอวํ ทุกฺขิโต โหตุ อโยฺย อุทายี, เอวํ มา สุขํ ลภตุ อโยฺย อุทายี, ยถา มยํ ทุคฺคตา ทุกฺขิตา น สุขํ ลภาม ปาปิกาหิ สสฺสูหิ ปาปเกหิ สสุเรหิ ปาปเกหิ สามิเกหี”ติ.
ยา ปน ตา อิตฺถิโย สนฺตุฏฺฐา สสฺสูหิ วา สสุเรหิ วา สามิเกหิ วา ตา เอวํ อายาจนฺติ— “เอวํ สุขิโต โหตุ อโยฺย อุทายี, เอวํ สชฺชิโต โหตุ อโยฺย อุทายี, เอวํ สุขเมโธ โหตุ อโยฺย อุทายี, ยถา มยํ สุขิตา สชฺชิตา สุขเมธา ภทฺทิกาหิ สสฺสูหิ ภทฺทเกหิ สสุเรหิ ภทฺทเกหิ สามิเกหี”ติ.
อโสฺสสุํ โข ภิกฺขู เอกจฺจานํ อิตฺถีนํ โอยาจนฺตีนํ เอกจฺจานํ อิตฺถีนํ อายาจนฺตีนํ. เย เต ภิกฺขู อปฺปิจฺฉา …เป… เต อุชฺฌายนฺติ ขิยฺยนฺติ วิปาเจนฺติ— “กถญฺหิ นาม อายสฺมา อุทายี สญฺจริตฺตํ สมาปชฺชิสฺสตี”ติ.
อถ โข เต ภิกฺขู อายสฺมนฺตํ อุทายิํ อเนกปริยาเยน วิครหิตฺวา ภควโต เอตมตฺถํ อาโรเจสุํ. อถ โข ภควา เอตสฺมิํ นิทาเน เอตสฺมิํ ปกรเณ ภิกฺขุสํฆํ สนฺนิปาตาเปตฺวา อายสฺมนฺตํ อุทายิํ ปฏิปุจฺฉิ— “สจฺจํ กิร ตฺวํ, อุทายิ, สญฺจริตฺตํ สมาปชฺชสี”ติ? “สจฺจํ, ภควา”ติ. วิครหิ พุทฺโธ ภควา …เป… กถญฺหิ นาม ตฺวํ, โมฆปุริส, สญฺจริตฺตํ สมาปชฺชิสฺสสิ. เนตํ, โมฆปุริส, อปฺปสนฺนานํ วา ปสาทาย …เป… เอวญฺจ ปน, ภิกฺขเว, อิมํ สิกฺขาปทํ อุทฺทิเสยฺยาถ—
“โย ปน ภิกฺขุ สญฺจริตฺตํ สมาปชฺเชยฺย, อิตฺถิยา วา ปุริสมติํ ปุริสสฺส วา อิตฺถิมติํ, ชายตฺตเน วา ชารตฺตเน วา, สํฆาทิเสโส” ติ.
เอวญฺจิทํ ภควตา ภิกฺขูนํ สิกฺขาปทํ ปญฺญตฺตํ โหติ.
เตน โข ปน สมเยน สมฺพหุลา ธุตฺตา อุยฺยาเน ปริจาเรนฺตา อญฺญตริสฺสา เวสิยา สนฺติเก ทูตํ ปาเหสุํ— “อาคจฺฉตุ อุยฺยาเน ปริจาเรสฺสามา”ติ. สา เอวมาห— “อหํ ขฺวโยฺย, ตุมฺเห น ชานามิ— ‘เก วา อิเม กสฺส วา’ติ. อหญฺจมฺหิ พหุภณฺฑา พหุปริกฺขารา, พหินครญฺจ คนฺตพฺพํ. นาหํ คมิสฺสามี”ติ.
อถ โข โส ทูโต เตสํ ธุตฺตานํ เอตมตฺถํ อาโรเจสิ. เอวํ วุตฺเต, อญฺญตโร ปุริโส เต ธุตฺเต เอตทโวจ— “กิสฺส ตุมฺเห, อโยฺย, เอตํ เวสิํ ยาจิตฺถ? นนุ อโยฺย อุทายี วตฺตพฺโพ. อโยฺย อุทายี อุโยฺยเชสฺสตี”ติ. เอวํ วุตฺเต, อญฺญตโร อุปาสโก ตํ ปุริสํ เอตทโวจ— “มาโยฺย, เอวํ อวจ. น กปฺปติ สมณานํ สกฺยปุตฺติยานํ เอวรูปํ กาตุํ. นาโยฺย อุทายี เอวํ กริสฺสตี”ติ. เอวํ วุตฺเต, “กริสฺสติ น กริสฺสตี”ติ อพฺภุตมกํสุ.
อถ โข เต ธุตฺตา เยนายสฺมา อุทายี เตนุปสงฺกมิํสุ; อุปสงฺกมิตฺวา อายสฺมนฺตํ อุทายิํ เอตทโวจุํ— “อิธ มยํ, ภนฺเต, อุยฺยาเน ปริจาเรนฺตา อสุกาย นาม เวสิยา สนฺติเก ทูตํ ปหิณิมฺหา— ‘อาคจฺฉตุ อุยฺยาเน ปริจาเรสฺสามา’ติ. สา เอวมาห— ‘อหํ ขฺวโยฺย, ตุมฺเห น ชานามิ— เก วา อิเม กสฺส วาติ, อหญฺจมฺหิ พหุภณฺฑา พหุปริกฺขารา, พหินครญฺจ คนฺตพฺพํ. นาหํ คมิสฺสามี’ติ. สาธุ, ภนฺเต, อโยฺย ตํ เวสิํ อุโยฺยเชตู”ติ.
อถ โข อายสฺมา อุทายี เยน สา เวสี เตนุปสงฺกมิ; อุปสงฺกมิตฺวา ตํ เวสิํ เอตทโวจ— “กิสฺสิเมสํ น คจฺฉสี”ติ? “อหํ ขฺวยฺย, อิเม น ชานามิ— ‘เก วา อิเม กสฺส วา’ติ. อหญฺจมฺหิ พหุภณฺฑา พหุปริกฺขารา, พหินครญฺจ คนฺตพฺพํ. นาหํ คมิสฺสามี”ติ. “คจฺฉิเมสํ. อหํ อิเม ชานามี”ติ. “สเจ, ภนฺเต, อโยฺย ชานาติ อหํ คมิสฺสามี”ติ. อถ โข เต ธุตฺตา ตํ เวสิํ อาทาย อุยฺยานํ อคมํสุ. อถ โข โส อุปาสโก อุชฺฌายติ ขิยฺยติ วิปาเจติ— “กถญฺหิ นาม อโยฺย อุทายี ตงฺขณิกํ สญฺจริตฺตํ สมาปชฺชิสฺสตี”ติ.
