1.2.6 กุฏิการสิกฺขาปท
เตน สมเยน พุทฺโธ ภควา ราชคเห วิหรติ เวฬุวเน กลนฺทกนิวาเป. เตน โข ปน สมเยน อาฬวกา ภิกฺขู สญฺญาจิกาโย กุฏิโย การาเปนฺติ อสฺสามิกาโย อตฺตุทฺเทสิกาโย อปฺปมาณิกาโย. ตาโย น นิฏฺฐานํ คจฺฉนฺติ. เต ยาจนพหุลา วิญฺญตฺติพหุลา วิหรนฺติ— “ปุริสํ เทถ, ปุริสตฺถกรํ เทถ, โคณํ เทถ, สกฏํ เทถ, วาสิํ เทถ, ปรสุํ เทถ, กุฐาริํ เทถ, กุทาลํ เทถ, นิขาทนํ เทถ, วลฺลิํ เทถ, เวฬุํ เทถ, มุญฺชํ เทถ, ปพฺพชํ เทถ, ติณํ เทถ, มตฺติกํ เทถา”ติ. มนุสฺสา อุปทฺทุตา ยาจนาย อุปทฺทุตา วิญฺญตฺติยา ภิกฺขู ทิสฺวา อุพฺพิชฺชนฺติปิ อุตฺตสนฺติปิ ปลายนฺติปิ อญฺเญนปิ คจฺฉนฺติ อญฺเญนปิ มุขํ กโรนฺติ ทฺวารมฺปิ ถเกนฺติ, คาวิมฺปิ ทิสฺวา ปลายนฺติ ภิกฺขูติ มญฺญมานา.
อถ โข อายสฺมา มหากสฺสโป ราชคเห วสฺสํวุฏฺโฐ เยน อาฬวี เตน ปกฺกามิ. อนุปุพฺเพน เยน อาฬวี ตทวสริ. ตตฺร สุทํ อายสฺมา มหากสฺสโป อาฬวิยํ วิหรติ อคฺคาฬเว เจติเย. อถ โข อายสฺมา มหากสฺสโป ปุพฺพณฺหสมยํ นิวาเสตฺวา ปตฺตจีวรมาทาย อาฬวิํ ปิณฺฑาย ปาวิสิ. มนุสฺสา อายสฺมนฺตํ มหากสฺสปํ ปสฺสิตฺวา อุพฺพิชฺชนฺติปิ อุตฺตสนฺติปิ ปลายนฺติปิ อญฺเญนปิ คจฺฉนฺติ อญฺเญนปิ มุขํ กโรนฺติ ทฺวารมฺปิ ถเกนฺติ. อถ โข อายสฺมา มหากสฺสโป อาฬวิยํ ปิณฺฑาย จริตฺวา ปจฺฉาภตฺตํ ปิณฺฑปาตปฏิกฺกนฺโต ภิกฺขู อามนฺเตสิ— “ปุพฺพายํ, อาวุโส, อาฬวี สุภิกฺขา อโหสิ สุลภปิณฺฑา สุกรา อุญฺเฉน ปคฺคเหน ยาเปตุํ; เอตรหิ ปนายํ อาฬวี ทุพฺภิกฺขา ทุลฺลภปิณฺฑา, น สุกรา อุญฺเฉน ปคฺคเหน ยาเปตุํ. โก นุ โข, อาวุโส, เหตุ โก ปจฺจโย, เยนายํ อาฬวี ทุพฺภิกฺขา ทุลฺลภปิณฺฑา, น สุกรา อุญฺเฉน ปคฺคเหน ยาเปตุนฺ”ติ? อถ โข เต ภิกฺขู อายสฺมโต มหากสฺสปสฺส เอตมตฺถํ อาโรเจสุํ.
อถ โข ภควา ราชคเห ยถาภิรนฺตํ วิหริตฺวา เยน อาฬวี เตน จาริกํ ปกฺกามิ. อนุปุพฺเพน จาริกํ จรมาโน เยน อาฬวี ตทวสริ. ตตฺร สุทํ ภควา อาฬวิยํ วิหรติ อคฺคาฬเว เจติเย. อถ โข อายสฺมา มหากสฺสโป เยน ภควา เตนุปสงฺกมิ; อุปสงฺกมิตฺวา ภควนฺตํ อภิวาเทตฺวา เอกมนฺตํ นิสีทิ. เอกมนฺตํ นิสินฺโน โข อายสฺมา มหากสฺสโป ภควโต เอตมตฺถํ อาโรเจสิ.
อถ โข ภควา เอตสฺมิํ นิทาเน เอตสฺมิํ ปกรเณ ภิกฺขุสํฆํ สนฺนิปาตาเปตฺวา อาฬวเก ภิกฺขู ปฏิปุจฺฉิ— “สจฺจํ กิร ตุมฺเห, ภิกฺขเว, สญฺญาจิกาโย กุฏิโย การาเปถ อสฺสามิกาโย อตฺตุทฺเทสิกาโย อปฺปมาณิกาโย. ตาโย น นิฏฺฐานํ คจฺฉนฺติ. เต ตุมฺเห ยาจนพหุลา วิญฺญตฺติพหุลา วิหรถ— ‘ปุริสํ เทถ ปุริสตฺถกรํ เทถ …เป… ติณํ เทถ มตฺติกํ เทถา’ติ. มนุสฺสา อุปทฺทุตา ยาจนาย อุปทฺทุตา วิญฺญตฺติยา ภิกฺขู ทิสฺวา อุพฺพิชฺชนฺติปิ อุตฺตสนฺติปิ ปลายนฺติปิ อญฺเญนปิ คจฺฉนฺติ อญฺเญนปิ มุขํ กโรนฺติ ทฺวารมฺปิ ถเกนฺติ, คาวิมฺปิ ทิสฺวา ปลายนฺติ ภิกฺขูติ มญฺญมานา”ติ? “สจฺจํ, ภควา”ติ. วิครหิ พุทฺโธ ภควา …เป… กถญฺหิ นาม ตุมฺเห, โมฆปุริสา, สํยาจิกาโย กุฏิโย การาเปสฺสถ อสฺสามิกาโย อตฺตุทฺเทสิกาโย อปฺปมาณิกาโย. ตาโย น นิฏฺฐานํ คจฺฉนฺติ. เต ตุมฺเห ยาจนพหุลา วิญฺญตฺติพหุลา วิหริสฺสถ— “ปุริสํ เทถ ปุริสตฺถกรํ เทถ …เป… ติณํ เทถ มตฺติกํ เทถา”ติ. เนตํ โมฆปุริสา, อปฺปสนฺนานํ วา ปสาทาย …เป… วิครหิตฺวา ธมฺมิํ กถํ กตฺวา ภิกฺขู อามนฺเตสิ—
“ภูตปุพฺพํ, ภิกฺขเว, ทฺเว ภาตโร อิสโย คงฺคํ นทิํ อุปนิสฺสาย วิหริํสุ. อถ โข, ภิกฺขเว, มณิกณฺโฐ นาคราชา คงฺคํ นทิํ อุตฺตริตฺวา เยน กนิฏฺโฐ อิสิ เตนุปสงฺกมิ; อุปสงฺกมิตฺวา กนิฏฺฐํ อิสิํ สตฺตกฺขตฺตุํ โภเคหิ ปริกฺขิปิตฺวา อุปริมุทฺธนิ มหนฺตํ ผณํ กริตฺวา อฏฺฐาสิ. อถ โข, ภิกฺขเว, กนิฏฺโฐ อิสิ ตสฺส นาคสฺส ภยา กิโส อโหสิ ลูโข ทุพฺพณฺโณ อุปฺปณฺฑุปฺปณฺฑุกชาโต ธมนิสนฺถตคตฺโต. อทฺทส โข, ภิกฺขเว, เชฏฺโฐ อิสิ กนิฏฺฐํ อิสิํ กิสํ ลูขํ ทุพฺพณฺณํ อุปฺปณฺฑุปฺปณฺฑุกชาตํ ธมนิสนฺถตคตฺตํ. ทิสฺวาน กนิฏฺฐํ อิสิํ เอตทโวจ— ‘กิสฺส ตฺวํ, โภ, กิโส ลูโข ทุพฺพณฺโณ อุปฺปณฺฑุปฺปณฺฑุกชาโต ธมนิสนฺถตคตฺโต’ติ? ‘อิธ, โภ, มณิกณฺโฐ นาคราชา คงฺคํ นทิํ อุตฺตริตฺวา เยนาหํ เตนุปสงฺกมิ; อุปสงฺกมิตฺวา มํ สตฺตกฺขตฺตุํ โภเคหิ ปริกฺขิปิตฺวา อุปริมุทฺธนิ มหนฺตํ ผณํ กริตฺวา อฏฺฐาสิ. ตสฺสาหํ, โภ, นาคสฺส ภยา กิโส ลูโข ทุพฺพณฺโณ อุปฺปณฺฑุปฺปณฺฑุกชาโต ธมนิสนฺถตคตฺโต’ติ. ‘อิจฺฉสิ ปน ตฺวํ, โภ, ตสฺส นาคสฺส อนาคมนนฺ’ติ? ‘อิจฺฉามหํ, โภ, ตสฺส นาคสฺส อนาคมนนฺ’ติ. ‘อปิ ปน ตฺวํ, โภ, ตสฺส นาคสฺส กิญฺจิ ปสฺสสี’ติ? ‘ปสฺสามหํ, โภ, มณิมสฺส กณฺเฐ ปิลนฺธนนฺ’ติ. ‘เตน หิ ตฺวํ, โภ, ตํ นาคํ มณิํ ยาจ— “มณิํ เม, โภ, เทหิ; มณินา เม อตฺโถ”’ติ.
