1.2.7 วิหารการสิกฺขาปท
เตน สมเยน พุทฺโธ ภควา โกสมฺพิยํ วิหรติ โฆสิตาราเม. เตน โข ปน สมเยน อายสฺมโต ฉนฺนสฺส อุปฏฺฐาโก คหปติ อายสฺมนฺตํ ฉนฺนํ เอตทโวจ— “วิหารวตฺถุํ, ภนฺเต, ชานาหิ อยฺยสฺส วิหารํ การาเปสฺสามี”ติ. อถ โข อายสฺมา ฉนฺโน วิหารวตฺถุํ โสเธนฺโต อญฺญตรํ เจติยรุกฺขํ เฉทาเปสิ คามปูชิตํ นิคมปูชิตํ นครปูชิตํ ชนปทปูชิตํ รฏฺฐปูชิตํ. มนุสฺสา อุชฺฌายนฺติ ขิยฺยนฺติ วิปาเจนฺติ— “กถญฺหิ นาม สมณา สกฺยปุตฺติยา เจติยรุกฺขํ เฉทาเปสฺสนฺติ คามปูชิตํ นิคมปูชิตํ นครปูชิตํ ชนปทปูชิตํ รฏฺฐปูชิตํ. เอกินฺทฺริยํ สมณา สกฺยปุตฺติยา ชีวํ วิเหเฐนฺตี”ติ.
อโสฺสสุํ โข ภิกฺขู เตสํ มนุสฺสานํ อุชฺฌายนฺตานํ ขิยฺยนฺตานํ วิปาเจนฺตานํ. เย เต ภิกฺขู อปฺปิจฺฉา …เป… เต อุชฺฌายนฺติ ขิยฺยนฺติ วิปาเจนฺติ— “กถญฺหิ นาม อายสฺมา ฉนฺโน เจติยรุกฺขํ เฉทาเปสฺสติ คามปูชิตํ …เป… รฏฺฐปูชิตนฺ”ติ.
อถ โข เต ภิกฺขู อายสฺมนฺตํ ฉนฺนํ อเนกปริยาเยน วิครหิตฺวา ภควโต เอตมตฺถํ อาโรเจสุํ …เป… “สจฺจํ กิร ตฺวํ, ฉนฺน, เจติยรุกฺขํ เฉทาเปสิ คามปูชิตํ …เป… รฏฺฐปูชิตนฺ”ติ? “สจฺจํ, ภควา”ติ. วิครหิ พุทฺโธ ภควา …เป… กถญฺหิ นาม ตฺวํ, โมฆปุริส, เจติยรุกฺขํ เฉทาเปสฺสสิ คามปูชิตํ นิคมปูชิตํ นครปูชิตํ ชนปทปูชิตํ รฏฺฐปูชิตํ. ชีวสญฺญิโน หิ, โมฆปุริส, มนุสฺสา รุกฺขสฺมิํ. เนตํ, โมฆปุริส, อปฺปสนฺนานํ วา ปสาทาย …เป… เอวญฺจ ปน, ภิกฺขเว, อิมํ สิกฺขาปทํ อุทฺทิเสยฺยาถ—
“มหลฺลกํ ปน ภิกฺขุนา วิหารํ การยมาเนน สสฺสามิกํ อตฺตุทฺเทสํ ภิกฺขู อภิเนตพฺพา วตฺถุเทสนาย. เตหิ ภิกฺขูหิ วตฺถุ เทเสตพฺพํ อนารมฺภํ สปริกฺกมนํ. สารมฺเภ เจ ภิกฺขุ วตฺถุสฺมิํ อปริกฺกมเน มหลฺลกํ วิหารํ กาเรยฺย ภิกฺขู วา อนภิเนยฺย วตฺถุเทสนาย, สํฆาทิเสโส” ติ. (7: 11 )
มหลฺลโก นาม วิหาโร สสฺสามิโก วุจฺจติ.
วิหาโร นาม อุลฺลิตฺโต วา โหติ อวลิตฺโต วา อุลฺลิตฺตาวลิตฺโต วา.
การยมาเนนา ติ กโรนฺโต วา การาเปนฺโต วา.
สสฺสามิกนฺ ติ อญฺโญ โกจิ สามิโก โหติ อิตฺถี วา ปุริโส วา คหฏฺโฐ วา ปพฺพชิโต วา.
อตฺตุทฺเทสนฺ ติ อตฺตโน อตฺถาย.