อโสฺสสุํ โข ภิกฺขู ตสฺส อุปาสกสฺส อุชฺฌายนฺตสฺส ขิยฺยนฺตสฺส วิปาเจนฺตสฺส. เย เต ภิกฺขู อปฺปิจฺฉา …เป… เต อุชฺฌายนฺติ ขิยฺยนฺติ วิปาเจนฺติ— “กถญฺหิ นาม อายสฺมา อุทายี ตงฺขณิกํ สญฺจริตฺตํ สมาปชฺชิสฺสตี”ติ.
อถ โข เต ภิกฺขู อายสฺมนฺตํ อุทายิํ อเนกปริยาเยน วิครหิตฺวา ภควโต เอตมตฺถํ อาโรเจสุํ …เป… “สจฺจํ กิร ตฺวํ, อุทายิ, ตงฺขณิกํ สญฺจริตฺตํ สมาปชฺชสี”ติ? “สจฺจํ, ภควา”ติ. วิครหิ พุทฺโธ ภควา …เป… กถญฺหิ นาม ตฺวํ, โมฆปุริส, ตงฺขณิกํ สญฺจริตฺตํ สมาปชฺชิสฺสสิ? เนตํ, โมฆปุริส, อปฺปสนฺนานํ วา ปสาทาย …เป… เอวญฺจ ปน, ภิกฺขเว, อิมํ สิกฺขาปทํ อุทฺทิเสยฺยาถ—
“โย ปน ภิกฺขุ สญฺจริตฺตํ สมาปชฺเชยฺย, อิตฺถิยา วา ปุริสมติํ ปุริสสฺส วา อิตฺถิมติํ, ชายตฺตเน วา ชารตฺตเน วา, อนฺตมโส ตงฺขณิกายปิ, สํฆาทิเสโส” ติ. (5: 9 )
โย ปนา ติ โย ยาทิโส …เป… ภิกฺขู ติ …เป… อยํ อิมสฺมิํ อตฺเถ อธิปฺเปโต ภิกฺขูติ.
สญฺจริตฺตํ สมาปชฺเชยฺยา ติ อิตฺถิยา วา ปหิโต ปุริสสฺส สนฺติเก คจฺฉติ, ปุริเสน วา ปหิโต อิตฺถิยา สนฺติเก คจฺฉติ.
อิตฺถิยา วา ปุริสมตินฺ ติ ปุริสสฺส มติํ อิตฺถิยา อาโรเจติ.
ปุริสสฺส วา อิตฺถิมตินฺ ติ อิตฺถิยา มติํ ปุริสสฺส อาโรเจติ.
ชายตฺตเน วา ติ ชายา ภวิสฺสสิ.
ชารตฺตเน วา ติ ชารี ภวิสฺสสิ.
อนฺตมโส ตงฺขณิกายปี ติ มุหุตฺติกา ภวิสฺสสิ.
สํฆาทิเสโส ติ …เป… เตนปิ วุจฺจติ “สํฆาทิเสโส”ติ.
ทส อิตฺถิโย— มาตุรกฺขิตา ปิตุรกฺขิตา มาตาปิตุรกฺขิตา ภาตุรกฺขิตา ภคินิรกฺขิตา ญาติรกฺขิตา โคตฺตรกฺขิตา ธมฺมรกฺขิตา สารกฺขา สปริทณฺฑา.
ทส ภริยาโย— ธนกฺกีตา ฉนฺทวาสินี โภควาสินี ปฏวาสินี โอทปตฺตกินี โอภฏจุมฺพฏา ทาสี จ ภริยา จ กมฺมการี จ ภริยา จ ธชาหฏา มุหุตฺติกา.
มาตุรกฺขิตา นาม มาตา รกฺขติ โคเปติ อิสฺสริยํ กาเรติ วสํ วตฺเตติ.
ปิตุรกฺขิตา นาม ปิตา รกฺขติ โคเปติ อิสฺสริยํ กาเรติ วสํ วตฺเตติ.
มาตาปิตุรกฺขิตา นาม มาตาปิตโร รกฺขนฺติ โคเปนฺติ อิสฺสริยํ กาเรนฺติ วสํ วตฺเตนฺติ.
ภาตุรกฺขิตา นาม ภาตา รกฺขติ โคเปติ อิสฺสริยํ กาเรติ วสํ วตฺเตติ.
ภคินิรกฺขิตา นาม ภคินี รกฺขติ โคเปติ อิสฺสริยํ กาเรติ วสํ วตฺเตติ.
ญาติรกฺขิตา นาม ญาตกา รกฺขนฺติ โคเปนฺติ อิสฺสริยํ กาเรนฺติ วสํ วตฺเตนฺติ.
โคตฺตรกฺขิตา นาม สโคตฺตา รกฺขนฺติ โคเปนฺติ อิสฺสริยํ กาเรนฺติ วสํ วตฺเตนฺติ.
ธมฺมรกฺขิตา นาม สหธมฺมิกา รกฺขนฺติ โคเปนฺติ อิสฺสริยํ กาเรนฺติ วสํ วตฺเตนฺติ.
สารกฺขา นาม คพฺเภปิ ปริคฺคหิตา โหติ— มยฺหํ เอสาติ. อนฺตมโส มาลาคุฬปริกฺขิตฺตาปิ.
สปริทณฺฑา นาม เกหิจิ ทณฺโฑ ฐปิโต โหติ— โย อิตฺถนฺนามํ อิตฺถิํ คจฺฉติ เอตฺตโก ทณฺโฑติ.
ธนกฺกีตา นาม ธเนน กิณิตฺวา วาเสติ.
ฉนฺทวาสินี นาม ปิโย ปิยํ วาเสติ.
โภควาสินี นาม โภคํ ทตฺวา วาเสติ.
ปฏวาสินี นาม ปฏํ ทตฺวา วาเสติ.
โอทปตฺตกินี นาม อุทกปตฺตํ อามสิตฺวา วาเสติ.
โอภฏจุมฺพฏา นาม จุมฺพฏํ โอโรเปตฺวา วาเสติ.
ทาสี นาม ทาสี เจว โหติ ภริยา จ.
กมฺมการี นาม กมฺมการี เจว โหติ ภริยา จ.
ธชาหฏา นาม กรมรานีตา วุจฺจติ.
มุหุตฺติกา นาม ตงฺขณิกา วุจฺจติ.
ปุริโส ภิกฺขุํ ปหิณติ— “คจฺฉ, ภนฺเต, อิตฺถนฺนามํ มาตุรกฺขิตํ พฺรูหิ— ‘โหหิ กิร อิตฺถนฺนามสฺส ภริยา ธนกฺกีตา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
ปุริโส ภิกฺขุํ ปหิณติ— “คจฺฉ, ภนฺเต, อิตฺถนฺนามํ ปิตุรกฺขิตํ พฺรูหิ …เป… มาตาปิตุรกฺขิตํ พฺรูหิ… ภาตุรกฺขิตํ พฺรูหิ… ภคินิรกฺขิตํ พฺรูหิ… ญาติรกฺขิตํ พฺรูหิ… โคตฺตรกฺขิตํ พฺรูหิ… ธมฺมรกฺขิตํ พฺรูหิ… สารกฺขํ พฺรูหิ… สปริทณฺฑํ พฺรูหิ— ‘โหหิ กิร อิตฺถนฺนามสฺส ภริยา ธนกฺกีตา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
นิกฺเขปปทานิ.