อถ โข, ภิกฺขเว, มณิกณฺโฐ นาคราชา คงฺคํ นทิํ อุตฺตริตฺวา เยน กนิฏฺโฐ อิสิ เตนุปสงฺกมิ; อุปสงฺกมิตฺวา เอกมนฺตํ อฏฺฐาสิ. เอกมนฺตํ ฐิตํ โข, ภิกฺขเว, มณิกณฺฐํ นาคราชานํ กนิฏฺโฐ อิสิ เอตทโวจ— ‘มณิํ เม, โภ, เทหิ; มณินา เม อตฺโถ’ติ. อถ โข, ภิกฺขเว, มณิกณฺโฐ นาคราชา— ‘ภิกฺขุ มณิํ ยาจติ, ภิกฺขุสฺส มณินา อตฺโถ’ติ ขิปฺปญฺเญว อคมาสิ.
ทุติยมฺปิ โข, ภิกฺขเว, มณิกณฺโฐ นาคราชา คงฺคํ นทิํ อุตฺตริตฺวา เยน กนิฏฺโฐ อิสิ เตนุปสงฺกมิ. อทฺทส โข, ภิกฺขเว, กนิฏฺโฐ อิสิ มณิกณฺฐํ นาคราชานํ ทูรโตว อาคจฺฉนฺตํ. ทิสฺวาน มณิกณฺฐํ นาคราชานํ เอตทโวจ— ‘มณิํ เม, โภ, เทหิ; มณินา เม อตฺโถ’ติ. อถ โข, ภิกฺขเว, มณิกณฺโฐ นาคราชา— ‘ภิกฺขุ มณิํ ยาจติ, ภิกฺขุสฺส มณินา อตฺโถ’ติ ตโตว ปฏินิวตฺติ.
ตติยมฺปิ โข, ภิกฺขเว, มณิกณฺโฐ นาคราชา คงฺคํ นทิํ อุตฺตรติ. อทฺทส โข, ภิกฺขเว, กนิฏฺโฐ อิสิ มณิกณฺฐํ นาคราชานํ คงฺคํ นทิํ อุตฺตรนฺตํ. ทิสฺวาน มณิกณฺฐํ นาคราชานํ เอตทโวจ— ‘มณิํ เม, โภ, เทหิ; มณินา เม อตฺโถ’ติ. อถ โข, ภิกฺขเว, มณิกณฺโฐ นาคราชา กนิฏฺฐํ อิสิํ คาถาหิ อชฺฌภาสิ—
‘มมนฺนปานํ วิปุลํ อุฬารํ,
อุปฺปชฺชตีมสฺส มณิสฺส เหตุ;_
ตํ เต น ทสฺสํ อติยาจโกสิ,
น จาปิ เต อสฺสมมาคมิสฺสํ.
สุสู ยถา สกฺขรโธตปาณี,
ตาเสสิ มํ เสลมายาจมาโน;
ตํ เต น ทสฺสํ อติยาจโกสิ,
น จาปิ เต อสฺสมมาคมิสฺสนฺ’ติ.
อถ โข, ภิกฺขเว, มณิกณฺโฐ นาคราชา— ‘ภิกฺขุ มณิํ ยาจติ, ภิกฺขุสฺส มณินา อตฺโถ’ติ ปกฺกามิ. ตถา ปกฺกนฺโตว อโหสิ, น ปุน ปจฺจาคญฺฉิ. อถ โข, ภิกฺขเว, กนิฏฺโฐ อิสิ ตสฺส นาคสฺส ทสฺสนียสฺส อทสฺสเนน ภิโยฺยโส มตฺตาย กิโส อโหสิ ลูโข ทุพฺพณฺโณ, อุปฺปณฺฑุปฺปณฺฑุกชาโต ธมนิสนฺถตคตฺโต. อทฺทส โข, ภิกฺขเว, เชฏฺโฐ อิสิ กนิฏฺฐํ อิสิํ ภิโยฺยโส มตฺตาย กิสํ ลูขํ ทุพฺพณฺณํ อุปฺปณฺฑุปฺปณฺฑุกชาตํ ธมนิสนฺถตคตฺตํ. ทิสฺวาน กนิฏฺฐํ อิสิํ เอตทโวจ— ‘กิสฺส ตฺวํ, โภ, ภิโยฺยโส มตฺตาย กิโส ลูโข ทุพฺพณฺโณ อุปฺปณฺฑุปฺปณฺฑุกชาโต ธมนิสนฺถตคตฺโต’ติ? ‘ตสฺสาหํ, โภ, นาคสฺส ทสฺสนียสฺส อทสฺสเนน ภิโยฺยโส มตฺตาย กิโส ลูโข ทุพฺพณฺโณ อุปฺปณฺฑุปฺปณฺฑุกชาโต ธมนิสนฺถตคตฺโต’ติ. อถ โข, ภิกฺขเว, เชฏฺโฐ อิสิ กนิฏฺฐํ อิสิํ คาถาย อชฺฌภาสิ—
‘น ตํ ยาเจ ยสฺสปิยํ ชิคีเส,
วิเทโสฺส โหติ อติยาจนาย;
นาโค มณิํ ยาจิโต พฺราหฺมเณน,
อทสฺสนญฺเญว ตทชฺฌคมา’ติ.
เตสญฺหิ นาม, ภิกฺขเว, ติรจฺฉานคตานํ ปาณานํ อมนาปา ภวิสฺสติ ยาจนา อมนาปา วิญฺญตฺติ. กิมงฺคํ ปน มนุสฺสภูตานํ.
ภูตปุพฺพํ, ภิกฺขเว, อญฺญตโร ภิกฺขุ หิมวนฺตปเสฺส วิหรติ อญฺญตรสฺมิํ วนสณฺเฑ. ตสฺส โข, ภิกฺขเว, วนสณฺฑสฺส อวิทูเร มหนฺตํ นินฺนํ ปลฺลลํ. อถ โข, ภิกฺขเว, มหาสกุณสงฺโฆ ตสฺมิํ ปลฺลเล ทิวสํ โคจรํ จริตฺวา สายํ ตํ วนสณฺฑํ วาสาย อุปคจฺฉติ. อถ โข, ภิกฺขเว, โส ภิกฺขุ ตสฺส สกุณสงฺฆสฺส สทฺเทน อุพฺพาโฬฺห เยนาหํ เตนุปสงฺกมิ; อุปสงฺกมิตฺวา มํ อภิวาเทตฺวา เอกมนฺตํ นิสีทิ. เอกมนฺตํ นิสินฺนํ โข อหํ, ภิกฺขเว, ตํ ภิกฺขุํ เอตทโวจ— ‘กจฺจิ, ภิกฺขุ, ขมนียํ กจฺจิ ยาปนียํ กจฺจิสิ อปฺปกิลมเถน อทฺธานํ อาคโต? กุโต จ ตฺวํ, ภิกฺขุ, อาคจฺฉสี’ติ? ‘ขมนียํ, ภควา, ยาปนียํ, ภควา. อปฺปกิลมเถน จาหํ, ภนฺเต, อทฺธานํ อาคโต. อตฺถิ, ภนฺเต, หิมวนฺตปเสฺส มหาวนสณฺโฑ. ตสฺส โข ปน, ภนฺเต, วนสณฺฑสฺส อวิทูเร มหนฺตํ นินฺนํ ปลฺลลํ. อถ โข, ภนฺเต, มหาสกุณสงฺโฆ ตสฺมิํ ปลฺลเล ทิวสํ โคจรํ จริตฺวา สายํ ตํ วนสณฺฑํ วาสาย อุปคจฺฉติ. ตโต อหํ, ภควา, อาคจฺฉามิ— ตสฺส สกุณสงฺฆสฺส สทฺเทน อุพฺพาโฬฺห’ติ. ‘อิจฺฉสิ ปน ตฺวํ, ภิกฺขุ, ตสฺส สกุณสงฺฆสฺส อนาคมนนฺ’ติ? ‘อิจฺฉามหํ, ภควา, ตสฺส สกุณสงฺฆสฺส อนาคมนนฺ’ติ. ‘เตน หิ ตฺวํ, ภิกฺขุ, ตตฺถ คนฺตฺวา ตํ วนสณฺฑํ อชฺโฌคาเหตฺวา รตฺติยา ปฐมํ ยามํ ติกฺขตฺตุํ สทฺทมนุสฺสาเวหิ— สุณนฺตุ เม, โภนฺโต สกุณา, ยาวติกา อิมสฺมิํ วนสณฺเฑ วาสํ อุปคตา, ปตฺเตน เม อตฺโถ. เอเกกํ เม, โภนฺโต, ปตฺตํ ททนฺตู’ติ. รตฺติยา มชฺฌิมํ ยามํ… รตฺติยา ปจฺฉิมํ ยามํ ติกฺขตฺตุํ สทฺทมนุสฺสาเวหิ— ‘สุณนฺตุ เม, โภนฺโต สกุณา, ยาวติกา อิมสฺมิํ วนสณฺเฑ วาสํ อุปคตา, ปตฺเตน เม อตฺโถ. เอเกกํ เม, โภนฺโต, ปตฺตํ ททนฺตู’ติ.