ภิกฺขู อภิเนตพฺพา วตฺถุเทสนายา ติ เตน วิหารการเกน ภิกฺขุนา วิหารวตฺถุํ โสเธตฺวา สํฆํ อุปสงฺกมิตฺวา เอกํสํ อุตฺตราสงฺคํ กริตฺวา วุฑฺฒานํ ภิกฺขูนํ ปาเท วนฺทิตฺวา อุกฺกุฏิกํ นิสีทิตฺวา อญฺชลิํ ปคฺคเหตฺวา เอวมสฺส วจนีโย— “อหํ, ภนฺเต, มหลฺลกํ วิหารํ กตฺตุกาโม สสฺสามิกํ อตฺตุทฺเทสํ. โสหํ, ภนฺเต, สํฆํ วิหารวตฺถุโอโลกนํ ยาจามี”ติ. ทุติยมฺปิ ยาจิตพฺพา. ตติยมฺปิ ยาจิตพฺพา. สเจ สพฺโพ สํโฆ อุสฺสหติ วิหารวตฺถุํ โอโลเกตุํ สพฺเพน สํเฆน โอโลเกตพฺพํ. โน เจ สพฺโพ สํโฆ อุสฺสหติ วิหารวตฺถุํ โอโลเกตุํ, เย ตตฺถ โหนฺติ ภิกฺขู พฺยตฺตา ปฏิพลา สารมฺภํ อนารมฺภํ สปริกฺกมนํ อปริกฺกมนํ ชานิตุํ เต ยาจิตฺวา สมฺมนฺนิตพฺพา. “เอวญฺจ ปน, ภิกฺขเว, สมฺมนฺนิตพฺพา. พฺยตฺเตน ภิกฺขุนา ปฏิพเลน สํโฆ ญาเปตพฺโพ—
‘สุณาตุ เม, ภนฺเต, สํโฆ. อยํ อิตฺถนฺนาโม ภิกฺขุ มหลฺลกํ วิหารํ กตฺตุกาโม สสฺสามิกํ อตฺตุทฺเทสํ. โส สํฆํ วิหารวตฺถุโอโลกนํ ยาจติ. ยทิ สํฆสฺส ปตฺตกลฺลํ, สํโฆ อิตฺถนฺนามญฺจ อิตฺถนฺนามญฺจ ภิกฺขู สมฺมนฺเนยฺย อิตฺถนฺนามสฺส ภิกฺขุโน วิหารวตฺถุํ โอโลเกตุํ. เอสา ญตฺติ.
สุณาตุ เม, ภนฺเต, สํโฆ. อยํ อิตฺถนฺนาโม ภิกฺขุ มหลฺลกํ วิหารํ กตฺตุกาโม สสฺสามิกํ อตฺตุทฺเทสํ. โส สํฆํ วิหารวตฺถุโอโลกนํ ยาจติ. สํโฆ อิตฺถนฺนามญฺจ อิตฺถนฺนามญฺจ ภิกฺขู สมฺมนฺนติ อิตฺถนฺนามสฺส ภิกฺขุโน วิหารวตฺถุํ โอโลเกตุํ. ยสฺสายสฺมโต ขมติ อิตฺถนฺนามสฺส จ อิตฺถนฺนามสฺส จ ภิกฺขูนํ สมฺมุติ อิตฺถนฺนามสฺส ภิกฺขุโน วิหารวตฺถุํ โอโลเกตุํ, โส ตุณฺหสฺส; ยสฺส นกฺขมติ, โส ภาเสยฺย.
สมฺมตา สํเฆน อิตฺถนฺนาโม จ อิตฺถนฺนาโม จ ภิกฺขู อิตฺถนฺนามสฺส ภิกฺขุโน วิหารวตฺถุํ โอโลเกตุํ. ขมติ สํฆสฺส, ตสฺมา ตุณฺหี, เอวเมตํ ธารยามี’”ติ.