ปุริโส ภิกฺขุํ ปหิณติ— “คจฺฉ, ภนฺเต, อิตฺถนฺนามํ มาตุรกฺขิตญฺจ ปิตุรกฺขิตญฺจ พฺรูหิ— ‘โหถ กิร อิตฺถนฺนามสฺส ภริยาโย ธนกฺกีตา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
ปุริโส ภิกฺขุํ ปหิณติ— “คจฺฉ, ภนฺเต, อิตฺถนฺนามํ มาตุรกฺขิตญฺจ มาตาปิตุรกฺขิตญฺจ …เป… มาตุรกฺขิตญฺจ ภาตุรกฺขิตญฺจ… มาตุรกฺขิตญฺจ ภคินิรกฺขิตญฺจ… มาตุรกฺขิตญฺจ ญาติรกฺขิตญฺจ… มาตุรกฺขิตญฺจ โคตฺตรกฺขิตญฺจ… มาตุรกฺขิตญฺจ ธมฺมรกฺขิตญฺจ… มาตุรกฺขิตญฺจ สารกฺขญฺจ… มาตุรกฺขิตญฺจ สปริทณฺฑญฺจ พฺรูหิ— ‘โหถ กิร อิตฺถนฺนามสฺส ภริยาโย ธนกฺกีตา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
ขณฺฑจกฺกํ.
ปุริโส ภิกฺขุํ ปหิณติ— “คจฺฉ, ภนฺเต, อิตฺถนฺนามํ ปิตุรกฺขิตญฺจ มาตาปิตุรกฺขิตญฺจ พฺรูหิ— ‘โหถ กิร อิตฺถนฺนามสฺส ภริยาโย ธนกฺกีตา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
ปุริโส ภิกฺขุํ ปหิณติ— “คจฺฉ, ภนฺเต, อิตฺถนฺนามํ ปิตุรกฺขิตญฺจ ภาตุรกฺขิตญฺจ …เป… ปิตุรกฺขิตญฺจ ภคินิรกฺขิตญฺจ… ปิตุรกฺขิตญฺจ ญาติรกฺขิตญฺจ… ปิตุรกฺขิตญฺจ โคตฺตรกฺขิตญฺจ… ปิตุรกฺขิตญฺจ ธมฺมรกฺขิตญฺจ… ปิตุรกฺขิตญฺจ สารกฺขญฺจ… ปิตุรกฺขิตญฺจ สปริทณฺฑญฺจ พฺรูหิ— ‘โหถ กิร อิตฺถนฺนามสฺส ภริยาโย ธนกฺกีตา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
ปุริโส ภิกฺขุํ ปหิณติ— “คจฺฉ, ภนฺเต, อิตฺถนฺนามํ ปิตุรกฺขิตญฺจ มาตุรกฺขิตญฺจ พฺรูหิ— ‘โหถ กิร อิตฺถนฺนามสฺส ภริยาโย ธนกฺกีตา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
พทฺธจกฺกํ มูลํ สํขิตฺตํ.
( ) ปุริโส ภิกฺขุํ ปหิณติ— “คจฺฉ, ภนฺเต, อิตฺถนฺนามํ สปริทณฺฑญฺจ มาตุรกฺขิตญฺจ พฺรูหิ— ‘โหถ กิร อิตฺถนฺนามสฺส ภริยาโย ธนกฺกีตา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
ปุริโส ภิกฺขุํ ปหิณติ— “คจฺฉ, ภนฺเต, อิตฺถนฺนามํ สปริทณฺฑญฺจ ปิตุรกฺขิตญฺจ …เป… สปริทณฺฑญฺจ มาตาปิตุรกฺขิตญฺจ… สปริทณฺฑญฺจ ภาตุรกฺขิตญฺจ… สปริทณฺฑญฺจ ภคินิรกฺขิตญฺจ… สปริทณฺฑญฺจ ญาติรกฺขิตญฺจ… สปริทณฺฑญฺจ โคตฺตรกฺขิตญฺจ… สปริทณฺฑญฺจ ธมฺมรกฺขิตญฺจ… สปริทณฺฑญฺจ สารกฺขญฺจ พฺรูหิ— ‘โหถ กิร อิตฺถนฺนามสฺส ภริยาโย ธนกฺกีตา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
เอกมูลกํ นิฏฺฐิตํ.
เอวํ ทุมูลกมฺปิ ติมูลกมฺปิ ยาว นวมูลกํ กาตพฺพํ.
อิทํ ทสมูลกํ—
ปุริโส ภิกฺขุํ ปหิณติ— “คจฺฉ, ภนฺเต, อิตฺถนฺนามํ มาตุรกฺขิตญฺจ ปิตุรกฺขิตญฺจ มาตาปิตุรกฺขิตญฺจ ภาตุรกฺขิตญฺจ ภคินิรกฺขิตญฺจ ญาติรกฺขิตญฺจ โคตฺตรกฺขิตญฺจ ธมฺมรกฺขิตญฺจ สารกฺขญฺจ สปริทณฺฑญฺจ พฺรูหิ— ‘โหถ กิร อิตฺถนฺนามสฺส ภริยาโย ธนกฺกีตา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
ธนกฺกีตาจกฺกํ นิฏฺฐิตํ.
ปุริโส ภิกฺขุํ ปหิณติ— “คจฺฉ, ภนฺเต, อิตฺถนฺนามํ มาตุรกฺขิตํ พฺรูหิ— ‘โหหิ กิร อิตฺถนฺนามสฺส ภริยา ฉนฺทวาสินี …เป… โภควาสินี… ปฏวาสินี… โอทปตฺตกินี… โอภฏจุมฺพฏา… ทาสี จ ภริยา จ… กมฺมการี จ ภริยา จ… ธชาหฏา… มุหุตฺติกา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
ปุริโส ภิกฺขุํ ปหิณติ— “คจฺฉ, ภนฺเต, อิตฺถนฺนามํ ปิตุรกฺขิตํ พฺรูหิ …เป… มาตาปิตุรกฺขิตํ พฺรูหิ… ภาตุรกฺขิตํ พฺรูหิ… ภคินิรกฺขิตํ พฺรูหิ… ญาติรกฺขิตํ พฺรูหิ… โคตฺตรกฺขิตํ พฺรูหิ… ธมฺมรกฺขิตํ พฺรูหิ… สารกฺขํ พฺรูหิ… สปริทณฺฑํ พฺรูหิ— ‘โหหิ กิร อิตฺถนฺนามสฺส ภริยา มุหุตฺติกา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
นิกฺเขปปทานิ.
