10.4 อสาธารณาทิ
“วีสํ ทฺเว สตานิ,
ภิกฺขูนํ สิกฺขาปทานิ;
อุทฺเทสํ อาคจฺฉนฺติ อุโปสเถสุ,_
ตีณิ สตานิ จตฺตาริ;
ภิกฺขุนีนํ สิกฺขาปทานิ,
อุทฺเทสํ อาคจฺฉนฺติ อุโปสเถสุ._
ฉจตฺตารีสา ภิกฺขูนํ,
ภิกฺขุนีหิ อสาธารณา;
สตํ ติํสา จ ภิกฺขุนีนํ,
ภิกฺขูหิ อสาธารณา.
สตํ สตฺตติ ฉจฺเจว,
อุภินฺนํ อสาธารณา;_
สตํ สตฺตติ จตฺตาริ,
อุภินฺนํ สมสิกฺขตา._
วีสํ ทฺเว สตานิ,
ภิกฺขูนํ สิกฺขาปทานิ;
อุทฺเทสํ อาคจฺฉนฺติ อุโปสเถสุ,_
เต สุโณหิ ยถาตถํ.
ปาราชิกานิ จตฺตาริ,
สํฆาทิเสสานิ ภวนฺติ เตรส;
อนิยตา ทฺเว โหนฺติ.
นิสฺสคฺคิยานิ ติํเสว,
ทฺเวนวุติ จ ขุทฺทกา;
จตฺตาโร ปาฏิเทสนียา,
ปญฺจสตฺตติ เสขิยา.
วีสํ ทฺเว สตานิ จิเม โหนฺติ,
ภิกฺขูนํ สิกฺขาปทานิ;
อุทฺเทสํ อาคจฺฉนฺติ อุโปสเถสุ._
ตีณิ สตานิ จตฺตาริ,
ภิกฺขุนีนํ สิกฺขาปทานิ;
อุทฺเทสํ อาคจฺฉนฺติ อุโปสเถสุ,_
เต สุโณหิ ยถาตถํ.
ปาราชิกานิ อฏฺฐ,
สํฆาทิเสสานิ ภวนฺติ สตฺตรส;
นิสฺสคฺคิยานิ ติํเสว,
สตํ สฏฺฐิ ฉ เจว;
ขุทฺทกานิ ปวุจฺจนฺติ.
อฏฺฐ ปาฏิเทสนียา,
ปญฺจสตฺตติ เสขิยา;
ตีณิ สตานิ จตฺตาริ จิเม โหนฺติ,
ภิกฺขุนีนํ สิกฺขาปทานิ;
อุทฺเทสํ อาคจฺฉนฺติ อุโปสเถสุ._
ฉจตฺตารีสา ภิกฺขูนํ,
ภิกฺขุนีหิ อสาธารณา;
เต สุโณหิ ยถาตถํ.
ฉ สํฆาทิเสสา,
ทฺเว อนิยเตหิ อฏฺฐ;
นิสฺสคฺคิยานิ ทฺวาทส,
เตหิ เต โหนฺติ วีสติ.
ทฺเววีสติ ขุทฺทกา,
จตุโร ปาฏิเทสนียา;
ฉจตฺตารีสา จิเม โหนฺติ,
ภิกฺขูนํ ภิกฺขุนีหิ อสาธารณา.
สตํ ติํสา จ ภิกฺขุนีนํ,
ภิกฺขูหิ อสาธารณา;
เต สุโณหิ ยถาตถํ.
ปาราชิกานิ จตฺตาริ,
สํฆมฺหา ทส นิสฺสเร;
นิสฺสคฺคิยานิ ทฺวาทส,
ฉนฺนวุติ จ ขุทฺทกา;
อฏฺฐ ปาฏิเทสนียา.
สตํ ติํสา จิเม โหนฺติ,
ภิกฺขุนีนํ ภิกฺขูหิ อสาธารณา;
สตํ สตฺตติ ฉจฺเจว,
อุภินฺนํ อสาธารณา;_
เต สุโณหิ ยถาตถํ.
ปาราชิกานิ จตฺตาริ,
สํฆาทิเสสานิ ภวนฺติ โสฬส;
อนิยตา ทฺเว โหนฺติ,
นิสฺสคฺคิยานิ จตุวีสติ;
สตํ อฏฺฐารสา เจว,
ขุทฺทกานิ ปวุจฺจนฺติ;
ทฺวาทส ปาฏิเทสนียา.
สตํ สตฺตติ ฉจฺเจวิเม โหนฺติ,
อุภินฺนํ อสาธารณา;_
สตํ สตฺตติ จตฺตาริ,
อุภินฺนํ สมสิกฺขตา;_
เต สุโณหิ ยถาตถํ.
ปาราชิกานิ จตฺตาริ,
สํฆาทิเสสานิ ภวนฺติ สตฺต;
นิสฺสคฺคิยานิ อฏฺฐารส,
สมสตฺตติ ขุทฺทกา;
ปญฺจสตฺตติ เสขิยานิ.
สตํ สตฺตติ จตฺตาริ จิเม โหนฺติ,
อุภินฺนํ สมสิกฺขตา;_
อฏฺเฐว ปาราชิกา เย ทุราสทา,
ตาลวตฺถุสมูปมา.
ปณฺฑุปลาโส ปุถุสิลา,
สีสจฺฉินฺโนว โส นโร;
ตาโลว มตฺถกจฺฉินฺโน,
อวิรุฬฺหี ภวนฺติ เต.
เตวีสติ สํฆาทิเสสา,
ทฺเว อนิยตา;
ทฺเว จตฺตารีส นิสฺสคฺคิยา,
อฏฺฐาสีติสตํ ปาจิตฺติยา;
ทฺวาทส ปาฏิเทสนียา.
ปญฺจสตฺตติ เสขิยา,
ตีหิ สมเถหิ สมฺมนฺติ;
สมฺมุขา จ ปฏิญฺญาย,
ติณวตฺถารเกน จ.
ทฺเว อุโปสถา ทฺเว ปวารณา,
จตฺตาริ กมฺมานิ ชิเนน เทสิตา;
ปญฺเจว อุทฺเทสา จตุโร ภวนฺติ,
อนญฺญถา อาปตฺติกฺขนฺธา จ ภวนฺติ สตฺต.
อธิกรณานิ จตฺตาริ,
สตฺตหิ สมเถหิ สมฺมนฺติ;
ทฺวีหิ จตูหิ ตีหิ,
กิจฺจํ เอเกน สมฺมติ”.