อถ โข, ภิกฺขเว, โส ภิกฺขุ ตตฺถ คนฺตฺวา ตํ วนสณฺฑํ อชฺโฌคาเหตฺวา รตฺติยา ปฐมํ ยามํ ติกฺขตฺตุํ สทฺทมนุสฺสาเวสิ— ‘สุณนฺตุ เม, โภนฺโต สกุณา, ยาวติกา อิมสฺมิํ วนสณฺเฑ วาสํ อุปคตา, ปตฺเตน เม อตฺโถ. เอเกกํ เม, โภนฺโต, ปตฺตํ ททนฺตู’ติ. รตฺติยา มชฺฌิมํ ยามํ… รตฺติยา ปจฺฉิมํ ยามํ ติกฺขตฺตุํ สทฺทมนุสฺสาเวสิ— ‘สุณนฺตุ เม, โภนฺโต สกุณา, ยาวติกา อิมสฺมิํ วนสณฺเฑ วาสํ อุปคตา, ปตฺเตน เม อตฺโถ. เอเกกํ เม, โภนฺโต, ปตฺตํ ททนฺตู’ติ. อถ โข, ภิกฺขเว, โส สกุณสงฺโฆ— ‘ภิกฺขุ ปตฺตํ ยาจติ ภิกฺขุสฺส ปตฺเตน อตฺโถ’ติ ตมฺหา วนสณฺฑา ปกฺกามิ. ตถา ปกฺกนฺโตว อโหสิ น ปุน ปจฺจาคญฺฉิ. เตสญฺหิ นาม, ภิกฺขเว, ติรจฺฉานคตานํ ปาณานํ อมนาปา ภวิสฺสติ ยาจนา อมนาปา วิญฺญตฺติ. กิมงฺคํ ปน มนุสฺสภูตานํ.
ภูตปุพฺพํ, ภิกฺขเว, รฏฺฐปาลสฺส กุลปุตฺตสฺส ปิตา รฏฺฐปาลํ กุลปุตฺตํ คาถาย อชฺฌภาสิ—
‘อปาหํ เต น ชานามิ,
รฏฺฐปาล พหู ชนา;
เต มํ สงฺคมฺม ยาจนฺติ,
กสฺมา มํ ตฺวํ น ยาจสี’ติ.
‘ยาจโก อปฺปิโย โหติ,
ยาจํ อททมปฺปิโย;
ตสฺมาหํ ตํ น ยาจามิ,
มา เม วิเทสฺสนา อหู’ติ.
โส หิ นาม, ภิกฺขเว, รฏฺฐปาโล กุลปุตฺโต สกํ ปิตรํ เอวํ วกฺขติ. กิมงฺคํ ปน ชโน ชนํ.
คิหีนํ, ภิกฺขเว, ทุสฺสํหรานิ โภคานิ สมฺภตานิปิ ทุรกฺขิยานิ. ตตฺถ นาม ตุมฺเห, โมฆปุริสา, เอวํ ทุสฺสํหเรสุ โภเคสุ สมฺภเตสุปิ ทุรกฺขิเยสุ ยาจนพหุลา วิญฺญตฺติพหุลา วิหริสฺสถ— ‘ปุริสํ เทถ, ปุริสตฺถกรํ เทถ, โคณํ เทถ, สกฏํ เทถ, วาสิํ เทถ, ปรสุํ เทถ, กุฐาริํ เทถ, กุทาลํ เทถ, นิขาทนํ เทถ, วลฺลิํ เทถ, เวฬุํ เทถ, มุญฺชํ เทถ, ปพฺพชํ เทถ, ติณํ เทถ, มตฺติกํ เทถา’ติ. เนตํ, โมฆปุริสา, อปฺปสนฺนานํ วา ปสาทาย …เป… เอวญฺจ ปน, ภิกฺขเว, อิมํ สิกฺขาปทํ อุทฺทิเสยฺยาถ—
“สญฺญาจิกาย ปน ภิกฺขุนา กุฏิํ การยมาเนน อสฺสามิกํ อตฺตุทฺเทสํ ปมาณิกา กาเรตพฺพา. ตตฺริทํ ปมาณํ— ทีฆโส ทฺวาทส วิทตฺถิโย, สุคตวิทตฺถิยา; ติริยํ สตฺตนฺตรา. ภิกฺขู อภิเนตพฺพา วตฺถุเทสนาย. เตหิ ภิกฺขูหิ วตฺถุ เทเสตพฺพํ— อนารมฺภํ สปริกฺกมนํ. สารมฺเภ เจ ภิกฺขุ วตฺถุสฺมิํ อปริกฺกมเน สญฺญาจิกาย กุฏิํ กาเรยฺย, ภิกฺขู วา อนภิเนยฺย วตฺถุเทสนาย, ปมาณํ วา อติกฺกาเมยฺย, สํฆาทิเสโส” ติ. (6: 10 )
สญฺญาจิกา นาม สยํ ยาจิตฺวา ปุริสมฺปิ ปุริสตฺถกรมฺปิ โคณมฺปิ สกฏมฺปิ วาสิมฺปิ ปรสุมฺปิ กุฐาริมฺปิ กุทาลมฺปิ นิขาทนมฺปิ วลฺลิมฺปิ เวฬุมฺปิ มุญฺชมฺปิ ปพฺพชมฺปิ ติณมฺปิ มตฺติกมฺปิ.
กุฏิ นาม อุลฺลิตฺตา วา โหติ อวลิตฺตา วา อุลฺลิตฺตาวลิตฺตา วา.
การยมาเนนา ติ กโรนฺโต วา การาเปนฺโต วา.
อสฺสามิกนฺ ติ น อญฺโญ โกจิ สามิโก โหติ, อิตฺถี วา ปุริโส วา คหฏฺโฐ วา ปพฺพชิโต วา.
อตฺตุทฺเทสนฺ ติ อตฺตโน อตฺถาย.
ปมาณิกา กาเรตพฺพา. ตตฺริทํ ปมาณํ— ทีฆโส ทฺวาทส วิทตฺถิโย, สุคตวิทตฺถิยา ติ พาหิริเมน มาเนน.
ติริยํ สตฺตนฺตรา ติ อพฺภนฺตริเมน มาเนน.
ภิกฺขู อภิเนตพฺพา วตฺถุเทสนายา ติ เตน กุฏิการเกน ภิกฺขุนา กุฏิวตฺถุํ โสเธตฺวา สํฆํ อุปสงฺกมิตฺวา เอกํสํ อุตฺตราสงฺคํ กริตฺวา วุฑฺฒานํ ภิกฺขูนํ ปาเท วนฺทิตฺวา อุกฺกุฏิกํ นิสีทิตฺวา อญฺชลิํ ปคฺคเหตฺวา เอวมสฺส วจนีโย— “อหํ, ภนฺเต, สญฺญาจิกาย กุฏิํ กตฺตุกาโม อสฺสามิกํ อตฺตุทฺเทสํ. โสหํ, ภนฺเต, สํฆํ กุฏิวตฺถุโอโลกนํ ยาจามี”ติ. ทุติยมฺปิ ยาจิตพฺพา. ตติยมฺปิ ยาจิตพฺพา. สเจ สพฺโพ สํโฆ อุสฺสหติ กุฏิวตฺถุํ โอโลเกตุํ, สพฺเพน สํเฆน โอโลเกตพฺพํ. โน เจ สพฺโพ สํโฆ อุสฺสหติ กุฏิวตฺถุํ โอโลเกตุํ, เย ตตฺถ โหนฺติ ภิกฺขู พฺยตฺตา ปฏิพลา สารมฺภํ อนารมฺภํ สปริกฺกมนํ อปริกฺกมนํ ชานิตุํ เต ยาจิตฺวา สมฺมนฺนิตพฺพา. “เอวญฺจ ปน, ภิกฺขเว, สมฺมนฺนิตพฺพา. พฺยตฺเตน ภิกฺขุนา ปฏิพเลน สํโฆ ญาเปตพฺโพ—
‘สุณาตุ เม, ภนฺเต, สํโฆ. อยํ อิตฺถนฺนาโม ภิกฺขุ สญฺญาจิกาย กุฏิํ กตฺตุกาโม อสฺสามิกํ อตฺตุทฺเทสํ. โส สํฆํ กุฏิวตฺถุโอโลกนํ ยาจติ. ยทิ สํฆสฺส ปตฺตกลฺลํ, สํโฆ อิตฺถนฺนามญฺจ อิตฺถนฺนามญฺจ ภิกฺขู สมฺมนฺเนยฺย อิตฺถนฺนามสฺส ภิกฺขุโน กุฏิวตฺถุํ โอโลเกตุํ. เอสา ญตฺติ.
สุณาตุ เม, ภนฺเต, สํโฆ. อยํ อิตฺถนฺนาโม ภิกฺขุ สญฺญาจิกาย กุฏิํ กตฺตุกาโม อสฺสามิกํ อตฺตุทฺเทสํ. โส สํฆํ กุฏิวตฺถุโอโลกนํ ยาจติ. สํโฆ อิตฺถนฺนามญฺจ อิตฺถนฺนามญฺจ ภิกฺขู สมฺมนฺนติ อิตฺถนฺนามสฺส ภิกฺขุโน กุฏิวตฺถุํ โอโลเกตุํ. ยสฺสายสฺมโต ขมติ อิตฺถนฺนามสฺส จ อิตฺถนฺนามสฺส จ ภิกฺขูนํ สมฺมุติ อิตฺถนฺนามสฺส ภิกฺขุโน กุฏิวตฺถุํ โอโลเกตุํ, โส ตุณฺหสฺส; ยสฺส นกฺขมติ, โส ภาเสยฺย.