ปุริโส ภิกฺขุํ ปหิณติ— “คจฺฉ, ภนฺเต, อิตฺถนฺนามํ มาตุรกฺขิตญฺจ ปิตุรกฺขิตญฺจ พฺรูหิ— ‘โหถ กิร อิตฺถนฺนามสฺส ภริยาโย มุหุตฺติกา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
ปุริโส ภิกฺขุํ ปหิณติ— “คจฺฉ, ภนฺเต, อิตฺถนฺนามํ มาตุรกฺขิตญฺจ มาตาปิตุรกฺขิตญฺจ …เป… มาตุรกฺขิตญฺจ สปริทณฺฑญฺจ พฺรูหิ— ‘โหถ กิร อิตฺถนฺนามสฺส ภริยาโย มุหุตฺติกา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
ขณฺฑจกฺกํ.
ปุริโส ภิกฺขุํ ปหิณติ— “คจฺฉ, ภนฺเต, อิตฺถนฺนามํ ปิตุรกฺขิตญฺจ มาตาปิตุรกฺขิตญฺจ พฺรูหิ— ‘โหถ กิร อิตฺถนฺนามสฺส ภริยาโย มุหุตฺติกา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
ปุริโส ภิกฺขุํ ปหิณติ— “คจฺฉ, ภนฺเต, อิตฺถนฺนามํ ปิตุรกฺขิตญฺจ ภาตุรกฺขิตญฺจ …เป… ปิตุรกฺขิตญฺจ สปริทณฺฑญฺจ พฺรูหิ— ‘โหถ กิร อิตฺถนฺนามสฺส ภริยาโย มุหุตฺติกา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
ปุริโส ภิกฺขุํ ปหิณติ— “คจฺฉ, ภนฺเต, อิตฺถนฺนามํ ปิตุรกฺขิตญฺจ มาตุรกฺขิตญฺจ พฺรูหิ— ‘โหถ กิร อิตฺถนฺนามสฺส ภริยาโย มุหุตฺติกา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
พทฺธจกฺกํ มูลํ สํขิตฺตํ.
ปุริโส ภิกฺขุํ ปหิณติ— “คจฺฉ, ภนฺเต, อิตฺถนฺนามํ สปริทณฺฑญฺจ มาตุรกฺขิตญฺจ พฺรูหิ— ‘โหถ กิร อิตฺถนฺนามสฺส ภริยาโย มุหุตฺติกา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
ปุริโส ภิกฺขุํ ปหิณติ— “คจฺฉ, ภนฺเต, อิตฺถนฺนามํ สปริทณฺฑญฺจ ปิตุรกฺขิตญฺจ …เป… สปริทณฺฑญฺจ สารกฺขญฺจ พฺรูหิ— ‘โหถ กิร อิตฺถนฺนามสฺส ภริยาโย มุหุตฺติกา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
เอกมูลกํ นิฏฺฐิตํ.
ทุมูลกาทีนิปิ เอวเมว กาตพฺพานิ.
อิทํ ทสมูลกํ—
ปุริโส ภิกฺขุํ ปหิณติ— “คจฺฉ, ภนฺเต, อิตฺถนฺนามํ มาตุรกฺขิตญฺจ ปิตุรกฺขิตญฺจ มาตาปิตุรกฺขิตญฺจ ภาตุรกฺขิตญฺจ ภคินิรกฺขิตญฺจ ญาติรกฺขิตญฺจ โคตฺตรกฺขิตญฺจ ธมฺมรกฺขิตญฺจ สารกฺขญฺจ สปริทณฺฑญฺจ พฺรูหิ— ‘โหถ กิร อิตฺถนฺนามสฺส ภริยาโย มุหุตฺติกา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
มุหุตฺติกาจกฺกํ นิฏฺฐิตํ.
ปุริโส ภิกฺขุํ ปหิณติ— “คจฺฉ, ภนฺเต, อิตฺถนฺนามํ มาตุรกฺขิตํ พฺรูหิ— ‘โหหิ กิร อิตฺถนฺนามสฺส ภริยา ธนกฺกีตา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
ปุริโส ภิกฺขุํ ปหิณติ— “คจฺฉ, ภนฺเต, อิตฺถนฺนามํ มาตุรกฺขิตํ พฺรูหิ— ‘โหหิ กิร อิตฺถนฺนามสฺส ภริยา ฉนฺทวาสินี …เป… โภควาสินี… ปฏวาสินี… โอทปตฺตกินี… โอภฏจุมฺพฏา… ทาสี จ ภริยา จ… กมฺมการี จ ภริยา จ… ธชาหฏา… มุหุตฺติกา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
นิกฺเขปปทานิ.
ปุริโส ภิกฺขุํ ปหิณติ— “คจฺฉ, ภนฺเต, อิตฺถนฺนามํ มาตุรกฺขิตํ พฺรูหิ— ‘โหหิ กิร อิตฺถนฺนามสฺส ภริยา ธนกฺกีตา จ ฉนฺทวาสินี จา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
ปุริโส ภิกฺขุํ ปหิณติ— “คจฺฉ, ภนฺเต, อิตฺถนฺนามํ มาตุรกฺขิตํ พฺรูหิ— ‘โหหิ กิร อิตฺถนฺนามสฺส ภริยา ธนกฺกีตา จ โภควาสินี จ …เป… ธนกฺกีตา จ ปฏวาสินี จ… ธนกฺกีตา จ โอทปตฺตกินี จ… ธนกฺกีตา จ โอภฏจุมฺพฏา จ… ธนกฺกีตา จ ทาสี จ ภริยา จ… ธนกฺกีตา จ กมฺมการี จ ภริยา จ… ธนกฺกีตา จ ธชาหฏา จ… ธนกฺกีตา จ มุหุตฺติกา จา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
ขณฺฑจกฺกํ.
ปุริโส ภิกฺขุํ ปหิณติ— “คจฺฉ, ภนฺเต, อิตฺถนฺนามํ มาตุรกฺขิตํ พฺรูหิ— ‘โหหิ กิร อิตฺถนฺนามสฺส ภริยา ฉนฺทวาสินี จ โภควาสินี จ …เป… ฉนฺทวาสินี จ มุหุตฺติกา จ… ฉนฺทวาสินี จ ธนกฺกีตา จา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
พทฺธจกฺกํ มูลํ สํขิตฺตํ.
ปุริโส ภิกฺขุํ ปหิณติ— “คจฺฉ, ภนฺเต, อิตฺถนฺนามํ มาตุรกฺขิตํ พฺรูหิ— ‘โหหิ กิร อิตฺถนฺนามสฺส ภริยา มุหุตฺติกา จ ธนกฺกีตา จ …เป… มุหุตฺติกา จ ฉนฺทวาสินี จ …เป… มุหุตฺติกา จ ธชาหฏา จา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
เอกมูลกํ นิฏฺฐิตํ.
ทุมูลกาทีนิปิ เอวเมว กาตพฺพานิ.