เตหิ สมฺมเตหิ ภิกฺขูหิ ตตฺถ คนฺตฺวา วิหารวตฺถุ โอโลเกตพฺพํ; สารมฺภํ อนารมฺภํ สปริกฺกมนํ อปริกฺกมนํ ชานิตพฺพํ. สเจ สารมฺภํ โหติ อปริกฺกมนํ, “มายิธ กรี”ติ วตฺตพฺโพ. สเจ อนารมฺภํ โหติ สปริกฺกมนํ, สํฆสฺส อาโรเจตพฺพํ— “อนารมฺภํ สปริกฺกมนนฺ”ติ. เตน วิหารการเกน ภิกฺขุนา สํฆํ อุปสงฺกมิตฺวา เอกํสํ อุตฺตราสงฺคํ กริตฺวา วุฑฺฒานํ ภิกฺขูนํ ปาเท วนฺทิตฺวา อุกฺกุฏิกํ นิสีทิตฺวา อญฺชลิํ ปคฺคเหตฺวา เอวมสฺส วจนีโย— “อหํ, ภนฺเต, มหลฺลกํ วิหารํ กตฺตุกาโม สสฺสามิกํ อตฺตุทฺเทสํ. โสหํ, ภนฺเต, สํฆํ วิหารวตฺถุเทสนํ ยาจามี”ติ. ทุติยมฺปิ ยาจิตพฺพา. ตติยมฺปิ ยาจิตพฺพา. พฺยตฺเตน ภิกฺขุนา ปฏิพเลน สํโฆ ญาเปตพฺโพ—
“สุณาตุ เม, ภนฺเต, สํโฆ. อยํ อิตฺถนฺนาโม ภิกฺขุ มหลฺลกํ วิหารํ กตฺตุกาโม สสฺสามิกํ อตฺตุทฺเทสํ. โส สํฆํ วิหารวตฺถุเทสนํ ยาจติ. ยทิ สํฆสฺส ปตฺตกลฺลํ, สํโฆ อิตฺถนฺนามสฺส ภิกฺขุโน วิหารวตฺถุํ เทเสยฺย. เอสา ญตฺติ.
สุณาตุ เม, ภนฺเต, สํโฆ. อยํ อิตฺถนฺนาโม ภิกฺขุ มหลฺลกํ วิหารํ กตฺตุกาโม สสฺสามิกํ อตฺตุทฺเทสํ. โส สํฆํ วิหารวตฺถุเทสนํ ยาจติ. สํโฆ อิตฺถนฺนามสฺส ภิกฺขุโน วิหารวตฺถุํ เทเสติ. ยสฺสายสฺมโต ขมติ อิตฺถนฺนามสฺส ภิกฺขุโน วิหารวตฺถุสฺส เทสนา, โส ตุณฺหสฺส; ยสฺส นกฺขมติ, โส ภาเสยฺย.
เทสิตํ สํเฆน อิตฺถนฺนามสฺส ภิกฺขุโน วิหารวตฺถุ. ขมติ สํฆสฺส, ตสฺมา ตุณฺหี, เอวเมตํ ธารยามี”ติ.
สารมฺภํ นาม กิปิลฺลิกานํ วา อาสโย โหติ, อุปจิกานํ วา อาสโย โหติ, อุนฺทูรานํ วา …เป… อหีนํ วา… วิจฺฉิกานํ วา… สตปทีนํ วา… หตฺถีนํ วา… อสฺสานํ วา… สีหานํ วา… พฺยคฺฆานํ วา… ทีปีนํ วา… อจฺฉานํ วา… ตรจฺฉานํ วา อาสโย โหติ, เยสํ เกสญฺจิ ติรจฺฉานคตานํ ปาณานํ อาสโย โหติ, ปุพฺพณฺณนิสฺสิตํ วา โหติ, อปรณฺณนิสฺสิตํ วา โหติ, อพฺภาฆาตนิสฺสิตํ วา โหติ, อาฆาตนนิสฺสิตํ วา โหติ, สุสานนิสฺสิตํ วา โหติ, อุยฺยานนิสฺสิตํ วา โหติ, ราชวตฺถุนิสฺสิตํ วา โหติ, หตฺถิสาลานิสฺสิตํ วา โหติ, อสฺสสาลานิสฺสิตํ วา โหติ, พนฺธนาคารนิสฺสิตํ วา โหติ, ปานาคารนิสฺสิตํ วา โหติ, สูนนิสฺสิตํ วา โหติ, รจฺฉานิสฺสิตํ วา โหติ, จจฺจรนิสฺสิตํ วา โหติ, สภานิสฺสิตํ วา โหติ, สํสรณนิสฺสิตํ วา โหติ. เอตํ สารมฺภํ นาม.
อปริกฺกมนํ นาม น สกฺกา โหติ ยถายุตฺเตน สกเฏน อนุปริคนฺตุํ, สมนฺตา นิเสฺสณิยา อนุปริคนฺตุํ. เอตํ อปริกฺกมนํ นาม.