สมฺมตา สํเฆน อิตฺถนฺนาโม จ อิตฺถนฺนาโม จ ภิกฺขู อิตฺถนฺนามสฺส ภิกฺขุโน กุฏิวตฺถุํ โอโลเกตุํ. ขมติ สํฆสฺส, ตสฺมา ตุณฺหี, เอวเมตํ ธารยามี’”ติ.
เตหิ สมฺมเตหิ ภิกฺขูหิ ตตฺถ คนฺตฺวา กุฏิวตฺถุ โอโลเกตพฺพํ, สารมฺภํ อนารมฺภํ สปริกฺกมนํ อปริกฺกมนํ ชานิตพฺพํ. สเจ สารมฺภํ โหติ อปริกฺกมนํ, “มา อิธ กรี”ติ วตฺตพฺโพ. สเจ อนารมฺภํ โหติ สปริกฺกมนํ, สํฆสฺส อาโรเจตพฺพํ— “อนารมฺภํ สปริกฺกมนนฺ”ติ. เตน กุฏิการเกน ภิกฺขุนา สํฆํ อุปสงฺกมิตฺวา เอกํสํ อุตฺตราสงฺคํ กริตฺวา วุฑฺฒานํ ภิกฺขูนํ ปาเท วนฺทิตฺวา อุกฺกุฏิกํ นิสีทิตฺวา อญฺชลิํ ปคฺคเหตฺวา เอวมสฺส วจนีโย— “อหํ, ภนฺเต, สญฺญาจิกาย กุฏิํ กตฺตุกาโม อสฺสามิกํ อตฺตุทฺเทสํ. โสหํ, ภนฺเต, สํฆํ กุฏิวตฺถุเทสนํ ยาจามี”ติ. ทุติยมฺปิ ยาจิตพฺพา. ตติยมฺปิ ยาจิตพฺพา. “พฺยตฺเตน ภิกฺขุนา ปฏิพเลน สํโฆ ญาเปตพฺโพ—
‘สุณาตุ เม, ภนฺเต, สํโฆ. อยํ อิตฺถนฺนาโม ภิกฺขุ สญฺญาจิกาย กุฏิํ กตฺตุกาโม อสฺสามิกํ อตฺตุทฺเทสํ. โส สํฆํ กุฏิวตฺถุเทสนํ ยาจติ. ยทิ สํฆสฺส ปตฺตกลฺลํ, สํโฆ อิตฺถนฺนามสฺส ภิกฺขุโน กุฏิวตฺถุํ เทเสยฺย. เอสา ญตฺติ.
สุณาตุ เม, ภนฺเต, สํโฆ. อยํ อิตฺถนฺนาโม ภิกฺขุ สญฺญาจิกาย กุฏิํ กตฺตุกาโม อสฺสามิกํ อตฺตุทฺเทสํ. โส สํฆํ กุฏิวตฺถุเทสนํ ยาจติ. สํโฆ อิตฺถนฺนามสฺส ภิกฺขุโน กุฏิวตฺถุํ เทเสติ. ยสฺสายสฺมโต ขมติ อิตฺถนฺนามสฺส ภิกฺขุโน กุฏิวตฺถุสฺส เทสนา, โส ตุณฺหสฺส; ยสฺส นกฺขมติ, โส ภาเสยฺย.
เทสิตํ สํเฆน อิตฺถนฺนามสฺส ภิกฺขุโน กุฏิวตฺถุ. ขมติ สํฆสฺส, ตสฺมา ตุณฺหี, เอวเมตํ ธารยามี’”ติ.
สารมฺภํ นาม กิปิลฺลิกานํ วา อาสโย โหติ, อุปจิกานํ วา อาสโย โหติ, อุนฺทูรานํ วา อาสโย โหติ, อหีนํ วา อาสโย โหติ, วิจฺฉิกานํ วา อาสโย โหติ, สตปทีนํ วา อาสโย โหติ, หตฺถีนํ วา อาสโย โหติ, อสฺสานํ วา อาสโย โหติ, สีหานํ วา อาสโย โหติ, พฺยคฺฆานํ วา อาสโย โหติ, ทีปีนํ วา อาสโย โหติ, อจฺฉานํ วา อาสโย โหติ, ตรจฺฉานํ วา อาสโย โหติ, เยสํ เกสญฺจิ ติรจฺฉานคตานํ ปาณานํ อาสโย โหติ, ปุพฺพณฺณนิสฺสิตํ วา โหติ, อปรณฺณนิสฺสิตํ วา โหติ, อพฺภาฆาตนิสฺสิตํ วา โหติ, อาฆาตนนิสฺสิตํ วา โหติ, สุสานนิสฺสิตํ วา โหติ, อุยฺยานนิสฺสิตํ วา โหติ, ราชวตฺถุนิสฺสิตํ วา โหติ, หตฺถิสาลานิสฺสิตํ วา โหติ, อสฺสสาลานิสฺสิตํ วา โหติ, พนฺธนาคารนิสฺสิตํ วา โหติ, ปานาคารนิสฺสิตํ วา โหติ, สูนนิสฺสิตํ วา โหติ, รจฺฉานิสฺสิตํ วา โหติ, จจฺจรนิสฺสิตํ วา โหติ, สภานิสฺสิตํ วา โหติ, สํสรณนิสฺสิตํ วา โหติ. เอตํ สารมฺภํ นาม.
อปริกฺกมนํ นาม น สกฺกา โหติ ยถายุตฺเตน สกเฏน อนุปริคนฺตุํ สมนฺตา นิเสฺสณิยา อนุปริคนฺตุํ. เอตํ อปริกฺกมนํ นาม.
อนารมฺภํ นาม น กิปิลฺลิกานํ วา อาสโย โหติ, น อุปจิกานํ วา อาสโย โหติ, น อุนฺทูรานํ วา อาสโย โหติ, น อหีนํ วา อาสโย โหติ, น วิจฺฉิกานํ วา อาสโย โหติ, น สตปทีนํ วา อาสโย โหติ …เป… น สํสรณนิสฺสิตํ วา โหติ. เอตํ อนารมฺภํ นาม.
สปริกฺกมนํ นาม สกฺกา โหติ ยถายุตฺเตน สกเฏน อนุปริคนฺตุํ, สมนฺตา นิเสฺสณิยา อนุปริคนฺตุํ. เอตํ สปริกฺกมนํ นาม.
สญฺญาจิกา นาม สยํ ยาจิตฺวา ปุริสมฺปิ ปุริสตฺถกรมฺปิ …เป… มตฺติกมฺปิ.
กุฏิ นาม อุลฺลิตฺตา วา โหติ อวลิตฺตา วา อุลฺลิตฺตาวลิตฺตา วา.
กาเรยฺยา ติ กโรติ วา การาเปติ วา.
ภิกฺขู วา อนภิเนยฺย, วตฺถุเทสนาย ปมาณํ วา อติกฺกาเมยฺยา ติ ญตฺติทุติเยน กมฺเมน กุฏิวตฺถุํ น เทสาเปตฺวา, อายามโต วา วิตฺถารโต วา อนฺตมโส เกสคฺคมตฺตมฺปิ อติกฺกาเมตฺวา กโรติ วา การาเปติ วา, ปโยเค ทุกฺกฏํ. เอกํ ปิณฺฑํ อนาคเต อาปตฺติ ถุลฺลจฺจยสฺส. ตสฺมิํ ปิณฺเฑ อาคเต อาปตฺติ สํฆาทิเสสสฺส.
สํฆาทิเสโส ติ …เป… เตนปิ วุจฺจติ “สํฆาทิเสโส”ติ.
ภิกฺขุ กุฏิํ กโรติ อเทสิตวตฺถุกํ สารมฺภํ อปริกฺกมนํ, อาปตฺติ สํฆาทิเสเสน ทฺวินฺนํ ทุกฺกฏานํ. ภิกฺขุ กุฏิํ กโรติ อเทสิตวตฺถุกํ สารมฺภํ สปริกฺกมนํ, อาปตฺติ สํฆาทิเสเสน ทุกฺกฏสฺส. ภิกฺขุ กุฏิํ กโรติ อเทสิตวตฺถุกํ อนารมฺภํ อปริกฺกมนํ, อาปตฺติ สํฆาทิเสเสน ทุกฺกฏสฺส. ภิกฺขุ กุฏิํ กโรติ อเทสิตวตฺถุกํ อนารมฺภํ สปริกฺกมนํ, อาปตฺติ สํฆาทิเสสสฺส.
ภิกฺขุ กุฏิํ กโรติ เทสิตวตฺถุกํ สารมฺภํ อปริกฺกมนํ, อาปตฺติ ทฺวินฺนํ ทุกฺกฏานํ. ภิกฺขุ กุฏิํ กโรติ เทสิตวตฺถุกํ สารมฺภํ สปริกฺกมนํ, อาปตฺติ ทุกฺกฏสฺส. ภิกฺขุ กุฏิํ กโรติ เทสิตวตฺถุกํ อนารมฺภํ อปริกฺกมนํ, อาปตฺติ ทุกฺกฏสฺส. ภิกฺขุ กุฏิํ กโรติ เทสิตวตฺถุกํ อนารมฺภํ สปริกฺกมนํ, อนาปตฺติ.