อิทํ ทสมูลกํ—
ปุริโส ภิกฺขุํ ปหิณติ— “คจฺฉ, ภนฺเต, อิตฺถนฺนามํ มาตุรกฺขิตํ พฺรูหิ— ‘โหหิ กิร อิตฺถนฺนามสฺส ภริยา ธนกฺกีตา จ ฉนฺทวาสินี จ โภควาสินี จ ปฏวาสินี จ โอทปตฺตกินี จ โอภฏจุมฺพฏา จ ทาสี จ ภริยา จ กมฺมการี จ ภริยา จ ธชาหฏา จ มุหุตฺติกา จา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
มาตุรกฺขิตาจกฺกํ นิฏฺฐิตํ.
ปุริโส ภิกฺขุํ ปหิณติ— “คจฺฉ, ภนฺเต, อิตฺถนฺนามํ ปิตุรกฺขิตํ …เป… มาตาปิตุรกฺขิตํ… ภาตุรกฺขิตํ… ภคินิรกฺขิตํ… ญาติรกฺขิตํ… โคตฺตรกฺขิตํ… ธมฺมรกฺขิตํ… สารกฺขํ… สปริทณฺฑํ พฺรูหิ— ‘โหหิ กิร อิตฺถนฺนามสฺส ภริยา ธนกฺกีตา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
ปุริโส ภิกฺขุํ ปหิณติ— “คจฺฉ, ภนฺเต, อิตฺถนฺนามํ สปริทณฺฑํ พฺรูหิ— ‘โหหิ กิร อิตฺถนฺนามสฺส ภริยา ฉนฺทวาสินี …เป… โภควาสินี… ปฏวาสินี… โอทปตฺตกินี… โอภฏจุมฺพฏา… ทาสี จ ภริยา จ… กมฺมการี จ ภริยา จ… ธชาหฏา… มุหุตฺติกา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
นิกฺเขปปทานิ.
ปุริโส ภิกฺขุํ ปหิณติ— “คจฺฉ, ภนฺเต, อิตฺถนฺนามํ สปริทณฺฑํ พฺรูหิ— ‘โหหิ กิร อิตฺถนฺนามสฺส ภริยา ธนกฺกีตา จ ฉนฺทวาสินี จา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
ปุริโส ภิกฺขุํ ปหิณติ— “คจฺฉ, ภนฺเต, อิตฺถนฺนามํ สปริทณฺฑํ พฺรูหิ— ‘โหหิ กิร อิตฺถนฺนามสฺส ภริยา ธนกฺกีตา จ โภควาสินี จ …เป… ธนกฺกีตา จ มุหุตฺติกา จา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
ขณฺฑจกฺกํ.
ปุริโส ภิกฺขุํ ปหิณติ— “คจฺฉ, ภนฺเต, อิตฺถนฺนามํ สปริทณฺฑํ พฺรูหิ— ‘โหหิ กิร อิตฺถนฺนามสฺส ภริยา ฉนฺทวาสินี จ โภควาสินี จ …เป… ฉนฺทวาสินี จ มุหุตฺติกา จ… ฉนฺทวาสินี จ ธนกฺกีตา จา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
พทฺธจกฺกํ มูลํ สํขิตฺตํ.
ปุริโส ภิกฺขุํ ปหิณติ— “คจฺฉ, ภนฺเต, อิตฺถนฺนามํ สปริทณฺฑํ พฺรูหิ— ‘โหหิ กิร อิตฺถนฺนามสฺส ภริยา มุหุตฺติกา จ ธนกฺกีตา จ …เป… มุหุตฺติกา จ ฉนฺทวาสินี จ …เป… มุหุตฺติกา จ ธชาหฏา จา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
เอกมูลกํ นิฏฺฐิตํ.
ทุมูลกมฺปิ ติมูลกมฺปิ ยาว นวมูลกํ เอวเมว กาตพฺพํ.
อิทํ ทสมูลกํ—
ปุริโส ภิกฺขุํ ปหิณติ— “คจฺฉ, ภนฺเต, อิตฺถนฺนามํ สปริทณฺฑํ พฺรูหิ— ‘โหหิ กิร อิตฺถนฺนามสฺส ภริยา ธนกฺกีตา จ ฉนฺทวาสินี จ โภควาสินี จ ปฏวาสินี จ โอทปตฺตกินี จ โอภฏจุมฺพฏา จ ทาสี จ ภริยา จ กมฺมการี จ ภริยา จ ธชาหฏา จ มุหุตฺติกา จา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
สปริทณฺฑาจกฺกํ นิฏฺฐิตํ.
ปุริโส ภิกฺขุํ ปหิณติ— “คจฺฉ, ภนฺเต, อิตฺถนฺนามํ มาตุรกฺขิตํ พฺรูหิ— ‘โหหิ กิร อิตฺถนฺนามสฺส ภริยา ธนกฺกีตา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
ปุริโส ภิกฺขุํ ปหิณติ— “คจฺฉ, ภนฺเต, อิตฺถนฺนามํ มาตุรกฺขิตญฺจ ปิตุรกฺขิตญฺจ พฺรูหิ— ‘โหถ กิร อิตฺถนฺนามสฺส ภริยาโย ธนกฺกีตา จ ฉนฺทวาสินี จา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
ปุริโส ภิกฺขุํ ปหิณติ— “คจฺฉ, ภนฺเต, อิตฺถนฺนามํ มาตุรกฺขิตญฺจ ปิตุรกฺขิตญฺจ มาตาปิตุรกฺขิตญฺจ พฺรูหิ— ‘โหถ กิร อิตฺถนฺนามสฺส ภริยาโย ธนกฺกีตา จ ฉนฺทวาสินี จ โภควาสินี จา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
เอวํ อุภโตวฑฺฒกํ กาตพฺพํ.
ปุริโส ภิกฺขุํ ปหิณติ— “คจฺฉ, ภนฺเต, อิตฺถนฺนามํ มาตุรกฺขิตญฺจ ปิตุรกฺขิตญฺจ มาตาปิตุรกฺขิตญฺจ ภาตุรกฺขิตญฺจ ภคินิรกฺขิตญฺจ ญาติรกฺขิตญฺจ โคตฺตรกฺขิตญฺจ ธมฺมรกฺขิตญฺจ สารกฺขญฺจ สปริทณฺฑญฺจ พฺรูหิ— ‘โหถ กิร อิตฺถนฺนามสฺส ภริยาโย ธนกฺกีตา จ ฉนฺทวาสินี จ โภควาสินี จ ปฏวาสินี จ โอทปตฺตกินี จ โอภฏจุมฺพฏา จ ทาสี จ ภริยา จ กมฺมการี จ ภริยา จ ธชาหฏา จ มุหุตฺติกา จา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
อุภโตวฑฺฒกํ นิฏฺฐิตํ.
