10.5 ปาราชิกาทิอาปตฺติ
“ปาราชิกนฺ”ติ ยํ วุตฺตํ,
ตํ สุโณหิ ยถาตถํ;
จุโต ปรทฺโธ ภฏฺโฐ จ,
สทฺธมฺมา หิ นิรงฺกโต;
สํวาโสปิ ตหิํ นตฺถิ,
เตเนตํ อิติ วุจฺจติ.
“สํฆาทิเสโส”ติ ยํ วุตฺตํ,
ตํ สุโณหิ ยถาตถํ;
สํโฆว เทติ ปริวาสํ,
มูลาย ปฏิกสฺสติ;
มานตฺตํ เทติ อพฺเภติ,
เตเนตํ อิติ วุจฺจติ.
“อนิยโต”ติ ยํ วุตฺตํ,
ตํ สุโณหิ ยถาตถํ;
อนิยโต น นิยโต,
อเนกํสิกตํ ปทํ;
ติณฺณมญฺญตรํ ฐานํ,
“อนิยโต”ติ ปวุจฺจติ.
“ถุลฺลจฺจยนฺ”ติ ยํ วุตฺตํ,
ตํ สุโณหิ ยถาตถํ;
เอกสฺส มูเล โย เทเสติ,
โย จ ตํ ปฏิคณฺหติ;
อจฺจโย เตน สโม นตฺถิ,
เตเนตํ อิติ วุจฺจติ.
“นิสฺสคฺคิยนฺ”ติ ยํ วุตฺตํ,
ตํ สุโณหิ ยถาตถํ;
สํฆมชฺเฌ คณมชฺเฌ,
เอกเสฺสว จ เอกโต;
นิสฺสชฺชิตฺวาน เทเสติ,
เตเนตํ อิติ วุจฺจติ.
“ปาจิตฺติยนฺ”ติ ยํ วุตฺตํ,
ตํ สุโณหิ ยถาตถํ;
ปาเตติ กุสลํ ธมฺมํ,
อริยมคฺคํ อปรชฺฌติ;
จิตฺตสมฺโมหนฏฺฐานํ,
เตเนตํ อิติ วุจฺจติ.
“ปาฏิเทสนียนฺ”ติ ยํ วุตฺตํ,
ตํ สุโณหิ ยถาตถํ;
ภิกฺขุ อญฺญาตโก สนฺโต,
กิจฺฉา ลทฺธาย โภชนํ;
สามํ คเหตฺวา ภุญฺเชยฺย,
“คารยฺหนฺ”ติ ปวุจฺจติ.
นิมนฺตนาสุ ภุญฺชนฺตา ฉนฺทาย,
โวสาสติ ตตฺถ ภิกฺขุนิํ;
อนิวาเรตฺวา ตหิํ ภุญฺเช,
“คารยฺหนฺ”ติ ปวุจฺจติ.
สทฺธาจิตฺตํ กุลํ คนฺตฺวา,
อปฺปโภคํ อนาฬิยํ;
อคิลาโน ตหิํ ภุญฺเช,
“คารยฺหนฺ”ติ ปวุจฺจติ.
โย เจ อรญฺเญ วิหรนฺโต,
สาสงฺเก สภยานเก;
อวิทิตํ ตหิํ ภุญฺเช,
“คารยฺหนฺ”ติ ปวุจฺจติ.
ภิกฺขุนี อญฺญาติกา สนฺตา,
ยํ ปเรสํ มมายิตํ;
สปฺปิ เตลํ มธุํ ผาณิตํ,
มจฺฉมํสํ อโถ ขีรํ;
ทธิํ สยํ วิญฺญาเปยฺย ภิกฺขุนี,
คารยฺหปตฺตา สุคตสฺส สาสเน.
“ทุกฺกฏนฺ”ติ ยํ วุตฺตํ,
ตํ สุโณหิ ยถาตถํ;
อปรทฺธํ วิรทฺธญฺจ,
ขลิตํ ยญฺจ ทุกฺกฏํ.
ยํ มนุโสฺส กเร ปาปํ,
อาวิ วา ยทิ วา รโห;
“ทุกฺกฏนฺ”ติ ปเวเทนฺติ,
เตเนตํ อิติ วุจฺจติ.
“ทุพฺภาสิตนฺ”ติ ยํ วุตฺตํ,
ตํ สุโณหิ ยถาตถํ;
ทุพฺภาสิตํ ทุราภฏฺฐํ,
สํกิลิฏฺฐญฺจ ยํ ปทํ;
ยญฺจ วิญฺญู ครหนฺติ,
เตเนตํ อิติ วุจฺจติ.
“เสขิยนฺ”ติ ยํ วุตฺตํ,
ตํ สุโณหิ ยถาตถํ;
เสกฺขสฺส สิกฺขมานสฺส,
อุชุมคฺคานุสาริโน._
อาทิ เจตํ จรณญฺจ,
มุขํ สญฺญมสํวโร;
สิกฺขา เอตาทิสี นตฺถิ,
เตเนตํ อิติ วุจฺจติ.
ฉนฺนมติวสฺสติ,
วิวฏํ นาติวสฺสติ;
ตสฺมา ฉนฺนํ วิวเรถ,
เอวํ ตํ นาติวสฺสติ.
คติ มิคานํ ปวนํ,
อากาโส ปกฺขินํ คติ;
วิภโว คติ ธมฺมานํ,
นิพฺพานํ อรหโต คตีติ.
คาถาสงฺคณิกํ นิฏฺฐิตํ.
ตสฺสุทฺทานํ
สตฺตนคเรสุ ปญฺญตฺตา,
วิปตฺติ จตุโรปิ จ;
ภิกฺขูนํ ภิกฺขุนีนญฺจ,
สาธารณา อสาธารณา;
สาสนํ อนุคฺคหาย,
คาถาสงฺคณิกํ อิทนฺติ.
คาถาสงฺคณิกํ นิฏฺฐิตํ.