อนารมฺภํ นาม น กิปิลฺลิกานํ วา อาสโย โหติ …เป… น สํสรณนิสฺสิตํ วา โหติ. เอตํ อนารมฺภํ นาม.
สปริกฺกมนํ นาม สกฺกา โหติ ยถายุตฺเตน สกเฏน อนุปริคนฺตุํ, สมนฺตา นิเสฺสณิยา อนุปริคนฺตุํ. เอตํ สปริกฺกมนํ นาม.
มหลฺลโก นาม วิหาโร สสฺสามิโก วุจฺจติ.
วิหาโร นาม อุลฺลิตฺโต วา โหติ อวลิตฺโต วา อุลฺลิตฺตาวลิตฺโต วา.
กาเรยฺยา ติ กโรติ วา การาเปติ วา.
ภิกฺขู วา อนภิเนยฺย วตฺถุเทสนายา ติ ญตฺติทุติเยน กมฺเมน วิหารวตฺถุํ น เทสาเปตฺวา กโรติ วา การาเปติ วา, ปโยเค ทุกฺกฏํ. เอกํ ปิณฺฑํ อนาคเต, อาปตฺติ ถุลฺลจฺจยสฺส. ตสฺมิํ ปิณฺเฑ อาคเต, อาปตฺติ สํฆาทิเสสสฺส.
สํฆาทิเสโส ติ …เป… เตนปิ วุจฺจติ— “สํฆาทิเสโส”ติ.
ภิกฺขุ วิหารํ กโรติ อเทสิตวตฺถุกํ สารมฺภํ อปริกฺกมนํ, อาปตฺติ สํฆาทิเสเสน ทฺวินฺนํ ทุกฺกฏานํ. ภิกฺขุ วิหารํ กโรติ อเทสิตวตฺถุกํ สารมฺภํ สปริกฺกมนํ, อาปตฺติ สํฆาทิเสเสน ทุกฺกฏสฺส. ภิกฺขุ วิหารํ กโรติ อเทสิตวตฺถุกํ อนารมฺภํ อปริกฺกมนํ, อาปตฺติ สํฆาทิเสเสน ทุกฺกฏสฺส. ภิกฺขุ วิหารํ กโรติ อเทสิตวตฺถุกํ อนารมฺภํ สปริกฺกมนํ, อาปตฺติ สํฆาทิเสสสฺส.
ภิกฺขุ วิหารํ กโรติ เทสิตวตฺถุกํ สารมฺภํ อปริกฺกมนํ, อาปตฺติ ทฺวินฺนํ ทุกฺกฏานํ. ภิกฺขุ วิหารํ กโรติ เทสิตวตฺถุกํ สารมฺภํ สปริกฺกมนํ, อาปตฺติ ทุกฺกฏสฺส. ภิกฺขุ วิหารํ กโรติ เทสิตวตฺถุกํ อนารมฺภํ อปริกฺกมนํ, อาปตฺติ ทุกฺกฏสฺส. ภิกฺขุ วิหารํ กโรติ เทสิตวตฺถุกํ อนารมฺภํ สปริกฺกมนํ, อนาปตฺติ.
ภิกฺขุ สมาทิสติ— “วิหารํ เม กโรถา”ติ. ตสฺส วิหารํ กโรนฺติ อเทสิตวตฺถุกํ สารมฺภํ อปริกฺกมนํ, อาปตฺติ สํฆาทิเสเสน ทฺวินฺนํ ทุกฺกฏานํ …เป… สารมฺภํ สปริกฺกมนํ, อาปตฺติ สํฆาทิเสเสน ทุกฺกฏสฺส …เป… อนารมฺภํ อปริกฺกมนํ, อาปตฺติ สํฆาทิเสเสน ทุกฺกฏสฺส …เป… อนารมฺภํ สปริกฺกมนํ, อาปตฺติ สํฆาทิเสสสฺส.
ภิกฺขุ สมาทิสติ— “วิหารํ เม กโรถา”ติ. ตสฺส วิหารํ กโรนฺติ เทสิตวตฺถุกํ สารมฺภํ อปริกฺกมนํ, อาปตฺติ ทฺวินฺนํ ทุกฺกฏานํ …เป… สารมฺภํ สปริกฺกมนํ, อาปตฺติ ทุกฺกฏสฺส …เป… อนารมฺภํ อปริกฺกมนํ, อาปตฺติ ทุกฺกฏสฺส …เป… อนารมฺภํ สปริกฺกมนํ, อนาปตฺติ.