ปุริสสฺส มาตา ภิกฺขุํ ปหิณติ …เป… ปุริสสฺส ปิตา ภิกฺขุํ ปหิณติ …เป… ปุริสสฺส มาตาปิตโร ภิกฺขุํ ปหิณนฺติ …เป… ปุริสสฺส ภาตา ภิกฺขุํ ปหิณติ …เป… ปุริสสฺส ภคินี ภิกฺขุํ ปหิณติ …เป… ปุริสสฺส ญาตกา ภิกฺขุํ ปหิณนฺติ …เป… ปุริสสฺส โคตฺตา ภิกฺขุํ ปหิณนฺติ …เป… ปุริสสฺส สหธมฺมิกา ภิกฺขุํ ปหิณนฺติ …เป… .
ปุริสสฺส เปยฺยาโล วิตฺถาเรตพฺโพ.
อุภโตวฑฺฒกํ ยถา ปุริมนโย ตเถว วิตฺถาเรตพฺพํ.
มาตุรกฺขิตาย มาตา ภิกฺขุํ ปหิณติ— “คจฺฉ, ภนฺเต, อิตฺถนฺนามํ พฺรูหิ— ‘โหตุ อิตฺถนฺนามสฺส ภริยา ธนกฺกีตา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
มาตุรกฺขิตาย มาตา ภิกฺขุํ ปหิณติ— “คจฺฉ, ภนฺเต, อิตฺถนฺนามํ พฺรูหิ— ‘โหตุ อิตฺถนฺนามสฺส ภริยา ฉนฺทวาสินี …เป… โภควาสินี… ปฏวาสินี… โอทปตฺตกินี… โอภฏจุมฺพฏา… ทาสี จ ภริยา จ… กมฺมการี จ ภริยา จ… ธชาหฏา… มุหุตฺติกา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
นิกฺเขปปทานิ.
มาตุรกฺขิตาย มาตา ภิกฺขุํ ปหิณติ— “คจฺฉ, ภนฺเต, อิตฺถนฺนามํ พฺรูหิ— ‘โหตุ อิตฺถนฺนามสฺส ภริยา ธนกฺกีตา จ ฉนฺทวาสินี จ …เป… ธนกฺกีตา จ โภควาสินี จ …เป… ธนกฺกีตา จ มุหุตฺติกา จา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
ขณฺฑจกฺกํ.
มาตุรกฺขิตาย มาตา ภิกฺขุํ ปหิณติ— “คจฺฉ, ภนฺเต, อิตฺถนฺนามํ พฺรูหิ— ‘โหตุ อิตฺถนฺนามสฺส ภริยา ฉนฺทวาสินี จ โภควาสินี จ …เป… ฉนฺทวาสินี จ มุหุตฺติกา จ… ฉนฺทวาสินี จ ธนกฺกีตา จา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
พทฺธจกฺกํ มูลํ สํขิตฺตํ.
มาตุรกฺขิตาย มาตา ภิกฺขุํ ปหิณติ— “คจฺฉ, ภนฺเต, อิตฺถนฺนามํ พฺรูหิ— ‘โหตุ อิตฺถนฺนามสฺส ภริยา มุหุตฺติกา จ ธนกฺกีตา จ …เป… มุหุตฺติกา จ ฉนฺทวาสินี จ …เป… มุหุตฺติกา จ ธชาหฏา จา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
เอกมูลกํ นิฏฺฐิตํ.
ทุมูลกมฺปิ ติมูลกมฺปิ ยาว นวมูลกํ เอวเมว กาตพฺพํ.
อิทํ ทสมูลกํ—
มาตุรกฺขิตาย มาตา ภิกฺขุํ ปหิณติ— “คจฺฉ, ภนฺเต, อิตฺถนฺนามํ พฺรูหิ— ‘โหตุ อิตฺถนฺนามสฺส ภริยา ธนกฺกีตา จ ฉนฺทวาสินี จ โภควาสินี จ ปฏวาสินี จ โอทปตฺตกินี จ โอภฏจุมฺพฏา จ ทาสี จ ภริยา จ กมฺมการี จ ภริยา จ ธชาหฏา จ มุหุตฺติกา จา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
มาตุจกฺกํ นิฏฺฐิตํ.
ปิตุรกฺขิตาย ปิตา ภิกฺขุํ ปหิณติ …เป… มาตาปิตุรกฺขิตาย มาตาปิตโร ภิกฺขุํ ปหิณนฺติ… ภาตุรกฺขิตาย ภาตา ภิกฺขุํ ปหิณติ… ภคินิรกฺขิตาย ภคินี ภิกฺขุํ ปหิณติ… ญาติรกฺขิตาย ญาตกา ภิกฺขุํ ปหิณนฺติ… โคตฺตรกฺขิตาย โคตฺตา ภิกฺขุํ ปหิณนฺติ… ธมฺมรกฺขิตาย สหธมฺมิกา ภิกฺขุํ ปหิณนฺติ… สารกฺขาย เยน ปริคฺคหิตา โหติ โส ภิกฺขุํ ปหิณติ… สปริทณฺฑาย เยน ทณฺโฑ ฐปิโต โหติ โส ภิกฺขุํ ปหิณติ— “คจฺฉ, ภนฺเต, อิตฺถนฺนามํ พฺรูหิ— ‘โหตุ อิตฺถนฺนามสฺส ภริยา ธนกฺกีตา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
สปริทณฺฑาย เยน ทณฺโฑ ฐปิโต โหติ โส ภิกฺขุํ ปหิณติ— “คจฺฉ, ภนฺเต, อิตฺถนฺนามํ พฺรูหิ— ‘โหตุ อิตฺถนฺนามสฺส ภริยา ฉนฺทวาสินี …เป… โภควาสินี… ปฏวาสินี… โอทปตฺตกินี… โอภฏจุมฺพฏา… ทาสี จ ภริยา จ… กมฺมการี จ ภริยา จ… ธชาหฏา… มุหุตฺติกา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
นิกฺเขปปทานิ.
สปริทณฺฑาย เยน ทณฺโฑ ฐปิโต โหติ โส ภิกฺขุํ ปหิณติ— “คจฺฉ, ภนฺเต, อิตฺถนฺนามํ พฺรูหิ— ‘โหตุ อิตฺถนฺนามสฺส ภริยา ธนกฺกีตา จ ฉนฺทวาสินี จ …เป… ธนกฺกีตา จ โภควาสินี จ …เป… ธนกฺกีตา จ มุหุตฺติกา จา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
ขณฺฑจกฺกํ.
สปริทณฺฑาย เยน ทณฺโฑ ฐปิโต โหติ โส ภิกฺขุํ ปหิณติ— “คจฺฉ, ภนฺเต, อิตฺถนฺนามํ พฺรูหิ— ‘โหตุ อิตฺถนฺนามสฺส ภริยา ฉนฺทวาสินี จ โภควาสินี จ …เป… ฉนฺทวาสินี จ มุหุตฺติกา จ… ฉนฺทวาสินี จ ธนกฺกีตา จา’”ติ. ปฏิคฺคณฺหาติ วีมํสติ ปจฺจาหรติ อาปตฺติ สํฆาทิเสสสฺส.
พทฺธจกฺกํ มูลํ สํขิตฺตํ.