ภิกฺขุ กุฏิํ กโรติ ปมาณาติกฺกนฺตํ สารมฺภํ อปริกฺกมนํ, อาปตฺติ สํฆาทิเสเสน ทฺวินฺนํ ทุกฺกฏานํ. ภิกฺขุ กุฏิํ กโรติ ปมาณาติกฺกนฺตํ สารมฺภํ สปริกฺกมนํ, อาปตฺติ สํฆาทิเสเสน ทุกฺกฏสฺส. ภิกฺขุ กุฏิํ กโรติ ปมาณาติกฺกนฺตํ อนารมฺภํ อปริกฺกมนํ, อาปตฺติ สํฆาทิเสเสน ทุกฺกฏสฺส. ภิกฺขุ กุฏิํ กโรติ ปมาณาติกฺกนฺตํ อนารมฺภํ สปริกฺกมนํ, อาปตฺติ สํฆาทิเสสสฺส.
ภิกฺขุ กุฏิํ กโรติ ปมาณิกํ สารมฺภํ อปริกฺกมนํ, อาปตฺติ ทฺวินฺนํ ทุกฺกฏานํ. ภิกฺขุ กุฏิํ กโรติ ปมาณิกํ สารมฺภํ สปริกฺกมนํ, อาปตฺติ ทุกฺกฏสฺส. ภิกฺขุ กุฏิํ กโรติ ปมาณิกํ อนารมฺภํ อปริกฺกมนํ, อาปตฺติ ทุกฺกฏสฺส. ภิกฺขุ กุฏิํ กโรติ ปมาณิกํ อนารมฺภํ สปริกฺกมนํ, อนาปตฺติ.
ภิกฺขุ กุฏิํ กโรติ อเทสิตวตฺถุกํ ปมาณาติกฺกนฺตํ สารมฺภํ อปริกฺกมนํ, อาปตฺติ ทฺวินฺนํ สํฆาทิเสเสน ทฺวินฺนํ ทุกฺกฏานํ. ภิกฺขุ กุฏิํ กโรติ อเทสิตวตฺถุกํ ปมาณาติกฺกนฺตํ สารมฺภํ สปริกฺกมนํ, อาปตฺติ ทฺวินฺนํ สํฆาทิเสเสน ทุกฺกฏสฺส. ภิกฺขุ กุฏิํ กโรติ อเทสิตวตฺถุกํ ปมาณาติกฺกนฺตํ อนารมฺภํ อปริกฺกมนํ, อาปตฺติ ทฺวินฺนํ สํฆาทิเสเสน ทุกฺกฏสฺส. ภิกฺขุ กุฏิํ กโรติ อเทสิตวตฺถุกํ ปมาณาติกฺกนฺตํ อนารมฺภํ สปริกฺกมนํ, อาปตฺติ ทฺวินฺนํ สํฆาทิเสสานํ.
ภิกฺขุ กุฏิํ กโรติ เทสิตวตฺถุกํ ปมาณิกํ สารมฺภํ อปริกฺกมนํ, อาปตฺติ ทฺวินฺนํ ทุกฺกฏานํ. ภิกฺขุ กุฏิํ กโรติ เทสิตวตฺถุกํ ปมาณิกํ สารมฺภํ สปริกฺกมนํ, อาปตฺติ ทุกฺกฏสฺส. ภิกฺขุ กุฏิํ กโรติ เทสิตวตฺถุกํ ปมาณิกํ อนารมฺภํ อปริกฺกมนํ, อาปตฺติ ทุกฺกฏสฺส. ภิกฺขุ กุฏิํ กโรติ เทสิตวตฺถุกํ ปมาณิกํ อนารมฺภํ สปริกฺกมนํ, อนาปตฺติ.
ภิกฺขุ สมาทิสติ— “กุฏิํ เม กโรถา”ติ. ตสฺส กุฏิํ กโรนฺติ อเทสิตวตฺถุกํ สารมฺภํ อปริกฺกมนํ, อาปตฺติ สํฆาทิเสเสน ทฺวินฺนํ ทุกฺกฏานํ …เป… สารมฺภํ สปริกฺกมนํ, อาปตฺติ สํฆาทิเสเสน ทุกฺกฏสฺส …เป… อนารมฺภํ อปริกฺกมนํ, อาปตฺติ สํฆาทิเสเสน ทุกฺกฏสฺส …เป… อนารมฺภํ สปริกฺกมนํ, อาปตฺติ สํฆาทิเสสสฺส.
ภิกฺขุ สมาทิสติ— “กุฏิํ เม กโรถา”ติ. ตสฺส กุฏิํ กโรนฺติ เทสิตวตฺถุกํ สารมฺภํ อปริกฺกมนํ, อาปตฺติ ทฺวินฺนํ ทุกฺกฏานํ …เป… สารมฺภํ สปริกฺกมนํ, อาปตฺติ ทุกฺกฏสฺส …เป… อนารมฺภํ อปริกฺกมนํ, อาปตฺติ ทุกฺกฏสฺส …เป… อนารมฺภํ สปริกฺกมนํ, อนาปตฺติ.
ภิกฺขุ สมาทิสติ— “กุฏิํ เม กโรถา”ติ. ตสฺส กุฏิํ กโรนฺติ ปมาณาติกฺกนฺตํ สารมฺภํ อปริกฺกมนํ, อาปตฺติ สํฆาทิเสเสน ทฺวินฺนํ ทุกฺกฏานํ …เป… สารมฺภํ สปริกฺกมนํ, อาปตฺติ สํฆาทิเสเสน ทุกฺกฏสฺส …เป… อนารมฺภํ อปริกฺกมนํ, อาปตฺติ สํฆาทิเสเสน ทุกฺกฏสฺส …เป… อนารมฺภํ สปริกฺกมนํ, อาปตฺติ สํฆาทิเสสสฺส.
ภิกฺขุ สมาทิสติ— “กุฏิํ เม กโรถา”ติ. ตสฺส กุฏิํ กโรนฺติ ปมาณิกํ สารมฺภํ อปริกฺกมนํ, อาปตฺติ ทฺวินฺนํ ทุกฺกฏานํ …เป… สารมฺภํ สปริกฺกมนํ, อาปตฺติ ทุกฺกฏสฺส …เป… อนารมฺภํ อปริกฺกมนํ, อาปตฺติ ทุกฺกฏสฺส …เป… อนารมฺภํ สปริกฺกมนํ, อนาปตฺติ.
ภิกฺขุ สมาทิสติ— “กุฏิํ เม กโรถา”ติ. ตสฺส กุฏิํ กโรนฺติ อเทสิตวตฺถุกํ ปมาณาติกฺกนฺตํ สารมฺภํ อปริกฺกมนํ, อาปตฺติ ทฺวินฺนํ สํฆาทิเสเสน ทฺวินฺนํ ทุกฺกฏานํ …เป… สารมฺภํ สปริกฺกมนํ, อาปตฺติ ทฺวินฺนํ สํฆาทิเสเสน ทุกฺกฏสฺส …เป… อนารมฺภํ อปริกฺกมนํ, อาปตฺติ ทฺวินฺนํ สํฆาทิเสเสน ทุกฺกฏสฺส …เป… อนารมฺภํ สปริกฺกมนํ, อาปตฺติ ทฺวินฺนํ สํฆาทิเสสานํ.
ภิกฺขุ สมาทิสติ— “กุฏิํ เม กโรถา”ติ. ตสฺส กุฏิํ กโรนฺติ เทสิตวตฺถุกํ ปมาณิกํ สารมฺภํ อปริกฺกมนํ, อาปตฺติ ทฺวินฺนํ ทุกฺกฏานํ …เป… สารมฺภํ สปริกฺกมนํ, อาปตฺติ ทุกฺกฏสฺส …เป… อนารมฺภํ อปริกฺกมนํ, อาปตฺติ ทุกฺกฏสฺส …เป… อนารมฺภํ สปริกฺกมนํ, อนาปตฺติ.
ภิกฺขุ สมาทิสิตฺวา ปกฺกมติ— “กุฏิํ เม กโรถา”ติ. น จ สมาทิสติ— “เทสิตวตฺถุกา จ โหตุ อนารมฺภา จ สปริกฺกมนา จา”ติ. ตสฺส กุฏิํ กโรนฺติ อเทสิตวตฺถุกํ สารมฺภํ อปริกฺกมนํ, อาปตฺติ สํฆาทิเสเสน ทฺวินฺนํ ทุกฺกฏานํ …เป… สารมฺภํ สปริกฺกมนํ, อาปตฺติ สํฆาทิเสเสน ทุกฺกฏสฺส …เป… อนารมฺภํ อปริกฺกมนํ, อาปตฺติ สํฆาทิเสเสน ทุกฺกฏสฺส …เป… อนารมฺภํ สปริกฺกมนํ, อาปตฺติ สํฆาทิเสสสฺส.
ภิกฺขุ สมาทิสิตฺวา ปกฺกมติ— “กุฏิํ เม กโรถา”ติ. น จ สมาทิสติ— “เทสิตวตฺถุกา จ โหตุ อนารมฺภา จ สปริกฺกมนา จา”ติ. ตสฺส กุฏิํ กโรนฺติ เทสิตวตฺถุกํ สารมฺภํ อปริกฺกมนํ, อาปตฺติ ทฺวินฺนํ ทุกฺกฏานํ …เป… สารมฺภํ สปริกฺกมนํ, อาปตฺติ ทุกฺกฏสฺส …เป… อนารมฺภํ อปริกฺกมนํ, อาปตฺติ ทุกฺกฏสฺส …เป… อนารมฺภํ สปริกฺกมนํ, อนาปตฺติ.
