10.1 สตฺตนคเรสุปญฺญตฺตสิกฺขาปท
“เอกํสํ จีวรํ กตฺวา,
ปคฺคณฺหิตฺวาน อญฺชลิํ;
อาสีสมานรูโปว,
กิสฺส ตฺวํ อิธ มาคโต”.
“ทฺวีสุ วินเยสุ เย ปญฺญตฺตา,
อุทฺเทสํ อาคจฺฉนฺติ อุโปสเถสุ;_
กติ เต สิกฺขาปทา โหนฺติ,
กติสุ นคเรสุ ปญฺญตฺตา”.
“ภทฺทโก เต อุมฺมงฺโค,
โยนิโส ปริปุจฺฉสิ;
ตคฺฆ เต อหมกฺขิสฺสํ,
ยถาสิ กุสโล ตถา”.
“ทฺวีสุ วินเยสุ เย ปญฺญตฺตา,
อุทฺเทสํ อาคจฺฉนฺติ อุโปสเถสุ;_
อฑฺฒุฑฺฒสตานิ เต โหนฺติ,
สตฺตสุ นคเรสุ ปญฺญตฺตา”.
“กตเมสุ สตฺตสุ นคเรสุ ปญฺญตฺตา,
อิงฺฆ เม ตฺวํ พฺยากร นํ;_
ตํ วจนปถํ นิสามยิตฺวา,
ปฏิปชฺเชม หิตาย โน สิยา”.
“เวสาลิยํ ราชคเห,
สาวตฺถิยญฺจ อาฬวิยํ;
โกสมฺพิยญฺจ สกฺเกสุ,
ภคฺเคสุ เจว ปญฺญตฺตา”.
“กติ เวสาลิยํ ปญฺญตฺตา,
กติ ราชคเห กตา;
สาวตฺถิยํ กติ โหนฺติ,
กติ อาฬวิยํ กตา”.
“กติ โกสมฺพิยํ ปญฺญตฺตา,
กติ สกฺเกสุ วุจฺจนฺติ;
กติ ภคฺเคสุ ปญฺญตฺตา,
ตํ เม อกฺขาหิ ปุจฺฉิโต”.
“ทส เวสาลิยํ ปญฺญตฺตา,
เอกวีส ราชคเห กตา;
ฉอูน ตีณิสตานิ,
สพฺเพ สาวตฺถิยํ กตา.
ฉ อาฬวิยํ ปญฺญตฺตา,
อฏฺฐ โกสมฺพิยํ กตา;
อฏฺฐ สกฺเกสุ วุจฺจนฺติ,
ตโย ภคฺเคสุ ปญฺญตฺตา.
เย เวสาลิยํ ปญฺญตฺตา,
เต สุโณหิ ยถาตถํ;
เมถุนวิคฺคหุตฺตริ,
อติเรกญฺจ กาฬกํ.
ภูตํ ปรมฺปรภตฺตํ,
ทนฺตโปเนน อเจลโก;
ภิกฺขุนีสุ จ อกฺโกโส,
ทเสเต เวสาลิยํ กตา.
เย ราชคเห ปญฺญตฺตา,
เต สุโณหิ ยถาตถํ;
อทินฺนาทานํ ราชคเห,
ทฺเว อนุทฺธํสนา ทฺเวปิ จ เภทา.
อนฺตรวาสกํ รูปิยํ สุตฺตํ,
อุชฺฌาปเนน จ ปาจิตปิณฺฑํ;_
คณโภชนํ วิกาเล จ,
จาริตฺตํ นหานํ อูนวีสติ.
จีวรํ ทตฺวา โวสาสนฺติ,
เอเต ราชคเห กตา;
คิรคฺคจริยา ตตฺเถว,
ฉนฺททาเนน เอกวีสติ.
เย สาวตฺถิยํ ปญฺญตฺตา,
เต สุโณหิ ยถาตถํ;
ปาราชิกานิ จตฺตาริ,
สํฆาทิเสสา ภวนฺติ โสฬส.
อนิยตา จ ทฺเว โหนฺติ,
นิสฺสคฺคิยา จตุวีสติ;
ฉปญฺญาสสตญฺเจว,
ขุทฺทกานิ ปวุจฺจนฺติ.
ทสเยว จ คารยฺหา,
ทฺเวสตฺตติ จ เสขิยา;
ฉอูน ตีณิสตานิ,
สพฺเพ สาวตฺถิยํ กตา.
เย อาฬวิยํ ปญฺญตฺตา,
เต สุโณหิ ยถาตถํ;
กุฏิโกสิยเสยฺยา จ,
ขณเน คจฺฉ เทวเต;
สปฺปาณกญฺจ สิญฺจนฺติ,
ฉ เอเต อาฬวิยํ กตา.
เย โกสมฺพิยํ ปญฺญตฺตา,
เต สุโณหิ ยถาตถํ;
มหาวิหาโร โทวจสฺสํ,
อญฺญํ ทฺวารํ สุราย จ;
อนาทริยํ สหธมฺโม,
ปโยปาเนน อฏฺฐมํ.
เย สกฺเกสุ ปญฺญตฺตา,
เต สุโณหิ ยถาตถํ;
เอฬกโลมานิ ปตฺโต จ,
โอวาโท เจว เภสชฺชํ.
สูจิ อารญฺญิโก เจว,
อฏฺเฐเต กาปิลวตฺถเว;
อุทกสุทฺธิยา โอวาโท,_
ภิกฺขุนีสุ ปวุจฺจนฺติ.
เย ภคฺเคสุ ปญฺญตฺตา,
เต สุโณหิ ยถาตถํ;
สมาทหิตฺวา วิสิพฺเพนฺติ,
สามิเสน สสิตฺถกํ.
ปาราชิกานิ จตฺตาริ,
สํฆาทิเสสานิ ภวนฺติ;
สตฺต จ นิสฺสคฺคิยานิ,
อฏฺฐ ทฺวตฺติํส ขุทฺทกา.
ทฺเว คารยฺหา ตโย เสกฺขา,
ฉปฺปญฺญาส สิกฺขาปทา;
ฉสุ นคเรสุ ปญฺญตฺตา,
พุทฺเธนาทิจฺจพนฺธุนา.
ฉอูน ตีณิสตานิ,
สพฺเพ สาวตฺถิยํ กตา;
การุณิเกน พุทฺเธน,
โคตเมน ยสสฺสินา”.