สปริทณฺฑาย เยน ทณฺโฑ, ฐปิโต โหติ โส ภิกฺขุํ ปหิณติ— “คจฺฉ, ภนฺเต, อิตฺถนฺนามํ พฺรูหิ— ‘โหตุ อิตฺถนฺนามสฺส ภริยา มุหุตฺติกา จ ธนกฺกีตา จ …เป… มุหุตฺติกา จ ฉนฺทวาสินี จ …เป… มุหุตฺติกา จ ธชาหฏา จา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
เอกมูลกํ นิฏฺฐิตํ.
ทุมูลกมฺปิ ติมูลกมฺปิ ยาว นวมูลกํ เอวเมว กาตพฺพํ.
อิทํ ทสมูลกํ—
สปริทณฺฑาย เยน ทณฺโฑ ฐปิโต โหติ โส ภิกฺขุํ ปหิณติ— “คจฺฉ, ภนฺเต, อิตฺถนฺนามํ พฺรูหิ— ‘โหตุ อิตฺถนฺนามสฺส ภริยา ธนกฺกีตา จ ฉนฺทวาสินี จ โภควาสินี จ ปฏวาสินี จ โอทปตฺตกินี จ โอภฏจุมฺพฏา จ ทาสี จ ภริยา จ กมฺมการี จ ภริยา จ ธชาหฏา จ มุหุตฺติกา จา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
ทณฺฑฐปิตจกฺกํ นิฏฺฐิตํ.
มาตุรกฺขิตา ภิกฺขุํ ปหิณติ— “คจฺฉ, ภนฺเต, อิตฺถนฺนามํ พฺรูหิ— ‘โหมิ อิตฺถนฺนามสฺส ภริยา ธนกฺกีตา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
มาตุรกฺขิตา ภิกฺขุํ ปหิณติ— “คจฺฉ, ภนฺเต, อิตฺถนฺนามํ พฺรูหิ— ‘โหมิ อิตฺถนฺนามสฺส ภริยา ฉนฺทวาสินี …เป… โภควาสินี… ปฏวาสินี… โอทปตฺตกินี… โอภฏจุมฺพฏา… ทาสี จ ภริยา จ… กมฺมการี จ ภริยา จ… ธชาหฏา… มุหุตฺติกา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
นิกฺเขปปทานิ.
มาตุรกฺขิตา ภิกฺขุํ ปหิณติ— “คจฺฉ, ภนฺเต, อิตฺถนฺนามํ พฺรูหิ— ‘โหมิ อิตฺถนฺนามสฺส ภริยา ธนกฺกีตา จ ฉนฺทวาสินี จา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
มาตุรกฺขิตา ภิกฺขุํ ปหิณติ— “คจฺฉ, ภนฺเต, อิตฺถนฺนามํ พฺรูหิ— ‘โหมิ อิตฺถนฺนามสฺส ภริยา ธนกฺกีตา จ โภควาสินี จ …เป… ธนกฺกีตา จ ปฏวาสินี จ …เป… ธนกฺกีตา จ มุหุตฺติกา จา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
ขณฺฑจกฺกํ.
มาตุรกฺขิตา ภิกฺขุํ ปหิณติ— “คจฺฉ, ภนฺเต, อิตฺถนฺนามํ พฺรูหิ— ‘โหมิ อิตฺถนฺนามสฺส ภริยา ฉนฺทวาสินี จ โภควาสินี จ …เป… ฉนฺทวาสินี จ มุหุตฺติกา จ… ฉนฺทวาสินี จ ธนกฺกีตา จา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
พทฺธจกฺกํ มูลํ สํขิตฺตํ.
มาตุรกฺขิตา ภิกฺขุํ ปหิณติ— “คจฺฉ, ภนฺเต, อิตฺถนฺนามํ พฺรูหิ— ‘โหมิ อิตฺถนฺนามสฺส ภริยา มุหุตฺติกา จ ธนกฺกีตา จ …เป… มุหุตฺติกา จ ฉนฺทวาสินี จ …เป… มุหุตฺติกา จ ธชาหฏา จา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
เอกมูลกํ นิฏฺฐิตํ.
ทุมูลกาทีนิปิ เอวเมว กาตพฺพานิ.
อิทํ ทสมูลกํ—
มาตุรกฺขิตา ภิกฺขุํ ปหิณติ— “คจฺฉ, ภนฺเต, อิตฺถนฺนามํ พฺรูหิ— ‘โหมิ อิตฺถนฺนามสฺส ภริยา ธนกฺกีตา จ ฉนฺทวาสินี จ โภควาสินี จ ปฏวาสินี จ โอทปตฺตกินี จ โอภฏจุมฺพฏา จ ทาสี จ ภริยา จ กมฺมการี จ ภริยา จ ธชาหฏา จ มุหุตฺติกา จา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
อปรํ มาตุรกฺขิตาจกฺกํ นิฏฺฐิตํ.
ปิตุรกฺขิตา ภิกฺขุํ ปหิณติ …เป… มาตาปิตุรกฺขิตา ภิกฺขุํ ปหิณติ… ภาตุรกฺขิตา ภิกฺขุํ ปหิณติ… ภคินิรกฺขิตา ภิกฺขุํ ปหิณติ… ญาติรกฺขิตา ภิกฺขุํ ปหิณติ… โคตฺตรกฺขิตา ภิกฺขุํ ปหิณติ… ธมฺมรกฺขิตา ภิกฺขุํ ปหิณติ… สารกฺขา ภิกฺขุํ ปหิณติ… สปริทณฺฑา ภิกฺขุํ ปหิณติ— “คจฺฉ, ภนฺเต, อิตฺถนฺนามํ พฺรูหิ— ‘โหมิ อิตฺถนฺนามสฺส ภริยา ธนกฺกีตา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
สปริทณฺฑา ภิกฺขุํ ปหิณติ— “คจฺฉ, ภนฺเต, อิตฺถนฺนามํ พฺรูหิ— ‘โหมิ อิตฺถนฺนามสฺส ภริยา ฉนฺทวาสินี …เป… โภควาสินี… ปฏวาสินี… โอทปตฺตกินี… โอภฏจุมฺพฏา… ทาสี จ ภริยา จ… กมฺมการี จ ภริยา จ… ธชาหฏา… มุหุตฺติกา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
นิกฺเขปปทานิ.
สปริทณฺฑา ภิกฺขุํ ปหิณติ— “คจฺฉ, ภนฺเต, อิตฺถนฺนามํ พฺรูหิ— ‘โหมิ อิตฺถนฺนามสฺส ภริยา ธนกฺกีตา จ ฉนฺทวาสินี จ …เป… ธนกฺกีตา จ มุหุตฺติกา จา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
ขณฺฑจกฺกํ.