ภิกฺขุ สมาทิสิตฺวา ปกฺกมติ— “กุฏิํ เม กโรถา”ติ. น จ สมาทิสติ— “ปมาณิกา จ โหตุ อนารมฺภา จ สปริกฺกมนา จา”ติ. ตสฺส กุฏิํ กโรนฺติ ปมาณาติกฺกนฺตํ สารมฺภํ อปริกฺกมนํ, อาปตฺติ สํฆาทิเสเสน ทฺวินฺนํ ทุกฺกฏานํ …เป… สารมฺภํ สปริกฺกมนํ, อาปตฺติ สํฆาทิเสเสน ทุกฺกฏสฺส …เป… อนารมฺภํ อปริกฺกมนํ, อาปตฺติ สํฆาทิเสเสน ทุกฺกฏสฺส …เป… อนารมฺภํ สปริกฺกมนํ, อาปตฺติ สํฆาทิเสสสฺส.
ภิกฺขุ สมาทิสิตฺวา ปกฺกมติ— “กุฏิํ เม กโรถา”ติ. น จ สมาทิสติ— “ปมาณิกา จ โหตุ อนารมฺภา จ สปริกฺกมนา จา”ติ. ตสฺส กุฏิํ กโรนฺติ ปมาณิกํ สารมฺภํ อปริกฺกมนํ, อาปตฺติ ทฺวินฺนํ ทุกฺกฏานํ …เป… สารมฺภํ สปริกฺกมนํ, อาปตฺติ ทุกฺกฏสฺส …เป… อนารมฺภํ อปริกฺกมนํ, อาปตฺติ ทุกฺกฏสฺส …เป… อนารมฺภํ สปริกฺกมนํ, อนาปตฺติ.
ภิกฺขุ สมาทิสิตฺวา ปกฺกมติ— “กุฏิํ เม กโรถา”ติ. น จ สมาทิสติ— “เทสิตวตฺถุกา จ โหตุ ปมาณิกา จ อนารมฺภา จ สปริกฺกมนา จา”ติ. ตสฺส กุฏิํ กโรนฺติ อเทสิตวตฺถุกํ ปมาณาติกฺกนฺตํ สารมฺภํ อปริกฺกมนํ, อาปตฺติ ทฺวินฺนํ สํฆาทิเสเสน ทฺวินฺนํ ทุกฺกฏานํ …เป… สารมฺภํ สปริกฺกมนํ, อาปตฺติ ทฺวินฺนํ สํฆาทิเสเสน ทุกฺกฏสฺส …เป… อนารมฺภํ อปริกฺกมนํ, อาปตฺติ ทฺวินฺนํ สํฆาทิเสเสน ทุกฺกฏสฺส …เป… อนารมฺภํ สปริกฺกมนํ, อาปตฺติ ทฺวินฺนํ สํฆาทิเสสานํ.
ภิกฺขุ สมาทิสิตฺวา ปกฺกมติ— “กุฏิํ เม กโรถา”ติ. น จ สมาทิสติ— “เทสิตวตฺถุกา จ โหตุ ปมาณิกา จ อนารมฺภา จ สปริกฺกมนา จา”ติ. ตสฺส กุฏิํ กโรนฺติ เทสิตวตฺถุกํ ปมาณิกํ สารมฺภํ อปริกฺกมนํ, อาปตฺติ ทฺวินฺนํ ทุกฺกฏานํ …เป… สารมฺภํ สปริกฺกมนํ, อาปตฺติ ทุกฺกฏสฺส …เป… อนารมฺภํ อปริกฺกมนํ, อาปตฺติ ทุกฺกฏสฺส …เป… อนารมฺภํ สปริกฺกมนํ, อนาปตฺติ.
ภิกฺขุ สมาทิสิตฺวา ปกฺกมติ— “กุฏิํ เม กโรถา”ติ. สมาทิสติ จ— “เทสิตวตฺถุกา จ โหตุ อนารมฺภา จ สปริกฺกมนา จา”ติ. ตสฺส กุฏิํ กโรนฺติ อเทสิตวตฺถุกํ สารมฺภํ อปริกฺกมนํ. โส สุณาติ— “กุฏิ กิร เม กยิรติ อเทสิตวตฺถุกา สารมฺภา อปริกฺกมนา”ติ. เตน ภิกฺขุนา สามํ วา คนฺตพฺพํ ทูโต วา ปาเหตพฺโพ— “เทสิตวตฺถุกา จ โหตุ อนารมฺภา จ สปริกฺกมนา จา”ติ. โน เจ สามํ วา คจฺเฉยฺย ทูตํ วา ปหิเณยฺย, อาปตฺติ ทุกฺกฏสฺส.
ภิกฺขุ สมาทิสิตฺวา ปกฺกมติ— “กุฏิํ เม กโรถา”ติ. สมาทิสติ จ— “เทสิตวตฺถุกา จ โหตุ อนารมฺภา จ สปริกฺกมนา จา”ติ. ตสฺส กุฏิํ กโรนฺติ อเทสิตวตฺถุกํ สารมฺภํ สปริกฺกมนํ. โส สุณาติ— “กุฏิ กิร เม กยิรติ อเทสิตวตฺถุกา สารมฺภา สปริกฺกมนา”ติ. เตน ภิกฺขุนา สามํ วา คนฺตพฺพํ ทูโต วา ปาเหตพฺโพ— “เทสิตวตฺถุกา จ โหตุ อนารมฺภา จา”ติ. โน เจ สามํ วา คจฺเฉยฺย ทูตํ วา ปหิเณยฺย, อาปตฺติ ทุกฺกฏสฺส.
ภิกฺขุ สมาทิสิตฺวา ปกฺกมติ— “กุฏิํ เม กโรถา”ติ. สมาทิสติ จ— “เทสิตวตฺถุกา จ โหตุ อนารมฺภา จ สปริกฺกมนา จา”ติ. ตสฺส กุฏิํ กโรนฺติ อเทสิตวตฺถุกํ อนารมฺภํ อปริกฺกมนํ. โส สุณาติ— “กุฏิ กิร เม กยิรติ อเทสิตวตฺถุกา อนารมฺภา อปริกฺกมนา”ติ. เตน ภิกฺขุนา สามํ วา คนฺตพฺพํ ทูโต วา ปาเหตพฺโพ— “เทสิตวตฺถุกา จ โหตุ สปริกฺกมนา จา”ติ. โน เจ สามํ วา คจฺเฉยฺย ทูตํ วา ปหิเณยฺย, อาปตฺติ ทุกฺกฏสฺส.
ภิกฺขุ สมาทิสิตฺวา ปกฺกมติ— “กุฏิํ เม กโรถา”ติ. สมาทิสติ จ— “เทสิตวตฺถุกา จ โหตุ อนารมฺภา จ สปริกฺกมนา จา”ติ. ตสฺส กุฏิํ กโรนฺติ อเทสิตวตฺถุกํ อนารมฺภํ สปริกฺกมนํ. โส สุณาติ— “กุฏิ กิร เม กยิรติ อเทสิตวตฺถุกา อนารมฺภา สปริกฺกมนา”ติ. เตน ภิกฺขุนา สามํ วา คนฺตพฺพํ ทูโต วา ปาเหตพฺโพ— “เทสิตวตฺถุกา โหตู”ติ. โน เจ สามํ วา คจฺเฉยฺย ทูตํ วา ปหิเณยฺย, อาปตฺติ ทุกฺกฏสฺส.
ภิกฺขุ สมาทิสิตฺวา ปกฺกมติ— “กุฏิํ เม กโรถา”ติ. สมาทิสติ จ— “เทสิตวตฺถุกา จ โหตุ อนารมฺภา จ สปริกฺกมนา จา”ติ. ตสฺส กุฏิํ กโรนฺติ เทสิตวตฺถุกํ สารมฺภํ อปริกฺกมนํ. โส สุณาติ— “กุฏิ กิร เม กยิรติ เทสิตวตฺถุกา สารมฺภา อปริกฺกมนา”ติ. เตน ภิกฺขุนา สามํ วา คนฺตพฺพํ ทูโต วา ปาเหตพฺโพ— “อนารมฺภา จ โหตุ สปริกฺกมนา จา”ติ. โน เจ สามํ วา คจฺเฉยฺย ทูตํ วา ปหิเณยฺย, อาปตฺติ ทุกฺกฏสฺส.
ภิกฺขุ สมาทิสิตฺวา ปกฺกมติ— “กุฏิํ เม กโรถา”ติ. สมาทิสติ จ— “เทสิตวตฺถุกา จ โหตุ อนารมฺภา จ สปริกฺกมนา จา”ติ. ตสฺส กุฏิํ กโรนฺติ เทสิตวตฺถุกํ สารมฺภํ สปริกฺกมนํ. โส สุณาติ— “กุฏิ กิร เม กยิรติ เทสิตวตฺถุกา สารมฺภา สปริกฺกมนา”ติ. เตน ภิกฺขุนา สามํ วา คนฺตพฺพํ ทูโต วา ปาเหตพฺโพ— “อนารมฺภา โหตู”ติ. โน เจ สามํ วา คจฺเฉยฺย ทูตํ วา ปหิเณยฺย, อาปตฺติ ทุกฺกฏสฺส.
ภิกฺขุ สมาทิสิตฺวา ปกฺกมติ— “กุฏิํ เม กโรถา”ติ. สมาทิสติ จ— “เทสิตวตฺถุกา จ โหตุ อนารมฺภา จ สปริกฺกมนา จา”ติ. ตสฺส กุฏิํ กโรนฺติ เทสิตวตฺถุกํ อนารมฺภํ อปริกฺกมนํ. โส สุณาติ— “กุฏิ กิร เม กยิรติ เทสิตวตฺถุกา อนารมฺภา อปริกฺกมนา”ติ. เตน ภิกฺขุนา สามํ วา คนฺตพฺพํ ทูโต วา ปาเหตพฺโพ— “สปริกฺกมนา โหตู”ติ. โน เจ สามํ วา คจฺเฉยฺย ทูตํ วา ปหิเณยฺย, อาปตฺติ ทุกฺกฏสฺส.