ภิกฺขุ สมาทิสิตฺวา ปกฺกมติ— “วิหารํ เม กโรถา”ติ. น จ สมาทิสติ— “เทสิตวตฺถุโก จ โหตุ อนารมฺโภ จ สปริกฺกมโน จา”ติ. ตสฺส วิหารํ กโรนฺติ อเทสิตวตฺถุกํ สารมฺภํ อปริกฺกมนํ, อาปตฺติ สํฆาทิเสเสน ทฺวินฺนํ ทุกฺกฏานํ …เป… สารมฺภํ สปริกฺกมนํ, อาปตฺติ สํฆาทิเสเสน ทุกฺกฏสฺส …เป… อนารมฺภํ อปริกฺกมนํ, อาปตฺติ สํฆาทิเสเสน ทุกฺกฏสฺส …เป… อนารมฺภํ สปริกฺกมนํ, อาปตฺติ สํฆาทิเสสสฺส.
ภิกฺขุ สมาทิสิตฺวา ปกฺกมติ— “วิหารํ เม กโรถา”ติ. น จ สมาทิสติ— “เทสิตวตฺถุโก จ โหตุ อนารมฺโภ จ สปริกฺกมโน จา”ติ. ตสฺส วิหารํ กโรนฺติ เทสิตวตฺถุกํ สารมฺภํ อปริกฺกมนํ, อาปตฺติ ทฺวินฺนํ ทุกฺกฏานํ …เป… สารมฺภํ สปริกฺกมนํ, อาปตฺติ ทุกฺกฏสฺส …เป… อนารมฺภํ อปริกฺกมนํ, อาปตฺติ ทุกฺกฏสฺส …เป… อนารมฺภํ สปริกฺกมนํ, อนาปตฺติ.
ภิกฺขุ สมาทิสิตฺวา ปกฺกมติ— “วิหารํ เม กโรถา”ติ. สมาทิสติ จ— “เทสิตวตฺถุโก จ โหตุ อนารมฺโภ จ สปริกฺกมโน จา”ติ. ตสฺส วิหารํ กโรนฺติ อเทสิตวตฺถุกํ สารมฺภํ อปริกฺกมนํ. โส สุณาติ— “วิหาโร กิร เม กยิรติ อเทสิตวตฺถุโก สารมฺโภ อปริกฺกมโน”ติ. เตน ภิกฺขุนา สามํ วา คนฺตพฺพํ ทูโต วา ปาเหตพฺโพ— “เทสิตวตฺถุโก จ โหตุ อนารมฺโภ จ สปริกฺกมโน จา”ติ …เป… “เทสิตวตฺถุโก จ โหตุ อนารมฺโภ จา”ติ …เป… “เทสิตวตฺถุโก จ โหตุ สปริกฺกมโน จา”ติ …เป… “เทสิตวตฺถุโก โหตู”ติ. โน เจ สามํ วา คจฺเฉยฺย ทูตํ วา ปหิเณยฺย, อาปตฺติ ทุกฺกฏสฺส.
ภิกฺขุ สมาทิสิตฺวา ปกฺกมติ— “วิหารํ เม กโรถา”ติ. สมาทิสติ จ— “เทสิตวตฺถุโก จ โหตุ อนารมฺโภ จ สปริกฺกมโน จา”ติ. ตสฺส วิหารํ กโรนฺติ เทสิตวตฺถุกํ สารมฺภํ อปริกฺกมนํ. โส สุณาติ— “วิหาโร กิร เม กยิรติ เทสิตวตฺถุโก สารมฺโภ อปริกฺกมโน”ติ. เตน ภิกฺขุนา สามํ วา คนฺตพฺพํ ทูโต วา ปาเหตพฺโพ— “อนารมฺโภ จ โหตุ สปริกฺกมโน จา”ติ …เป… “อนารมฺโภ โหตู”ติ. “สปริกฺกมโน โหตู”ติ, อนาปตฺติ.
ภิกฺขุ สมาทิสิตฺวา ปกฺกมติ— “วิหารํ เม กโรถา”ติ. สมาทิสติ จ— “เทสิตวตฺถุโก จ โหตุ อนารมฺโภ จ สปริกฺกมโน จา”ติ. ตสฺส วิหารํ กโรนฺติ อเทสิตวตฺถุกํ สารมฺภํ อปริกฺกมนํ, อาปตฺติ การุกานํ ติณฺณํ ทุกฺกฏานํ …เป… สารมฺภํ สปริกฺกมนํ, อาปตฺติ การุกานํ ทฺวินฺนํ ทุกฺกฏานํ …เป… อนารมฺภํ อปริกฺกมนํ, อาปตฺติ การุกานํ ทฺวินฺนํ ทุกฺกฏานํ …เป… อนารมฺภํ สปริกฺกมนํ, อาปตฺติ การุกานํ ทุกฺกฏสฺส.
