10.2 จตุวิปตฺติ
“ยํ ตํ ปุจฺฉิมฺห อกิตฺตยิ โน,
ตํ ตํ พฺยากตํ อนญฺญถา;
อญฺญํ ตํ ปุจฺฉามิ ตทิงฺฆ พฺรูหิ,
ครุก ลหุกญฺจาปิ สาวเสสํ;
อนวเสสํ ทุฏฺฐุลฺลญฺจ อทุฏฺฐุลฺลํ,
เย จ ยาวตติยกา.
สาธารณํ อสาธารณํ,
วิภตฺติโย จ เยหิ สมเถหิ สมฺมนฺติ;
สพฺพานิเปตานิ วิยากโรหิ,
หนฺท วากฺยํ สุโณม เต”.
“เอกติํสา เย ครุกา,
อฏฺเฐตฺถ อนวเสสา;
เย ครุกา เต ทุฏฺฐุลฺลา,
เย ทุฏฺฐุลฺลา สา สีลวิปตฺติ;
ปาราชิกํ สํฆาทิเสโส,
‘สีลวิปตฺตี’ติ วุจฺจติ.
ถุลฺลจฺจยํ ปาจิตฺติยา,
ปาฏิเทสนียํ ทุกฺกฏํ;
ทุพฺภาสิตํ โย จายํ,
อกฺโกสติ หสาธิปฺปาโย;
อยํ สา อาจารวิปตฺติสมฺมตา.
วิปรีตทิฏฺฐิํ คณฺหนฺติ,
อสทฺธมฺเมหิ ปุรกฺขตา;
อพฺภาจิกฺขนฺติ สมฺพุทฺธํ,
ทุปฺปญฺญา โมหปารุตา;
อยํ สา ทิฏฺฐิวิปตฺติสมฺมตา.
อาชีวเหตุ อาชีวการณา ปาปิจฺโฉ อิจฺฉาปกโต อสนฺตํ อภูตํ อุตฺตริมนุสฺสธมฺมํ อุลฺลปติ, อาชีวเหตุ อาชีวการณา สญฺจริตฺตํ สมาปชฺชติ, อาชีวเหตุ อาชีวการณา— ‘โย เต วิหาเร วสติ, โส ภิกฺขุ อรหา’ติ ภณติ, อาชีวเหตุ อาชีวการณา ภิกฺขุ ปณีตโภชนานิ อตฺตโน อตฺถาย วิญฺญาเปตฺวา ภุญฺชติ, อาชีวเหตุ อาชีวการณา ภิกฺขุนี ปณีตโภชนานิ อตฺตโน อตฺถาย วิญฺญาเปตฺวา ภุญฺชติ, อาชีวเหตุ อาชีวการณา สูปํ วา โอทนํ วา อคิลาโน อตฺตโน อตฺถาย วิญฺญาเปตฺวา ภุญฺชติ. อยํ สา อาชีววิปตฺติ สมฺมตา.
เอกาทส ยาวตติยกา,
เต สุโณหิ ยถาตถํ;
อุกฺขิตฺตานุวตฺติกา,_
อฏฺฐ ยาวตติยกา;
อริฏฺโฐ จณฺฑกาฬี จ,
อิเม เต ยาวตติยกา”._