ภิกฺขุ สมาทิสิตฺวา ปกฺกมติ— “กุฏิํ เม กโรถา”ติ. สมาทิสติ จ— “เทสิตวตฺถุกา จ โหตุ อนารมฺภา จ สปริกฺกมนา จา”ติ. ตสฺส กุฏิํ กโรนฺติ เทสิตวตฺถุกํ อนารมฺภํ สปริกฺกมนํ, อนาปตฺติ.
ภิกฺขุ สมาทิสิตฺวา ปกฺกมติ— “กุฏิํ เม กโรถา”ติ. สมาทิสติ จ— “ปมาณิกา จ โหตุ อนารมฺภา จ สปริกฺกมนา จา”ติ. ตสฺส กุฏิํ กโรนฺติ ปมาณาติกฺกนฺตํ สารมฺภํ อปริกฺกมนํ. โส สุณาติ— “กุฏิ กิร เม กยิรติ ปมาณาติกฺกนฺตา สารมฺภา อปริกฺกมนา”ติ. เตน ภิกฺขุนา สามํ วา คนฺตพฺพํ ทูโต วา ปาเหตพฺโพ— “ปมาณิกา จ โหตุ อนารมฺภา จ สปริกฺกมนา จา”ติ …เป… “ปมาณิกา จ โหตุ อนารมฺภา จา”ติ …เป… “ปมาณิกา จ โหตุ สปริกฺกมนา จา”ติ …เป… “ปมาณิกา โหตู”ติ. โน เจ สามํ วา คจฺเฉยฺย ทูตํ วา ปหิเณยฺย, อาปตฺติ ทุกฺกฏสฺส.
ภิกฺขุ สมาทิสิตฺวา ปกฺกมติ— “กุฏิํ เม กโรถา”ติ. สมาทิสติ จ— “ปมาณิกา จ โหตุ อนารมฺภา จ สปริกฺกมนา จา”ติ. ตสฺส กุฏิํ กโรนฺติ ปมาณิกํ สารมฺภํ อปริกฺกมนํ. โส สุณาติ— “กุฏิ กิร เม กยิรติ ปมาณิกา สารมฺภา อปริกฺกมนา”ติ. เตน ภิกฺขุนา สามํ วา คนฺตพฺพํ ทูโต วา ปาเหตพฺโพ— “อนารมฺภา จ โหตุ สปริกฺกมนา จา”ติ …เป… “อนารมฺภา โหตู”ติ …เป… “สปริกฺกมนา โหตู”ติ …เป… อนาปตฺติ.
ภิกฺขุ สมาทิสิตฺวา ปกฺกมติ— “กุฏิํ เม กโรถา”ติ. สมาทิสติ จ— “เทสิตวตฺถุกา จ โหตุ ปมาณิกา จ อนารมฺภา จ สปริกฺกมนา จา”ติ. ตสฺส กุฏิํ กโรนฺติ อเทสิตวตฺถุกํ ปมาณาติกฺกนฺตํ สารมฺภํ อปริกฺกมนํ. โส สุณาติ— “กุฏิ กิร เม กยิรติ อเทสิตวตฺถุกา ปมาณาติกฺกนฺตา สารมฺภา อปริกฺกมนา”ติ. เตน ภิกฺขุนา สามํ วา คนฺตพฺพํ ทูโต วา ปาเหตพฺโพ— “เทสิตวตฺถุกา จ โหตุ ปมาณิกา จ อนารมฺภา จ สปริกฺกมนา จา”ติ …เป… “เทสิตวตฺถุกา จ โหตุ ปมาณิกา จ อนารมฺภา จา”ติ …เป… “เทสิตวตฺถุกา จ โหตุ ปมาณิกา จ สปริกฺกมนา จา”ติ …เป… “เทสิตวตฺถุกา จ โหตุ ปมาณิกา จา”ติ. โน เจ สามํ วา คจฺเฉยฺย ทูตํ วา ปหิเณยฺย, อาปตฺติ ทุกฺกฏสฺส.
ภิกฺขุ สมาทิสิตฺวา ปกฺกมติ— “กุฏิํ เม กโรถา”ติ. สมาทิสติ จ— “เทสิตวตฺถุกา จ โหตุ ปมาณิกา จ อนารมฺภา จ สปริกฺกมนา จา”ติ. ตสฺส กุฏิํ กโรนฺติ เทสิตวตฺถุกํ ปมาณิกํ สารมฺภํ อปริกฺกมนํ. โส สุณาติ— “กุฏิ กิร เม กยิรติ เทสิตวตฺถุกา ปมาณิกา สารมฺภา อปริกฺกมนา”ติ. เตน ภิกฺขุนา สามํ วา คนฺตพฺพํ ทูโต วา ปาเหตพฺโพ— “อนารมฺภา จ โหตุ สปริกฺกมนา จา”ติ …เป… “อนารมฺภา โหตู”ติ …เป… “สปริกฺกมนา โหตู”ติ …เป… อนาปตฺติ.
ภิกฺขุ สมาทิสิตฺวา ปกฺกมติ— “กุฏิํ เม กโรถา”ติ. สมาทิสติ จ— “เทสิตวตฺถุกา จ โหตุ อนารมฺภา จ สปริกฺกมนา จา”ติ. ตสฺส กุฏิํ กโรนฺติ อเทสิตวตฺถุกํ สารมฺภํ อปริกฺกมนํ, อาปตฺติ การุกานํ ติณฺณํ ทุกฺกฏานํ …เป… สารมฺภํ สปริกฺกมนํ, อาปตฺติ การุกานํ ทฺวินฺนํ ทุกฺกฏานํ …เป… อนารมฺภํ อปริกฺกมนํ, อาปตฺติ การุกานํ ทฺวินฺนํ ทุกฺกฏานํ …เป… อนารมฺภํ สปริกฺกมนํ, อาปตฺติ การุกานํ ทุกฺกฏสฺส.
ภิกฺขุ สมาทิสิตฺวา ปกฺกมติ— “กุฏิํ เม กโรถา”ติ. สมาทิสติ จ— “เทสิตวตฺถุกา จ โหตุ อนารมฺภา จ สปริกฺกมนา จา”ติ. ตสฺส กุฏิํ กโรนฺติ เทสิตวตฺถุกํ สารมฺภํ อปริกฺกมนํ, อาปตฺติ การุกานํ ทฺวินฺนํ ทุกฺกฏานํ …เป… สารมฺภํ สปริกฺกมนํ, อาปตฺติ การุกานํ ทุกฺกฏสฺส …เป… อนารมฺภํ อปริกฺกมนํ, อาปตฺติ การุกานํ ทุกฺกฏสฺส …เป… อนารมฺภํ สปริกฺกมนํ, อนาปตฺติ.
ภิกฺขุ สมาทิสิตฺวา ปกฺกมติ— “กุฏิํ เม กโรถา”ติ. สมาทิสติ จ— “ปมาณิกา จ โหตุ อนารมฺภา จ สปริกฺกมนา จา”ติ. ตสฺส กุฏิํ กโรนฺติ ปมาณาติกฺกนฺตํ สารมฺภํ อปริกฺกมนํ, อาปตฺติ การุกานํ ติณฺณํ ทุกฺกฏานํ …เป… สารมฺภํ สปริกฺกมนํ, อาปตฺติ การุกานํ ทฺวินฺนํ ทุกฺกฏานํ …เป… อนารมฺภํ อปริกฺกมนํ, อาปตฺติ การุกานํ ทฺวินฺนํ ทุกฺกฏานํ …เป… อนารมฺภํ สปริกฺกมนํ, อาปตฺติ การุกานํ ทุกฺกฏสฺส.
ภิกฺขุ สมาทิสิตฺวา ปกฺกมติ— “กุฏิํ เม กโรถา”ติ. สมาทิสติ จ— “ปมาณิกา จ โหตุ อนารมฺภา จ สปริกฺกมนา จา”ติ. ตสฺส กุฏิํ กโรนฺติ ปมาณิกํ สารมฺภํ อปริกฺกมนํ, อาปตฺติ การุกานํ ทฺวินฺนํ ทุกฺกฏานํ …เป… สารมฺภํ สปริกฺกมนํ, อาปตฺติ การุกานํ ทุกฺกฏสฺส …เป… อนารมฺภํ อปริกฺกมนํ, อาปตฺติ การุกานํ ทุกฺกฏสฺส …เป… อนารมฺภํ สปริกฺกมนํ, อนาปตฺติ.
ภิกฺขุ สมาทิสิตฺวา ปกฺกมติ— “กุฏิํ เม กโรถา”ติ. สมาทิสติ จ— “เทสิตวตฺถุกา จ โหตุ ปมาณิกา จ อนารมฺภา จ สปริกฺกมนา จา”ติ. ตสฺส กุฏิํ กโรนฺติ อเทสิตวตฺถุกํ ปมาณาติกฺกนฺตํ สารมฺภํ อปริกฺกมนํ, อาปตฺติ การุกานํ จตุนฺนํ ทุกฺกฏานํ …เป… สารมฺภํ สปริกฺกมนํ, อาปตฺติ การุกานํ ติณฺณํ ทุกฺกฏานํ …เป… อนารมฺภํ อปริกฺกมนํ, อาปตฺติ การุกานํ ติณฺณํ ทุกฺกฏานํ …เป… อนารมฺภํ สปริกฺกมนํ, อาปตฺติ การุกานํ ทฺวินฺนํ ทุกฺกฏานํ.