ภิกฺขุ สมาทิสิตฺวา ปกฺกมติ— “วิหารํ เม กโรถา”ติ. สมาทิสติ จ— “เทสิตวตฺถุโก จ โหตุ อนารมฺโภ จ สปริกฺกมโน จา”ติ. ตสฺส วิหารํ กโรนฺติ เทสิตวตฺถุกํ สารมฺภํ อปริกฺกมนํ, อาปตฺติ การุกานํ ทฺวินฺนํ ทุกฺกฏานํ …เป… สารมฺภํ สปริกฺกมนํ, อาปตฺติ การุกานํ ทุกฺกฏสฺส …เป… อนารมฺภํ อปริกฺกมนํ, อาปตฺติ การุกานํ ทุกฺกฏสฺส …เป… อนารมฺภํ สปริกฺกมนํ, อนาปตฺติ.
ภิกฺขุ สมาทิสิตฺวา ปกฺกมติ— “วิหารํ เม กโรถา”ติ. ตสฺส วิหารํ กโรนฺติ อเทสิตวตฺถุกํ สารมฺภํ อปริกฺกมนํ. โส เจ วิปฺปกเต อาคจฺฉติ, เตน ภิกฺขุนา โส วิหาโร อญฺญสฺส วา ทาตพฺโพ ภินฺทิตฺวา วา ปุน กาตพฺโพ. โน เจ อญฺญสฺส วา ทเทยฺย ภินฺทิตฺวา วา ปุน กาเรยฺย, อาปตฺติ สํฆาทิเสเสน ทฺวินฺนํ ทุกฺกฏานํ …เป… สารมฺภํ สปริกฺกมนํ, อาปตฺติ สํฆาทิเสเสน ทุกฺกฏสฺส …เป… อนารมฺภํ อปริกฺกมนํ, อาปตฺติ สํฆาทิเสเสน ทุกฺกฏสฺส …เป… อนารมฺภํ สปริกฺกมนํ, อาปตฺติ สํฆาทิเสสสฺส.
ภิกฺขุ สมาทิสิตฺวา ปกฺกมติ— “วิหารํ เม กโรถา”ติ. ตสฺส วิหารํ กโรนฺติ เทสิตวตฺถุกํ สารมฺภํ อปริกฺกมนํ. โส เจ วิปฺปกเต อาคจฺฉติ, เตน ภิกฺขุนา โส วิหาโร อญฺญสฺส วา ทาตพฺโพ ภินฺทิตฺวา วา ปุน กาตพฺโพ. โน เจ อญฺญสฺส วา ทเทยฺย ภินฺทิตฺวา วา ปุน กาเรยฺย, อาปตฺติ ทฺวินฺนํ ทุกฺกฏานํ …เป… สารมฺภํ สปริกฺกมนํ, อาปตฺติ ทุกฺกฏสฺส …เป… อนารมฺภํ อปริกฺกมนํ, อาปตฺติ ทุกฺกฏสฺส …เป… อนารมฺภํ สปริกฺกมนํ, อนาปตฺติ.
อตฺตนา วิปฺปกตํ อตฺตนา ปริโยสาเปติ, อาปตฺติ สํฆาทิเสสสฺส.
อตฺตนา วิปฺปกตํ ปเรหิ ปริโยสาเปติ, อาปตฺติ สํฆาทิเสสสฺส.
ปเรหิ วิปฺปกตํ อตฺตนา ปริโยสาเปติ, อาปตฺติ สํฆาทิเสสสฺส.
ปเรหิ วิปฺปกตํ ปเรหิ ปริโยสาเปติ, อาปตฺติ สํฆาทิเสสสฺส.
อนาปตฺติ— เลเณ คุหาย ติณกุฏิกาย อญฺญสฺสตฺถาย วาสาคารํ ฐเปตฺวา สพฺพตฺถ. อนาปตฺติ อุมฺมตฺตกสฺส, อาทิกมฺมิกสฺสาติ.
วิหารการสิกฺขาปทํ นิฏฺฐิตํ สตฺตมํ.