สปริทณฺฑา ภิกฺขุํ ปหิณติ— “คจฺฉ, ภนฺเต, อิตฺถนฺนามํ พฺรูหิ— ‘โหมิ อิตฺถนฺนามสฺส ภริยา ฉนฺทวาสินี จ โภควาสินี จ …เป… ฉนฺทวาสินี จ มุหุตฺติกา จ… ฉนฺทวาสินี จ ธนกฺกีตา จา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
พทฺธจกฺกํ, มูลํ สํขิตฺตํ.
สปริทณฺฑา ภิกฺขุํ ปหิณติ— “คจฺฉ, ภนฺเต, อิตฺถนฺนามํ พฺรูหิ— ‘โหมิ อิตฺถนฺนามสฺส ภริยา มุหุตฺติกา จ ธนกฺกีตา จ …เป… มุหุตฺติกา จ ฉนฺทวาสินี จ …เป… มุหุตฺติกา จ ธชาหฏา จา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
เอกมูลกํ นิฏฺฐิตํ.
ทุมูลกาทีนิปิ เอวเมว กาตพฺพานิ.
อิทํ ทสมูลกํ—
สปริทณฺฑา ภิกฺขุํ ปหิณติ— “คจฺฉ, ภนฺเต, อิตฺถนฺนามํ พฺรูหิ— ‘โหมิ อิตฺถนฺนามสฺส ภริยา ธนกฺกีตา จ ฉนฺทวาสินี จ โภควาสินี จ ปฏวาสินี จ โอทปตฺตกินี จ โอภฏจุมฺพฏา จ ทาสี จ ภริยา จ กมฺมการี จ ภริยา จ ธชาหฏา จ มุหุตฺติกา จา’”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
อปรํ สปริทณฺฑาจกฺกํ นิฏฺฐิตํ.
สพฺพํ จกฺกเปยฺยาลํ นิฏฺฐิตํ.
ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส. ปฏิคฺคณฺหาติ วีมํสติ น ปจฺจาหรติ, อาปตฺติ ถุลฺลจฺจยสฺส. ปฏิคฺคณฺหาติ น วีมํสติ ปจฺจาหรติ, อาปตฺติ ถุลฺลจฺจยสฺส. ปฏิคฺคณฺหาติ น วีมํสติ น ปจฺจาหรติ, อาปตฺติ ทุกฺกฏสฺส. น ปฏิคฺคณฺหาติ วีมํสติ ปจฺจาหรติ, อาปตฺติ ถุลฺลจฺจยสฺส. น ปฏิคฺคณฺหาติ วีมํสติ น ปจฺจาหรติ, อาปตฺติ ทุกฺกฏสฺส. น ปฏิคฺคณฺหาติ น วีมํสติ ปจฺจาหรติ, อาปตฺติ ทุกฺกฏสฺส. น ปฏิคฺคณฺหาติ น วีมํสติ น ปจฺจาหรติ, อนาปตฺติ.
ปุริโส สมฺพหุเล ภิกฺขู อาณาเปติ— “คจฺฉถ, ภนฺเต, อิตฺถนฺนามํ อิตฺถิํ วีมํสถา”ติ. สพฺเพ ปฏิคฺคณฺหนฺติ สพฺเพ วีมํสนฺติ สพฺเพ ปจฺจาหรนฺติ, อาปตฺติ สพฺเพสํ สํฆาทิเสสสฺส.
ปุริโส สมฺพหุเล ภิกฺขู อาณาเปติ— “คจฺฉถ, ภนฺเต, อิตฺถนฺนามํ อิตฺถิํ วีมํสถา”ติ. สพฺเพ ปฏิคฺคณฺหนฺติ สพฺเพ วีมํสนฺติ เอกํ ปจฺจาหราเปนฺติ, อาปตฺติ สพฺเพสํ สํฆาทิเสสสฺส.
ปุริโส สมฺพหุเล ภิกฺขู อาณาเปติ— “คจฺฉถ, ภนฺเต, อิตฺถนฺนามํ อิตฺถิํ วีมํสถา”ติ. สพฺเพ ปฏิคฺคณฺหนฺติ เอกํ วีมํสาเปตฺวา สพฺเพ ปจฺจาหรนฺติ, อาปตฺติ สพฺเพสํ สํฆาทิเสสสฺส.
ปุริโส สมฺพหุเล ภิกฺขู อาณาเปติ— “คจฺฉถ, ภนฺเต, อิตฺถนฺนามํ อิตฺถิํ วีมํสถา”ติ. สพฺเพ ปฏิคฺคณฺหนฺติ เอกํ วีมํสาเปตฺวา เอกํ ปจฺจาหราเปนฺติ, อาปตฺติ สพฺเพสํ สํฆาทิเสสสฺส.
ปุริโส ภิกฺขุํ อาณาเปติ— “คจฺฉ, ภนฺเต, อิตฺถนฺนามํ อิตฺถิํ วีมํสา”ติ. ปฏิคฺคณฺหาติ วีมํสติ ปจฺจาหรติ, อาปตฺติ สํฆาทิเสสสฺส.
ปุริโส ภิกฺขุํ อาณาเปติ— “คจฺฉ, ภนฺเต, อิตฺถนฺนามํ อิตฺถิํ วีมํสา”ติ. ปฏิคฺคณฺหาติ วีมํสติ อนฺเตวาสิํ ปจฺจาหราเปติ, อาปตฺติ สํฆาทิเสสสฺส.
ปุริโส ภิกฺขุํ อาณาเปติ— “คจฺฉ, ภนฺเต, อิตฺถนฺนามํ อิตฺถิํ วีมํสา”ติ. ปฏิคฺคณฺหาติ อนฺเตวาสิํ วีมํสาเปตฺวา อตฺตนา ปจฺจาหรติ, อาปตฺติ สํฆาทิเสสสฺส.
ปุริโส ภิกฺขุํ อาณาเปติ— “คจฺฉ, ภนฺเต, อิตฺถนฺนามํ อิตฺถิํ วิมํสา”ติ. ปฏิคฺคณฺหาติ อนฺเตวาสิํ วีมํสาเปติ อนฺเตวาสี วีมํสิตฺวา พหิทฺธา ปจฺจาหรติ, อาปตฺติ อุภินฺนํ ถุลฺลจฺจยสฺส.
คจฺฉนฺโต สมฺปาเทติ, อาคจฺฉนฺโต วิสํวาเทติ, อาปตฺติ ถุลฺลจฺจยสฺส.
คจฺฉนฺโต วิสํวาเทติ, อาคจฺฉนฺโต สมฺปาเทติ, อาปตฺติ ถุลฺลจฺจยสฺส.
คจฺฉนฺโต สมฺปาเทติ, อาคจฺฉนฺโต สมฺปาเทติ, อาปตฺติ สํฆาทิเสสสฺส.
คจฺฉนฺโต วิสํวาเทติ, อาคจฺฉนฺโต วิสํวาเทติ, อนาปตฺติ.
อนาปตฺติ— สํฆสฺส วา เจติยสฺส วา คิลานสฺส วา กรณีเยน คจฺฉติ, อุมฺมตฺตกสฺส, อาทิกมฺมิกสฺสาติ.