ภิกฺขุ สมาทิสิตฺวา ปกฺกมติ— “กุฏิํ เม กโรถา”ติ. สมาทิสติ จ— “เทสิตวตฺถุกา จ โหตุ ปมาณิกา จ อนารมฺภา จ สปริกฺกมนา จา”ติ. ตสฺส กุฏิํ กโรนฺติ เทสิตวตฺถุกํ ปมาณิกํ สารมฺภํ อปริกฺกมนํ, อาปตฺติ การุกานํ ทฺวินฺนํ ทุกฺกฏานํ …เป… สารมฺภํ สปริกฺกมนํ, อาปตฺติ การุกานํ ทุกฺกฏสฺส …เป… อนารมฺภํ อปริกฺกมนํ, อาปตฺติ การุกานํ ทุกฺกฏสฺส …เป… อนารมฺภํ สปริกฺกมนํ, อนาปตฺติ.
ภิกฺขุ สมาทิสิตฺวา ปกฺกมติ— “กุฏิํ เม กโรถา”ติ. ตสฺส กุฏิํ กโรนฺติ อเทสิตวตฺถุกํ สารมฺภํ อปริกฺกมนํ. โส เจ วิปฺปกเต อาคจฺฉติ, เตน ภิกฺขุนา สา กุฏิ อญฺญสฺส วา ทาตพฺพา ภินฺทิตฺวา วา ปุน กาตพฺพา. โน เจ อญฺญสฺส วา ทเทยฺย ภินฺทิตฺวา วา ปุน กาเรยฺย, อาปตฺติ สํฆาทิเสเสน ทฺวินฺนํ ทุกฺกฏานํ.
ภิกฺขุ สมาทิสิตฺวา ปกฺกมติ— “กุฏิํ เม กโรถา”ติ. ตสฺส กุฏิํ กโรนฺติ อเทสิตวตฺถุกํ สารมฺภํ สปริกฺกมนํ. โส เจ วิปฺปกเต อาคจฺฉติ, เตน ภิกฺขุนา สา กุฏิ อญฺญสฺส วา ทาตพฺพา ภินฺทิตฺวา วา ปุน กาตพฺพา. โน เจ อญฺญสฺส วา ทเทยฺย ภินฺทิตฺวา วา ปุน กาเรยฺย, อาปตฺติ สํฆาทิเสเสน ทุกฺกฏสฺส …เป… อนารมฺภํ อปริกฺกมนํ …เป… อาปตฺติ สํฆาทิเสเสน ทุกฺกฏสฺส …เป… อนารมฺภํ สปริกฺกมนํ …เป… อาปตฺติ สํฆาทิเสสสฺส.
ภิกฺขุ สมาทิสิตฺวา ปกฺกมติ— “กุฏิํ เม กโรถา”ติ. ตสฺส กุฏิํ กโรนฺติ เทสิตวตฺถุกํ สารมฺภํ อปริกฺกมนํ. โส เจ วิปฺปกเต อาคจฺฉติ, เตน ภิกฺขุนา สา กุฏิ อญฺญสฺส วา ทาตพฺพา ภินฺทิตฺวา วา ปุน กาตพฺพา. โน เจ อญฺญสฺส วา ทเทยฺย ภินฺทิตฺวา วา ปุน กาเรยฺย, อาปตฺติ ทฺวินฺนํ ทุกฺกฏานํ …เป… สารมฺภํ สปริกฺกมนํ, อาปตฺติ ทุกฺกฏสฺส …เป… อนารมฺภํ อปริกฺกมนํ, อาปตฺติ ทุกฺกฏสฺส …เป… อนารมฺภํ สปริกฺกมนํ, อนาปตฺติ.
ภิกฺขุ สมาทิสิตฺวา ปกฺกมติ— “กุฏิํ เม กโรถา”ติ. ตสฺส กุฏิํ กโรนฺติ ปมาณาติกฺกนฺตํ สารมฺภํ อปริกฺกมนํ. โส เจ วิปฺปกเต อาคจฺฉติ, เตน ภิกฺขุนา สา กุฏิ อญฺญสฺส วา ทาตพฺพา ภินฺทิตฺวา วา ปุน กาตพฺพา. โน เจ อญฺญสฺส วา ทเทยฺย ภินฺทิตฺวา วา ปุน กาเรยฺย, อาปตฺติ สํฆาทิเสเสน ทฺวินฺนํ ทุกฺกฏานํ …เป… สารมฺภํ สปริกฺกมนํ, อาปตฺติ สํฆาทิเสเสน ทุกฺกฏสฺส …เป… อนารมฺภํ อปริกฺกมนํ, อาปตฺติ สํฆาทิเสเสน ทุกฺกฏสฺส …เป… อนารมฺภํ สปริกฺกมนํ, อาปตฺติ สํฆาทิเสสสฺส.
ภิกฺขุ สมาทิสิตฺวา ปกฺกมติ— “กุฏิํ เม กโรถา”ติ. ตสฺส กุฏิํ กโรนฺติ ปมาณิกํ สารมฺภํ อปริกฺกมนํ. โส เจ วิปฺปกเต อาคจฺฉติ, เตน ภิกฺขุนา สา กุฏิ อญฺญสฺส วา ทาตพฺพา ภินฺทิตฺวา วา ปุน กาตพฺพา. โน เจ อญฺญสฺส วา ทเทยฺย ภินฺทิตฺวา วา ปุน กาเรยฺย, อาปตฺติ ทฺวินฺนํ ทุกฺกฏานํ …เป… สารมฺภํ สปริกฺกมนํ, อาปตฺติ ทุกฺกฏสฺส …เป… อนารมฺภํ อปริกฺกมนํ, อาปตฺติ ทุกฺกฏสฺส …เป… อนารมฺภํ สปริกฺกมนํ, อนาปตฺติ.
ภิกฺขุ สมาทิสิตฺวา ปกฺกมติ— “กุฏิํ เม กโรถา”ติ. ตสฺส กุฏิํ กโรนฺติ อเทสิตวตฺถุกํ ปมาณาติกฺกนฺตํ สารมฺภํ อปริกฺกมนํ. โส เจ วิปฺปกเต อาคจฺฉติ, เตน ภิกฺขุนา สา กุฏิ อญฺญสฺส วา ทาตพฺพา ภินฺทิตฺวา วา ปุน กาตพฺพา. โน เจ อญฺญสฺส วา ทเทยฺย ภินฺทิตฺวา วา ปุน กาเรยฺย, อาปตฺติ ทฺวินฺนํ สํฆาทิเสเสน ทฺวินฺนํ ทุกฺกฏานํ …เป… สารมฺภํ สปริกฺกมนํ, อาปตฺติ ทฺวินฺนํ สํฆาทิเสเสน ทุกฺกฏสฺส …เป… อนารมฺภํ อปริกฺกมนํ, อาปตฺติ ทฺวินฺนํ สํฆาทิเสเสน ทุกฺกฏสฺส …เป… อนารมฺภํ สปริกฺกมนํ, อาปตฺติ ทฺวินฺนํ สํฆาทิเสสานํ.
ภิกฺขุ สมาทิสิตฺวา ปกฺกมติ— “กุฏิํ เม กโรถา”ติ. ตสฺส กุฏิํ กโรนฺติ เทสิตวตฺถุกํ ปมาณิกํ สารมฺภํ อปริกฺกมนํ. โส เจ วิปฺปกเต อาคจฺฉติ, เตน ภิกฺขุนา สา กุฏิ อญฺญสฺส วา ทาตพฺพา ภินฺทิตฺวา วา ปุน กาตพฺพา. โน เจ อญฺญสฺส วา ทเทยฺย ภินฺทิตฺวา วา ปุน กาเรยฺย, อาปตฺติ ทฺวินฺนํ ทุกฺกฏานํ …เป… สารมฺภํ สปริกฺกมนํ, อาปตฺติ ทุกฺกฏสฺส …เป… อนารมฺภํ อปริกฺกมนํ, อาปตฺติ ทุกฺกฏสฺส.
ภิกฺขุ สมาทิสิตฺวา ปกฺกมติ— “กุฏิํ เม กโรถา”ติ. ตสฺส กุฏิํ กโรนฺติ เทสิตวตฺถุกํ ปมาณิกํ อนารมฺภํ สปริกฺกมนํ, อนาปตฺติ.
อตฺตนา วิปฺปกตํ อตฺตนา ปริโยสาเปติ, อาปตฺติ สํฆาทิเสสสฺส.
อตฺตนา วิปฺปกตํ ปเรหิ ปริโยสาเปติ, อาปตฺติ สํฆาทิเสสสฺส.
ปเรหิ วิปฺปกตํ อตฺตนา ปริโยสาเปติ, อาปตฺติ สํฆาทิเสสสฺส.
ปเรหิ วิปฺปกตํ ปเรหิ ปริโยสาเปติ, อาปตฺติ สํฆาทิเสสสฺส.
อนาปตฺติ— เลเณ คุหาย ติณกุฏิกาย อญฺญสฺสตฺถาย วาสาคารํ ฐเปตฺวา สพฺพตฺถ, อนาปตฺติ อุมฺมตฺตกสฺส อาทิกมฺมิกสฺสาติ.
กุฏิการสิกฺขาปทํ นิฏฺฐิตํ ฉฏฺฐํ.